Levitɛnɔ 15 - WE NU GALE 1995

Mbula ngɔ zɛlɛ kɛ wi wili ba tɛ wuko

¹ NWA tɔ̃a hã Mɔizɛ do Aroni na,

² wa e mbulanɔ gɛ hã obe Israɛlɛ na: “Fala kɛ wi wili ba zɛlɛ tɛ wuko, hã zu ga a si do ma, nɛ ma ma si tɛ̃ a ni, ma dɛ sɛ na, a hɔ wi ndi li Gale.

³ Nɛ zɛlɛ ni wia do dɛ na, nu ga wi ni si do ma, tabi ma kpe li holo ga a. Gɛnɛ kɔ nu ga a si si, tabi ma kpe kpia, nɛ nde a hɔa wi ndi li Gale ia.

⁴ Nɛ mɔ kɛ a ɔa ngɔ nɛ, tabi mɔ kɛ a dungu ngɔ nɛ ni, ma hɔa mɔ ndi li Gale.

⁵ Wi kɛ a 'be tɛ mɔ ɔi olo wi zɛlɛ ni, nɛ ma wia na, a fɔlɔ tulu tɛ̃ a, nɛ a fɔlɔ 'bɔ tɛ̃ a. Nɛ nde a 'bana sɛ wi ndi gbaa we hɔ gɛ̃a wese.

⁶ Wi kɛ a dungu ngɔ mɛ olo wi zɛlɛ ni, nɛ ma wia na, a fɔlɔ tulu tɛ̃ a, nɛ a fɔlɔ 'bɔ tɛ̃ a. Nɛ nde a 'bana sɛ wi ndi gbaa we hɔ gɛ̃a wese.

⁷ Wi kɛ a 'be tɛ wi zɛlɛ ni, nɛ a fɔlɔ sɛ tulu tɛ̃ a, nɛ a fɔlɔ 'bɔ tɛ̃ a. Nɛ nde a 'bana sɛ wi ndi gbaa we hɔ gɛ̃a wese.

⁸ Fala kɛ wi zɛlɛ ni tufu sã nu a tɛ wi kɛ a ɔ sa li Gale ni, nɛ ma wia na, wi ni fɔlɔ tulu tɛ̃ a, nɛ a fɔlɔ 'bɔ tɛ̃ a. Nɛ nde a 'bana sɛ wi ndi gbaa we hɔ gɛ̃a wese.

⁹ Kɔ wi zɛlɛ ni, a nɛ gɛnɛ, nɛ mɔ dungunɔ vɛ̃ kɛ a dungu ngɔ nɛ li 'do sa'de we nɛ gɛnɛ ni, ma hɔ sɛ mɔ ndi li Gale.

¹⁰ Wele kɛ a 'be tɛ mɔ kɛ wi zɛlɛ dungu ngɔ nɛ ni, nɛ a hɔ sɛ wi ndi gbaa we hɔ gɛ̃a wese. Wele kɛ a ba tole mɛ kɛ wi zɛlɛ dungu ngɔ nɛ ni, nɛ ma wia na, a fɔlɔ tulu tɛ̃ a, nɛ a fɔlɔ 'bɔ tɛ̃ a. Nɛ nde a 'bana sɛ wi ndi gbaa we hɔ gɛ̃a wese.

¹¹ Fala kɛ wi zɛlɛ ni fɔ̀lɔ̀ kɔ̃ a dati gɔ, kɔ a 'be tɛ wele, nɛ ma wia na, wi ni a fɔlɔ tulu tɛ̃ a, nɛ a fɔlɔ 'bɔ tɛ̃ a. Nɛ nde a 'bana sɛ wi ndi gbaa we hɔ gɛ̃a wese.

¹² Fala kɛ wi zɛlɛ ni 'be tɛ kpana kɛ wa 'bua do gili ni, nɛ wa o sɛ ma do'do. Kɔ a 'be tɛ kpana kɛ wa sɛa do te ni, nɛ ma wia na, wa fɔlɔ ma do lì na ma sa.

¹³ “Fala kɛ wi zɛlɛ ni a kpasa do'do, nɛ ma wia na, a 'bɔ tũ sambo, nɛ a fɔlɔ tulu tɛ̃ a, nɛ a fɔlɔ 'bɔ tɛ̃ a do dia lì, sɛ nɛ a hɔ sɛ sa wi li Gale de.

¹⁴ Ma hɔ tɛ tũi kɛ ngbɛ'dɛ'dɛ, nɛ a kala ogbakulĩ bɔa, tabi opizɔ̃ bɔa, nɛ a nɛ do wa dɛ dati NWA tɛ nu tɔa Tande i, nɛ a kala wa hã nganga.

¹⁵ Nɛ nganga a hã sɛ mbee nɔɛ kpo do dɔnggamɔ we fo ku'da 'dã mɔ, nɛ a dɔ mbee nɛ we dɔnggɔ do NWA. Nɛ mɛ a dɛa ni, ma fɔlɔ sɛ wi ni olo zɛlɛ, nɛ a hɔ sa wi li Gale.

¹⁶ “Fala kɛ lì tɛ wele hɔ iko, nɛ ma wia na, a fɔlɔ tɛ̃ a vɛ̃. Nɛ nde a 'bana sɛ wi ndi gbaa we hɔ gɛ̃a wese.

