Levitɛnɔ 14 - WE NU GALE 1995

Mbula ngɔ fɔlɔ wi olo zɛlɛ ngbɛlɛ

¹ NWA tumba Mɔizɛ na,

² a e mbulanɔ gɛ hã obe Israɛlɛ ngo fɔlɔ wi ngbɛlɛ. Mbulanɔ ni ma kɛ: “'Da fala wele kpasa tɛ zɛlɛ ngbɛlɛ ma ba zi a ni, nɛ wa nɛ do a we be a hã nganga olo zɛlɛ ni.

³ Nɛ nganga a hɔ sɛ dɛ 'do ngbo ɔi i we kpa wi zɛlɛ ni, takɔ a zɔ a. Ko fala kɛ wi ni kpasa tɛ zɛlɛ ngbɛlɛ kpaa nde,

⁴ nɛ nganga a ba sɛ nu a na, wa tɛ do tunu li onɔɛ bɔa, kɛ wa ɔ sa li Gale ni, mba do te sɛdrɛ, do fila sala bata, do te nyama.

⁵ 'Do nɛ, nɛ a ba sɛ 'bɔ nu a na, wa 'bili gɛlɛ mbe kpo nɔɛ ni dɛ ngɔ kpana kɛ wa 'bua do gili, nɛ wa sua dia lì dɛ lo nɛ ni.

⁶ Nɛ nganga a ba sɛ mbee tunu li nɔɛ ni, mba do te sɛdrɛ, do fila sala bata, do te nyama, nɛ a yulu ma dɛ 'dɔ tɔkɔ nɔɛ kɛ wa 'bili gɛlɛ a dɛ ngo lì ni,

⁷ nɛ a kpã ma dɛ tɛ wi kɛ a kpasa olo zɛlɛ ngbɛlɛ ni fala sambo. Nɛ a tɔ̃ sɛ hã wi ni na, a hɔa sa wi li Gale, 'Do nɛ, nɛ a da sɛ kɔ̃ a tɛ nɔɛ kɛ a 'bana do tunu li a ni, nɛ a bũlũ, nɛ a le zamɔ.

⁸ Nɛ wi ni a fɔlɔ sɛ tulu tɛ̃ a, nɛ a kɛlɛ sala tɛ̃ a vɛ̃, nɛ a fɔlɔ tɛ̃ a, takɔ a hɔ sa wi li Gale. 'Do nɛ, nɛ a kpolo sɛ tɛ̃ a dɛ kɔ ngbo ɔi i. Nɛ nde a 'bana sɛ dɛ 'do nu tɔa tande 'da a dɛ nza gɛ we tũ sambo.

⁹ Ma hɔ tɛ tũi kɛ sambo, nɛ a kɛlɛ sɛ 'bɔ zu a, do nzɛlɛ a, do sala ngɔ li a, do gele tala salanɔ tɛ̃ a ni vɛ̃. Nɛ a fɔlɔ tulu tɛ̃ a, nɛ a fɔlɔ 'bɔ tɛ̃ a, nɛ a hɔ sa wi li Gale.

¹⁰ “Ma hɔ kɔ̃ tũi kɛ ngbɛ'dɛ'dɛ, nɛ wi ni a tɛ sɛ do obe wili bata bɔa, do be naa bata kpo, kɛ wa do sabɛlɛ kpo kpo, nɛ fo kunda tɛ wa bina ni. Nɛ a tɛ 'bɔ do dɔnggamɔ fũ, kɛ wa zanga ma do nɔ ni we kilo kusi, do nɔ sãtilitrɛ 'bu nɛ mɔlɔ, nɛ a hã ma vɛ̃ hã nganga.

¹¹ Nɛ nganga wele kɛ a fɔlɔ wi ni, a e sɛ wi ni do dɔnggamɛnɔ 'da a vɛ̃ dati NWA, dɛ nu tɔa Tande kpa ngba wi do a ni.

¹² Nɛ a ba sɛ bata kpo, do dɔnggamɔ we gbɛlɛ ti nyanga wi olo zɛlɛ. Nɛ a ba 'bɔ sãtilitrɛ nɔɛ 'bu nɛ mɔlɔ ni, nɛ a yaka ma dati NWA, nɛ a hã ma hã a.

