YOANƐ 5 - WE NU GALE 1995

Yezu kpasa wi kala nyanga

¹ 'Do nɛ, nɛ ngba soe mbe ɛngga 'da Yudanɔ wia, nɛ Yezu nɛa Yeruzalɛmɛ i we nɛ.

² Nɛ nde kɔ le Yeruzalɛmɛ ni, zã lì zi boe, wa ia li nɛ do Hebre na Bɛtzata. Zã lì ni zi dɛ kɛ zã nu ngbo le, kɛ li nɛ a “Nu ngbo Obatanɔ” ni. Nɛ wa dɛa oda mɔlɔ dɛ kɛ zã nu lì ni.

^3-4 Nɛ owi tandu, do owi nɛa kũ, do Owi kala nyanga wa ɔ zi dɛ di ni. [Wa 'bɔ zi na, anzɛ 'da Nwa Gale le 'dɔ lì, kɔ ma yaka, nɛ wi nɛ le 'dɔ nɛ dati ni, nɛ a kpasa. Gɛnɛ kɔ zɛlɛ ge nde, nɛ ma e iko.]

⁵ Nɛ wi zɛlɛ kpo zi di ni, zɛlɛ ɔa tɛ̃ a sabɛlɛ 'bu nɛ talɛ ngɔ nɛ ngbɛ'dɛ'dɛ.

⁶ Kɔ Yezu nɛa we zɔ a tɛ ɔ dɛ ngɔ bunggi 'da a ni, nɛ a ĩ na, a ɔa do zɛlɛ 'do nɛ nyɛlɛ wena, nɛ a aka a na: “Mɔ kɔ̃a na, mɔ kpasa nde?”

⁷ Nɛ wi zɛlɛ ni gese hã a na: “Aa nwa, 'da fala kɛ anzɛ le 'dɔ lì, kɔ ma ma ngɔ yaka nɛ ni, nɛ nde fo wi fi mi 'dɔ lì bina. Lì ma ngɔ yaka nɛ, kɔ mi nɛ yamba we le 'dɔ nɛ, nɛ nde mbe gele wele lia sɔ dati mi ia.”

⁸ Nɛ Yezu tɔ̃ hã a na: “Mɔ kúlú ngɔ, kɔ mɔ kásá bunggi 'da mɔ, hã mɔ sí.”

⁹ Nɛ wi ni kpasa do ti, nɛ a kasa bunggi 'da a, nɛ a ma ngɔ si nɛ. Tũi kɛ Yezu kpasa do wi ni zi a tũ ɔmɔ tɛ wi.

¹⁰ Kɔ onwa Yudanɔ wa nɛa we zɔ wi ni, nɛ wa tɔ̃ hã a na: “Sɔɛ gɛ mɛ a tũ ɔmɔ tɛ wi. Nɛ mbula 'da lɛ tɔ̃a na, do tũ ɔmɔ tɛ wi, nɛ wele tɛ bà mɔ dɛ kɔ̃ ɛ gɔ. Kɔ gulu kɛ mɔ ba bunggu dɛ kɔ̃ mɔ we ge nde?”

¹¹ Nɛ a gese hã wa na: “Wi kɛ a kpasa mi ni, a tɔ̃a hã mi na, mi bá bunggi 'da mi, kɔ mi sí.”

¹² Nɛ wa aka a na: “Wi tɔ̃a hã mɔ ní ni a wio nde?”

¹³ Nɛ nde wi ni ĩ̀ zi na, wi a Yezu hã a kpasa ɛ ni gɔ, we kɛ Yezu la zi fala ni do'do, we gba gili winɔ.

¹⁴ 'Do nɛ, nɛ Yezu kpa wi ni kɔ Tɛmpɛlo i, nɛ a tɔ̃ hã a na: “Mɔ zɔ́, mɔ kpasa ia. Kɔ mɔ tɛ dɛ̃ 'bɔ mbé 'dã mɔ gɔ, dɔ mɔ kpa mbé zɛlɛ 'danga nɛ ngɔ kɛ zi dati ni gɔ.”

¹⁵ Nɛ wi ni la, nɛ a tɔ̃ hã onwa Yudanɔ na, wi kpasa zi ɛ, wi a Yezu.

¹⁶ Ma kɛ Oyudanɔ wa ma ngɔ sɛnɛ Yezu, we kɛ a kpasa wi ni do kɔ̃ tũ ɔmɔ tɛ wi ni.

¹⁷ Nɛ Yezu tɔ̃ hã wa na: “Baa mi dɛ toe 'da a dɛa fai iko, nɛ mi, mi dɛ 'bɔ na mɛ ni.”

