YOANƐ 6 - WE NU GALE 1995

Yezu hã nyɔngɔmɔ hã Owele koto mɔlɔ

¹ 'Do nɛ, nɛ Yezu la dɛ kulu gba ndɔ Galile, kɛ wa sa 'bɔ mbe li nɛ na Tiberiadɛ ni.

² Nɛ gba gili wele wa nɛa 'do a, we kɛ wa zɔa gba sɔ̃ mɛnɔ kɛ a zi tɛ dɛ ma, tɛ kpasa Owi zɛlɛmɛnɔ ni.

³ Kɔ a hɔa i mɔ, nɛ a kũ do owi yambala mɛnɔ 'da a dɛ ngɔ mbe kala kpo, nɛ wa dungu nù.

⁴ 'Da fala ni, nɛ nde ngba soe ɛngga Hɔ Nza kɔ Ngbá 'da Yudanɔ kɔla ia.

⁵ Nɛ Yezu fi li a, nɛ a zɔ gba gili winɔ kɛ wa tɛ dɛ 'da a nga ni, nɛ a aka Filipɛ na: “Fala lɛ nɛ oso do nyɔngɔmɔ hã winɔ gɛ vɛ̃ ni a do nde?”

⁶ (A aka zi na mɛ ni, takɔ a yamba sila Filipɛ iko, we kɛ a ĩ zi ti mɛ a nɛ dɛ ma ni ĩ.)

⁷ Nɛ Filipɛ gese hã a na: “Gɛnɛ kɔ lɛ oso mapa olo mbili kama bɔa, nɛ nde ma kpá sɛ zu winɔ gɛ gɔ.”

⁸ Nɛ mbe wi yambala mɛ 'da a kpo, li a a Andre, nya Simɔ Petro tɔ̃ hã a na:

⁹ “Mɔ zɔ́, mbe bulu be kpo tɛ dɛ, a do mapa ɔrzɛ mɔlɔ do kɔyɔ bɔa. Nɛ nde ma wé sɛ 'bɔ zu gba gili winɔ gɛ gɔ.”

¹⁰ Nɛ Yezu tɔ̃ hã owi yambala mɛnɔ 'da a na, wa tɔ̃́ hã winɔ, kɔ wa dungu nù. (Wɔkɔsɔ zi fala ni wena.) Winɔ ni vɛ̃, wa zi a owi wili kɔlɔ do koto mɔlɔ.

¹¹ Nɛ Yezu kala mapa mɔlɛ ni, nɛ a hã iɔ̃nae hã Gale, nɛ a gbini sanga nɛ, nɛ a hã ma hã Owi yambala mɛnɔ na, wa kṹ hã winɔ ni. Nɛ a kala 'bɔ kɔyɔnɔ ni, nɛ a dɛ 'bɔ ɔ nɛ kɛ a dɛa do mapa ni, nɛ a hã ma hã wa na, wa kɛ. Nɛ wele do wele kpa ɔ nɛ kɛ ma wia do a ni.

¹² Nɛ wa nyɔnga ní gbaa, nɛ zã wa hɛ̃. 'Do nɛ, nɛ Yezu tɔ̃ hã owi yambala mɛnɔ na: “Nɛ ngɛ́mɛ́ tala kɛnɔ ma 'bana ni na, dɔ ma 'dángá iko gɔ.”

¹³ Nɛ owi yambala mɛnɔ wa ngɛma tala mapanɔ do kɔyɔnɔ, nɛ ma dunu sanggi 'bu ngɔ nɛ bɔa.

¹⁴ Kɔ winɔ ni wa zɔa gba sɔ̃ mɛ kɛ Yezu dɛa ni, nɛ wa tɔ̃ na: “Wi gɛ a ngbongbo wi gba olo nu Gale kɛ wa tɔ̃a zɛ́ na, a tɛ sɛ ngɔ nù gɛ ni!”

¹⁵ Nɛ Yezu zɔa na, winɔ ni wa kɔ̃a we ba ɛ, takɔ wa e ɛ do nwa ngɔ wa. Nɛ a fua tɛ̃ a sanga wa, nɛ a kũ 'bɔ dɛ ngɔ kala i zu a kpo.

