Levitɛnɔ 10 - WE NU GALE 1995

Nadabɛ do Abihu wa fia

¹ Mbe tũ kpo, nɛ mbe obenɔ 'da Aroni bɔa, Nadabɛ do Abihu, wa ba mɔ u do we 'da wa, nɛ wa a kalĩ we kɔ nɛ, nɛ wa a fũ yɔmbɔ ngɔ nɛ, nɛ ma unu, nɛ wa dɔnggɔ ma do NWA. Nɛ nde we ni ma zi santo gɔ, we kɛ NWA bà zi nu a hã wa na, wa dɔnggɔ do ɛ gɔ.

² Nɛ we ma yolo kɔ tɔa Tande 'da NWA i, nɛ ma hɔ, nɛ ma bɛlɛ wa bɔa nɛ, nɛ wa fe dɛ dati NWA ni.

³ Nɛ Mɔizɛ tɔ̃ hã Aroni na: “Ma dɛa ngboo nɛ́ kɛ NWA mbisa zi mɔ ni. Mba gɔ a tɔ̃a zi na, ɛ kɔa na, winɔ wa kɔlɔ do ɛ ni, wa dɔnggɔ ɛ, kɛ ɛ santo ni, nɛ wa hã dɔ̃lɔ̃ li hã ɛ dɛ li owinɔ vɛ̃.” Aroni zila ní, nɛ ma kolo a, nɛ a wèlè we gɔ.

⁴ Nɛ Mɔizɛ sa mɔ hã Mikaɛlɛ do Elisafanɛ, obenɔ 'da Uziɛlɛ, kɛ a a nya baa Aroni ni, nɛ a ba nu a hã wa na: “Nɛ nɛ́, kɔ nɛ fo wɔlɔ onya nɛ dati tɔa Tande do'do, nɛ nɛ hɔ do ma dɛ 'do ngbo ɔi i.”

⁵ Wa zila nu Mɔizɛ, nɛ wa dɛ olo nu a. Nɛ wa 'be wa do vungbu tulunɔ tɛ wa ni, nɛ wa kala wa hɔa do wa dɛ 'do ngbo ɔi i.

⁶ 'Do nɛ, nɛ Mɔizɛ tɔ̃ hã Aroni, do tala obenɔ 'da a bɔa, Elazarɛ do Itamarɛ na: “Nɛ tɛ là mili zu nɛ na mɛ ni iko gɔ, nɛ nɛ tɛ ɛ̃̀ 'bɔ tulu tɛ nɛ we dɛ 'bako gɔ. Nɛ dɛ na mɛ ni, nɛ nɛ fe sɛ, nɛ zã NWA ma nɔ̃lɔ̃ sɛ dɛ tɛ obe Israɛlɛ vɛ̃. Nɛ nde tala onya nɛ, obe Israɛlɛ, wa wia we he kɔ̃a winɔ kɛ NWA tumba nyɛa we, kɔ ma gbɛa wa ni.

⁷ Fala kɛ nɛ kɔ̃̀ fio gɔ, nɛ nɛ tɛ bà nyanga nɛ nu tɔa Tande kpa ngba wi do NWA dɛ gele fala gɔ. Mba gɔ, nɔɛ wa a zu nɛ ni, ma ia nɛ na, nɛ dɛ to nganga hã NWA.” Nɛ Aroni do obenɔ 'da a, wa dɛa olo nu Mɔizɛ.

Mbula ngɔ onganganɔ

⁸ NWA tɔ̃a hã Aroni na:

⁹ “Mɔ, do obenɔ 'da mɔ, nɛ nɔ́ sɛ dɔ̃ dati kɛ na, nɛ le kɔ tɔa Tande i ni gɔ. Nɛ dɛ na mɛ ni, nɛ nɛ fe sɛ. Mɛ a mbula kɛ he do obe zã nɛ, nɛ dɛ sɛ ma fai,

¹⁰ Nɛ nɛ tɛ nɔ̀ dɔ̃ 'da fala kɛ nɛ gɔrɔ sanga mɔ kɛ ma santo, tabi ma santo gɔ ni gɔ, tabi mɔ kɛ ma sa, tabi ma a mɔ ndi li mi ni gɔ.

