YOANƐ 20 - WE NU GALE 1995

Yezu za'da nza kɔ fio

¹ Do kuti tũi kɔ mbé pɔsɛ ni, nɛ do titole belee, nɛ nde fala 'bana zi mbĩi, nɛ Maria, boko Magdala nɛa ngɔ zunu i. Kɔ a nɛ ka mɔ, nɛ nde ta fua tɛ̃ ɛ nu kɔ̃ɛ do'do.

² Nɛ a kpolo tɛ̃ a do yu, nɛ a sa mɔ hã Simɔ Petro, do mbe wi yambala mɛ kɛ Yezu kɔ̃a zi gɛnɛ a nɛ ge nde ni. Nɛ a tɔ̃ hã wa na: “Nɛ zɔ́, wa fua Nwa Yezu kɔ kɔ̃e do'do, kɔ lɛ ĩ̀ fala wa ia do a ni gɔ!”

³ Nɛ Petro do mbe wi yambala mɛ ni, wa la ngɔ zunu i.

⁴ Nɛ wa bɔa nɛ, wa ma ngɔ yu nɛ, nɛ nde mbe wi yambala mɛ ni yu nganda wena, nɛ a hɔ nu kɔ i dati hã Petro.

⁵ Nɛ a gɛ zu a kɔ kɔ̃ i, nɛ a zɔ na, du gbau tuli wa kasa zi do tɛ Yezu ni, ma dɛ nù ni. Nɛ a lè lia gɔ.

⁶ Nɛ 'da kala bi sĩ, nɛ Petro hɔ, nɛ a le kɔ kɔ̃ i do ti, nɛ a zɔ tuli wa kasa zi tɛ Yezu ni dɛ nù ni.

⁷ Nɛ nde tuli kɛ wa ɛnza zi do zu Yezu ni, ma fala nɛ kpo do kɛ wa kasa zi do tɛ̃ a ni gɔ, ma ɔa do tɛ̃ ɛ.

⁸ Nɛ mbe wi yambala mɛ, kɛ a hɔa sɔ dati tɛ nu kɔ̃ i ni, a le tɛ mɛ 'bɔ, nɛ a zɔ mɛnɔ ni, nɛ a kɔ̃ na, Yezu za'da nza kɔ fio.

⁹ (Gɛnɛ kɔ gbaa ni, nɛ nde Owi yambala mɛnɔ wa tɛ ĩ̀ zi ti gulu lɛnggɛ kɔ 'Buki 'da Gale na, Yezu a za'da sɛ nza kɔ fio ni gɔ.)

¹⁰ Nɛ owi yambala mɛnɔ bɔa ni wa si.

Yezu bia tɛ̃ ɛ hã Maria boko Magdala

¹¹ Maria yula dɛ nu kɔ̃ ni tɛ he ma. Kɔ a tɛ he nɛ, nɛ a gɛ zu a kɔ kɔ̃ i,

¹² nɛ a zɔ oanzɛ bɔa. Wa hi'da fɛ̃a tulu, kɔ wa dungu nù dɛ fala wa ia zi do wɔlɔ Yezu ni, mbe kpo a tɛ fala olo zu Yezu, nɛ mbee nɛ tɛ fala olo nyanga a.

¹³ Nɛ oanzɛnɔ ni wa aka Maria na: “Aa wuko, mɔ he kɔ̃a ge nde?” Nɛ a gese hã wa na: “Wa ba wɔlɔ nwa 'da mi do'do, nɛ mi ĩ̀ fala wa ia do a ni gɔ.”

¹⁴ A tɔ̃a we ni do'do, kɔ a nɛ siki tɛ̃ a, nɛ a zɔ Yezu tɛ yolo dɛ di ni. Nɛ nde a ĩ̀ zi na, wi a Yezu gɔ.

¹⁵ Nɛ Yezu aka a na: “Aa wuko, mɔ he kɔ̃a ge nde? Mɔ fa wio nde?” Nɛ Maria lengge zi na, wi ni a wi dɛa to kɔ ngboe, ma kɛ a tɔ̃a hã a na: “Fala kɛ mɔ a mɔ ba a nde, nɛ mɔ be fala mɔ ia do a ni, takɔ mi nɛ we ba a.”

¹⁶ Nɛ Yezu sa li a na: “Maria!” Kɔ a nɛa we siki tɛ̃ a dɛ 'da Yezu nga, nɛ a tɔ̃ do lɛnggɛ hebre na: “Rabuni!” (Gulu nɛ na: “Wi be mɔ!”)

¹⁷ Nɛ Yezu tɔ̃ hã a na: “Mɔ tɛ 'bè tɛ mi gɔ, we kɛ mi tɛ kṹ 'da Baa mi i gɔ. Kɔ mɔ nɛ́ we tɔ̃ hã owinɔ 'da mi na, mi kũ dɛ 'da Baa mi, kɛ a 'bɔ a Baa nɛ ni. Mi kũ dɛ 'da Gale 'da mi, kɛ a 'bɔ a Gale 'da nɛ ni.”

