YOANƐ 7 - WE NU GALE 1995

Onya Yezu wa kɔ̃̀ zu li a gɔ

¹ 'Do nɛ, nɛ Yezu yɛngga do ngɔ nù Galile, nɛ nde a kɔ̃̀ zi we yɛnggɛ ngɔ nù Yude gɔ, we kɛ onwa Yudanɔ wa fa zi we gbɛ a gbɛa.

² Nɛ ngba soe ɛngga Ɔ ti Da 'da Yudanɔ kɔla,

³ nɛ onya Yezu wa tɔ̃ hã a na: “Mɔ lá mbe dɛ Yude i, takɔ owinɔ 'da mɔ i mɔ ni, wa zɔ tɛ mɛ 'bɔ mbe mɛnɔ mɔ dɛ gɛ.

⁴ Mba gɔ, fala kɛ wele kɔ̃ na, wa ĩ ti ɛ wena nde, nɛ a wè tɛ usu mɛnɔ a dɛ ni usu gɔ. Kɔ nɛ́ kɛ mɔ dɛ oɔngbamɔ ni, ma wia na, mɔ dɛ ma dɛ li winɔ vɛ̃, kɔ wa zɔ.”

⁵ (Onya Yezu wa tɔ̃ zi na mɛ ni, we duzu kɛ wa kɔ̃̀ zu li a gɔ.)

⁶ Nɛ Yezu gisa hã wa na: “Ngba soe kɛ Gale saka we mi ni tɛ wè gɔ. Nɛ nde we duzu nɛ, ngba soenɔ vɛ̃ wi wia iko.

⁷ Winɔ nù gɛ, wa wè tɛ sɛnɛ nɛ gɔ, nɛ nde wa tɛ sɛnɛ mi, we duzu kɛ mi be dɛ nza na, mɛnɔ wa dɛ ni, ma dè gɔ.

⁸ Kɔ nɛ nɛ́ kɛ 'da nɛ we ɛngga ni. Nɛ nde we mi, mi nɛ́ sɛ ngangga ni gɔ, we kɛ ngba soe 'da mi tɛ wè gɔ.”

⁹ Yezu tɔ̃a wenɔ ni ní vɛ̃, nɛ a 'bana dɛ Galile ni.

Yezu nɛa ɛngga Ɔ ti Da

¹⁰ Onya Yezu wa la ɛngga do'do, nɛ Yezu la tɛ mɛ 'bɔ 'do wa do usu nɛ.

¹¹ Nɛ onwa Yudanɔ wa ma ngɔ fa a, tɛ aka na: “A a i do nde?”

¹² Nɛ ogba gili winɔ wa tɔ̃a we 'da a wena do usu nɛ dɛ sanga ngba wa. Ombe wa na: “A a dia wele,” nɛ ombe nɛ na: “Ma a ni gɔ. A ɔlɔ winɔ iko.”

¹³ Nɛ nde wele wè zi tɛ wele we 'da a dɛ wila fala gɔ, we duzu kɛ wa dɛ zi kili onwa Yudanɔ.

¹⁴ Nɛ ma nɛa we hɔ tɛ gbogbo zã ɛngga, nɛ Yezu le kɔ tɔa Tɛmpɛloe, nɛ a ma ngɔ be we.

¹⁵ Kɔ onwa Yudanɔ wa nɛa we zele bia we 'da a, nɛ wa ɔngbɔ do ma wena, nɛ wa ma ngɔ aka ngba wa na: “Dɛ do kɛ wi gɛ yàmbàlà mɔ gɔ, nɛ a ĩ ti mɛnɔ wena ni nɛ nde?”

¹⁶ Nɛ Yezu tɔ̃ hã wa na: “Wenɔ mi be gɛ, ma yòlò kɔ mi gɔ, nɛ nde ma yula 'da Gale kɛ a tumba mi ni.

¹⁷ Kɔ fala kɛ wele dɛ mɛnɔ kɛ zã Gale kɔ̃a ni, sɛ nɛ a ĩ sɛ na, wenɔ mi be gɛ, ma yula 'da Gale, tabi ma yula kɔ mi zu mi kpo ni de.

¹⁸ Mba gɔ, wi kɛ a tɔ̃ lɛnggɛ kɛ ma yolo kɔ a iko ni, nɛ nde a fa dɔ̃lɔ̃ li 'da a zu a kpo. Kɔ wele kɛ a fa dɔ̃lɔ̃ li 'da wi tumba a ni, nɛ a tɔ̃ gbãlã we, nɛ a 'bílí bɛlɛ fala kpo gɔ.

¹⁹ Nɛ ĩ na, Mɔizɛ bia zɛ́ mbula hã nɛ, nɛ nde mbe wele kpo sanga nɛ dɛ̃ ma gɔ. Kɔ gulu kɛ nɛ fa we gbɛ mi we ge nde?”

