YOANƐ 2 - WE NU GALE 1995

Wa dɛa mɔ dɔ ba ngba wi kɔ le Kana

¹ Olo nɛ la tũ bɔa, nɛ do talɛ tũi, nɛ ombe wele wa dɛa mɔ dɔ ba ngba wi kɔ le Kana, tɛ ngɔ nù Galile. Nɛ naa Yezu zi tɛ mɔ dɔɛ ni.

² Nɛ wa sa zi 'bɔ mɔ hã Yezu do Owi yambala mɛnɔ 'da a tɛ mɔ dɔɛ ni.

³ Nɛ winɔ wa nɔa dɔ̃ɛ gbaa, nɛ ma e fɛrr. Kɔ naa Yezu nɛa we zɔ na, dɔ̃ɛ ia ni, nɛ a tɔ̃ hã Yezu na: “Mɔ zɔ́, fo 'bɔ mbé dɔ́ we winɔ bina.”

⁴ Nɛ Yezu gese hã a na: “Naa mi, mɔ a mɔ wè tɛ tɔ̃ we mɛ kɛ na, mi dɛ ni gɔ. Mba gɔ, ngba soe kɛ Gale saka we mi ni, ma tɛ wè gɔ.”

⁵ Nɛ naa a nɛa, nɛ a tɔ̃ hã owi dɛa tonɔ na: “Nɛ dɛ́ kɛnɔ vɛ̃ a tɔ̃ sɛ hã nɛ ni.”

⁶ Okpana lì gazɛlɛ zi di ni, wa dɛa ma do ta. Nɛ lì kɔ kpananɔ ni, Oyudanɔ wa fɔlɔ zi do kɔ̃ wa do tɛlɛ tɛ mɔ olo yaa wa. Nɛ kɔ kpana kpo ma wia zi litrɛ 'bu nɛ ngbɛ'dɛ'dɛ, tabi kama do 'bu nɛ bɔa.

⁷ Nɛ Yezu tɔ̃a hã wi dɛa tonɔ na: “Nɛ nɛ́, kɔ nɛ á lì kɔ kpananɔ gɛ, kɔ ma dunu.” Nɛ wa nɛa, nɛ wa a ni gbaa, nɛ ma dunu tɔɔ.

⁸ Nɛ Yezu tɔ̃ 'bɔ hã wa na: “Nɛ só mbe zu lì, kɔ nɛ nɛ́ do ma hã wi ngɔ wi kɛ̃ mɛnɔ.” Nɛ wa nɛa do nɛ hã a.

⁹ Kɔ wi ni nɛa we yamba lì, nɛ nde ma kifi dɔ̃. Nɛ a ĩ̀ fala dɔ̃ɛ ni yula nɛ ni gɔ. (Ĩ na, Owi dɛa tonɔ wa sua sɔ lì ni, wa ĩ gulu nɛ.) Nɛ a sa mɔ hã wi ba wuke,

¹⁰ nɛ a aka a na: “Mɔ dɛa ní we ge nde? Ma wia sɔ na, wa kɛ̃ de dɔ̃ɛ, kɔ winɔ wa nɔ gbaa, kɔ ma ba wa do'do, sɛ nɛ wa ĩ ti kɛ̃ kɛ ma dè ngboo gɔɛ ni de. Kɔ mɔ dɛ̃ ní gɔ, nɛ mɔ usu dia lì dɔ̃ɛ gbaa ni we ge nde?”

¹¹ Ki ni a kuti gba sɔ̃ mɔ kɛ Yezu dɛa zi ma tɛ Kana, tɛ ngɔ nù Galile. Nɛ mɛnɔ Yezu dɛa ma ni bia dɔ̃lɔ̃ li 'da a, nɛ owi yambala mɛnɔ 'da a wa kɔ̃a zu li a.

¹² Nɛ 'do nɛ, nɛ a la do naa a, do onya a, do owi yambala mɛnɔ 'da a vɛ̃ dɛ kɔ le Kafarnaumɛ, nɛ wa ɔa i mɔ be sĩ.