Yezu la ngɔ lì do nyanga ɛ

¹⁶ Wese nɛa we gɛ̃ nɛ, nɛ owi yambala mɛnɔ wa la dɛ nu gba ndɔ i.

¹⁷ Nɛ wa kũ kɔ mbe ga kpo, nɛ wa ma ngɔ kũ dɛ kulu lì i, we la dɛ Kafarnaumɛ. Do 'da fala ni, nɛ nde tũi tũ ia, nɛ Yezu tɛ tɛ̀ dɛ 'da wa nga gɔ.

¹⁸ Nɛ gba bũ ma ngɔ dɛ nganda wena, tɛ yaka lì.

¹⁹ Nɛ wa la ni gbaa, kɔ 'do wa nɛa we nyɛlɛ ɔ nɛ kilomɛtrɛ mɔlɔ tabi gazɛlɛ ni, nɛ wa zɔ Yezu, nɛ nde a kɔla do wa, kɔ a tɛ tɛ dɛ 'da wa nga do ngɔ lì do nyanga a. Nɛ kili ba wa wena.

²⁰ Kɔ Yezu nɛa we zɔ na, wa dɛ kili wena ni, nɛ a tɔ̃ hã wa na: “Nɛ tɛ dɛ̀ kili gɔ, wi a mi.”

²¹ Nɛ wa kɔ̃a we e a kɔ ga, kɔ wa nɛ ka mɔ, nɛ nde wa hɔa sɔ dɛ nu lì fala wa nɛ dɛ tɛ nɛ ni ia.

Gba gili wele wa fa Yezu

²² Fala nɛa we sa 'do nɛ, nɛ gba gili winɔ kɛ wa 'bana zɛ kulu lì i ni, wa zɔa na, fo Yezu sanga wa bina. Ĩ na, ga zɛ dɛ nu lì ni kpo iko, nɛ owi yambala mɛnɔ wa la zɛ nɛ, nɛ Yezu là do wa gɔ.

²³ Nɛ titole ni, Owele wa yula do tɛ le Tiberiadɛ, nɛ wa hɔ do oga tɛ fala Nwa Yezu hã zɛ iɔ̃nae hã Gale we mapa, nɛ winɔ wa nyɔngɔ ni.

²⁴ Nɛ ɔ nɛ kɛ winɔ zɛ ni wa zɔa na, fo Yezu do Owi yambala mɛnɔ 'da a bina ni, nɛ wa kũ kɔ oganɔ ni, nɛ wa kũ lì dɛ Kafarnaumɛ i, we fa Yezu.

Yezu a nyɔngɔmɔ kɛ ma hã kpasi hã wele ni

²⁵ Nɛ winɔ ni wa kũ ndɔɛ, kɔ wa nɛ hɔ kulu nɛ i, nɛ wa kpa Yezu, nɛ wa aka a na: “Wi be mɔ, mɔ hɔa i nga soe ki nge nde?”

²⁶ Nɛ Yezu gese hã wa na: “Mi tɔ̃ hã nɛ do gbãlã we na, nɛ fa mi we duzu kɛ nɛ nyɔnga zɛ mapa, nɛ zã nɛ hɛ̃a ni iko. Nɛ nde nɛ fà mi, we kɛ nɛ ĩ ti gulu gba sɔ̃ mɛ mi dɛa zɛ ni gɔ.

²⁷ Kɔ nɛ lá fala dɛ to we fa nyɔngɔmɛnɔ kɛ ma 'da 'danga ni, nɛ nɛ fá nyɔngɔmɛ kɛ ma ɔ fai, nɛ ma hã kpasi kɛ ma é sɛ gɔɛ ni. Nɛ nde wi a mi Be 'da Wele hã mi hã sɛ nyɔngɔmɛ ni hã nɛ, we kɛ Gale, Baa mi bia na, mi do ngawi 'da a kɔ mi boe.”