¹³ Nɛ nganga a 'bili sɛ gɛlɛ bata dɛ fala wa 'bili do gɛlɛ osa'de dɔnggamɔ we fo ku'da 'dã mɛnɔ, tabi dɔnggamɔ kɛ wa dɔ hã NWA ni. Fala ni ma santo, nɛ a 'bili sɛ gɛlɛ bata dɛ di ni, we kɛ sa'de kɛ wa gbɛ a we gbɛlɛ ti nyanga wi olo zɛlɛ ni, mɛ a dɔnggamɔ kɛ ma santo, ɔ nɛ dɔnggamɔ kɛ we fo ku'da 'dã mɛnɔ ni. Nɛ wele nɛ a mɔ́ nganga.

¹⁴ Nganga a kpɔ sɛ tɔkɔ sa'de ni, nɛ a kɔ tɛ zala wi ni si ngawili kɔ̃, do tɛ gba 'biti zu kɔ a do nyanga a kɛ si ngawili kɔ.

¹⁵ 'Do nɛ, nɛ nganga a ba sɛ nɔɛ, nɛ a tɛnɛ sĩ dɛ kɔ a wele nɛ, kɛ si ngɔ gale.

¹⁶ Nɛ a fi zu kɔ a si ngawili kɔ 'dɔ nɛ, nɛ a kpã ma dɛ dati NWA fala sambo.

¹⁷ Nɛ a kɔ tala nɔɛ 'bana ni sĩ tɛ zala wi ni si ngawili kɔ, do tɛ gba 'biti zu kɔ a do nyanga a kɛ si ngawili kɔ̃, tɛ falanɔ a kɔa sɔ do tɔkɔ bata ni.

¹⁸ Nɛ a tɛnɛ tala nɔɛ kɛ ma 'bana kɔ a ni dɛ zu wi ni. Nɛ mɛ a dɛa ni, ma fo 'dã mɛ zu wi ni.

¹⁹ Nganga a dɔ sɛ sa'de do dɔnggamɔ we fo ku'da 'dã mɔ. Nɛ mɛ a dɛa ni, ma fo sɛ ndi tɛ wi ni li NWA do'do. 'Do nɛ, nɛ a 'bili sɛ gɛlɛ sa'de kɛ a nɛ dɔ hã NWA ni.

²⁰ Nɛ a dɔ sɛ sa'de ni vɛ̃ mba do fũi dɛ ngɔ gbagala ni. Nɛ mɛ a dɛa ni ma fɔlɔ sɛ wi ni, nɛ a hɔ sa wi li NWA.

²¹ “Fala kɛ wi ni ɔ do wi sã, hã a do wala we kpa dɔnggamɛnɔ kɛ ma wia ni vɛ̃ bina, nɛ a ba sɛ bata kpo iko, nɛ a hã do dɔnggamɔ we gbɛlɛ ti nyanga a olo zɛlɛ. Nɛ nganga a be sɛ ma hã NWA, takɔ ma fɔlɔ wi ni na, a hɔ sa wi li NWA. Nɛ a tɛ 'bɔ do fũ kɛ wa zanga do nɔ ni we kilo talɛ iko, do nɔ sãtilitrɛ 'bu nɛ mɔlɔ.

²² Nɛ a kala 'bɔ ogbakulĩ bɔa, tabi pizɔ̃ bɔa, ɔ nɛ kɛ a wia we kpa ma ni. Nɛ mbe nɔɛ kpo sɛ we hã a do dɔnggamɔ fo ku'da 'dã mɔ, nɛ mbee nɛ we dɔ we dɔnggɔ do NWA.

²³ Ma hɔ tɛ tũi kɛ ngbɛ'dɛ'dɛ, nɛ wi ni a tɛ sɛ do mɛnɔ ni we hã ma hã nganga, dɛ nu tɔa Tande ni.

²⁴ “Nɛ nganga a ba sɛ bata ni do nɔɛ, nɛ a yaka ma dati NWA.

²⁵ A 'bili sɛ gɛlɛ bata, nɛ a kpɔ tɔkɔ tɛ̃ a, nɛ a kɔ tɛ zala wi ni si ngawili kɔ, do tɛ gba 'biti zu kɔ̃ a do nyanga a si ngawili kɔ̃.

