YƆƐLƐ 1 - WE NU GALE 1995

¹ Nɛ zélé lɛnggɛnɔ kɛ NWA wila zi hã Yɔɛlɛ, be 'da Pɛtuɛlɛ gɛ.

Odɔla wa te sɛ ngɔ nùi

² Aa nɛ, okumunɔ, nɛ zélé wenɔ mi nɛ tɔ̃ ma ni! Nɛ nɛ, owi ngɔ nù Yuda vɛ̃, nɛ gɛ́ zala nɛ! Kuti mɔ ɔ nɛ kɛ gɛ, ma dɛa zi mbe tɛ̃ ɛ dati fala kpo dɛ gbali nɛ, tabi dɛ gbali oyaa nɛ nde?

³ Nɛ tɔ̃́ we nɛ hã obenɔ 'da nɛ, nɛ wa tɔ̃ sɛ tɛ mɛ 'bɔ hã obenɔ 'da wa, sɛ nɛ obenɔ ni wa tɔ̃ tɛ mɛ 'bɔ hã onu fɛlɛ kulanɔ 'do gɛ de.

⁴ Odɔkɔ wa tia zu kpalɛnɔ dɛlɛ wena, nɛ wa nyɔngɔ ma. Tala kpalɛnɔ kɛ wa la ma ni, nɛ odɔlanɔ wa nyɔngɔ ma. Tala kɛ odɔlanɔ wa la ni, nɛ ogɔvĩnɔ wa nyɔngɔ ma. Tala kɛ ogɔvĩnɔ wa la ni, nɛ osisiwelenɔ wa nyɔngɔ ma.

⁵ Aa nɛ, owi bá dɔ̃nɔ, nɛ túnú hã nɛ hé kɔ̃a! Nɛ nɛ, owinɔ vɛ̃ kɛ nɛ nɔ dɔ̃ nɔa ni, nɛ hé kɔ̃a tɛ nɛ, we kɛ odɔlanɔ wa 'danga te vinɔnɔ vɛ̃, nɛ nɛ kpá sɛ 'bɔ mbé dɔ̃ gɔ.

⁶ Gba gili odɔla wa tia ngɔ nùi 'da lɛ. Wa dɛlɛ wena, nɛ wa 'danga mɛnɔ wena. Gogo wa tɔ̃a ɔ nɛ gogo gbɔgbɔ ni.

⁷ Wa 'danga te vinɔnɔ do te figɛnɔ 'da lɛ do'do. Wa ngete okɔa 'do nɛ, nɛ nga te ɔ dɛ nza iko.

⁸ Nɛ hé kɔ̃a tɛ nɛ ɔ nɛ be zɔnga kɛ wili a fia do'do, nɛ a do 'bako wena ni.

⁹ Owinɔ wa tɛ́ 'bɔ kɔ tɔa Tɛmpɛlo nga do okpalɛ, do dɔ̃ we dɔnggɔ do Gale gɔ. We duzu ma, onganganɔ kɛ wa dɛ toe hã Gale ni, wa do 'bako.

¹⁰ Ofɔnɔ ma 'danga, nɛ 'bako tia ngɔ nùi. Mbé kpalɛ 'bɔ bina, mbé wala te vinɔ we kpĩlĩ ma 'bɔ bina, nɛ mbamba lì nɔ bi sĩ bina.

¹¹ Owi wa fɔnɔ wa kɔ 'bako, nɛ owi mi te vinɔnɔ wa he kɔ̃a tɛ wa iko. Mbamba kpalɛ kpo 'bànà gɔ, mɛnɔ ma kumu vɛ̃ do'do.

¹² Ote vinɔnɔ do ote figɛnɔ ma kula. Nɛ tenɔ vɛ̃ kɛ ma wa wala ni, ma wè 'bɔ tɛ gã nɛ gɔ. Nɛ yangga 'da owinɔ ma ia vɛ̃ do'do.

Yɔɛlɛ ba nu ɛ na, winɔ wa ala nu wa hã NWA

¹³ Aa nɛ, onganganɔ, kɛ nɛ gbɛ sa'denɔ we dɔnggɔ do Gale ni, nɛ hé'dé tulu gɛla, nɛ nɛ hé kɔ̃a tɛ nɛ! Nɛ, kɛ nɛ a Owi tonɔ 'da Gale 'da lɛ ni, nɛ dɛ́ 'bako, nɛ yala tɛ gbò li nɛ gɔ, tua kɛ owinɔ wa tɛ́ 'bɔ kɔ tɔa Tɛmpɛlo nga do okpalɛ, do dɔ̃ we dɔnggɔ do Gale gɔ.

¹⁴ Nɛ bá nu nɛ hã winɔ na, wa bɛ̃ nyɔngɔmɔ we dɔnggɔ Gale. Nɛ sá mɔ hã wa na, wa tɛ vɛ̃ tɛ gã mba li ngba wi. Nɛ mbá li okumunɔ, do owinɔ vɛ̃ dɛ kɔ tɔa Tɛmpɛloe 'da NWA Gale 'da lɛ, nɛ nɛ álá nu nɛ hã a.

Kɔ̃ tũi kɛ NWA a gɔnɔ sɛ ngbangga 'da winɔ

¹⁵ 'Bako wena, kɔ̃ tũi kɛ NWA Gale a gɔnɔ sɛ ngbangga 'da winɔ ni, ma kɔla ia! Mɛ a kɔ̃ tũ kɛ Gale do nganda vɛ̃, a 'danga sɛ mɛnɔ yerr.

¹⁶ Okpalɛ li fɔnɔ 'danga dɛ li nɛ gɛ. Nɛ fo 'bɔ yangga kɔ Tɛmpɛloe 'da Gale 'da lɛ bina.

¹⁷ Okpalɛnɔ wa mi ni, ma mbulu ti nù i do'do, nɛ kɛnɔ ngɔ yangganɔ ma ia kpɛrr.

¹⁸ Nɛ zélé hiamɔ wɛ kɛ ongɔmbɛnɔ wa he ni! Wa pɛsa tɛ yɛnggɛ do gele fala, tua kɛ wa 'bɔ do dia wɔkɔsɔ we nyɔngɔ ma bina. Nɛ obatanɔ wa tɛ fe nɛ.

Sambala 'da Yɔɛlɛ

¹⁹ Mi he mɔ dɛ 'da mɔ NWA, tua kɛ dia wɔkɔsɔnɔ ngɔ kalanɔ, do otenɔ kɔ fɔnɔ, ma kumu vɛ̃ ɔ nɛ kɛ we bɛlɛ ma bɛla ni.

²⁰ Nɛ osa'de zamɛnɔ wa tɛ he mɔ dɛ 'da mɔ, tua kɛ lìnɔ ɔ̃sã vɛ̃, nɛ odia wɔkɔsɔnɔ ma kula do'do.