Levitɛnɔ 13 - WE NU GALE 1995

Mbula ngɔ ozɛlɛ ba ndala tɛ wi

¹ NWA tɔ́a hã Mɔizɛ do Aroni na:

² “Fala kɛ wele do hɛ̃a mɔ, tabi dani tɛ̃ a, tabi mɔ kombo tɛ̃ a, hã ma hɔ ɔ nɛ zɛlɛ ngbɛlɛ, nɛ wa nɛ sɛ do wi ni hã nganga Aroni, tabi mbe kɔ obenɔ 'da a kpo,

³ nɛ a hã a zɔ sɛ fala dani ni. Kɔ fala kɛ be salanɔ tɛ fala dani ni, ma ɔ fɛ̃a, kɔ dani nyɔngɔ mulu tɛ̃ a dɛ kɔ nɛ, nɛ nde ki ni mɛ a zɛlɛ ngbɛlɛ. Nɛ nganga a tɔ̃ sɛ hã wi ni na, a hɔa wi ndi li Gale.

⁴ Nɛ nde fala kɛ dani ma ɔ fɛ̃a iko, kɔ li nɛ 'dù dɛ kɔ nɛ 'du gɔ, nɛ sala fala nɛ ni ma ɔ̃ fɛ̃a gɔ, nɛ nganga a fo sɛ wi ni kɔ owinɔ do'do, nɛ a fi a kɔ wili tɔa 'do tũ sambo.

⁵ Ma hɔ tũi kɛ sambo, nɛ nganga a zɔ sɛ 'bɔ dani ni. Kɔ fala kɛ a zɔ na, ma 'bana na mɛ ni iko, ma yɛ̀'bɛ̀ tɛ ndala tɛ wi ni si gele fala gɔ, nɛ a fi sɛ 'bɔ a mbé nɛ kɔ wili tɔa 'do tũ sambo.

⁶ Kɔ̃ tũnɔ ni ma we, nɛ a zɔ sɛ 'bɔ dani ni. Kɔ fala kɛ li nɛ ma fe, nɛ ma yɛ'bɛ 'bɔ tɛ ndala tɛ̃ a si gele fala gɔ, nu lɛnggɛ hebre, ma mba zɛlɛnɔ kpi do kpi nɛ nganga a tɔ̃ sɛ hã a na, a a sa wi li Gale. Nɛ nde ki ni mɛ a gele dani iko, nɛ wi ni a fɔ́lɔ́ tulu tɛ̃ a, nɛ a hɔ sa wi li Gale.

⁷ Nɛ nde 'do kɛ nganga zɔ dani tɛ wi ni, kɔ a tɔ̃ na, a a sa wi li Gale, kɔ dani ni ma yɛ'bɛ tɛ ndala tɛ̃ a, nɛ a kpolo sɛ tɛ̃ a 'da nganga i.

⁸ Nɛ nganga a zɔ sɛ 'bɔ dani ni mbé nɛ. Kɔ fala kɛ a zɔ na, dani ma yɛ'bɛ tɛ ndala tɛ wi ni, nɛ a tɔ̃ sɛ hã a na, a hɔa wi ndi li Gale, we kɛ mɛ a zɛlɛ ngbɛlɛ.

⁹ “Fala kɛ dani 'bili wele ɔ nɛ zɛlɛ ngbɛlɛ ni, nɛ wa nɛ sɛ do a hã nganga,

¹⁰ nɛ nganga a zɔ sɛ dani tɛ̃ a ni. Kɔ fala kɛ li dani ni ma fè gɔ, nɛ be salanɔ tɛ nɛ ni ma ɔ 'bɔ fɛ̃a, nɛ ma nyɔngɔ muli nyɔnga,

¹¹ nɛ nde ki ni mɛ a zɛlɛ ngbɛlɛ kɛ 'do nɛ ma nyɛlɛ tɛ wi ni nyɛla. Nɛ nganga a tɔ̃ sɛ hã a na, a hɔa wi ndi li Gale. Ki ni ma wè na, wa e 'bɔ a kɔ wili tɔa we zɔ dani gɔ, we kɛ a hɔa wi ndi li Gale ia.

¹² Nɛ nde fala kɛ gba talɛ a tɛ wele, kɔ ma kpa tɛ̃ a vɛ̃, yolo zu a we hɔ nyanga a,

¹³ nɛ nganga a zɔ sɛ ma do sɔ̃a li ngboo. Kɔ fala kɛ a zɔ na, dani ma hɔa kpa tɛ̃ a vɛ̃, nɛ a to sɛ na, zɛlɛ ni ma dɛ na wele hɔ wi ndi li Gale gɔ. Ki ni mɛ a gele dani iko. Nɛ wi ni sɛ a sa wi li Gale, we kɛ ndala tɛ̃ a vɛ̃ ma a fɛ̃a.