²⁰ Nɛ wa gisa hã a na: “Mɔ do 'dã hi wi kɔ mɔ. Wi fa we gbɛ mɔ a wio nde?”

²¹ Nɛ Yezu gese hã wa na: “Mi dɛa gba sɔ̃ mɔ kpo, nɛ nɛ vɛ̃ nɛ ɔngba do ma!

²² Mɔizɛ tɔ̃a zɛ́ hã nɛ na, fala kɛ bulu benɔ 'da nɛ wa ɔ tũ ngbɛ'dɛ'dɛ, nɛ nɛ gɔ́nɔ́ wa do gaza. Nɛ nde Mɔizɛ a ndò nyanga gɔnɔ benɔ gɔ, ma ndua zɛ́ 'da oyaa nɛ. Kɔ fala kɛ ngba soe gɔnɔ benɔ 'da nɛ ma lo ngbɛ ɛ do tũ ɔmɔ tɛ wi, nɛ nɛ gɔnɔ wa iko.

²³ Kɔ nɛ́ kɛ nɛ wia we gɔnɔ bulu be 'da nɛ do tũ ɔmɔ tɛ wi, nɛ nde nɛ gbìnì mbula 'da Mɔizɛ gɔ ni, nɛ gulu kɛ sila nɛ nɔ̃lɔ̃ dɛ tɛ mi, we kɛ mi kpasa kili tɛ wele do tũ ɔmɔ tɛ wi ni we ge nde?

²⁴ Nɛ lá fala 'bili we 'da winɔ we bula li wa do'do, kɔ nɛ 'bílí we 'da wa do bɔlɔ nɛ.”

Yezu a gbãlã we Mɛsiya nde?

²⁵ Nɛ ombe sanga owi Yeruzalɛmɛ wa tɔ̃ na: “Wi kɛ wa fa a we gbɛ a gɛ, a hɛ̃ gɔ nde?

²⁶ Kɔ nɛ zɔ́, a tɛ wele we dɛ li winɔ vɛ̃, nɛ nde wa dɛ́ mɔ do a gɔ. Ní nɛ nde Onwanɔ 'da lɛ wa ĩ na, a a Mɛsiya nde?

²⁷ Mɔ kpo a kɛ Mɛsiya hɔ, nɛ nde wele ĩ́ sɛ ti fala a yula nɛ ni gɔ. Ĩ na, kɛ 'da wi gɛ, lɛ ĩ ti fala a yula nɛ ni.”

²⁸ Nɛ Yezu tɛ be we kɔ Tɛmpɛlo i, nɛ a tɔ̃ hã wa dɛ ngɔ na: “Nɛ ĩ ti mi ngboo, nɛ nɛ ĩ ti fala mi yula nɛ ni nde? Ĩ na, mi tɛ̀ do kɔ sila mi iko gɔ. Wi tombo mi, a dɛ olo nu a fai, nɛ nɛ ĩ̀ ti a gɔ.

²⁹ Nɛ nde mi ĩ ti a de wena, we kɛ mi yula 'da a i, nɛ a a tumba mi.”

³⁰ Nɛ wa fa wala we ba Yezu, nɛ nde wele kpo wè zi we ba a gɔ, we kɛ ngba soe kɛ Gale saka we a ni, ma tɛ wè gɔ.

³¹ Nɛ ombe wena sanga gba gili winɔ ni, wa kɔ̃a zi zu li a. Nɛ wa ma ngɔ tɔ̃ na: “'Da fala kɛ Mɛsiya a tɛ sɛ ni, nɛ a dɛ sɛ 'bɔ mɔ nɛ ngɔ kɛ wi gɛ dɛ gɛ nde?”

Onwanɔ wa tumba owele we ba Yezu

³² Ofariziɛnɔ wa zila wenɔ kɛ winɔ wa tɔ̃ ngɔ Yezu do usu nɛ ni, nɛ wa do onwa nganganɔ, wa tombo Owi zɔ mɔ nu tɔa Tɛmpɛloe na, wa nɛ́, kɔ wa ba a.

³³ Nɛ Yezu tɔ̃ hã winɔ na: “Mi 'bana tɛ ɔ do nɛ bi sĩ, nɛ 'do nɛ, nɛ mi si sɛ dɛ 'da Wi tumba mi ni.

³⁴ Nɛ nɛ fa sɛ mi, nɛ nde nɛ kpá sɛ mi gɔ, we kɛ nɛ wè tɛ hɔ fala mi nɛ la nɛ ni gɔ.”

³⁵ Nɛ onwa Yudanɔ wa ma ngɔ aka ngba wa na: “Kɛ a tɔ̃ na, lɛ wé sɛ tɛ kpa ɛ gɔ gɛ, a nɛ la dɛ do nde? Tabi a nɛ la dɛ 'da onya lɛ Oyudanɔ, kɛ wa ɔ sanga ogele winɔ i ni, we be we hã ogele winɔ nde?

