YOANƐ 19 - WE NU GALE 1995

¹ 'Do nɛ, nɛ Pilatɛ ba nu a na, wa ba Yezu, kɔ wa zɛ a do zufa ndala.

² Nɛ osodanɔ wa kala otɛ̃, nɛ wa fana do ndasa nwa korr ɔ nɛ kali ni, nɛ wa yulu dɛ zu a, nɛ wa he'de 'bɔ gba du fila tulu hã a.

³ Nɛ wa tɛ, nɛ wa ma ngɔ mɔmɔ a, nɛ wa na: “Balɛ hã mɔ, nwa 'da Oyudanɔ!” Nɛ wa ma ngɔ fũ sanga li a.

⁴ Nɛ Pilatɛ hɔ 'bɔ nza, nɛ a tɔ̃ hã ogba gili winɔ na: “Nɛ zɔ́, mi hɔa do a hã nɛ, takɔ nɛ ĩ na, mi kpà 'dã gulu we mɔ́ a gɔ.”

⁵ Nɛ Yezu hɔa nza do ndasa tɛ̃ dɛ zu a, do fila tuli dɛ tɛ̃ a ni. Nɛ Pilatɛ tɔ̃ hã wa na: “A kɛ!”

⁶ Kɔ onwa nganganɔ, do owi zɔ mɔ nu tɔa Tɛmpɛloe wa nɛa we zɔ a, nɛ wa he mɔ fuu na: “Bɛlɛ a ngɔ finda te! Bɛ̃lɛ a ngɔ finda te!” Nɛ Pilatɛ tɔ̃ hã wa na: “Nɛ bá a, kɔ nɛ bɛ̃lɛ a ngɔ finda te do tɛ nɛ, we kɛ mi kpà 'dã gulu we mɔ́ a gɔ.”

⁷ Nɛ Oyudanɔ wa gese hã a na: “Lɛ do mbula boe, nɛ mbula ni tɔ́a na, a wia do fio, we kɛ a ba tɛ̃ a na, ɛ a Be 'da Gale.”

⁸ Pilatɛ nɛa we zele ni, nɛ kili ba 'bɔ a wena.

⁹ Nɛ a kpolo tɛ̃ a do Yezu dɛ kɔ tɔa 'da a i, nɛ a aka Yezu na: “Mɔ yula do nde?” Nɛ nde Yezu gèsè nu we hã a kpo gɔ.

¹⁰ Nɛ Pilatɛ tɔ̃ hã a na: “Mɔ kɔ̃̀ we wele we hã mi gɔ nde? Mɔ ĩ̀ na, mi do ngawi we da kɔ̃ mi tɛ mɔ, tabi we tɔ̃ 'bɔ na, wa bɛ̃lɛ̃ mɔ ngɔ finda te ni gɔ nde?”

¹¹ Nɛ Yezu gese hã a na: “Ɔ do kɛ Gale hã̀ sɔ ngawi hã mɔ gɔ, nɛ nde mɔ sɔ do ngawi ngɔ mi bina. Ma kɛ 'dã mɛ 'da wi kɛ a ba mi hã mɔ ni, ma nɛa ngɔ gɛlɛ 'dã mɛ 'da mɔ.”

¹² Yolo do di ni, nɛ Pilatɛ ma ngɔ fa wala we da kɔ̃ a tɛ Yezu. Nɛ Oyudanɔ wa he mɔ na: “Mɔ da kɔ̃ mɔ tɛ wi gɛ, nɛ nde mɔ 'bɔ a wi 'da gã nwa ngɔ nù Roma gɔ. We kɛ wi kɛ a tɔ̃ na, ɛ a nwa ni, a bɛ̃a gɛnɛ gã nwa ni!”

¹³ Pilatɛ nɛa we zele ni, nɛ a hɔ do Yezu, nɛ a dungu nù ngɔ kpongbo nwa a 'bili do we ni, tɛ fala wa sa li nɛ do lɛnggɛ hebre na: “Gabata” ni. (Gulu Gabata na: “Fala wa ba do tanɔ.”)

¹⁴ Ma zi do midi, nɛ mɛ zi a tũ dati ɛngga Hɔ Nza kɔ Ngbá, kɛ wa 'dafa do mɔ ɛngga ni. Nɛ Pilatɛ tɔ̃ hã Oyudanɔ na: “Nɛ zɔ́, Nwa 'da nɛ, a kɛ!”

¹⁵ Kɔ wa nɛa we zele ní, nɛ wa ma ngɔ he mɔ fuu na: “Mɔ gbɛ́ a, mɔ gbɛ́ a! Bɛlɛ a ngɔ finda te!” Nɛ Pilatɛ aka wa na: “Mi bɛ̃lɛ̃ nwa 'da nɛ ngɔ finda te nde?” Nɛ onwa nganganɔ wa gese hã a na, lo do mbé gele nwa bina, wi kpo a gã nwa ngɔ nù Roma iko.

