YƆƐLƐ 2 - WE NU GALE 1995

Kɔ̃ tũi kɛ NWA a gɔnɔ sɛ do ngbangga ni kɔla ia

¹ Nɛ dámá mɔtũlũ tɛ ngɔ kala santo 'da Gale tɛ Sioni, we mbese owinɔ. Nɛ nɛ, owinɔ ngɔ nù Yuda, nɛ táná kili, tua kɛ kɔ̃ tũi kɛ NWA a gɔnɔ sɛ do ngbangga 'da winɔ ni ma kɔla ia.

² Mɛ sɛ a kɔ̃ tũ gba tũ kpirr, nɛ li nza ma kpe sɛ do gba kutu kpã kpã. Ngɔ gili odɔla, kɛ wa dɛlɛ wena, nɛ wa 'danga mɔ wena, wa hɔ sɛ, ɔ nɛ Owi bolo ni. Nɛ wa tũ sɛ ngɔ kalanɔ kpã kpã, ɔ nɛ kɛ tũi tũ nɛ ni. Owele wa zɔ̀ zɛ́ mbe kuti mɔ ɔ ni dati gɔ, nɛ wa zɔ́ sɛ 'bɔ ma mbé nɛ gɔ.

³ Odɔlanɔ wa 'danga kpalɛnɔ kɛ wa kpa ma dati wa ni vɛ̃, ɔ nɛ kɛ we bɛlɛ do mɛnɔ ni, nɛ wa là mɔ kpo gɔ. Fɔɛ kɛ wa tɛ hɔ̀ kɔ nɛ gɔ ni, ma dia wia kɔ do fɔ Edɛnɛ. Kɔ wa hɔ kɔ nɛ ia, nɛ wa lá mɔ kpo gɔ, nɛ ma hɔ li go.

⁴ Wa yu ngbakpakpa ɔ nɛ gba gili ombalata, kɛ wele wa kũ ngɔ wa, we nɛ do wa li bolo ni.

⁵ Kɔ wa hɔ tɛ zu kalanɔ, nɛ giti wa wele ɔ nɛ giti ngilingili, tabi ɔ nɛ giti gba nyɛa we, kɛ ma tɛ bɛlɛ lu'du wɔkɔsɔ ni. Ngɔ gili wa ɔ nɛ ngɔ gili osoda, kɛ wa lɔnggɔ dɛ 'do ngba wa ni.

⁶ Kɔ wa ma ngɔ kɔlɔ nɛ, nɛ li winɔ fele, nɛ wa ma ngɔ tana kili.

⁷ Odɔlanɔ wa kũ ngɔ ngbonɔ, nɛ wa bi lenɔ ɔ nɛ owi bolo ni. Dɔla kpo kpo ka mɔ dɛ dati ɛ, nɛ a wɛ́nggɛ́ wala gɔ.

⁸ Mbe kpo ílí ngba a gɔ. Dɔla kpo kpo ba tati a wala 'dɛ ɛ. Nɛ fo mɔ amba wa bina, nɛ wa nɛ tɛ mɛ nɛa iko.

⁹ Wa gɔnɔ ngɔ zã le, nɛ wa danga ngɔ ngbonɔ, nɛ wa le kɔ tɔanɔ do li holo tɔa ɔ nɛ owi zũ ni.

¹⁰ Wa ma ngɔ la nɛ, nɛ li nza do nùi tana. Nɛ wese do zɛkɛ to 'bɔ gɔ, nɛ osɔlanɔ wa bi tũ vɛ̃ do'do.

¹¹ Nɛ NWA ba nu a hã Owi bolonɔ 'da a. Ngɔ gili wi bolonɔ, kɛ wa zele nu a ni, wa dɛlɛ wena. Kɔ̃ tũi kɛ nwa nɛ gɔnɔ do ngbangga 'da winɔ ni, mɛ a gã kɔ̃ tũ, nɛ ma hã sɛ gba kili. Wi wia sɛ we kunu sila ɛ 'da fala ni a wio nde?

'Da fala kifi sila wi hɔa ia

¹² NWA tɔ̃a na: “Ngangga ni, nɛ kífí sila nɛ, nɛ nɛ kpóló tɛ nɛ dɛ 'da mi. Nɛ bɛ nyɔngɔmɔ, nɛ nɛ álá nu nɛ hã mi, nɛ nɛ hé kɔ̃a tɛ nɛ we be na, nɛ dɛ 'bako 'dã mɛnɔ 'da nɛ.

¹³ Nɛ kífí sila nɛ ngboo, nɛ nɛ tɛ ɛ̃ tati a tulu tɛ nɛ iko gɔ.” Nɛ kpóló tɛ nɛ dɛ 'da NWA Gale 'da nɛ, we kɛ a a wi dia zã, nɛ a do mbɔkɔ li wena. A a wi du sila, nɛ kɔ̃a zã 'da a la mɔ vɛ̃. A kpolo linggamɛ 'da a ngɔ etumbui a kɔ̃a sɔ we hã hã nɛ ni dɔ̃ iko.

¹⁴ Lɛ ĩ̀ gɔ, mbe gɔ nɛ a kpolo linggamɛ 'da a, nɛ a dɛ na, fɔnɔ 'da nɛ ko ogili kpalɛ. Na mɛ ni, nɛ nɛ wia sɛ we tɛ do okpalɛ do dɔ̃, we dɔnggɔ do a.