¹⁸ Nɛ Maria boko Magdala ni kulu ngɔ, nɛ a la, nɛ a tɔ̃ hã Owi yambala mɛnɔ na, ɛ zɔa Nwa! Nɛ a tɔ̃a wenɔ kɛ Yezu tɔ̃a hã a ni hã wa.

Yezu bia tɛ̃ a hã owi yambala mɛnɔ 'da a

¹⁹ Do kpo kuti tũi kɔ pɔsɛ ni, kɔ wese nɛa we le tũ, nɛ nde owi yambala mɛnɔ wa mba zi li ngba wa vɛ̃ dɛ kɔ mbe tɔa kpo. Nɛ wa kpia nu tɔa ni dɛ ngɔ wa, nɛ wa kã ma, we kɛ wa dɛ zi kili onwa Yudanɔ. Nɛ Yezu hɔa, nɛ a yolo dɛ sanga wa, nɛ a tɔ̃ hã wa na: “Nɛ ɔ́ do gɛ̃a sila!”

²⁰ A tɔ́a ní do'do, nɛ a be tambala kɔ̃ a do gbãlã ngu'du a hã wa. Kɔ wa nɛa we zɔ nwa 'da wa, nɛ wa dɛ yangga wena.

²¹ Nɛ Yezu tɔ̃ 'bɔ hã wa na: “Nɛ ɔ́ do gɛ̃a sila! Nɛ́ kɛ Baa mi tumba mi ngɔ nù gɛ ni, mi tumba tɛ mɛ 'bɔ nɛ.”

²² A tɔ̃a ni do'do, nɛ a ufu bu nu a dɛ ngɔ wa, nɛ a tɔ̃ hã wa na: “Nɛ kpá Hi Wi Santo!

²³ Fala kɛ nɛ fo ku'da 'dã mɔ zu wele, nɛ Gale a fo sɛ tɛ mɛ 'bɔ ku'da 'dã mɛ zu wi ni. Kɔ fala kɛ nɛ fò ku'da 'dã mɔ zu wele gɔ, nɛ nde Gale fó sɛ tɛ mɛ 'bɔ ma gɔ.”

Yezu do Toma

²⁴ 'Da fala kɛ Yezu hɔa ni, nɛ nde Toma, kɛ wa sa 'bɔ li a na Be Dã, nɛ a a mbe kpo sanga owi yambala mɛnɔ 'bu ngɔ wa bɔa ni zi bina.

²⁵ Nɛ ongba a wa tɔ̃ hã a na: “Lɛ zɔa Nwa!” Nɛ Toma gese hã wa na: “Fala kɛ mi zɔ̀ mbala dani Sɛtɛ tambala kɔ̃ a ni, hã mi fí zu kɔ̃ mi li nɛ, nɛ mi e 'bɔ kɔ̃ mi li mbala dani gbãlã ngu'du a ni gɔ, nɛ nde mi kɔ̃́ sɛ na, wi a a gɔ.”

²⁶ Ma la 'bɔ pɔsɔ kpo 'do ki ni, nɛ owi yambala mɛnɔ 'da Yezu wa mba 'bɔ li ngba wa dɛ kɔ tɔa ni, nɛ wa kpia 'bɔ nu tɔa dɛ ngɔ wa, nɛ wa kã ma. Ki ni nɛ nde Toma zi boe. Nɛ Yezu hɔa, nɛ a yolo dɛ sanga wa ni, nɛ a tɔ̃ hã wa na: “Nɛ ɔ́ do gɛ̃a sila!”

²⁷ Nɛ 'do nɛ, nɛ a tɔ̃ hã Toma na: “Mɔ ɛ́fɛ́ zu kɔ̃ mɔ, hã mɔ e tɛ tambala kɔ̃ mi, kɔ mɔ zɔ́. Nɛ mɔ é kɔ̃ mɔ li mbala dani ngu'du mi gɛ, kɔ mɔ lá fala ba kafi do'do, hã mɔ kɔ̃́ na, wi a mi!”

²⁸ Nɛ Toma gese hã a na: “Mɔ a Nwa 'da mi, mɔ a Gale 'da mi!”

²⁹ Nɛ Yezu gese hã a na: “Mɔ kɔ̃a we kɛ mɔ zɔa mi ni gɔ nde? Yangga wena we winɔ kɛ wa kɔ̃a iko, nɛ nde wa zɔ̃ mi do li wa gɔ ni!”

Gã gulu 'buki gɛ

³⁰ Yezu dɛa zi gba sɔ̃ mɔ wena, nɛ owi yambala mɛnɔ 'da a wa zɔa ma do li wa ngboo, nɛ nde mi kɔ̀mɔ̀ ma vɛ̃ dɛ kɔ 'buki gɛ gɔ.

³¹ Mi kɔma wenɔ gɛ, takɔ nɛ kɔ̃ na, Yezu a Mɛsiya, Be 'da Gale. Kɔ nɛ kɔ̃ na mɛ ni, nɛ nɛ kpa sɛ kpasi do zu li a.