YOANƐ 9 - WE NU GALE 1995

Yezu kpasa wi tandu

¹ Yezu zi tɛ la ma, nɛ a zɔ mbe wi tandu, wa kua do a kɔ zã.

² Nɛ owi yambala mɛnɔ 'da Yezu wa aka a na: “Wi be mɔ, nɛ́ kɛ wa kua wi gɛ do tandui ní, a kpa kunda olo 'dã mɛ 'da a, tabi olo kɛ 'da owi ko a nde?”

³ Nɛ Yezu gese hã wa na: “Tandui ni, ma we 'dã mɛnɔ 'da a gɔ, nɛ ma 'bɔ we 'dã mɛnɔ 'da owi ko a gɔ. Nɛ nde wa kua a na mɛ ni, takɔ Gale dɛ gba mɔ do wala 'da a.

⁴ Fala kɛ wese 'bana ngɔ, nɛ ma wia na, lɛ dɛ mɛnɔ kɛ zã Wi tombo mi kɔ̃a ni. Nɛ nde tũi kɔlɔ tũ nɛ ia, nɛ wele wé sɛ 'bɔ tɛ dɛ to gɔ.

⁵ 'Da fala kɛ mi 'bana ngɔ nù gɛ ni, nɛ mi a sa fala kɛ ma sa ngɔ nù gɛ ni.”

⁶ Yezu tɔ̃a wenɔ ni ní do'do, nɛ a tufu sa nu a nù, nɛ a nzakata do nùi vɛ̃, nɛ a kɔ 'bɛ̃tɛ̃ nɛ ngɔ li wi tandui ni.

⁷ Nɛ a tɔ̃ hã a na: “Mɔ nɛ́, kɔ mɔ fɔ́lɔ́ li mɔ tɛ 'dɔ zã lì Siloe.” (Gulu li Siloe na: “Wa tumba a.”) Nɛ wi tandui la, nɛ a fɔlɔ li a. Kɔ a nɛ kpolo tɛ̃ a, nɛ nde a zɔ mɔ zɔa.

⁸ Nɛ ongba a wi tɔanɔ, do wanɔ kɛ wa zɔa zi a tɛ gɔ mɛnɔ ni, wa aka ngba wa na: “Wi dungu zi tɛ gɔ mɛnɔ gɛ, a a ni gɔ nde?”

⁹ Nɛ ombe wa tɔ̃ na: “Wi a a.” Nɛ ombe nɛ na: “Ɔ̃ ɔ̃, wi a a gɔ. A wia kɔ̃ do wi ni wia iko.” Nɛ a tɔ̃ na: “Wi a mi.”

¹⁰ Nɛ wa aka a na: “Li mɔ dɛa fala gɛ̃lɛ̃ nɛ ni nɛ nde?”

¹¹ Nɛ a gese na: “Wi kɛ li a a Yezu ni, a dɛa 'bɛ̃tɛ̃, nɛ a kɔ ngɔ li mi, nɛ a tɔ̃ hã mi na, mi nɛ́, kɔ mi fɔ́lɔ́ li mi tɛ Siloe. Nɛ mi nɛa, kɔ mi nɛ fɔlɔ li mi, nɛ mi ndo zɔ mɔ.”

¹² Nɛ wa aka 'bɔ a na: “Kɔ wi ni a do nde?” Nɛ a gese na, ɛ ĩ̀ fala a gɔ.

Ofariziɛnɔ wa aka wi tandui zi ni

¹³ Nɛ wa ba wi tandui zi ni, nɛ wa nɛ do a dɛ dati Ofariziɛnɔ.

¹⁴ Ĩ na, tũi kɛ Yezu dɛa zi do 'bɛ̃tɛ̃, kɔ li wi ni gɛ̃lɛ̃ nɛ ni zi a tũ ɔmɔ tɛ wi.

¹⁵ Nɛ Ofariziɛnɔ wa aka wi ni we mɛ ma dɛa tɛ̃ ɛ na, a zɔ mɔ ni. Nɛ a tɔ̃ hã wa na: “Yezu kɔa 'bɛ̃tɛ̃ ngɔ li mi, nɛ mi nɛa, nɛ mi fɔlɔ, nɛ mi zɔ mɔ.”

¹⁶ Nɛ ombe Fariziɛnɔ wa tɔ̃ na: “Wi dɛa mɛ gɛ wè tɛ yolo 'da Gale gɔ, we kɛ a dɔ̃nggɔ̀ mbula ɔmɔ tɛ wi gɔ.” Nɛ ombe nɛ wa na: “Wele a wi dɛ 'dã mɔ, nɛ nde a dɛ́ ogba sɔ̃ mɔ ɔ nɛ kɛ gɛ gɔ.” Nɛ sanga wa gɔna bɔa.

¹⁷ Nɛ Ofariziɛnɔ wa aka 'bɔ wi tandui zi ni na: “Kɛ 'da mɔ, we mɔ tɔ̃ ngɔ wi kɛ a hũi li mɔ gɛ na ge nde?” Nɛ a gese na: “A a wi gba olo nu Gale.”

¹⁸ Nɛ nde onwa Yudanɔ wa kɔ̃̀ zi we zele na, wi ni a zi a wi tandu, hã a hɔa wi zɔ mɔ ni gɔ. Nɛ wa sa mɔ hã owi ko a,

¹⁹ nɛ wa aka wa na: “Wi gɛ a be 'da nɛ, kɛ nɛ kua zi a do tandui ni nde? Nɛ mɛ ma dɛa tɛ̃ ɛ, kɔ a hɔa wi zɔ mɔ ni a ge nde?”