²⁶ Nganga a tɛnɛ sɛ nɔɛ dɛ tambala kɔ̃ a wele nɛ kɛ si ngɔ gale,

²⁷ nɛ a fi zu kɔ̃ a si ngawili kɔ̃ gɛ 'dɔ nɛ, nɛ a kpã ma dati NWA fala sambo.

²⁸ 'Do nɛ, nɛ a kɔ ma sĩ tɛ zala wi ni si ngawili kɔ, do tɛ gba 'biti zu kɔ a do nyanga a si ngawili kɔ, tɛ falanɔ a dɛa sɔ do tɔkɔ bata ia ni.

²⁹ Nɛ a tɛnɛ tala nɔɛ 'bana kɔ a ni dɛ zu wi ni. Nɛ mɛ a dɛa ni, ma fɔlɔ sɛ wi ni, nɛ a hɔ sa wi li NWA.

³⁰ 'Do nɛ, nɛ nganga a ba sɛ mbee gbakulĩ tabi mbee pizɔ̃ɛ, ɔ nɛ kɛ wi ni a tɛa do ma ni,

³¹ nɛ a gbɛ a we dɔnggɔ do NWA, takɔ ma fo ku'da 'dã mɔ zu wi ni. Nɛ a dɔ sɛ tala nɔɛ, mba do mbee dɔnggamɔ fũi, we dɔnggɔ do NWA. Nɛ mɛ a dɛa ni, ma fɔlɔ sɛ wi ni, nɛ a hɔ sa wi li Gale.”

³² Ki ni a mbula ngɔ wi zɛlɛ ngbɛlɛ, kɛ a do wala we hã dɔnggamɔ kɛ ma wia vɛ̃ na, wa dɛ do mɔ fɔlɔ do a bina ni.

Mɛnɔ kɛ ma kutu, nɛ ma 'danga tɛ dɛlɛ tɔa

³³ NWA tumba Mɔizɛ do Aroni na, wa e mbula gɛ hã obe Israɛlɛ na:

³⁴ “'Da fala kɛ nɛ le sɛ ngɔ nù Kanana, kɛ mi hã sɛ ma hã nɛ do mɔ́ nɛ ni, nɛ nɛ dɛ sɛ mbulanɔ mi hã ma hã nɛ gɛ. Fala kɛ mi dɛ na, mɔ ma kutu tɛ dɛlɛ tɔa ngɔ nùi 'da nɛ hã ma 'danga tɛ nɛ,

³⁵ nɛ wele tɔa ni, a nɛ sɛ we tɔ̃ we nɛ hã nganga na, ɛ zɔa mɔ ma hɔa kɔ tɔa 'da ɛ, nɛ ma 'danga tɛ nɛ.

³⁶ Nɛ nganga a ba sɛ nu a na, wa kala mɛnɔ kɔ tɔa ni dɛ nza vɛ̃ dati kɛ na, a nɛ we zɔ mɛ ni ni. Na mɛ ni, nɛ mɔ kpo kɔ tɔa ni, ma hɔ́ sɛ mɔ ndi li Gale gɔ. 'Do nɛ, nɛ nganga a le sɛ kɔ tɔa ni we zɔ fala ma 'danga ni.

³⁷ Fala kɛ a zɔ mɛ ni, nɛ nde ma nyɔngɔ dɛlɛ tɔa, nɛ ma a fila, tabi ma ɔ nɛ tɔlɔ nwá, nɛ ma 'du dɛ zã dɛlɛ tɔa i,

³⁸ nɛ nganga a hɔ sɛ nza kɔ tɔa ni, nɛ a kpe nu ma 'do tũ sambo.

³⁹ Ma hɔ tɛ tũi kɛ sambo, nɛ nganga a tɛ sɛ 'bɔ we zɔ mɛ ni. Kɔ fala kɛ mɛ ni ma yɛ'bɛ tɛ dɛlɛ tɔa dɛ dati,

⁴⁰ nɛ a ba sɛ nu a na, wa fo tanɔ kɛ tɛ nɛ 'danga ni, nɛ wa da ma dɛ 'do ngbo le, tɛ fala kɛ ma a fala ndi li Gale ni.

⁴¹ 'Do nɛ, nɛ a gbɛlɛ sɛ nùnɔ wa ba tɛ dɛlɛ tɔa ni, nɛ wa holo, nɛ wa a ma dɛ 'do ngbo le, tɛ fala kɛ ma a fala ndi li Gale ni.