²⁸ Nɛ wa aka a na: “Na mɛ ni, we dɛ mɛnɔ kɛ zã Gale kɔ̃a ni, nɛ lɛ dɛ nɛ nɛ nde?”

²⁹ Nɛ Yezu gese hã wa na: “Mɛnɔ kɛ zã Gale kɔ̃a na nɛ dɛ́ ni, mɛ a kɔ̃ zu li mi kɛ a tumba mi ni.”

³⁰ Nɛ wa tɔ̃ hã a na: “Ní a ɔngbamɛ ngboo mɔ nɛ dɛ ma, kɔ lɛ zɔ, takɔ lɛ kɔ̃ zu li mɔ ni a ge nde? Mɛ mɔ nɛ dɛ ma ni a ge nde?

³¹ Oyaa lɛ wa nyɔngɔ zɛ́ mana tɛ li gba zɔ̃ i, nɛ wa kɔma we nɛ kɔ 'Buki na: ‘A hã zɛ́ nyɔngɔmɔ kɛ ma yolo tɛ li nza ni hã wa.’ ”

³² Nɛ Yezu gese hã wa na: “Mi tɔ̃ hã nɛ do gbãlã we na, 'da fala nyɔngɔmɛ yolo zɛ́ ngɔ i, nɛ ma ala hã oyaa nɛ ni, nɛ nde Mɔizɛ zɛ́ a tómbó ma gɔ. Ĩ na, Baa mi a hã ngbongbo nyɔngɔmɛ li nza i ni hã nɛ.

³³ Mba gɔ, nyɔngɔmɛ kɛ Baa mi hã ma ni, mɛ a kɛ ma yula li nza i, nɛ ma hã kpasi hã winɔ ngɔ nù gɛ.”

³⁴ Nɛ wa tɔ̃ hã a na: “Aa nwa, mɔ kɔ̃, nɛ mɔ ha nyɔngɔmɛ mɔ tɔ̃ nɛ ni hã lɛ fai.”

³⁵ Nɛ Yezu tɔ̃ hã wa na: “Mi a nyɔngɔmɔ kɛ ma hã kpasi hã wele ni. Wi kɛ a tɛ 'da mi, nɛ a ɔ́ sɛ wɔ gɔ, nɛ wele kɛ a kɔ̃ zu li mi ni, wɔ lì bá sɛ 'bɔ a gɔ.

³⁶ Kɔ mi tɔ̃ hã nɛ na, gɛnɛ kɔ nɛ zɔa mi, nɛ nde nɛ kɔ̃̀ zu li mi gɔ.

³⁷ Winɔ vɛ̃ kɛ Baa mi hã wa hã mi ni, wa tɛ sɛ dɛ 'da mi, nɛ mi ndáká sɛ wele kpo sanga wa ni gɔ.

³⁸ Mba gɔ, mi yula li nza i, nɛ mi zĩlĩ nù nga, takɔ mi dɛ mɛnɔ kɛ zã Wi tombo mi kɔ̃a ni, nɛ nde mi dɛ́ a mɛ kɛ zã mi kɔ̃a ni gɔ.

³⁹ Wi tombo mi kɔ̃̀ na, mi yɔ mbe sanga winɔ ɛ hã wa hã mi ni kpo gɔ. Nɛ nde a kɔ̃a na, do ndɔti nùi, nɛ mi tunu sɛ wanɔ kɛ wa fia zi ni kɔ fio, takɔ wa ɔ do kpasi.

⁴⁰ We duzu kɛ Baa mi kɔ̃a na, winɔ vɛ̃ kɛ wa zɔa mi Be 'da a, nɛ wa kɔ̃a zu li mi ni, wa kpa kpasi kɛ ma é sɛ gɔ ni. Nɛ do ndɔti nùi, nɛ mi tunu sɛ wa kɔ fio, takɔ wa ɔ do kpasi.”

⁴¹ Oyudanɔ wa nɛa we zele ní, nɛ wa lungu Yezu, we kɛ a tɔ̃a na, ɛ a nyɔngɔmɔ kɛ ma yula li nza i ni.