¹⁸ Kɔ Yezu nɛa we tɔ̃ na mɛ ni, nɛ onwa Yudanɔ wa ma ngɔ fa 'bɔ mbé wala we gbɛ a. Mba gɔ, a gbìnì tati a mbula ngɔ tũ ɔmɔ tɛ wi iko gɔ, nɛ nde a tɔ̃a 'bɔ na, Gale a baa ɛ, nɛ a ba tɛ̃ a na, ɛ wia kɔ̃ do Gale.

Be 'da Gale do ngawi

¹⁹ Nɛ Yezu gisa hã wa na: “Mi tɔ̃ hã nɛ do gbãlã we na, mi Be 'da Gale, mi wè tɛ dɛ linggamɔ zu mi iko gɔ, nɛ nde mi dɛ a kɛ mi zɔa kɔ̃ Baa mi ni. Mɛnɔ vɛ̃ kɛ Baa mi dɛ ni, nɛ mi dɛ tɛ mɛ 'bɔ ma.

²⁰ Mba gɔ, Baa mi kɔ̃a gɛnɛ mi Be 'da a, nɛ a bia mɛnɔ a dɛ ni vɛ̃ hã mi. Nɛ a be sɛ 'bɔ ombé mɔ kɛ ma nɛa ngɔ kɛnɔ gɛ ni hã mi. Kɔ mi dɛ mɛnɔ ni, nɛ nɛ ɔngbɔ sɛ do ma wena.

²¹ Mba gɔ, nɛ́ kɛ Baa mi tunu ofionɔ kɔ fio, nɛ a hã kpasi hã wa ni, mi Be 'da a, mi dɛ 'bɔ kpasaa na mɛ ni. Mi hã kpasi hã winɔ kɛ mi kɔ̃a wa ni.

²² Baa mi 'bílí we mɔ́ Owele gɔ, nɛ nde a hã ngawi vɛ̃ hã mi Be 'da a, we 'bili do we 'da winɔ.

²³ A dɛa na mɛ ni, takɔ winɔ vɛ̃ wa dɔnggɔ mi Be 'da a, ɔ nɛ kɛ wa dɔnggɔ do a ni. Kɔ wele kɛ a dɔ́nggɔ́ mi gɔ ni, a dɔ́nggɔ́ tɛ mɛ 'bɔ Baa mi, kɛ a tumba mi ni gɔ.

²⁴ “Mi tɔ̃ hã nɛ do gbãlã we na, wi kɛ a zele we nu mi, kɔ a kɔ̃ zu li Wi tumba mi ni, a do kpasi kɛ ma é sɛ gɔ ni. Nɛ Gale 'bílí sɛ we mɔ́ wi ni gɔ, nɛ wi ni hɔa nza kɔ fio, nɛ a do kpasi.

²⁵ Mi tɔ̃ 'bɔ hã nɛ do gbãlã we na, ngba soe ma tɛ 'do gɛ, nɛ ma hɔa 'bɔ ia ni, ofionɔ wa zele sɛ gɛlɛ mi Be 'da Gale, kɔ wanɔ kɛ wa zele gɛlɛ mi ni, nɛ wa kpasa sɛ.

²⁶ “Kɔ nɛ́ kɛ Baa mi do ngawi we hã kpasi hã wele ni, a hã tɛ mɛ 'bɔ kpo ngawi ni hã mi Be 'da a.

²⁷ Nɛ a hã 'bɔ ngawi hã mi we 'bili we 'da winɔ, we duzu kɛ mi a Be 'da Wele.

²⁸ Kɔ nɛ tɛ ɔ̀ngbɔ̀ do ma gɔ, we kɛ ngba soe ma tɛ sɛ ni, nɛ ofionɔ kɔ zunu i, wa zele sɛ gɛlɛ mi,

²⁹ nɛ wa za'da sɛ nza kɔ zuni 'da wa. Nɛ wanɔ kɛ dɛa mɔ tɛ wa zi a dia ni, wa za'da sɛ we kpa kpasi kɛ ma é sɛ gɔ ni. Nɛ wanɔ kɛ dɛa mɔ tɛ wa dè zi gɔ ni, wa za'da sɛ, nɛ wa te li ngbangga.”

Mɛnɔ kɛ ma tɔ̃ we ngɔ Yezu ni

³⁰ “Mi wè tɛ dɛ mɔ do ngawi 'da mi zu mi kpo gɔ. Nɛ nde mi 'bili we 'da winɔ do 'da kɛ Gale tɔ̃ hã mi ni. Nɛ mi 'bili do bɔlɔ nɛ. We duzu kɛ mi fá we dɛ kɛ zã mi kɔ̃a ni gɔ, nɛ nde mi fa we dɛ kɛ zã Wi tombo mi kɔ̃a ni.

