YOANƐ 4 - WE NU GALE 1995

Yezu wila we do wuko Samaria

¹ Nɛ Ofariziɛnɔ wa zila na, Yezu kpa owi mɔ́ ɛ dɛlɛ nɛa ngɔ Yoanɛ, nɛ a batisa 'bɔ winɔ wena.

² (Nɛ nde ĩ na, Yezu bàtìsà wele gɔ. Wi batisa zi winɔ wi a owi yambala mɛnɔ 'da a iko.)

³ Kɔ Yezu nɛa we ĩ na, wa tɔ́a na mɛ ni, nɛ a kulu ngɔ ngɔ nù Yude we kpolo tɛ̃ a dɛ ngɔ nù Galile.

⁴ Nɛ ma wia zi na, a 'bili do ngɔ nù Samaria, we nɛ dɛ i mɔ.

⁵ Nɛ a nɛa gbaa, nɛ a kɔlɔ dɔ̃ɔ do mbe le ngɔ nù Samaria kpo, li nɛ a Sikarɛ. Le ni kɔla do fɔɛ kɛ Yakɔbɔ hã zɛ́ hã be 'da a Yozɛfu ni.

⁶ Nɛ 'de Yakɔbɔ zã zɛ́ ma ni, ma dɛ di ni. Nɛ Yezu mbɔka tɛ gɔnɔ wala do'do, nɛ a dungu nù dɛ kɛ zã nu lì ni. 'Da fala ni, nɛ nde wese hɔa zi gbogbo zu wi.

⁷ Nɛ 'da kala bi sĩ, nɛ mbe wuko Samaria kpo tɛ we so lì, nɛ Yezu tɔ̃ hã a na: “Mɔ hã mbe lì hã mi nɔ.”

⁸ (Mɛ ni nɛ nde, wi yambala mɛnɔ 'da a wa nɛa 'da le i we hɛ nyɔngɔmɔ.)

⁹ Nɛ wuke ni gese hã a na: “Ee! Mɔ a Yuda gɔ nde? Kɔ gulu kɛ mɔ gɔ lì kɔ̃ mi, wuko Samaria we ge nde?” (A gisa ní we kɛ Oyuda do Osamaria, wa nyɔ́ngɔ́ zi mɔ kɔ̃ ngba wa gɔ.)

¹⁰ Nɛ Yezu gese hã a na: “Ɔ do kɛ mɔ ĩ sɔ ti dia mɛ kɛ Gale hã ma ni ĩ, kɔ mɔ ĩ sɔ 'bɔ ti wele kɛ a gɔa lì kɔ̃ mɔ gɛ, nɛ mɔ a mɔ gɔ sɔ li kɔ a, nɛ a hã sɔ lì kɛ ma hã kpasi ni hã mɔ.”

¹¹ Nɛ wuke tɔ̃ hã a na: “Aa nwa, mɔ do mɔ so lì kɔ̃ mɔ bina, nɛ 'de gɛ 'du wena. Ní nɛ mɔ nɛ dɛ sɔ fala so lì kpasi mɔ tɔ̃ nɛ gɛ nɛ nde?

¹² Yaa lɛ Yakɔbɔ zã zɛ́ lì gɛ hã lɛ, nɛ a nɔa zi, do benɔ 'da a, do nadalamɛnɔ 'da a. Ní nɛ nde mɔ lengge na, mɔ nɛa ngɔ yaa lɛ Yakɔbɔ nde?”

¹³ Nɛ Yezu gese hã a na: “Winɔ wa nɔ lì gɛ ni, nɛ mbé wɔ lì ma ba sɛ 'bɔ wa.

¹⁴ Nɛ nde fala kɛ mi hã lì kɛ mi tɔ̃ nɛ ni hã wele, kɔ a nɔ, nɛ mbé wɔ lì bá sɛ 'bɔ a gɔ. Mba gɔ, lì mi nɛ hã ma hã a ni, ma hɔ sɛ zu lì dɛ kɔ a, nɛ ma fo sɛ kɔ a fua fai, nɛ ma hã kpasi kɛ ma é sɛ gɔ ni hã a.”

¹⁵ Nɛ wuke tɔ̃ hã a na: “Aa nwa, mɔ kɔ̃́, nɛ mɔ hã lì mɔ tɔ̃ nɛ gɛ hã mi, dɔ mbé wɔ lì bá mi, kɔ mi tɛ 'bɔ dɛ we so lì gɔ.”

¹⁶ Nɛ Yezu tɔ̃ hã a na: “Mɔ nɛ́, kɔ mɔ kpa wili mɔ tɛ do a.”

¹⁷ Nɛ wuke gese na: “Mi do wili bina.” Nɛ Yezu tɔ̃ na: “Mɔ tɔ̃a gbãlã we.

¹⁸ Mba gɔ, mɔ kala di ni wili fala mɔlɔ, nɛ wele kɛ nɛ do a ngangga ni, a 'bɔ a wili mɔ gɔ. We mɔ tɔ̃a ni a gbãlã we.”

¹⁹ Nɛ wuke tɔ̃ hã a na: “Aa nwa, mi zɔ na, mɔ a wi gba olo nu Gale.