⁴² Nɛ wa ma ngɔ tɔ̃ na: “A a Yezu, be 'da Yozɛfu gɔ nde? Lɛ ĩ ti baa a do naa a ĩ. Kɔ gulu kɛ a tɔ̃ na, ɛ yula li nza ni we ge nde?”

⁴³ Nɛ Yezu gese hã wa na: “Nɛ tɛ lùngù we gɔ.

⁴⁴ We kɛ wele wè tɛ tɛ dɛ 'da mi do ngawi 'da a iko gɔ. Baa mi kɛ a tumba mi ni, a tombo wele dɛ 'da mi, sɛ nɛ wi ni tɛ de. Nɛ do ndɔti nùi, nɛ mi tunu sɛ wi ni kɔ fio, takɔ a ɔ do kpasi.

⁴⁵ Owi gba olo nu Gale wa kɔma zɛ́ na: ‘Gale a be sɛ we 'da a hã winɔ vɛ̃.’ Kɔ wele kɛ a zele bia we 'da Gale, kɔ a kɔ̃ gɛnɛ nɛ, nɛ a tɛ 'da mi.

⁴⁶ Gulu nɛ na, wele zɔ̃ Gale gɔ. Nɛ nde tati a wele kɛ a yula 'da Gale i ni hã a zɔa a iko.

⁴⁷ “Mi tɔ̃ hã nɛ do gbãlã we na, wele kɛ a kɔ̃ zu li mi ni, a do kpasi kɛ ma é sɛ gɔ ni.

⁴⁸ Mi a nyɔngɔmɔ kɛ ma hã kpasi kɛ ma é sɛ gɔ ni.

⁴⁹ Oyaa nɛ wa nyɔngɔ zɛ́ mana li gba zɔ̃ i. Gɛnɛ kɔ na mɛ ni, nɛ wa fia vɛ̃.

⁵⁰ Kɔ fala kɛ wele nyɔngɔ nyɔngɔmɛ kɛ ma yula li nza i ni, nɛ nde a fé sɛ gɔ.

⁵¹ Mi a nyɔngɔmɛ kɛ ma yula ngɔ i, nɛ ma hã kpasi ni. Fala kɛ wele nyɔngɔ ma, nɛ a sɛ do kpasi fai. Nyɔngɔmɛ mi hã sɛ ma hã nɛ ni, mɛ a kili tɛ mi. Mi hã sɛ ma, takɔ winɔ ngɔ nù gɛ, wa kpasa.”

⁵² Oyudanɔ wa nɛa 'bɔ we zele na mɛ ni, nɛ zã wa nɔ̃lã, nɛ wa ma ngɔ ba kafi nu ngba wa na: “Dɛ do kɛ wi gɛ wia we hã kili tɛ̃ a hã lɛ na, lɛ nyɔngɔ ni nɛ nde?”

⁵³ Nɛ Yezu tɔ̃ hã wa na: “Mi tɔ̃ hã nɛ do gbãlã we na, fala kɛ nɛ nyɔ̀ngɔ̀ kili tɛ mi gɔ, hã nɛ nɔ̀ 'bɔ tɔkɔ tɛ mi gɔ, nɛ nde nɛ sɛ do kpasi kɔ nɛ bina.

⁵⁴ Mba gɔ, wi kɛ a nyɔngɔ kili tɛ mi, kɔ a nɔ tɔkɔ tɛ mi ni, a do kpasi kɛ ma é sɛ gɔ ni. Nɛ do ndɔti nùi, nɛ mi tunu sɛ a kɔ fio, takɔ a ɔ do kpasi.

⁵⁵ Mba gɔ, kili tɛ mi mɛ a ngbongbo nyɔngɔmɔ, nɛ tɔkɔ tɛ mi mɛ a ngbongbo mɔ nɔ nɔa.

⁵⁶ Wele kɛ a nyɔngɔ kili tɛ mi, hã a nɔ tɔkɔ tɛ mi, nɛ lɛ sɛ do a wele kpo.

⁵⁷ Baa mi kɛ a tumba mi ni, a do kpasi boe, nɛ mi tɛ mɛ 'bɔ do kpasi we duzu a. Na mɛ ni, wele kɛ a nyɔngɔ kili tɛ mi ni, a 'bɔ do kpasi boe we duzu mi.

