Levitɛnɔ 11 - WE NU GALE 1995

Ombula ngɔ mɛnɔ kɛ ma a sa do kɛnɔ ma a sa gɔ ni

¹ NWA tɔ́a hã Mɔizɛ do Aroni na,

² wa e mbulanɔ gɛ hã obe Israɛlɛ na: “Sanga osa'denɔ nù gɛ, nɛ nyɔngɔ sɛ a

³ owanɔ kɛ sala nyanga wa bɔa, nɛ wa nyɔngɔ 'da wɔkɔsɔ fala bɔa ni.

^4-6 Nɛ nde ma wè na, nɛ nyɔngɔ sa'de zamɔ, do bia, do kpã gɔ. We kɛ gɛnɛ kɔ wa nyɔngɔ 'da wɔkɔsɔ fala bɔa, nɛ nde sala nyanga wa bɔa gɔ.

⁷ Nɛ nɛ tɛ nyɔ̀ngɔ̀ 'bɔ ngulu gɔ, we kɛ gɛnɛ kɔ a do sala nyanga a bɔa, nɛ nde a nyɔ́ngɔ́ 'da wɔkɔsɔ fala bɔa gɔ.

⁸ Da dɛ kɔ nɛ nyɔ́ngɔ́ mulu sa'denɔ ni gɔ, nɛ nɛ tɛ 'bè 'bɔ tɛ fia wa gɔ. Nɛ zɔ sɛ wa li nɛ na, wa a osa'de ndi li Gale.

⁹ “Nɛ sanga osa'denɔ kɛ wa ɔ 'dɔ lì, tabi 'dɔ ndɔ, tabi 'dɔ gba li ni, nɛ nyɔngɔ sɛ a wanɔ kɛ kɔa tɛ wa boe, nɛ wa do mɔ kanda do lì tɛ wa boe ni.

¹⁰ Nɛ nde osa'denɔ kɛ wa ɔ 'dɔ lì, nɛ fo kɔa tɛ wa, do mɔ kanda do lì tɛ wa bina ni, nɛ nyɔ́ngɔ́ sɛ wa gɔ.

¹¹ Nɛ zɔ sɛ tɛlɛ tɛ osa'denɔ ni li nɛ na, wa a osa'de ndi li Gale. Nɛ tɛ nyɔ̀ngɔ̀ mulu wa gɔ, nɛ nɛ tɛ 'bè 'bɔ tɛ fia wa gɔ.

¹² Nɛ tɛ nyɔ̀ngɔ̀ sa'de 'dɔ lì, kɛ kɔa tɛ̃ a bina, nɛ a do mɔ kanda do lì tɛ̃ a bina ni gɔ.

^13-19 “Nɛ sanga onɔɛnɔ kɛ nɛ zɔ sɛ wa li nɛ na, wa a osa'de ndi li Gale, nɛ nɛ nyɔ́ngɔ́ sɛ wa gɔ ni, wa kɛ: ziki, zakanga, nɔɛ lì, gbagbaladangga, gãlãnutɔa ngolo, do ngɔ gili ozakanga kpi do kpi, do ganakele, gba nɔɛ li gba zɔ́, dili gba tũ, be kɔa lì, do ngɔ gili okonggonɔ kpi do kpi, dili gba sɔ, obe dili, nyɔlã, kɔa lì, nɔɛ ngele, do ngɔ gili ogbombe kpi do kpi, kuludu do pipili.

²⁰ “Nɛ obe sa'denɔ kɛ sala 'baka wa, do nyanga wa boe ni, nɛ zɔ sɛ tɛ mɛ 'bɔ wa li nɛ na, wa a osa'de ndi li Gale.

²¹ Nɛ nde nɛ nyɔngɔ sɛ wanɔ kɛ nyanga wa boe, nɛ wa bũlũ do ngɔ nù gɛ ni.

²² Mɛ a ngɔ gili odɔlanɔ do onɔ̃lɔ̃nɔ ni.

²³ Nɛ nɛ zɔ sɛ tala obe sa'denɔ kɛ sala 'baka wa do onyanga wa boe ni li nɛ na, wa a osa'de ndi li Gale.

^24-28 “Wele kɛ a 'be tɛ fia osa'denɔ gɛ, nɛ a hɔ sɛ wi ndi yolo 'da fala ni gbaa we hɔ gɛ̃a wese. Mɛ a osa'denɔ kɛ sala nyanga wa bɔa gɔ, nɛ wa nyɔ́ngɔ́ 'da wɔkɔsɔ fala bɔa gɔ, do osa'denɔ kɛ wa do ɛ̃lɛ̃ nyanga wa boe ni. Wi kɛ a ba tole fia sa'denɔ ni, nɛ a fɔlɔ sɛ tulu tɛ̃ a. Nɛ nde a 'bana sɛ wi ndi gbaa we hɔ gɛ̃a wese.

^29-30 “Nɛ sanga obe sa'denɔ kɛ wa hala do nù gɛ, wanɔ nɛ zɔ sɛ wa li nɛ na, wa a osa'de ndi li Gale ni, wa kɛ: zula ti nù, ngambele, ngɔ gili okada kpi do kpi, ka'bɛlɛ, kadanɔ kɛ tɛ wa gɛ gɛza, kada tɛ tɔlɔ nwá, kada yɛnggɛ zã kɛnzɛnɔ, do zo.