¹⁷ Nɛ ma wia na, tulu, tabi ndala kɛ lì tɛ wi 'danga tɛ nɛ ni, wa fɔlɔ ma. Nɛ nde ma 'bana sɛ mɔ ndi li Gale gbaa we hɔ gɛ̃a wese.

¹⁸ “Fala kɛ wi wili do wuko wa ɔ do ngba wa, nɛ ma wia na, wa fɔlɔ tɛ wa bɔa nɛ. Nɛ nde wa 'bana sɛ owi ndi li Gale gbaa we hɔ gɛ̃a wese.

Mbula ngɔ wuko kɛ a zɔa zɛkɛ

¹⁹ “Fala kɛ wuko zɔ zɛkɛ, nɛ a hɔ sɛ wi ndi li Gale 'do tũ sambo. Nɛ wele kɛ a 'be tɛ̃ a, nɛ a hɔ sɛ wi ndi li Gale gbaa we hɔ gɛ̃a wese.

²⁰ Nɛ mɔ ɔi vɛ̃ kɛ a ɔ ngɔ nɛ, tabi mɔ kɛ a dungu ngɔ nɛ do 'da fala a zɔa zɛkɛ ni, ma hɔ sɛ mɔ ndi li Gale.

^21-23 Wele kɛ a 'be tɛ mɔ ɔi, tabi mɔ dungi 'da a, tabi mɔ kɛ ma dɛ ngɔ mɔ ɔi tabi mɔ dungi 'da a, nɛ wi ni a fɔlɔ sɛ tulu tɛ̃ a. Nɛ nde a 'bana sɛ wi ndi li Gale gbaa we hɔ gɛ̃a wese.

²⁴ Fala kɛ wele ɔ do wuko do 'da fala kɛ a zɔ zɛkɛ ni, nɛ a hɔ sɛ tɛ mɛ 'bɔ wi ndi li Gale 'do tũ sambo. Nɛ mɔ ɔinɔ vɛ̃ kɛ a ɔ ngɔ nɛ ni, ma hɔ sɛ mɔ ndi li Gale.

²⁵ “Fala kɛ tɔkɔ si nù tɛ wuko do 'do kɛ a zɔa zɛkɛ ia ni, tabi a zɔ zɛkɛ gbaa nɛ ma la li kɔ̃ tũ kɛ na, ma e do ma ni do'do, nɛ a 'bana sɛ fai do wi ndi li Gale, ɔ nɛ kɛ ma dɛ tɛ̃ ɛ 'da fala kɛ a zɔ zɛkɛ ni.

²⁶ Nɛ mɔ ɔinɔ vɛ̃ kɛ a ɔ ngɔ nɛ, tabi mɔ kɛ a dungu ngɔ nɛ ni, ma hɔ sɛ mɔ ndi li Gale, ɔ nɛ kɛ ma dɛ tɛ̃ ɛ 'da fala kɛ a zɔ zɛkɛ ni.

²⁷ Wele kɛ a 'be tɛ mɔ ɔi, tabi mɔ dungi ni, nɛ ma wia na, a fɔlɔ tulu tɛ̃ a, nɛ a fɔlɔ 'bɔ tɛ̃ a. Nɛ nde a 'bana sɛ wi ndi li Gale gbaa we hɔ gɛ̃a wese.

²⁸ Fala kɛ fua tɔkɛ ma gɔnɔ, nɛ wuke ni a 'bɔ sɛ 'do nɛ tũ sambo, sɛ nɛ a hɔ sɛ sa wi li Gale mbé nɛ de.

²⁹ Ma hɔ tɛ tũi kɛ ngbɛ'dɛ'dɛ, nɛ a kala sɛ ogbakulĩ bɔa, tabi opizɔ̃ bɔa, nɛ a nɛ do wa hã nganga dɛ nu tɔa Tande.

³⁰ Nɛ nganga a hã sɛ mbee nɔɛ kpo do dɔnggamɔ we fo ku'da 'dã mɔ, nɛ a dɔ mbee nɛ we dɔnggɔ do NWA. Nɛ mɛ a dɛa ni, ma fɔlɔ sɛ wuke ni olo fua tɔkɛ, nɛ a hɔ sa wi li Gale.

³¹ “Nɛ mbese sɛ obe Israɛlɛ na, fala kɛ wa hɔ wi ndi ia, nɛ wa nyɛ́lɛ́ do tɔa Tande. Wa dɛ sɛ na mɛ ni na, da dɛ kɔ wa fáká tɔa Tande mi ɔ kɔ nɛ dɛ gbogbo wa ni, kɔ wa fe gɔ.”

³² Ki ni a mbulanɔ ngɔ wi wili kɛ a ba zɛlɛ tɛ wuko, tabi lì tɛ̃ a hɔa iko, nɛ ma dɛ na, a hɔ wi ndi li Gale ni.

³³ Nɛ mɛ 'bɔ a mbula ngɔ wuko kɛ a zɔa zɛkɛ, do wi wili kɛ a ɔa do wuko do 'da fala kɛ a zɔa zɛkɛ ni.