YOANƐ 21 - WE NU GALE 1995

Yezu bia tɛ̃ a hã owinɔ 'da a sambo

¹ 'Do nɛ, nɛ Yezu bia 'bɔ tɛ̃ ɛ hã owi yambala mɛnɔ 'da a tɛ ngu'du gba ndɔ Tiberiadɛ. A bia tɛ̃ a hã wa na mɛ gɛ:

² Simɔ Petro, do Toma (kɛ mbe li a 'bɔ a Be Dã ni), do Natanaɛlɛ (wi Kana, ngɔ nù Galile), do obenɔ 'da Zebede, do mbe gele wi yambala mɛnɔ 'da Yezu bɔa, wa zi fala nɛ kpo.

³ Nɛ Simɔ Petro tɔ̃ hã ongba a ni na: “Mi nɛ la we da gbanda.” Nɛ wa tɔ̃ hã a na: “Lɛ nɛ nɛ tɛ mɛ 'bɔ do mɔ.” Wa nɛa, nɛ wa kũ kɔ ga, nɛ wa ma ngɔ da gbanda. Nɛ do tũi ni, wa gbɛ̃ mbe kɔyɔ kpo gɔ.

⁴ Kɔ fala ma ngɔ sa nɛ, nɛ Yezu hɔ tɛ nu lì i, nɛ nde owi yambala mɛnɔ wa ĩ̀ na, wi a a gɔ.

⁵ Nɛ Yezu aka wa na: “Aa benɔ gɛ, nɛ gbɛ̀ mbe kɔyɔ gɔ nde?” Nɛ wa gese hã a na: “Ɔ̃ ɔ̃. Lɛ gbɛ̀ kɔyɔ kpo gɔ.”

⁶ Nɛ a tɔ̃ hã wa na: “Nɛ dá gbanda 'da nɛ tɛ mbee ga, si ngɔ ngawili kɔ̃, nɛ nɛ gbɛ sɛ okɔyɔ.” Nɛ wa da gbanda, nɛ okɔyɔ wa dunu kɔ nɛ tɔɔ, nɛ wa mana ma zãa.

⁷ Nɛ wi yambala mɛ kɛ Yezu kɔ̃a zi gɛnɛ a wena ni tɔ̃ hã Petro na: “Wi a Nwa a ni!” Simɔ Petro nɛa we zele na, wi a Nwa ni, nɛ a he'de tuli 'da a kɛ a hɔla sɔ we dɛ toe ni, nɛ a bũlũ, nɛ a te 'dɔ lì i.

⁸ Nɛ tala owi yambala mɛnɔ wa tɛ do ga tɛ gbɔtɔ gbanda do kɔyɔnɔ, dɛ nu lì nga. Mɛ ni nɛ nde wa nyɛ̀lɛ̀ zi do nu kolo lì gɔ, ma ɔ zi nɛ mɛtrɛ kama kpo iko ni.

⁹ Kɔ wa nɛa we hɔ dɛ ngɔ nza nga, nɛ wa zɔ kalĩ we, nɛ nde kɔyɔ ngɔ nɛ, nɛ mapa dɛ kɛ zã nɛ ni.

¹⁰ Nɛ Yezu tɔ̃ hã wa na: “Nɛ tɛ́ do mbe sanga kɔyɔnɔ kɛ nɛ gbɛa wa gɛ sɛ!”

¹¹ Nɛ Simɔ Petro kũ kɔ ga, nɛ a gbɔtɔ gbanda dɛ nza nga. Nɛ nde ogã kɔyɔ wa dunu ma tɔɔ. Kɔyɔnɔ wa zi vɛ̃ kama do 'bu nɛ mɔlɔ ngɔ nɛ talɛ. Gɛnɛ kɔ kɛ kɔyɔnɔ wa dunu zi kɔ gbanda wena ni, nɛ nde gbanda gɔ̃nɔ gɔ.

¹² Nɛ Yezu sa mɔ hã wa na: “Nɛ tɛ́, hã nɛ nyɔngɔ mɛ.” Nɛ wele kpo 'bã̀ nu ɛ ngɔ lɛnggɛ we aka a na, a a wio nde ni gɔ, we kɛ wa ĩ zi na, wi a Nwa a ni.

¹³ Nɛ Yezu nɛa, nɛ a ba mapa, nɛ a hã ma hã wa. Nɛ a ba kɔyɛ, nɛ a hã 'bɔ ma hã wa.

¹⁴ Ki ni zi a fala talɛ kɛ Yezu bia do tɛ̃ ɛ hã owi yambala mɛnɔ 'da a, 'do kɛ a za'da nza kɔ fio ni.

Yezu aka Petro na a kɔ̃a ɛ nde?