³¹ Wi kɛ a 'be tɛ wa, tabi tɛ fia wa, nɛ a hɔ sɛ wi ndi li Gale gbaa we hɔ gɛ̃a wese.

³² Nɛ fala kɛ fia sa'denɔ ni ma te ngɔ mɔ, ɔ nɛ sani kɛ wa sɛa do te, tabi ma te ngɔ tulu, ndala, tabi saki, nɛ gɛnɛ kɔ ma dɛ to ge nde, nɛ wa fɔlɔ sɛ ma do lì. Nɛ nde ma 'bana sɛ mɔ ndi li Gale gbaa we hɔ gɛ̃a wese.

³³ Fala kɛ sa'de kpo kɔ wanɔ ni te kɔ kpana kɛ wa 'bua ma do gili, nɛ mɛ kɔ kpana ni, ma hɔ sɛ mɔ ndi li Gale, nɛ wa o sɛ kpana ni.

³⁴ Fala kɛ wa so lì kɔ kpana ni, hã wa gi do nyɔngɔmo, nɛ nyɔngɔmɛ ni ma hɔ sɛ mɔ ndi li Gale. Fala kɛ ma ɔ do lì nɔ nɔa, ko ma yolo kɔ kpana ni, nɛ ma hɔ sɛ mɔ ndi li Gale.

³⁵ Mɛnɔ vɛ̃ kɛ fia sa'denɔ ni kpo te ngɔ nɛ ni, nɛ ma hɔ sɛ nu ndi li Gale. Fala kɛ ma ɔ do furu, tabi kusi, nɛ wa 'danga sɛ ma do'do.

³⁶ Nɛ nde fala kɛ fia sa'denɔ ni te 'dɔ fua lì, tabi kɔ kɔ̃ lì, nɛ lì ni ma 'bana sɛ sa li Gale, nɛ nde wele kɛ a fua fia sa'de 'dɔ lì dɛ nza ni, a hɔa wi ndi li Gale.

³⁷ Fala kɛ fia sa'de te ngɔ gbãlã kpalɛ kɛ wa nɛ mi ma mi ni, nɛ kpalɛ ma 'bana sɛ sa li Gale.

³⁸ Nɛ nde fala kɛ ma te ngɔ gbãlã kpalɛ kɛ wa fɔlɔ tɛ nɛ we nyɔngɔ ma, nɛ gbãlã kpalɛnɔ ni, ma hɔ sɛ mɔ ndi li Gale.

³⁹ “Fala kɛ sa'de kɛ wa wia we nyɔngɔ a ni, a fe iko, kɔ wele 'be te fia a, nɛ a hɔ sɛ wi ndi gbaa we hɔ gɛ̃a wese.

⁴⁰ Nɛ fala kɛ wele nyɔngɔ mbe mulu fia sa'de ni, nɛ ma wia na, a fɔlɔ tulu tɛ̃ a. Nɛ nde a 'bana sɛ wi ndi li Gale gbaa we hɔ gɛ̃a wese. Ma 'bɔ na mɛ ni, we wele kɛ a ba tole fia sa'de ni, nɛ ma wia na, a fɔlɔ tulu tɛ̃ a. Nɛ a 'bana sɛ wi ndi li Gale gbaa we hɔ gɛ̃a wese.

⁴¹ “Ma wè na, nɛ nyɔngɔ obe sa'denɔ kɛ wa hala do ngɔ nù gɛ ni gɔ.

⁴² Nɛ wanɔ kɛ wa hala do ngu'du wa, tabi wa nɛ do nyanga wa nalɛ, tabi wanɔ kɛ nyanga wa dɛlɛ nɛa ngo nalɛ ni, ma wè na nɛ nyɔngɔ wa gɔ. We kɛ wa a osa'de ndi li Gale.

⁴³ Nɛ tɛ nyɔ̀ngɔ̀ osa'denɔ ni, kɔ nɛ hɔ wi ndi li Gale gɔ.

⁴⁴ Mi a NWA Gale 'da nɛ, nɛ mi a santo. Ma kɛ ma wia na, nɛ dɛ mɔ tɛ nɛ ɔ nɛ Owele kɛ wa santo ni. Nɛ te nyɔngɔ obe sa'denɔ kɛ wa yɛnggɛ do nù gɛ, kɔ nɛ hɔ wi ndi li mi gɔ.

⁴⁵ Wi a mi, NWA, kɛ mi fua zi nɛ ngɔ nù Ezipeto dɛ nza, takɔ mi hɔ Gale 'da nɛ ni. Kɔ ma wia na, nɛ dɛ mɔ tɛ nɛ ɔ nɛ Owele kɛ wa santo ni, we kɛ mi santo.”

⁴⁶ Ki ni a mbula ngɔ osa'denɔ do onɔɛnɔ, do okɔyɔnɔ do obe sa'denɔ kɛ wa yɛnggɛ do nù gɛ a ni.

⁴⁷ Mbulanɔ ni, ma gala sɛ nɛ we gɔnɔ sanga osa'denɔ kɛ wa a sa li Gale, do wanɔ kɛ wa a sa gɔ, do osa'denɔ kɛ nɛ wia we nyɔngɔ wa, do wanɔ kɛ nɛ wè we nyɔngɔ wa gɔ ni.