¹⁴ Nɛ nde do ngba soe kɛ li dani tɛ wi ni ma nyɔngɔ, nɛ a hɔ sɛ wi ndi li Gale.

¹⁵ Nɛ nganga a zɔ sɛ fala dani nyɔngɔ do muli ni, nɛ a tɔ̃ hã wi ni na, a hɔa wi ndi li Gale. Dani kɛ ma nyɔngɔ mulu ni, mɛ a zɛlɛ ngbɛlɛ, nɛ ma a mɔ ndi li Gale.

¹⁶ Nɛ nde fala kɛ fala dani nyɔngɔ do muli ni, ma kifi 'bɔ fɛ̃a nɛ, nɛ wi ni a kpolo sɛ tɛ̃ a 'da nganga i,

¹⁷ nɛ nganga a zɔ sɛ dani ni. Kɔ fala kɛ a zɔ na, dani ma hɔa fɛ̃a kpaa, nɛ a to sɛ hã wi ni na, a a sa wi li Gale.

¹⁸ “Fala kɛ kili hɛ̃ wele, kɔ ma e,

¹⁹ hã dani kɛ ma ɔ fɛ̃a ni ma hɔ olo nɛ, tabi fila mɔ gɛzɛ do fɛ̃a nɛ ma kombo tɛ̃ a dɛ olo dani kili ni, nɛ wi ni a nɛ sɛ 'da nganga,

²⁰ nɛ nganga a zɔ sɛ zɛlɛ ni. Kɔ fala kɛ a zɔ na, dani nyɔngɔ muli nyɔnga, nɛ be salanɔ fala ni ma hɔa ɔ fɛ̃a, nɛ a tɔ̃ sɛ hã wi ni na, a hɔa wi ndi li Gale, we kɛ mɛ a zɛlɛ ngbɛlɛ, hã ma hɔa dɛ olo mbala hɛ̃a mɛ ni.

²¹ Kɔ fala kɛ nganga zɔ dani, nɛ nde be salanɔ tɛ nɛ ni ma ɔ́ fɛ̃a gɔ, nɛ dani ma nyɔ̀ngɔ̀ muli olo mbala ni gɔ, nɛ li ma fia, nɛ a fi sɛ wi zɛlɛ ni kɔ wili tɔa 'do tũ sambo.

²² 'Do nɛ, kɔ fala kɛ zɛlɛ ni ma yɛ'bɛ tɛ ndala tɛ wi ni, nɛ nganga a tɔ̃ sɛ hã wi ni na, a hɔa wi ndi li Gale, we kɛ mɛ a zɛlɛ ngbɛlɛ.

²³ Kɔ fala kɛ ihe ma hɔa tɛ wi ni, ma yɛ̀'bɛ̀ tɛ ndala tɛ̃ a gɔ, nɛ nde mɛ a olo mbala hɛ̃a mɛ iko, nɛ nganga a tɔ̃ sɛ hã wi ni na, a a sa wi li Gale.

²⁴ “Fala kɛ wele kpa dani we, kɔ fɛ̃a mɔ tabi fila mɔ gɛzɛ do fɛ̃a nɛ ma kombo li dani we ni,

²⁵ nɛ nganga a zɔ sɛ fala do dani ni. Kɔ fala kɛ obe salanɔ ma ɔ fɛ̃a, nɛ dani nyɔngɔ mulu tɛ wi ni dɛ kɔ nɛ, nɛ nde ki ni mɛ a zɛlɛ ngbɛlɛ, hã ma 'bili wi ni dɛ fala dani we ni. Na mɛ ni, nɛ nganga a tɔ̃ sɛ hã wi ni na, a hɔa wi ndi li Gale.

²⁶ Nɛ nde fala kɛ nganga zɔ dani, kɔ a kpa na, be fɛ̃a sala bina, nɛ dani nyɔngɔ mulu tɛ̃ a dɛ kɔ nɛ gɔ, kɔ li nɛ fia, nɛ a fi sɛ wi ni kɔ wili tɔa 'do tũ sambo.

²⁷ Fala kɛ ma hɔ tũi kɛ sambo, kɔ nganga zɔ na, zɛlɛ ma yɛ'bɛ tɛ ndala tɛ̃ a vɛ̃, nɛ nganga a tɔ̃ sɛ hã a na, a hɔa wi ndi li Gale, we kɛ mɛ a zɛlɛ ngbɛlɛ

²⁸ Kɔ fala kɛ kombo mɛ ni ma si 'do, nɛ ma yɛ'bɛ tɛ ndala tɛ̃ a gɔ, kɔ li dani ma fia, nɛ nde ki ni mɛ a dani olo we iko. Nɛ nganga a tɔ̃ sɛ hã wi ni na, a a sa wi li Gale, we kɛ mɛ a mbala olo dani we iko.