³¹ “Kɔ fala kɛ mi zu mi kpo, mi tɔ̃ we ngɔ mi, nɛ nɛ bá sɛ ma do gbãlã we gɔ.

³² Nɛ nde mbe gele wele te tɔ̃ we ngɔ mi, nɛ mi ĩ na, wenɔ a tɔ̃ ni, mɛ a gbãlã we.

³³ Nɛ tumba zi Owi to hã Yoanɛ, nɛ a tɔ̃a we ngɔ mi do gbãlã we.

³⁴ Nɛ nde we mi, mi fá na Owele wa tɔ̃ we ngɔ mi gɔ, nɛ nde mi tɔ̃ lɛnggɛ kɛ Yoanɛ tɔ̃a ni hã nɛ, takɔ nɛ kpa kpasi.

³⁵ Yoanɛ ɔ zi nɛ tanda kɛ ma nyɛ nyɛa ni, nɛ do be kɔ̃ tũi a zi nɛ ni, nɛ dɛa zi yangga we zɔ nyɛa we 'da a.

³⁶ Yoanɛ tɔ̃a we ngɔ mi, nɛ nde gele mɔ kɛ ma nɛa ngɔ wenɔ 'da a ni boe. Mba gɔ, toe kɛ mi tɛ dɛ ma ngɔ nù gɛ, ma be gbãlã we 'da mi. Wi a Baa mi a hã toe ni hã mi na, mi dɛ ma, nɛ ma be na, a a tumba mi.

³⁷ Baa mi kɛ a tumba mi ni tɔ̃a we ngɔ mi ia. Nɛ nde nɛ zèlè mbe gɛlɛ a fala kpo gɔ, nɛ nɛ zɔ̀ 'bɔ mbe bula li a fala kpo gɔ.

³⁸ Nɛ nɛ bá we 'da a dɛ kɔ sila nɛ gɔ, we kɛ nɛ kɔ̃̀ zu li mi, kɛ a tumba mi ni gɔ.

³⁹ Nɛ tɔlɔ 'Buki 'da Gale, we kɛ nɛ lengge na, nɛ kpa sɛ kpasi kɛ ma é sɛ gɔ ni kɔ nɛ. Nɛ nde ĩ na, 'Buki 'da Gale ni, ma tɔ̃ we ngɔ mi.

⁴⁰ Gɛnɛ kɔ na mɛ ni, nɛ nde nɛ kɔ̃̀ we tɛ dɛ 'da mi, takɔ nɛ kpa ngbongbo kpasi ni gɔ.

⁴¹ “Mi fá kɛ na, Owele wa dɔnggɔ mi iko gɔ.

⁴² Kɔ mi ĩ ti tɛlɛ tɛ nɛ, nɛ mi ĩ na, nɛ do kɔ̃a zã dɛ 'da Gale bina.

⁴³ Mi tɛa do zu li Baa mi, nɛ nɛ kɔ̃̀ gɛnɛ mi gɔ. Kɔ wele tɛ do ngawi 'da a iko, nɛ nɛ kpɔ kɔ̃ nɛ ti a.

⁴⁴ Nɛ kɔ̃a we kpa dɔngga wi dɛ kɔ̃ ngba nɛ iko, nɛ nde nɛ kɔ̃̀ gɛnɛ dɔngga wi kɛ Gale zu a kpo, a hã ni gɔ. Na mɛ ni, nɛ nɛ dɛ sɛ fala kɔ̃ gɛnɛ mi nɛ nde?

⁴⁵ Kɔ nɛ tɛ lènggè na, mi nɛ da nɛ dati Baa mi ni gɔ. Nɛ nde wi nɛ da nɛ, wi a Mɔizɛ, kɛ nɛ gbini zã nɛ do a ni.

⁴⁶ Kɔ nɛ kɔ̃ sɔ gɛnɛ Mɔizɛ ngboo kɔ̃a, nɛ nɛ kɔ̃ sɔ gɛnɛ mi. Mba gɔ, a kɔma zɛ́ we ngɔ mi kɔ 'buki 'da a.

⁴⁷ Kɔ ɔ nɛ kɛ nɛ kɔ̃̀ gɛnɛ wenɔ a kɔma zɛ́ ni gɔ ni, nɛ nɛ dɛ sɛ fala kɔ̃ gɛnɛ wenɔ 'da mi nɛ nde?”