¹⁵ Wa nyɔnga mɛ do'do, nɛ Yezu aka Petro na: “Simɔ, be 'da Yoanɛ, mɔ kɔ̃a gɛnɛ mi nɛa ngɔ wanɔ gɛ vɛ̃ nde?” Nɛ a gese na: “Ĩi Nwa, mɔ ĩ na, mi kɔ̃a gɛnɛ mɔ.” Nɛ Yezu tɔ̃ hã a na: “Mɔ fɔ́mɔ́ winɔ 'da mi, ɔ nɛ wi fɔmɔ bata ni.”

¹⁶ Nɛ Yezu aka 'bɔ Petro fala bɔa na: “Simɔ, be 'da Yoanɛ, mɔ kɔ̃a gɛnɛ mi nde?” Nɛ a gese 'bɔ na: “Ĩi Nwa, mɔ ĩ na, mi kɔ̃a gɛnɛ mɔ wena.” Nɛ Yezu tɔ̃ hã a na: “Mɔ fɔ́mɔ́ winɔ 'da mi.”

¹⁷ Nɛ 'do nɛ, nɛ a aka 'bɔ fala talɛ kɛ na: “Simɔ, be 'da Yoanɛ, mɔ kɔ̃a gɛnɛ mi nde?” Nɛ 'bako ba li Petro wena, we kɛ Yezu aka a fala talɛ na: “Mɔ kɔ̃a gɛnɛ mi nde” ni. Nɛ Petro gese hã a na: “Nwa, mɔ ĩ ti mɛnɔ vɛ̃, mɔ ĩ na, mi kɔ̃a gɛnɛ mɔ.” Nɛ Yezu tɔ̃ hã a na: “Mɔ fɔ́mɔ́ winɔ 'da mi.

¹⁸ Mi tɔ̃ hã mɔ do gbãlã we na, fala kɛ mɔ zi a be zagbãlã ni, mɔ 'dafa zi 'dɛ̃ 'da mɔ do tɛ mɔ, nɛ mɔ yɛnggɛ ɔ nɛ kɛ zã mɔ kɔ̃a ni. Kɔ fala kɛ mɔ dɛ sɛ gbɛlɛ ni, nɛ mɔ tata sɛ 'baka mɔ, nɛ mbé wele 'dafa 'dɛ̃ 'da mɔ hã mɔ, nɛ a nɛ do mɔ dɛ fala kɛ mɔ kɔ̃̀ sɔ we nɛ tɛ nɛ gɔ ni.”

¹⁹ (Do lɛnggɛ ni, Yezu be a tɛlɛ tɛ fie kɛ Petro a fe sɛ do ma, nɛ a hã do dɔ̃lɔ̃ li hã Gale ni.) Nɛ Yezu tɔ̃ hã a na: “Mɔ tɛ́ 'dɔkɔlɔ mi.”

Yezu do wi yambala mɛ kɛ a kɔ̃a a wena ni

²⁰ Nɛ Petro nɛ ka mɔ 'do ɛ, nɛ a zɔ wi yambala mɛ kɛ Yezu kɔ̃a gɛnɛ a nɛ ge nde ni tɛ tɛ 'do wa. (Wi a wele kɛ dati fie 'da Yezu, nɛ wa nyɔngɔ zi mɛ, nɛ a bili zu a, nɛ a aka Yezu na: “Nwa, wi nɛ 'dɔlɔ sɛ mɔ a wio nde” ni.)

²¹ Kɔ Petro nɛa we zɔ a, nɛ a aka Yezu na: “Aa Nwa, kɔ wele kɛ gɛ, ma ɔ sɛ do a nɛ nde?”

²² Nɛ Yezu gese hã a na: “Fala kɛ mi kɔ̃ na, a 'bana nza gbaa we 'bɔ 'da tɛa 'da mi, nɛ nde ma zɔa mɔ nde? Mɔ, mɔ tɛ́ 'dɔkɔlɔ mi.”

²³ Nɛ sako nɛ yɛ'ba sanga owinɔ 'da Yezu na, wi yambala mɛ ni fé sɛ fio gɔ. Nɛ nde Yezu tɔ̃̀ hã Petro na, wi ni fé sɛ fio gɔ ni gɔ. A tɔ̃a na, fala kɛ ɛ kɔ̃ na, a 'bana nza gbaa we 'bɔ 'da tɛa 'dɛ ɛ, nɛ nde ma zɔ̃ a gɔ.

²⁴ Wi a kpo wi yambala mɛ ni hã a tɔ̃ we mɛnɔ gɛ, nɛ a kɔma ma vɛ̃, kɔ nɛ ĩ na, wenɔ a tɔ̃ gɛ a gbãlã we.

Ndɔti we

²⁵ Yezu dɛa zi 'bɔ ombe gele mɔ wena. Kɔ wa kɔma sɔ ma kpo kpo vɛ̃, nɛ mi lengge na, fala e sɔ do mbɛti nɛ ngɔ nu gɛ bina.