²⁹ “Fala kɛ wi wili, tabi wuko ɔ do zɛlɛ tɛ ndala tɛ̃ a, tabi tɛ zu a, tabi tɛ 'bangga a,

³⁰ nɛ nganga a zɔ sɛ fala zɛlɛ ni. Kɔ fala kɛ a zɔ na, dani nyɔngɔ muli dɛ kɔ nɛ, nɛ be salanɔ tɛ dani ni ma ɔ yoo, nɛ ma yolo ndã ndã, nɛ nganga a tɔ̃ sɛ hã wi ni na, a hɔa wi ndi li Gale. Mba gɔ, mɛ a kumbakele hã ma tia tɛ zu a, tabi tɛ 'bangga a.

³¹ Nɛ nde fala kɛ nganga zɔ na, dani nyɔ̀ngɔ̀ muli dɛ kɔ nɛ gɔ, nɛ fo tũ sala bina, nɛ a fi sɛ wi ni kɔ wili tɔa 'do tũ sambo.

³² Kɔ ma hɔ tũi kɛ sambo, nɛ nganga a zɔ sɛ 'bɔ dani ni. Kɔ fala kɛ a zɔ na, dani ni ma yɛ'bɛ tɛ ndala tɛ̃ a gɔ, nɛ sala kɛ ma yoo ni bina, nɛ dani nyɔngɔ 'bɔ muli dɛ kɔ nɛ gɔ,

³³ nɛ wi zɛlɛ ni a kɛlɛ sɛ zu a, nɛ nde a kɛ́lɛ́ sɛ fala do dani ni gɔ. 'Do nɛ, nɛ nganga a fi sɛ 'bɔ a mbé nɛ kɔ wili tɔa 'do tũ sambo.

³⁴ Kɔ tũnɔ ni ma we, nɛ nganga a zɔ sɛ 'bɔ dani ni. Kɔ fala kɛ zɛlɛ ni ma yɛ̀'bɛ̀ tɛ̃ a gɔ, nɛ ma nyɔngɔ 'bɔ muli dɛ kɔ nɛ gɔ, nɛ nganga a tɔ̃ sɛ hã wi ni na, a a sa wi li Gale. Nɛ ma wia na, a fɔlɔ tulunɔ 'da a iko, takɔ a hɔ sa wi li Gale.

³⁵ Nɛ nde fala kɛ kumbakele ma yɛ'bɛ tɛ wi ni do 'do kɛ nganga tɔ́a hã a na, a a sa wi li Gale ni,

³⁶ nɛ nganga a zɔ sɛ 'bɔ dani ni. Kɔ fala kɛ kumbakele ma yɛ'bɛ tɛ wi ni kpaa nde, nɛ nganga sí sɛ tɛ zɔ na, be salanɔ ɔ yoo ni boe nde gɔ, we kɛ wi ni a wi ndi li Gale kpaa.

³⁷ Nɛ nde fala kɛ dani ni ma kìfì ngboo gɔ, nɛ tũ salanɔ ma hɔa li nɛ, nɛ nde ki ni, dani ni ma ɛ̃a ia, nɛ wi ni a sɛ a sa wi li Gale. Nɛ nganga a tɔ̃ sɛ 'bɔ hã a na, a a sa wi.

³⁸ “Fala kɛ fɛ̃a mɔ ma kombo tɛ ndala tɛ wi wili tabi wuko,

³⁹ nɛ nganga a zɔ sɛ wi ni. Kɔ fala kɛ kumba mɛnɔ ni ma là li gɔ, nɛ nde ki ni mɛ a gã zɛlɛ gɔ, nɛ wi ni a 'bana sɛ sa wi li Gale.

⁴⁰ “Fala kɛ mili zu wele ma bɛlɛ, nɛ a 'bana sɛ sa wi li Gale.

⁴¹ Fala kɛ dati a ma bɛlɛ bɔlɔ sanga, nɛ a 'bana sɛ 'bɔ do sa wi li Gale.

⁴² Kɔ fala kɛ ndala tɛ̃ a do bɛlɛ zu a ni ma dɛ dani, do fɛ̃a mɔ gɛzɛ do fila nɛ, nɛ nde ki ni mɛ a ndo nyanga zɛlɛ ngbɛlɛ,

⁴³ nɛ nganga a zɔ sɛ wi ni. Kɔ fala kɛ a zɔ na, dani ɔ fɛ̃a gɛzɛ do fila nɛ, nɛ ma wia kɔ do ngbɛlɛ,

⁴⁴ nɛ nganga a tɔ̃ sɛ hã wi ni na, a hɔa wi ndi li Gale, we duzu zɛlɛ kɛ ma tia zu a ni.