Yezu lia kɔ tɔa Tɛmpɛloe

¹³ Ngba soe ɛngga Hɔ Nza kɔ Ngbá 'da Oyudanɔ ma kɔla zi, nɛ Yezu la dɛ Yeruzalɛmɛ.

¹⁴ A hɔa i mɔ, nɛ a le kɔ tɔa Tɛmpɛloe, nɛ a kpa Owele tɛ be gole ongɔmbɔ, do obata, opizɔ̃, do owinɔ kɛ wa dungu nu mɛsanɔ tɛ kpolo mbili hã owinɔ ni.

¹⁵ Nɛ Yezu ba fɛlɛ, nɛ a dɛ ma do zufa, nɛ a ma ngɔ ndaka do winɔ kɔ Tɛmpɛloe dɛ nza. A ndaka owi be golenɔ ni do sa'denɔ 'da wa dɛ nza, nɛ a pɛsɛ mbilinɔ, nɛ a ili mɛsanɔ kɛ winɔ wa kpolo mbilinɔ ngɔ nɛ ni dɛ nù.

¹⁶ Nɛ a tɔ̃ hã owi be gole pizɔ̃nɔ na: “Nɛ fó wa do'do! We kɛ ma wè na, nɛ e tɔa 'da Baa mi do tɔa be gole gɔ.”

¹⁷ Kɔ a nɛa we tɔ̃ ní, nɛ ta zu owi yambala mɛnɔ 'da a gba ngɔ we kɔ 'Buki 'da Gale kɛ ma tɔ̃a na: “Aa Gale, kɔ̃a zã kɛ mi kɔ̃a do Tɛmpɛloe 'da mɔ ni, ma dɔ sila mi ɔ nɛ we ni.”

¹⁸ 'Do nɛ, nɛ onwa Yudanɔ wa tɛa, nɛ wa aka a na: “Gba sɔ̃ mɛ mɔ wia we dɛ ma, takɔ ma be hã lɛ na, wa hã wala hã mɔ na mɔ dɛ mɛnɔ gɛ ni a ge nde?”

¹⁹ Nɛ Yezu gese hã wa na: “Nɛ gbíní Tɛmpɛloe gɛ, nɛ mi dɛ sɛ 'bɔ mbé nɛ 'do tũ talɛ.”

²⁰ Nɛ Oyudanɔ wa tɔ̃ hã a na: “Wa dɛa Tɛmpɛloe gɛ 'do 'bu sabɛlɛ nalɛ ngɔ nɛ gazɛlɛ, sɛ a ma ĩ ti e ma de, nɛ mɔ tɔ̃ na, mɔ wia we dɛ ma 'do tũ talɛ, nɛ ma e nde?”

²¹ Nɛ nde Tɛmpɛloe Yezu tɔ̃ zi nɛ ni, mɛ a kili tɛ̃ a wele nɛ.

²² Ma hã 'do kɛ Yezu za'da nza kɔ fie ni, nɛ ta zu Owi yambala mɛnɔ gba ngɔ we a tɔ̃a zi hã wa ni. Nɛ wa kɔ̃a gɛnɛ wenɔ kɔ 'Buki 'da Gale, do kɛnɔ Yezu tɔ̃ zi ni.

Yezu ĩ ti we kɔ zã wele

²³ Do 'da fala ɛngga Hɔ Nza kɔ Ngbá, nɛ Yezu ɔa zi dɛ Yeruzalɛmɛ ni, nɛ gba gili Owele wa zɔa gba sɔ̃ mɛnɔ a dɛ ni, nɛ wa kɔ̃a zu li a.

²⁴ Nɛ nde Yezu gbìnì zã ɛ do wa gɔ, we duzu kɛ a ĩ zi ti we kɔ zã wa ni vɛ̃.

²⁵ Yezu 'bɔ̀ zi na, wa tɔ̃ we mɔ́ wele hɛ̃ ɛ tɔ́a gɔ, we kɛ a do tɛ̃ a, a ĩ ti we kɔ zã winɔ.