¹⁶ Nɛ Pilatɛ ia Yezu dɛ kɔ̃ osodanɔ na, wa bɛ̃lɛ̃ a ngɔ finda te. Osodanɔ wa ba Yezu,

Wa bɛ̃lã Yezu ngɔ finda te

¹⁷ nɛ wa e tole finda te zu 'baka a, nɛ wa hɔ dɛ 'do le i, nɛ wa nɛ tɛ fala wa sa li nɛ do lɛnggɛ hebre na “Golgota” ni. (Gulu Golgota na: “Fala gbãlã zu wi.”)

¹⁸ Nɛ sodanɔ wa bɛ̃lɛ̃ Yezu ngɔ finda te dɛ di ni. Nɛ wa bɛ̃lɛ̃ tɛ mɛ 'bɔ Owele bɔa ngɔ finda te dɛ kɛ zã a ni, mbe kpo ngɔ ngawili kɔ̃, nɛ mbe nɛ ngɔ gale, nɛ Yezu dɛ gbogbo wa ni.

¹⁹ Nɛ Pilatɛ ba nu a, nɛ wa kɔmɔ mbɛti na: “Yezu wi Nazarɛtɛ gɛ a Nwa 'da Oyudanɔ,” nɛ wa bɛ̃lɛ̃ ma dɛ ngɔ finda te ti zu Yezu ni.

²⁰ Nɛ gba gili Owele wa tɔla mbɛti ni, we kɛ fala wa bɛ̃lɛ̃ zi do Yezu ni, ma zi dɔ̃ɔ do gã le iko, nɛ wa kɔma ma do nu lɛnggɛ talɛ: Hebre, Grɛkɛ, do Latɛ̃.

²¹ Nɛ onwa nganganɔ 'da Oyudanɔ wa nɛa, nɛ wa tɔ̃ hã Pilatɛ na: “Mɔ wè tɛ kɔmɔ na: ‘Nwa 'da Oyudanɔ’ gɔ, nɛ nde mɔ wia we kɔmɔ na: Wi gɛ tɔ̃a na, ɛ a Nwa 'da Oyudanɔ.”

²² Nɛ Pilatɛ gisa hã wa na: “Kɛ mi kɔma ni, ma wia ia.”

²³ Osodanɔ wa bɛ̃lɛ̃ Yezu ngɔ finda te do'do, nɛ wa kala tulunɔ 'da a, nɛ wa gɔnɔ sanga nɛ nalɛ, nɛ wele do wele kpa kɛ 'dɛ ɛ. Nɛ wa ba 'bɔ du tuli 'da a kɛ li gbala nɛ bina, ma yula ngɔ kpɔlɔɔ gbaa dɛ nù nga ni.

²⁴ Nɛ sodanɔ wa tɔ̃ dɛ sanga wa na: “Lɛ tɛ ɛ̃̀ sanga du tuli gɛ gɔ, kɔ lɛ to zeke ngɔ nɛ. Kɔ wi kɛ a vũ ma ni, nɛ a ba do mɔ́ a.” Mɛnɔ ni ma la ni, takɔ lɛnggɛ kɛ wa kɔma kɔ 'Buki 'da Gale na: “Wa kɛ̃a sanga tulunɔ 'da mi dɛ kɔ̃ wa, nɛ wa tua zeke ngɔ du tulu 'da mi” ni, ma dɛ tɛ̃ ɛ.

²⁵ Mɛ ni nɛ nde Maria, naa Yezu do boko nya a, wa yolo zi dɛ kɛ zã finda te wa bɛ̃lã do Yezu ni, mba do Maria wuke 'da Klopasi, do Maria, boko Magdala.

²⁶ Nɛ Yezu zɔ naa ɛ, nɛ nde a yula do wi yambala mɛ kɛ a kɔ̃a gɛnɛ a wena ni. Nɛ Yezu tɔ̃ hã naa ɛ na: “Naa mi, mɔ zɔ́ be 'da mɔ, a kɛ!”

²⁷ Nɛ 'do nɛ, nɛ a tɔ̃ hã wi yambala mɛ ni na: “Mɔ zɔ́ naa mɔ, a kɛ!” Nɛ ndo do ngba soe ni, wi yambala mɛ ni kpa naa Yezu dɛ 'da a.

Yezu fia

²⁸ 'Do nɛ, nɛ Yezu ĩ na, mɛnɔ vɛ̃ wia ia, nɛ a tɔ̃ na: “Wɔ lì ba mi ba.” A tɔ̃a ni, takɔ lɛnggɛ kɛ wa kɔma kɔ 'Buki ni dɛ tɛ̃ ɛ.