²⁰ Oyaa lɛ Osamaria wa dɔnggɔ zɛ́ Gale dɛ ngɔ kala gɛ. Nɛ nde nɛ, Oyudanɔ, nɛ tɔ̃ na, fala owinɔ wa wia we dɔnggɔ do Gale ni, ma a tɛ Yeruzalɛmɛ.”

²¹ Nɛ Yezu gese na: “Aa wuke gɛ, mɔ zélé mi sɛ! Ngba soe kɛ ma hɔ sɛ 'do gɛ, nɛ nde Owele wa dɔ́nggɔ́ sɛ Baa wa Gale ngɔ kala gɛ gɔ, nɛ wa dɔ́nggɔ́ sɛ 'bɔ a tɛ Yeruzalɛmɛ i gɔ.

²² Nɛ, Osamaria, nɛ ĩ̀ ti Wele kɛ nɛ dɔnggɔ a gɛ gɔ. Nɛ nde lɛ, Oyudanɔ, lɛ ĩ ti Wele kɛ lɛ dɔnggɔ a ni, we duzu kɛ wi kɛ a kpasa sɛ winɔ ni, a yula kɔ nu kpala Oyudanɔ.

²³ Nɛ nde do ngba soe ma tɛ 'do gɛ, nɛ ma hɔa 'bɔ ia ni, Hi Wi 'da Gale a hã sɛ ngawi hã winɔ, takɔ wa dɔnggɔ Gale do gbãlã we. We kɛ Gale kɔ̃a na, winɔ wa dɔnggɔ ɛ do gbãlã we ngboo.

²⁴ Gale a Hi Wi, nɛ ma wia na, Hi Wi 'da Gale hã ngawi hã winɔ wa dɔnggɔ a ni, kɔ wa dɔnggɔ a do gbãlã we.”

²⁵ Nɛ wuke tɔ̃ hã a na: “Mi ĩ na, Mɛsiya (wele kɛ wa sa li a na Kristo ni), a hɔ sɛ. Kɔ a hɔ, nɛ a tɔ̃ sɛ gulu mɛnɔ vɛ̃ hã lɛ.”

²⁶ Nɛ Yezu gese hã a na: “Mɛsiya ni, wi a mi, kɛ mi tɔ̃ we hã mɔ gɛ.”

²⁷ Yezu tɛ wele we do wuke ni, nɛ owi yambala mɛnɔ 'da a wa hɔ. Kɔ wa nɛa we zɔ a tɛ wele we do wuke ni, nɛ wa ɔngbɔ do ma wena. Nɛ nde wele kpo sanga wa 'bã̀ nu ɛ ngɔ lɛnggɛ we aka a na, a aka wuke we ge nde, tabi gulu kɛ a wele we do a we ge nde ni gɔ.

²⁸ Nɛ wuke ni la kpana lì 'da ɛ dɛ di ni, nɛ a kpolo tɛ̃ a le i, nɛ a tɔ̃ hã owinɔ na:

²⁹ “Nɛ tɛ́, kɔ nɛ zɔ́ wi gɛ. A tɔ̃a we mɛnɔ mi dɛa ni vɛ̃. A zɔ́lɔ́ sɛ Mɛsiya gɔ!”

³⁰ Kɔ owinɔ wa nɛa we zele ní, nɛ wa yolo le i, nɛ wa tɛ 'da Yezu.

³¹ Do 'da fala ni, nɛ owi yambala mɛnɔ wa hɛ̃lɛ̃ Yezu na, a nyɔngɔ mbe mɔ sɛ!

³² Nɛ a bɛ̃, nɛ a tɔ̃ hã wa na: “Nyɔngɔmɛ kɛ mi nyɔngɔ ni, ma boe, nɛ nde nɛ ĩ̀ ti ma gɔ.”

³³ Nɛ owi yambala mɛnɔ wa ma ngɔ aka ngba wa na: “Mbe wele tɛa do nyɔngɔmɔ hã a tɛa nde?”

³⁴ Nɛ Yezu tɔ̃ hã wa na: “Nyɔngɔmɛ 'da mi kɛ mi tɔ̃ nɛ ni, mɛ a kɛ na mi zele nu Wi tombo mi, nɛ mi dɛ toe kɛ a hã ma hã mi ni gbaa we hɔ ndɔti nɛ.”

³⁵ Nɛ Yezu tɔ̃ 'bɔ hã wa na: “Lɛ zele nu winɔ na: ‘Kpalɛ ɔ li fɔ zɛkɛ nalɛ, nɛ wa kala.’ Nɛ nde we mi, mi tɔ̃ hã nɛ na, nɛ zɔ́ fɔɛ, kpalɛnɔ li nɛ kula ia! Kɔ ma wia na, wa kala ma dɛ le.

³⁶ Kɔ wele kɛ a kala ma, nɛ nde a kpa si olo nɛ ia. Ngɔ gili gbãlã kpalɛnɔ a ngɛma ni, ma é sɛ gɔ, ma 'bana sɛ fai. Na mɛ ni, wele kɛ a mi, do wele kɛ a kala dɛ le ni, wa dɛ yangga fala nɛ kpo.

