Levitɛnɔ 12 - WE NU GALE 1995

Mbula ngɔ wuko kɛ a kua

¹ NWA tɔ́a hã Mɔizɛ na,

² a e mbula hã obe Israɛlɛ na: “Fala kɛ wuko ko bulu be, nɛ a hɔ sɛ wi ndi li Gale we tũ sambo, ɔ nɛ 'da fala a zɔ do zɛkɛ ni.

³ Nɛ do ngbɛ'dɛ'dɛ tũi, nɛ wa gɔnɔ sɛ be ni.

⁴ 'Do nɛ, nɛ ma la sɛ 'bu tũ talɛ ngɔ nɛ talɛ, sɛ nɛ naa be hɔ sa wi olo tɔkɛ kɛ ma si nù 'da fala kula 'da a ni de. Nɛ ma wè na, a 'be tɛ mɔ kɛ ma santo ni gɔ. Nɛ ma wè 'bɔ na, a hɔ tɛ fala dɔnggɔ do Gale dati kɛ na, kɔ̃ tũi ni ma we ni gɔ.

⁵ “Fala kɛ wuko ko boko be, nɛ a hɔ sɛ wi ndi li Gale we tũ 'bu ngɔ nɛ nalɛ. 'Do nɛ, nɛ ma la sɛ 'bu tũ gazɛlɛ ngɔ nɛ gazɛlɛ, sɛ nɛ naa be hɔ sa wi olo tɔkɛ kɛ ma si nù 'da fala kula 'da a ni de.

⁶ “Fala kɛ kɔ̃ tũi ma we na, wa fɔlɔ a we hɔ sa wi li Gale olo kula bulu be tabi boko be ni, nɛ a nɛ sɛ do be bata kɛ a dɛa sabɛlɛ kpo ni, nɛ a hã a hã nganga tɛ nu tɔa Tande i. Nɛ nganga a dɔ sɛ sa'de ni we dɔnggɔ do NWA. A tɛ sɛ 'bɔ do pizɔ̃ tabi gbakulĩ do dɔnggamɔ we fo ku'da 'dã mɔ.

⁷ Nɛ nganga a be sɛ ma dati NWA Gale, takɔ ma fɔlɔ wuke ni, kɔ a hɔ sa wi li Gale. Nganga dɛ na mɛ ni, nɛ wuke ni a hɔ sɛ sa wi li NWA.” Ki ni mɛ a mbula ngɔ wuko kɛ a kua bulu be, tabi boko be ni.

⁸ Fala kɛ wuke ni do wala we hã be bata bina nde, nɛ a wia we tɛ do ogbakulĩ bɔa tabi pizɔ̃ bɔa. Nɛ wa dɔ sɛ mbe nɔɛ kpo we dɔnggɔ do NWA, nɛ wa hã mbee nɛ do dɔnggamɔ we fo ku'da 'dã mɔ. Nɛ nganga a be sɛ dɔnggamɛ ni dati NWA, nɛ ma fɔlɔ sɛ wuke ni, nɛ a hɔ sa wi li Gale.