³⁶ Gulu we a tɔ̃a na: ‘Wele kpá sɛ ɛ gɔ, we kɛ wele wè tɛ hɔ fala ɛ nɛ la nɛ gɔɛ’ gɛ a ni nde?”

Lì kɛ ma hã kpasi hã Owele ni

³⁷ Do tala ngɔ go'do tũ ɛngga, nɛ wa dɛ mɔ ngele nɛ nɛ ngɔ tũnɔ dati ni. Nɛ do kɔ̃ tũi ni, nɛ Yezu kulu ngɔ dɛ dati ogili winɔ, nɛ a tɔ̃ dɛ ngɔ na: “Wi kɛ wɔ lì ba a ni, nɛ a tɛ́ 'da mi, nɛ mi hã sɛ lì hã a!

³⁸ Wa kɔma kɔ 'Buki 'da Gale na: ‘Wi kɛ a kɔ̃ zu li mi ni, nɛ lì kpasi ma kũ sɛ kɔ sila a ɔ nɛ 'de ni.’ ”

³⁹ (Yezu tɔ̃ zi ni a we ngɔ Hi Wi Santo na, winɔ wa kɔ̃ zu li ɛ ni, wa kpa sɛ a. Mba gɔ, do 'da fala ni, nɛ nde Gale tɛ tòmbò Hi Wi Santo gɔ, we kɛ Yezu tɛ kù zi dɛ li nza i gɔ.)

Bia we 'da Yezu gɔnɔ sanga owinɔ

⁴⁰ Owinɔ wa zila wenɔ Yezu tɔ̃a ni, nɛ wa na: “Wi gɛ a ngbongbo wi gba olo nu Gale kɛ wa tɔ̃a zɛ́ na, a tɛ sɛ gɛ!”

⁴¹ Nɛ ombe wa na: “A a Mɛsiya!” Nɛ ombe nɛ 'bɔ na: “Mɛsiya wè tɛ yolo Galile gɔ.

⁴² 'Buki 'da Gale tɔ̃a na, Mɛsiya sɛ a wi nu fɛlɛ Davidi, nɛ a yolo sɛ tɛ Bɛtleɛmɛ, le ma kua nwa Davidi ni.”

⁴³ Na mɛ ni, nɛ winɔ wa gɔnɔ sanga tɛ ngba wa we bia we 'da Yezu.

⁴⁴ Nɛ ombe sanga winɔ ni, wa kɔ̃a zi we ba a, nɛ nde wele kpo è kɔ̃ ɛ tɛ̃ a gɔ.

Onwa Yudanɔ wa kɔ̃̀ zu li Yezu gɔ

⁴⁵ Owi zɔ mɔ nu tɔa Tɛmpɛloe wa nɛa we kpolo tɛ wa, nɛ onwa nganganɔ do Ofariziɛnɔ wa aka wa na: “Gulu kɛ nɛ bà a gɔ we ge nde?”

⁴⁶ Nɛ owinɔ ni wa gese hã wa na: “Wele wèlè mbe we fala kpo ɔ nɛ wi ni gɔ.”

⁴⁷ Nɛ Ofariziɛnɔ wa aka wa na: “A ɔ́lá tɛ mɛ 'bɔ nɛ ia gɔ nde?

⁴⁸ Nɛ zɔa mbe wele sanga lɛ nwanɔ do Ofariziɛnɔ, kɛ a kɔ̃a zu li a ni nde?

⁴⁹ Nɛ nde gba gili winɔ kɛ wa kɔ̃a zu li a ni, wa ĩ̀ ti mbula kɛ Mɔizɛ kɔma ni gɔ, kɔ wa kpa fɔmba 'da Gale ia!”

⁵⁰ 'Da fala wa tɔ̃ do we ni, nɛ nde Nikodɛmɛ, Fariziɛ̃ kɛ a nɛa zi we zɔ Yezu ni boe. Nɛ a tɔ̃a hã wa na:

⁵¹ “Mbula 'da lɛ tɔ̃a na, fala kɛ wa kɔ̃ we 'bili we mɔ́ wele, nɛ ma wia na, wa zele we nu wi ni, we ĩ ti mɛ a dɛa ni do'do, sɛ nɛ wa ĩ ti 'bili we 'da a de.”

⁵² Nɛ wa aka a na: “Mɔ tɛ mɛ 'bɔ a wi Galile nde? Fala kɛ mɔ yambala 'Buki 'da Gale, nɛ mɔ zɔ sɛ na, mbe wi gba olo nu Gale kpo yòlò Galile gɔ.” [

⁵³ Nɛ 'do nɛ, nɛ wele do wele si dɛ nu tɔa 'da ɛ.