⁴⁵ “Ma wia na, wi kɛ a do zɛlɛ ngbɛlɛ ni, a he'de ɛ̃a tulu, nɛ a tɛ kɛlɛ zu a gɔ, nɛ a kpo tulu, nɛ ma kele sala ngɔ nu a do nzɛlɛ a do'do. Nɛ a he mɔ na: ‘Mi a wi ndi! Mi a wi ndi!’

⁴⁶ Do 'da fala a do zɛlɛ ni, a sɛ fai a wi ndi. Ma kɛ ma wia na, a dɛ fala ɔi 'da a do 'do ngbo ɔi nyɛlɛ do gele winɔ.

Tulunɔ kɛ mɔ 'danga tɛ nɛ

⁴⁷ “Fala kɛ tulu kɛ wa dɛa do sala sa'de, tabi tulu kɛ ma ɔ bɛndɛ bɛndɛ ma onggo,

⁴⁸ tabi fala kɛ ondala sa'de, tabi mɛnɔ kɛ wa dɛa do nga ndala ni, ma to kubu,

⁴⁹ kɔ ungga tuli ni, ma gɛzɛ do tɛ tɔlɔ nwá, tabi fɛ̃a mɔ gɛzɛ do fila nɛ, nɛ ma wia na, nganga zɔ mɛ kɛ ma ungga ni.

⁵⁰ 'Do nɛ, nɛ a usu sɛ tuli ni kɔ tɔa 'do tũ sambo.

⁵¹ Nɛ do tũi kɛ sambo ni, nɛ a zɔ sɛ 'bɔ ma. Fala kɛ mɛ ma 'danga tɛ tuli ni, ma yɛ'bɛ dɛ dati, kɔ wa fɔlɔ zãa, nɛ mɛ ni, ma hɔ sɛ mɔ ndi li Gale.

⁵² Nɛ nganga a dɔ sɛ tuli ni. Mba gɔ, ɔ nɛ kɛ wa wè tɛ fo mɛ ma 'danga tɛ nɛ ni gɔ ni, ma wia na, wa dɔ ma do'do.

⁵³ Nɛ nde 'da fala kɛ nganga zɔ na, mɛ ma ungga tɛ tuli ni, ma yɛ̀'bɛ̀ tɛ nɛ gɔ,

⁵⁴ nɛ a bá sɛ nu a na, wa fɔlɔ tuli ni. 'Do nɛ, nɛ a usu sɛ 'bɔ ma kɔ tɔa 'do tũ sambo.

⁵⁵ Kɔ tũnɔ ni ma we, nɛ nganga a zɔ sɛ 'bɔ fala mɛ ma ungga tɛ tuli ni. Kɔ a zɔ na, ungga mɛ ni ma kìfì gɔ, nɛ gɛnɛ kɔ ma yɛ'bɛ tɛ tuli gɔ, nɛ tuli ni ma hɔ sɛ mɔ ndi li Gale. Nɛ ma wia na, wa dɔ ma do'do, we kɛ mɛ a tulu kɛ ma nyɔngɔ do 'do nɛ, tabi do kɔ nɛ.

⁵⁶ Nɛ nde fala kɛ nganga zɔ fala ni na, ungga mɛ ni ma hɔ̀ nza ngboo gɔ, nɛ a 'bili sɛ fala ma ungga tɛ tuli, tabi tɛ ndala ni do'do.

⁵⁷ Fala kɛ do 'do nɛ, kɔ mɛ ni ma hɔ 'bɔ tɛ tuli, tabi tɛ ndala sa'de, nɛ nde ki ni ma be na, ungga mɛ ni ma kpolo tɛ̃ ɛ, nɛ wa dɔ sɛ mɛ ma ungga ni.

⁵⁸ Fala kɛ wa fɔlɔ mɛ kɛ ma ungga tɛ nɛ ni, kɔ fala ungga mɛ ni ma e, nɛ ma wia na, wa fɔlɔ 'bɔ ma fala bɔa, takɔ ma ɔ sa li Gale.”

⁵⁹ Ki ni a mbulanɔ ngɔ tulu kɛ wa dɛa do sala sa'de, tabi tulu kɛ ma ɔ bɛndɛ bɛndɛ, nɛ ma ungga, tabi kɛ wa dɛa do nga ndala, nɛ ma tua kubu ni. Nɛ mbulanɔ gɛ ma hã sɛ wala we tɔ̃ na, mɛ ma 'danga ni ma ɔ sa, tabi ma a mɔ ndi li Gale.