²⁹ Wa ia zi kpana kpã dɔ̃ dɛ di ni, nɛ sodanɔ wa ba nukã, nɛ wa fi 'dɔ kpã dɔ̃ɛ ni, nɛ wa ɛnzɛ dɛ zu ka gole, nɛ wa ɛfɛ dɛ nu Yezu,

³⁰ takɔ a nzɔ'bɔ ma. Kɔ a nzɔ'bɔ do'do, nɛ a tɔ̃ na: “Ma wia vɛ̃ ia!” Nɛ a bili zu a, nɛ a e sila a nù.

Soda kpo dumu ngu'du Yezu

³¹ Mɛ zi a tũ dati tũ ɔmɔ tɛ wi, nɛ do tɛlɛ tɛ mɔ olo yaa Yudanɔ, nɛ nde wa kɔ̃̀ zi na, wɔlɔ 'bana ngɔ finda te do tũ ɔmɔ tɛ wi gɔ. Dɛ ngɔ nɛ, tũi ni zi a tũ gã ɛngga ngboo. Ma kɛ onwa Yudanɔ wa nɛa, nɛ wa aka Pilatɛ, takɔ a ba nu a na, sodanɔ wa gbini nyanga winɔ wa bɛ̃lɛ̃ wa ngɔ finda te ni, kɔ wa fo wa ngɔ finda te do'do.

³² Nɛ sodanɔ wa nɛa, nɛ wa gbini nyanga wanɔ bɔa zi wa bɛ̃lɛ̃ wa fala nɛ kpo do Yezu ni.

³³ Kɔ wa nɛ hɔ ngɔ Yezu, nɛ wa zɔ na, a fia sɔ belee ia, nɛ wa gbìnì nyanga a gɔ.

³⁴ Nɛ mbe soda kpo tɛa, nɛ a dumu ngu'du Yezu do sɛlɛ, nɛ tɔkɔ mba do lì ma ngɔ hɔ nɛ do ti.

³⁵ Wi kɔma mbɛti gɛ, a zɔa zi mɛnɔ ni do li a. Nɛ lɛnggɛ a kɔma gɛ, mɛ a gbãlã we ngboo. A ĩ na, ɛ tɔ̃ a gbãlã we, nɛ a kɔma lɛnggɛ nɛ, takɔ nɛ tɛ mɛ 'bɔ, nɛ kɔ̃ zu li Yezu.

³⁶ Mɛ ni la ní, takɔ we wa kɔma kɔ 'Buki 'da Gale na: “Wa gbíní sɛ gbãlã tɛ̃ a kpo gɔ” ni, ma dɛ tɛ̃ ɛ.

³⁷ Nɛ kɔ gele mbɛti, wa kɔma 'bɔ na: “Owinɔ wa ka sɛ mɔ tɛ wi wa dumu ngu'du a ni.”

Wa mi Yezu

³⁸ Nɛ 'do nɛ, nɛ mbe wele kpo li a a Yozɛfu, wi Arimate nɛa, nɛ a aka Pilatɛ we ba wɔlɔ Yezu. Yozɛfu ni zi a mbe sanga owinɔ 'da Yezu. Nɛ nde a kɔ̃̀ zi we be tɛ̃ a dɛ wila fala na, ɛ a wi 'da Yezu gɔ, we duzu kɛ a dɛ zi kili onwa Yudanɔ. Yozɛfu aka Pilatɛ, nɛ a kɔ̃, nɛ a nɛa, nɛ a ba wɔlɔ Yezu dɛ nù.

³⁹ Nɛ Nikodɛmɛ, wi kɛ a nɛa zi mbe 'da Yezu i do tũi ni, a tɛa tɛ mɛ 'bɔ do onɔ yɔmbɔ mirɛ do aloesi. Dĩ nɛ ɔ zi nɛ 'bu kilo talɛ ni.

⁴⁰ Nɛ wa bɔa ni, wa ba wɔlɔ Yezu, nɛ wa kasa du gbau tulu tɛ̃ a, nɛ wa a onɔ yɔmbɔnɔ ni ngɔ tuli ni, ɔ nɛ tɛlɛ tɛ kɛ Oyudanɔ wa dɛ ma we mi do fie 'da wa ni.

⁴¹ Mbe be ngbo zi tɛ fala wa bɛ̃lɛ̃ do Yezu ngɔ finda te ni boe. Nɛ kɔ ngboe ni, mbé zunu kɛ wa 'dungga ma kɔ ta, kɔ wa tɛ mì wele kɔ nɛ gɔ ni zi boe.

⁴² Nɛ́ kɛ tũi wa bɛ̃lɛ̃ do Yezu ngɔ finda te ni, mɛ a tũi Oyudanɔ wa 'dafa do ɛngga ɔmɔ tɛ wi 'da Oyudanɔ ni, nɛ wa mi zi wɔlɔ Yezu dɛ di ni, we kɛ ma kɔla zi do fala wa bɛ̃lɛ̃ do a ngɔ finda te ni.