¹¹ Nɛ ma wè 'bɔ na, nɛ nɔ dɔ̃ 'da fala be mbulanɔ kɛ mi hã ma do wala 'da Mɔizɛ hã obe Israɛlɛ ni gɔ.”

¹² Mɔizɛ tɔ̃a hã Aroni do obenɔ 'da a bɔa, Elazarɛ do Itamarɛ, kɛ wa 'bana nza ni na: “Nɛ kálá tala dɔnggamɔ fũnɔ, kɛ ma 'bana olo kɛnɔ wa la ma hã NWA ni, nɛ nɛ d: ma do mapa, nɛ nde nɛ tɛ à ina hana mapa tɛ nɛ gɔ. Nɛ nɛ nyɔngɔ ma dɛ kɛ zã gbagala, we kɛ mɛ a nyɔngɔmɔ kɛ ma santo.

¹³ Nɛ nyɔngɔ ma dɛ fala kɛ ma santo ni iko. Mbee dɔnggamɔ fũi kɛ wa hã ma hã NWA ni, ma a mɔ mɔ́ Aroni, do obenɔ 'da mɔ, ɔ nɛ kɛ mbulanɔ 'da NWA tɔ́a ni.

¹⁴ Nɛ gbãlã ngu'du sa'denɔ, do ku wa, kɛ obe Israɛlɛ wa hã ma do dɔnggamɔ be dɛa na, nɛ nɛ yaka ma dati NWA ni, wele nɛ a mɔ́ mɔ Aroni, do obenɔ 'da mɔ. Nɛ nyɔngɔ sɛ ma tɛ fala kɛ ma a sa li NWA. Nɛ oboko benɔ 'da mɔ, wa wia 'bɔ we nyɔngɔ ma fala nɛ kpo do nɛ.

¹⁵ Obe Israɛlɛ wa tɛ sɛ do gbãlã ngu'du sa'de, do ku nɛ, do 'da fala kɛ wa tɛ do kɛndɔnɔ na, mɔ dɔ ngɔ gbagala ni. Nɛ 'do kɛ mɔ yaka ma dati NWA ia ni, nɛ wa hã sɛ gbãlã ngu'du sa'de, do ku kɛ hã nɛ, we kɛ wele nɛ a mɔ́ nɛ fai, ɔ nɛ kɛ NWA ba do nu a ni.”

¹⁶ Mɔizɛ aka we dua, kɛ we hã do dɔnggamɔ fo ku'da 'dã mɛ zu obe Israɛlɛ. Nɛ wa mbisa a na, wa dɔa ma ia. Nɛ zã a nɔ̃lɔ̃ dɛ tɛ Elazarɛ do Itamarɛ, obenɔ 'da Aroni. Nɛ a aka wa na:

¹⁷ “Gulu kɛ nɛ nyɔ̀ngɔ̀ tala mulu sa'de dɔnggamɛ ni tɛ fala kɛ ma santo ni gɔ we ge nde? Mɛ a nyɔngɔmɔ kɛ ma santo. NWA hã sa'de ni hã nɛ, takɔ nɛ yaka ma dati a na, ma fo ku'da 'dã mɛ zu obe Israɛlɛ.

¹⁸ Nɛ nde wa lè 'bɔ do tɔkɔ sa'de ni kɔ tɔa Tande i gɔ. Ma kɛ nɛ wia sɔ we nyɔngɔ mulu sa'de tɛ fala kɛ ma santo, ɔ nɛ kɛ mi ba do nu mi hã nɛ̀ ni.”

¹⁹ Nɛ Aroni gese hã Mɔizɛ na: “Mɔ zɔ́, ɔ nɛ kɛ obe Israɛlɛ wa hã dɔnggamɛ we fo ku'da 'dã mɛ zu wa hã NWA, nɛ wa dɔa sa'de we dɔnggɔ do a ni, nɛ mɔ ĩ 'bɔ ti 'dã mɛ ma kpa mi sɔɛ gɛ ni. Kɔ fala kɛ mi nyɔngɔ sɔ mulu sa'de dua kɛ mɛ a dɔnggamɔ fo ku'da 'dã mɛ ni, nɛ ma de sɔ tɛ NWA nde?”

²⁰ Mɔizɛ zila ni, nɛ a kɔa gɛnɛ nɛ.