Levitɛnɔ 1 - WE NU GALE 1995

Mbula ngɔ dɔ sa'de do dɔnggamɔ

¹ NWA sa mɔ hã Mɔizɛ tɛ nu tɔa Tande kpa ngba wi do a, nɛ a ba nu a hã a na,

² a e mbulanɔ gɛ hã obe Israɛlɛ, nɛ wa dɛ ma 'da fala wa nɛ gbɛ sa'de we dɔnggɔ do ɛ ni. Mbulanɔ ni ma kɛ: “'Da fala kɛ mbe kpo sanga nɛ gbɛ sa'de we dɔnggɔ do NWA, nɛ ma wia na, ma ɔ do ngɔmbɔ tabi bata tabi dua.

³ Fala kɛ wi ni kɔ̃ we gbɛ ngɔmbɔ takɔ a dɔ we dɔnggɔ do NWA, nɛ ma wia na, a nɛ do wili ngɔmbɔ kɛ fo kunda tɛ̃ a bina ni, dɛ nu tɔa Tande i, takɔ NWA kɔ̃ gɛnɛ a.

⁴ A hɔ do wili ngɔmbɛ ni i mɔ, nɛ a e kɔ a dɛ zu a, nɛ ma ɔ sɛ nɛ dɔnggamɔ we fo ku'da 'dã mɛ zu a ni.

⁵ 'Do nɛ, nɛ a 'bili sɛ gɛlɛ wili ngɔmbɛ ni dɛ di ni. Nɛ onganganɔ, kɛ wa a obe zã Aroni ni, wa kpɔ sɛ tɔkɔ nɛ, nɛ wa be ma hã NWA. 'Do nɛ, nɛ wa kpã tɔkɛ ni tɛ 'bolo zã gbagala kɛ wa dɛa ma tɛ kpongbo nu tɔa Tande we do do sa'de hã NWA ni.

⁶ 'Do nɛ, nɛ wi ni a ɛ̃lɛ̃ sɛ ndala wili ngɔmbɛ, nɛ a gɔmɔ a.

⁷ Nɛ onganganɔ wa 'dafa sɛ ogua dɛ ngɔ gbagala ni, nɛ wa dã ma.

⁸ Nɛ wa kala sɛ o'bili sa'de, mba do zu a do kɛndɔnɔ, nɛ wa a ma dɛ li we ni.

⁹ Nɛ wi ni a fɔlɔ sɛ kala zã sa'de ni mba do ogbɔgɔlɔ nyanga nɛ, nɛ mbe nganga kpo dɔ ma vɛ̃ dɛ ngɔ gbagala ni. Nɛ zɛ̃ dɔnggamɛ ni ma unu sɛ NWA, nɛ ma de tɛ̃ a.

¹⁰ “Fala kɛ wele kɔ we gbɛ bata tabi dua, takɔ wa dɔ we dɔnggɔ do NWA, nɛ ma wia na, ma ɔ do wili nɛ, kɛ fo kunda tɛ̃ a bina ni.

¹¹ Nɛ a 'bili sɛ gɛlɛ a dɛ kɛ zã gbagala do si gbãlã ngɔ. Nɛ onganganɔ wa kpã sɛ tɔkɔ nɛ tɛ 'bolo zã gbagala.

¹² Wi ni a gɔmɔ sɛ sa'de ni, nɛ a 'bili zu a, nɛ a fo okɛndɔnɔ. Nɛ mbe nganga kpo, a kala sɛ 'bili sa'de ni vɛ̃, mba do zu sa'de do okɛndɔnɔ, nɛ a dɔ ma vɛ̃ li we ngɔ gbagala ni.

¹³ 'Do nɛ, nɛ wi ni a fɔlɔ sɛ kala zã sa'de, do ogbɔgɔlɔ nyanga nɛ. Nɛ mbe nganga kpo, a be sɛ ma hã NWA, nɛ a dɔ ma vɛ̃ dɛ ngɔ gbagala ni. Nɛ zɛ̃ dɔnggamɛ ni ma unu sɛ NWA, nɛ ma de tɛ̃ a.

¹⁴ “Fala kɛ wele kɔ we gbɛ nɔɛ, takɔ wa dɔ we dɔnggɔ do NWA, nɛ ma wia na, ma ɔ do gbakulĩ tabi pizɔ̃.

¹⁵ Nɛ mbe nganga kpo, a tɛ sɛ do nɔɛ ni dɛ dati gbagala. Nɛ a sa'ba gɛlɛ a, nɛ a fo zu a, nɛ a dɛ na, tɔkɔ nɛ ma hulu dɛ ngɔ gbagala. 'Do nɛ, nɛ a dɔ sɛ zu a dɛ ngɔ gbagala ni.

¹⁶ Nɛ a fo mɔ ti gɛlɛ nɔɛ ni, nɛ a da ma tɛ fala wa a do bũ olo dɔnggamɛ dɛ kɛ zã gbagala, si 'biti gba wese ni.

¹⁷ 'Do nɛ, nɛ a ɛ̃ sɛ sanga nɔɛ bɔa, nɛ a tata a, nɛ o'baka nɛ ma 'bana dɛ tɛ nɛ. Nɛ a dɔ sɛ ma vɛ̃ li we ngɔ gbagala ni. Nɛ zɛ̃ dɔnggamɛ ni ma unu sɛ NWA, nɛ ma de tɛ̃ a.