²⁰ Nɛ owi ko a wa gese na: “li, lɛ ĩ ngboo na, a a be 'da lɛ, kɛ lɛ kua zi a do tandui ni.

²¹ Nɛ nde lɛ ĩ̀ ti mɛ ma dɛa tɛ̃ ɛ, kɔ a hɔa wi zɔ mɔ ni gɔ. Nɛ lɛ ĩ̀ 'bɔ ti wi kɛ a hũi li a ni gɔ. Kɔ nɛ áká a do tɛ̃ a ngboo, a gã gã, a gese sɛ nu nɛ hã nɛ.”

²² Owi ko a wa tɔ̃a na mɛ ni, we duzu kɛ wa dɛ zi kili onwa Yudanɔ. Mba gɔ, nu onwa Yudanɔ wia zi kɔ̃ vɛ̃ na, fala kɛ wele tɔ̃ na, Yezu a Mɛsiya, nɛ wa ndaka wi ni kɔ tɔa mbula do'do.

²³ Ma hã owi ko wi ni wa tɔ̃a zi na, a gã gã, kɔ nɛ aka a do tɛ̃ a ni.

²⁴ Nɛ Ofariziɛnɔ wa sa 'bɔ mbé mɔ hã wi tandui zi ni, nɛ wa tɔ̃ hã a na: “Mɔ káná tɛ mɔ dati Gale na, mɔ tɔ̃ gbãlã we! Lɛ ĩ na wi gɛ a wi dɛ 'dã mɔ.”

²⁵ Nɛ a gese na: “A tabi a wi dɛ 'dã mɔ, tabi gɔ nde, mi ĩ̀ gɔ. Nɛ nde mɛ mi ĩ ti nɛ kpo gɛ na, mi zi a wi tandu, kɔ ngangga ni, mi zɔ mɔ zɔa.”

²⁶ Nɛ wa aka 'bɔ a na: “A dɛa do mɔ nɛ nde? A dɛa do kɛ a hũi li mɔ ni nɛ nde?”

²⁷ Nɛ a gese hã wa na: “Mi tɔ̃a sɔ hã nɛ ia, nɛ nɛ zèlè gɔ nde? Kɔ gulu kɛ nɛ kɔ̃a 'bɔ we zele 'bɔ mi mbé nɛ ni we ge nde? Nɛ kɔ̃a tabi we hɔ winɔ 'da a nde?”

²⁸ Nɛ wa dã a vɛ̃, nɛ wa tɔ̃ hã a na: “Mɔ, mɔ a wi 'da a! Lɛ gɛ a owinɔ 'da Mɔizɛ.

²⁹ Nɛ lɛ ĩ na, Gale wele zɛ́ we hã Mɔizɛ wila, nɛ nde lɛ ĩ̀ ti fala kɛ wi gɛ yula nɛ ni gɔ!”

³⁰ Nɛ wi ni gese na: “Nɛ zɔ́ ɔngbamɔ kɛ gɛ! Nɛ ĩ̀ ti fala a yula nɛ ni gɔ, gɛnɛ kɔ na mɛ ni, nɛ nde a hũi li mi!

³¹ Lɛ ĩ na, Gale zélé owi dɛ 'dã mɔ gɔ, nɛ nde a zele wi kɛ a dɔnggɔ a, nɛ a dɛ 'bɔ mɛ kɛ zã a kɔ̃a ni.

³² Fai gɛ, lɛ zèlè mbe fala kpo na, wele hũi li wele kɛ wa kua a do tandu ni gɔ.

³³ Kɔ wi gɛ yòlò sɔ 'da Gale gɔ, nɛ nde a wé sɔ we dɛ ɔngbamɔ kpo gɔ.”

³⁴ Nɛ wa gese hã a na: “Mɔ gɛ, wa kua zi mɔ kɔ 'dã mɔ, kɔ mɔ kɔ̃a we be we hã lɛ nde?” Nɛ wa ndaka a kɔ tɔa mbula do'do.

Ofariziɛnɔ wa ɔ nɛ wi tandu ni

³⁵ Yezu nɛa we zele na, wa ndaka wi tandui zi ni kɔ tɔa mbula do'do ni, nɛ a nɛa, nɛ a kpa a. Nɛ a aka a na: “Mɔ kɔ̃a zu li Be 'da Wele nde?”

³⁶ Nɛ a gese na: “Nwa, wi mi nɛ kɔ̃ zu li ania wio nde? Mɔ be a hã mi, takɔ mi kɔ̃ zu li a.”

³⁷ Nɛ Yezu tɔ̃ hã a na: “Mɔ zɔa wi ni ia. Wi a mi kɛ mi tɔ̃ we hã mɔ gɛ.”

³⁸ Nɛ wi ni gese hã a na: “Nwa, mi kɔ̃a!” Nɛ a gu nù ti Yezu.

³⁹ Nɛ Yezu tɔ̃ hã owinɔ na: “Mi tɛa ngɔ nù gɛ, takɔ mi gɔnɔ sanga owinɔ, takɔ wanɔ kɛ wa a wi tandu ni, wa zɔ mɔ, nɛ wanɔ kɛ wa zɔ mɔ zɔa ni, li wa lɔ.”

⁴⁰ Nɛ ombe Fariziɛnɔ kɛ wa zi di ni ni, wa zila we ni, nɛ wa aka a na: “Ní nɛ nde lɛ tɛ mɛ 'bɔ a owi tandu nde?”

⁴¹ Nɛ Yezu gese hã wa na: “Ɔ do kɛ nɛ sɔ a wi tandu, nɛ nde nɛ té sɔ do we gɔ. Kɔ nɛ́ kɛ nɛ tɔ̃a na, lo zɔ zɔa mɔ ni, nɛ tia do we.”