YOANƐ 17 - WE NU GALE 1995

Yezu sambala we owinɔ 'da a

¹ Yezu wila we ni do'do, nɛ a ba li a ngɔ, nɛ a tɔ̃ na: “Aa Baa mi, ngba soe kɛ mɔ ia zi ni wia ia. Kɔ mɔ dɛ́ na, mi Be 'da mɔ, mi kpa dɔ̃lɔ̃ li, takɔ mɔ kpa 'bɔ dɔ̃lɔ̃ li do wala 'da mi.

² Mba gɔ, mɔ ia mi do nwa ngɔ winɔ vɛ̃, takɔ mi hã kpasi kɛ ma é sɛ gɔ ni hã wanɔ mɔ saka zɛ́ wa na, wa hɔ owinɔ 'da mi ni.

³ Kpasi kɛ ma é sɛ gɔ ni, mɛ a kɛ na wele ĩ ti mɔ, kɛ mɔ a ngbongbo Gale, nɛ a ĩ 'bɔ ti mi Yezu Kristo, kɛ mɔ tumba mi ni.

⁴ Mi tɛa ngɔ nù gɛ, nɛ mi bia dɔ̃lɔ̃ li 'da mɔ hã owinɔ, nɛ mi dɛa toe kɛ mɔ hã zi ma hã mi ni, gbaa we hɔ ndɔti nɛ.

⁵ Kɔ ngangga ni, Baa mi, mɔ bá mi dɛ 'da mɔ i, nɛ mɔ hã 'bɔ dɔ̃lɔ̃ li hã mi, ɔ nɛ kɛ mi zɛ́ do ma dati kɛ na, mɔ dɛ nùi gɛ ni.

⁶ “Mi bia tɛlɛ tɛ mɔ hã owinɔ kɛ mɔ saka zɛ́ wa ngɔ nù gɛ, nɛ mɔ hã wa hã mi ni. Wa zɛ́ a owinɔ 'da mɔ, nɛ mɔ hã zi wa hã mi, nɛ wa dɛa olo nu mɔ.

⁷ Nɛ wa ĩ na, mɛnɔ vɛ̃ kɛ mi kpa ma ni, wi a mɔ a mɔ hã ma hã mi.

⁸ Mba gɔ, mi bia wenɔ kɛ mɔ tɔ̃a zi hã mi ni vɛ̃ hã wa, nɛ wa kɔ̃a gɛnɛ nɛ. Nɛ wa ĩ ngboo na, mi yula 'da mɔ, nɛ wa kɔ̃ na, wi a mɔ a mɔ tumba mi.

⁹ “Mi sambala mɔ we duzu wa. Mi sámbálá mɔ we winɔ nù gɛ gɔ, nɛ nde mi aka mɔ we wanɔ kɛ mɔ hã wa hã mi ni, we kɛ wa a owinɔ 'da mɔ.

¹⁰ Mɛnɔ vɛ̃ kɛ mi do ma ni, mɛ a mɛnɔ 'da mɔ, nɛ mɛnɔ vɛ̃ kɛ mɔ do ma ni, mɛ a mɛnɔ 'da mi. Nɛ dɔ̃lɔ̃ li 'da mi ma bia tɛ̃ ɛ do wala 'da owinɔ ni.

¹¹ Mi sɛ 'bɔ mbé nɛ ngɔ nù gɛ bina, mi nɛ si dɛ 'da mɔ i, nɛ nde wa 'bana sɛ ngɔ nù gɛ. Kɔ Baa mi, mɔ a santo, ma wia na, mɔ fɔmɔ wa do ngawi 'da mɔ. Mɛ a ngawi kɛ mɔ hã zi ma hã mi ni. Mɔ fɔ́mɔ́ wa, takɔ wa ɔ wele kpo, ɔ nɛ kɛ lɛ do mɔ, lɛ kpo ni.

¹² 'Da fala zi mi fala nɛ kpo do wa ni, mi fɔmɔ zi wa do ngawi 'da mɔ, kɛ mɔ hã zi ma hã mi ni. Mi fɔmɔ zi wa de wena, nɛ wele kpo yɔ̀ zi gɔ, tati a wele kɛ wa kɔma zɛ́ kɔ 'Buki na, a yɔ sɛ ni iko. Ma la ní, takɔ we wa kɔma kɔ 'Buki ni dɛ tɛ̃ ɛ.