⁴² 'Do nɛ, nɛ wa kala sɛ ogele ta, nɛ wa kpolo do kɛnɔ dati ni. Nɛ wa tɛ sɛ do gele nù we lɔ tɛ dɛlɛ tɔa.

⁴³ Fala kɛ mɛ ma 'danga kɔ tɔa ni, ma hɔ 'bɔ mbé nɛ, do 'do kɛ wa fua tanɔ kɛ ma 'danga, do nùi kɛ wa lɔa do tɛ dɛlɛ ni,

⁴⁴ nɛ nganga a nɛ sɛ 'bɔ we zɔ ma. Fala kɛ mɛ ma 'danga ni ma be 'bɔ tɛ̃ ɛ, ní a mɛ ma kutu ni, ma wè tɛ e tɛ dɛlɛ tɔa gɔ. Nɛ tɔa ma hɔ sɛ mɔ ndi li Gale.

⁴⁵ Nɛ ma wia na, wa gbini ma, nɛ wa kala tanɔ tɛ nɛ ni, do tenɔ, do nùi wa lɔa do tɛ dɛlɛ ni vɛ̃, nɛ wa hɔ do ma dɛ 'do ngbo le, tɛ fala kɛ ma a fala ndi li Gale ni.

⁴⁶ Wele kɛ a le kɔ tɔa ni do 'da fala kɛ wa kpia nu nɛ ni, nɛ a hɔ sɛ wi ndi gbaa we hɔ gɛ̃a wese.

⁴⁷ Wele kɛ a ɔ kɔ tɔa ni, tabi a nyɔngɔ mɔ kɔ nɛ, nɛ a fɔlɔ sɛ tulu tɛ̃ a.

⁴⁸ “Fala kɛ nganga zɔ na, mɛ ma 'danga ni, ma bè 'bɔ tɛ̃ ɛ 'do kɛ wa lɔa do nùi tɛ dɛlɛ tɔa ni gɔ, nɛ a ti sɛ na, tɔa ni ma hɔa sa li Gale, we kɛ mɛ ma 'danga tɛ nɛ ni, ma ia ia.

⁴⁹ Nɛ nganga a kala sɛ onɔɛ bɔa do fila sala bata, do te nyama, we dɛ do mɔ fɔlɔ tɔa ni na, ma ɔ sa li Gale.

⁵⁰ Nɛ a 'bili sɛ gɛlɛ mbe kpo nɔɛ dɛ ngɔ kpana kɛ wa 'bua do gili, nɛ wa sua dia lì dɛ kɔ nɛ ni.

⁵¹ Nɛ a ba sɛ te sɛdrɛ, do te nyama, do fila sala sa'de, do mbee nɔɛ, nɛ a yulu ma 'dɔ tɔkɔ nɔɛ kɛ a 'bili gɛlɛ a ni, do 'do dia lì ni, nɛ a kpã ma tɛ tɔa fala sambo.

⁵² Na mɛ ni, nɛ a fo sɛ ndi tɛ tɔa ni, do wala 'da tɔkɔ nɔɛ, do dia lì, do tunu li nɔɛ, do te sɛdrɛ, do te nyama, do fila sala bata.

⁵³ 'Do nɛ, nɛ a da sɛ kɔ̃ a tɛ nɔɛ kɛ a 'bana do tunu li a ni, nɛ a bũlũ, nɛ a le zamɔ. Nɛ mɛ a dɛa ni, ma fɔlɔ sɛ tɔa na, ma hɔ sa li Gale.”

⁵⁴ Ki ni a mbulanɔ ngɔ tɛlɛ tɛ zɛlɛ ngbɛlɛ, do kumbakele kpi do kpi,

^55-56 do hɛ̃a mɔ, do dani, do mɔ kɛ ma kombo tɛ wele, tabi mbula ngɔ ungga tulu, tabi mɔ kɛ ma kutu tɛ tɔa ni.

⁵⁷ Ombulanɔ ni, ma gala sɛ we gɔnɔ sanga kɛ na, wele a a wi ndi, tabi a a sa wi li Gale ni. Tabi we gɔnɔ 'bɔ sanga mɛnɔ kɛ ma a mɔ ndi, tabi ma ɔ sa li Gale ni.