'Da fala ala nu wi hã Gale hɔa ia

¹⁵ Nɛ dámá mɔtũlũ tɛ Sioni! Nɛ mbésé winɔ na, wa tɛ bɛ̃ nyɔngɔmɔ, nɛ wa tɛ tɛ gã mba li ngba wi.

¹⁶ Nɛ ngɛ́mɛ́ li Owi kɔ lenɔ vɛ̃, okpasa winɔ, do obenɔ, do obe nzɔ benɔ. Gɛnɛ kɔ owinɔ kɛ wa ba ngba wa dɛ ngangga gɛ iko ni, nɛ wa la tɔa 'da wa, nɛ wa tɛ tɛ mba li ngba wi ni.

¹⁷ Ma wia 'bɔ na onganganɔ kɛ wa dɛ to hã NWA Gale ni, wa yolo tɛ fala 'da wa, tɛ ngbala nu tɔa Tɛmpɛloe do gbagala wa dɔ do sa'de hã Gale ni. Nɛ wa ala nu wa hã a na: “Aa NWA, mɔ ĩ 'bako hã lɛ, owinɔ 'da mɔ! Mɔ tɛ kɔ̃̀ na, ogele winɔ wa hã sape hã lɛ gɔ. Nɛ mɔ tɛ kɔ̃̀ 'bɔ na, wa mɔmɔ lɛ, nɛ wa tɔ̃ na: ‘Gale 'da wa a do nde ni gɔ.’ ”

NWA gisa nu ala nui 'da owinɔ 'da a

¹⁸ NWA bia kɔ̃a zã hã owinɔ 'da a, nɛ a ĩ́ 'bako hã wa,

¹⁹ nɛ a gese nu sambala 'da wa na: “Nɛ zélé! Mi nɛ hã 'bɔ mbé okpalɛ, do dɔ̃, do nɔ hã nɛ. Nɛ nyɔngɔmɔ ma dunu sɛ kɔ tɔanɔ 'da nɛ. Mi kɔ̃́ sɛ 'bɔ na, ogele winɔ wa mɔmɔ nɛ fala kpo gɔ.

²⁰ Mi ndaka sɛ odɔlanɔ, kɛ wa yula tɛ si gbãlã ngɔ i ni, nɛ mi a sɛ wa li go, kɛ mbé mɔ wè tɛ hɔ li nɛ gɔ ni. Mi da sɛ ngɔ gili wanɔ kɛ wa kpia dati ni 'dɔ Ndɔ Fio, nɛ mi da ngɔ gili wanɔ kɛ wa kpia 'do ni 'dɔ gba lì Meditɛrane. Odɔlanɔ ni wa fe sɛ, nɛ fala tɛ mbulu wa ma unu sɛ kpãa, nɛ ma 'danga sɛ bũi vɛ̃. Mi dɛ sɛ ni we kumu wa olo ngamɛ wa hã zi hã nɛ ni.”

²¹ Mbé kili sɛ 'bɔ ngɔ nyanga nza gɛ bina, nɛ gã yangga ma le sɛ ngɔ nùi, tua kɛ NWA dɛa gba mɔ hã nɛ.

²² Nɛ kili bá sɛ 'bɔ osa'denɔ gɔ. Owɔkɔsɔ ngɔ kalanɔ ma tɛ kunu nɛ, nɛ ote figɛ, do ote vinɔ, do ogele tenɔ ma tɛ wala nɛ.

²³ Aa nɛ, Owi Sioni, nɛ dɛ́ yangga, nɛ nɛ te salangga we duzu NWA Gale 'da nɛ. Zɔlɔ li kolo hɔ, nɛ a tombo kole we kpasa nɛ. A fi kole hã nɛ do li zɔlɔ nɛ kpo do kpo, ɔ nɛ kɛ zi dati ni.

²⁴ Kpalɛnɔ ma dunu ngɔ yangganɔ, nɛ dɔ̃ do nɔ ma dunu okpananɔ.

²⁵ NWA tɔ̃a na: “Mi gese sɛ mɛnɔ vɛ̃ kɛ ma 'danga zi kɔ̃ nɛ kɔ sabɛlɛ kɛ ma la ni hã nɛ. Mi gese sɛ kpalɛnɔ kɛ Odɔkɔnɔ, odɔlanɔ, ogɔvĩnɔ, do osisiwelenɔ wa 'danga zi ni hã nɛ. Ĩ na, mi zi a mi tumba osa'denɔ ni we bi nɛ.

²⁶ Kɔ ngangga gɛ, nɛ nyɔngɔ sɛ mɔ, nɛ zã nɛ hɛ̃, nɛ nɛ dɔnggɔ sɛ mi, NWA Gale 'da nɛ, kɛ mi dɛa ɔngbamɔ we nɛ ni. Nɛ Owele wa ha sɛ 'bɔ sape hã nɛ, owinɔ 'da mi fala kpo gɔ.

²⁷ Na mɛ ni, nɛ nɛ, obe Israɛlɛ, nɛ ĩ sɛ na, mi do nɛ boe. Nɛ nɛ ĩ sɛ na, NWA Gale 'da nɛ wi a mi, nɛ fo gele gale olo mi bina. Nɛ Owele wa hã sɛ 'bɔ sape hã nɛ, owinɔ 'da mi fala kpo gɔ.”