³⁷ Mba gɔ, ma ɔ nɛ kɛ owinɔ wa tɔ̃ na: ‘Mbe wele kpo tɛ mi kpalɛ, nɛ mbee nɛ tɛ kala olo a dɛ le ni.’

³⁸ Mi tumba zi nɛ na, nɛ kala kpalɛ kɛ nɛ a nɛ mì ma gɔ ni. Ogele wele a wa zɔa zi ngamɔ mi ma, nɛ nɛ, nɛ kpa de mɔ olo toe 'da wa iko.”

³⁹ Nɛ gba gili Osamaria tɛ kɔ le 'da wuke ni, wa kɔ̃a zi zu li Yezu, we duzu we wuke ni tɔ̃a na, Yezu tɔ̃a we mɛnɔ vɛ̃ kɛ ɛ dɛa ma ni ni.

⁴⁰ Nɛ Osamaria wa tɛa 'da Yezu nga, nɛ wa ala nu wa hã a na, a ɔ́ mbe do lo sɛ! Nɛ a kɔ̃a, nɛ a ɔa do wa tũ bɔa.

⁴¹ Nɛ a bia 'bɔ we nu Gale hã wa, nɛ ombé gba gili wele wa kɔ̃a zu li a.

⁴² Nɛ wa tɔ̃ hã wuke na: “Lɛ kɔ̃̀ zu li Yezu we wenɔ kɛ mɔ tɔ̃a hã lɛ ni gɔ. Nɛ nde lɛ kɔ̃a, we kɛ lɛ zila a do zala lɛ, nɛ lɛ ĩ ngboo na, a a Wi kpasa winɔ ngɔ nù gɛ.”

Yezu kpasa be 'da mbe gã wi kpo

⁴³ Yezu ɔa tɛ Samaria i tũ bɔa, nɛ a la dɛ ngɔ nù Galile.

⁴⁴ Mba gɔ, a tɔ̃a zi do tɛ̃ a na: “Wa dɔ́nggɔ́ wi gba olo nu Gale kɔ le olo a gɔ.”

⁴⁵ A hɔa tɛ Galile i, nɛ winɔ wa dɛa yangga hɔa 'da a wena, we kɛ ombe sanga wa ni wa nɛa zi ɛngga Hɔ Nza kɔ Ngbá tɛ Yeruzalɛmɛ i, nɛ wa zɔa ɔngbamɛnɔ kɛ a dɛa ma 'da fala ɛngga ni.

⁴⁶ Nɛ 'do nɛ, nɛ a kpolo tɛ̃ a dɛ Kana, tɛ ngɔ nù Galile. Kana mɛ a le kɛ a kifi zi lì do dɔɛ kɔ nɛ ni. Nɛ mbe gã wi mbati kpo tɛ Kafarnaumɛ, be 'da a zi do zɛlɛ.

⁴⁷ Kɔ gã wi ni nɛa we zele na, Yezu yula tɛ Yude i, hã a tɛa Galile nga ni, nɛ a nɛ, nɛ a ala nu a hã Yezu na, a nɛ Kafarnaumɛ i, hã a kpasa be 'da ɛ, we kɛ a 'bɔ fio iko.

⁴⁸ A tɔ̃a ni vɛ̃, nɛ Yezu tɔ̃ hã a na: “Nɛ, winɔ gɛ, nɛ kɔ̃a tɛ mɛ we zɔ gba sɔ̃ mɛnɔ do ɔngbamɛnɔ 'da mi do'do, sɛ nɛ nɛ kɔ̃ zu li mi de nde?”

⁴⁹ Nɛ gã wi ni gese hã a na: “Aa nwa, mɔ kɔ̃́, nɛ mɔ tɛ, hã mɔ kpasa be 'da mi, dɔ a fé gɔ.”

⁵⁰ Nɛ Yezu tɔ̃ hã a na: “Mɔ sí! Be 'da mɔ kpasa ia.” Nɛ wi ni kɔ̃a we kɛ Yezu tɔ̃a hã a ni, nɛ a kpolo tɛ̃ a.

⁵¹ Kɔ a 'bana dɛ li wala nga, nɛ wi dɛa tonɔ 'da a wa gɔnɔ dati a, nɛ wa tɔ̃ hã a na: “Be 'da mɔ kpasa ia.”

⁵² Nɛ a aka wa na: “A kulu sɔ ngɔ tɛ zɛlɛ do sa ge nde?” Nɛ wa gese na: “Bawe tɛ̃ a ia zɛ, do sa kpo 'do midi.”

⁵³ Nɛ baa be ĩ na, mɛ a kpo 'da fala Yezu tɔ̃a hã ɛ na: “Be 'da mɔ kpasa ia” ni. Nɛ a, do nu fɛlɛ a vɛ̃ wa kɔ̃a zu li Yezu.

⁵⁴ Ki ni mɛ a bɔa gba sɔ̃ mɛ kɛ Yezu dɛa, 'do kɛ a yula tɛ Yude, kɔ a hɔa Galile ni.