⁵⁸ Mi a nyɔngɔmɔ kɛ ma yula li nza i. Mi ɔ̀ nɛ nyɔngɔmɛnɔ kɛ oyaa nɛ wa nyɔngɔ zɛ́, nɛ wa fia vɛ̃ ni gɔ. Wi kɛ a nyɔngɔ nyɔngɔmɛ kɛ ma yula li nza i ni, a fé sɛ gɔ, a sɛ do kpasi fai!”

⁵⁹ Yezu tɔ̃ zi wenɔ ni, 'da fala a zi tɛ be we kɔ tɔa mbula kɔ le Kafarnaumɛ.

Yezu bia wenɔ kɛ ma hã kpasi ni

⁶⁰ Yezu tɔ̃a wenɔ ni hã winɔ do'do, nɛ gba gili Owi yambala mɛnɔ 'da a wa tɔ̃ na: “Wenɔ a be gɛ, ma nganda wena. Wele wè tɛ kɔ̃ ma gɔ!”

⁶¹ Nɛ Yezu ĩ na, Owi yambala mɛnɔ 'da ɛ wa tɛ lungu ɛ, nɛ a tɔ̃ hã wa na: “Wenɔ mi tɔ̃a ni zɛlɛ nɛ zɛla nde?

⁶² Kɔ fala nɛ zɔ sɛ mi Be 'da Wele tɛ kũ dɛ li nza i, fala zɛ́ mi nɛ dati ni, nɛ nɛ lengge sɛ na ge nde?

⁶³ Wi a Hi Wi 'da Gale a hã kpasi hã winɔ. Wele wè tɛ dɛ mɔ do ngawi 'da a zu a kpo gɔ. Kɔ wenɔ mi tɔ̃ ma gɛ, ma yula kɔ Hi Wi 'da Gale, nɛ ma hã kpasi hã wele.

⁶⁴ Nɛ nde ombe sanga nɛ gɛ, wa kɔ̃̀ ma gɔ.” (Yezu tɔ̃a na mɛ ni, we kɛ a ĩ ti winɔ kɛ wa kɔ̃̀ zi gɔ ni, do wele kɛ a 'dɔlɔ sɛ a ni belee ia.)

⁶⁵ Nɛ a tɔ̃ 'bɔ hã wa na: “Nɛ zɔ́ gulu kɛ mi tɔ́a hã nɛ na, fala kɛ Baa mi tòmbò wele gɔ, nɛ nde a wè tɛ tɛ dɛ 'da mi gɔ gɛ a ni.”

⁶⁶ 'Do kɛ Yezu tɔ̃a ní ni, nɛ gba gili owi yambala mɛnɔ 'da a wa yu tɛ wa 'do a do'do.

⁶⁷ Nɛ Yezu aka wanɔ 'bu ngɔ wa bɔa ni na: “Nɛ kɔ̃a tɛ mɛ 'bɔ we yu mi nde?”

⁶⁸ Nɛ Simɔ Petro gese hã a na: “Nwa, lɛ nɛ la dɛ 'da wio nde? Wenɔ mɔ tɔ̃ ni, mɛ a we kɛ ma hã kpasi kɛ ma é sɛ gɔ ni.

⁶⁹ Lɛ kɔ̃a zu li mɔ, nɛ lɛ ĩ 'bɔ na, mɔ a Santo kɛ Gale tumba mɔ.”

⁷⁰ Nɛ Yezu gese hã wa na: “Mi a mi saka zi nɛ. Gɛnɛ kɔ na mɛ ni, nɛ nde mbe sanga nɛ kpo, a a wi 'da Satana.”

⁷¹ A tɔ̃a na mɛ ni, we kɛ a lengge zi do Yudasi, be 'da Simɔ Iskariɔtɛ. Mba gɔ, gɛnɛ kɔ Yudasi zi a mbe sanga owanɔ 'bu ngɔ wa bɔa ni, nɛ nde a 'dɔlɔ sɛ Yezu.