¹³ “Nɛ nde ngangga ni, mi nɛ si dɛ 'da mɔ i, kɔ mi tɔ̃ wenɔ ni hã wa 'da fala kɛ mi 'bana dɛ ngɔ nù gɛ ni, takɔ wa kpa tɛ mɛ 'bɔ yangga mi kpa ma gɛ, nɛ yangga ni dunu kɔ sila wa.

¹⁴ Mi bia zi we nu mɔ hã wa, nɛ owinɔ nù gɛ wa sɛnɛ wa, we kɛ wa a winɔ nù gɛ gɔ, ɔ nɛ kɛ mi tɛ mɛ 'bɔ a wi nù gɛ gɔ ni.

¹⁵ Kɔ mi àkà mɔ na, mɔ fo wa ngɔ nù gɛ do'do gɔ, nɛ nde mi aka mɔ na, mɔ fɔ́mɔ́ wa na, dɔ wa té dɛ kɔ Satana gɔ.

¹⁶ Wa a owinɔ nù gɛ gɔ, ɔ nɛ kɛ mi tɛ mɛ 'bɔ a wi nù gɛ gɔ ni.

¹⁷ Mɔ dɛ na, wa hɔ owinɔ 'da mɔ ngboo do wala 'da we nu mɔ. Mba gɔ, we nu mɔ a gbãlã we.

¹⁸ Mi tumba wa ngɔ nù gɛ, ɔ nɛ kɛ mɔ tumba do mi ni.

¹⁹ Kɔ mi ba tɛ mi vɛ̃ hã mɔ we wa, takɔ wa hɔ owinɔ 'da mɔ ngboo.

²⁰ “Mi áká mɔ tati a we wa iko gɔ, nɛ nde mi aka 'bɔ mɔ we owinɔ kɛ wa be sɛ we nu mɔ hã wa, nɛ wa kɔ sɛ zu li mi ni.

²¹ Mi aka mɔ, takɔ wa vɛ̃ wa ɔ wele kpo, ɔ nɛ kɛ lɛ do mɔ Baa mi, lɛ kpo ni. E kɔ wa mba do lɛ, nɛ lɛ ɔ wele kpo, takɔ winɔ nù gɛ wa ĩ na, mɔ a mɔ tumba mi.

²² Mi hã dɔ̃lɔ̃ li kɛ mɔ hã zɛ́ ma hã mi ni hã wa, takɔ wa ɔ wele kpo, ɔ nɛ kɛ lɛ do mɔ, lɛ kpo ni.

²³ Mi mba do wa, nɛ mɔ mba do mi, takɔ wa vɛ̃ wa ɔ wele kpo, nɛ owinɔ wa ĩ na, mɔ tumba mi, nɛ mɔ kɔ̃a gɛnɛ wa kpasaa ɔ nɛ kɛ mɔ kɔ̃a do gɛnɛ mi ni.

²⁴ “Baa mi, mɔ hã zi wa hã mi, kɔ mi kɔ̃a na, wa ɔ fala nɛ kpo do mi tɛ fála kɛ mi nɛ dungu do ma ni, takɔ wa zɔ dɔ̃lɔ̃ li 'da mi. Mɛ a dɔ̃lɔ̃ li kɛ mɔ hã zɛ́ ma hã mi, we kɛ mɔ kɔ̃a zɛ́ gɛnɛ mi dati kɛ na mɔ dɛ nùi ni.

²⁵ Baa mi, mɔ a wi bɔlɔ zu, nɛ winɔ nù gɛ wa ĩ̀ ti mɔ gɔ. Nɛ nde mi ĩ ti mɔ, nɛ wanɔ kɛ mi do wa gɛ wa ĩ na, wi a mɔ a mɔ tumba mi.

²⁶ Mi bia tɛlɛ tɛ mɔ hã wa, kɔ mi kɔ̃a we be ma hã wa dɛ dati gbaa na, wa kɔ̃ gɛnɛ ngba wa, ɔ nɛ kɛ mɔ kɔ̃a do gɛnɛ mi ni, nɛ mi ɔ dɛ kɔ sila wa ngboo.”