YOANƐ 16 - WE NU GALE 1995

¹ “Mi tɔ̃ hã nɛ na mɛ ni na, da dɛ kɔ nɛ lá fala kɔ̃ zu li mi gɔ.

² Wa ndaka sɛ nɛ kɔ tɔa mbulanɔ. Nɛ mbe ngba soe kpo, nɛ wa ma sɛ ngɔ gbɛ nɛ, nɛ wa lengge sɛ na, mɛnɔ lo dɛ ni, ma dɔnggɔ Gale dɔngga.

³ Wa zɛlɛ sɛ tɛ nɛ na mɛ ni, we kɛ wa ĩ̀ ti Baa mi gɔ, nɛ wa ĩ̀ 'bɔ ti mi gɔ.

⁴ Mi tɔ̃ wenɔ ni hã nɛ, takɔ 'da fala wa ma sɛ ngɔ zɛlɛ tɛ nɛ ni, nɛ ta zu nɛ gba ngɔ wenɔ mi tɔ̃a hã nɛ ni. “Ndo nyanga kɛ lɛ ma zi ngɔ yɛnggɛ do nɛ ni, mi tɔ̃̀ zi wenɔ ni hã nɛ gɔ, we kɛ mi zi dɛ sanga nɛ.

Dɛa toe 'da Hi Wi Santo

⁵ Kɔ ngangga ni, mi nɛ si 'da Baa mi, Wi tombo mi. Nɛ wele kpo sanga nɛ àkà mi na: ‘Mɔ nɛ do nde’ ni gɔ.

⁶ Kɔ sila nɛ dunu do 'bako, we duzu wenɔ mi tɔ̃a hã nɛ ni.

⁷ Nɛ nde mi tɔ̃ hã nɛ do gbãlã we na, we duzu nɛ, ma dia fɛ̃ na mi la. We kɛ mi là gɔ, nɛ nde Hi Wi Santo, Wi gbaka wi, a tɛ́ sɛ gɔ. Kɔ fala kɛ mi la, nɛ mi tombo sɛ a hã nɛ.

⁸ Kɔ fala kɛ a tɛ, nɛ a be sɛ gulu 'dã mɔ, do bɔlɔ zu dɛa mɔ, do 'bili we 'da Gale hã owinɔ nù gɛ. We kɛ wa ĩ̀ ti gulu nɛ gɔ.

⁹ Wa ĩ̀ ti gulu 'dã mɔ gɔ, we kɛ wa kɔ̃̀ zu li mi gɔ.

¹⁰ Nɛ wa ĩ̀ ti gulu bɔlɔ zu dɛa mɔ gɔ, we kɛ mi si sɛ 'da Baa mi i, nɛ nɛ zɔ́ sɛ 'bɔ mi gɔ.

¹¹ Wa ĩ̀ ti gulu 'bili we 'da Gale gɔ, we kɛ Gale 'bili we 'da Satana, nwa ngɔ nùi gɛ ia.

¹² “Mi 'bɔ do mbé we we tɔ̃ hã nɛ wena, nɛ nde nɛ wé sɛ we zele ma vɛ̃ ngangga gɛ gɔ.

¹³ Kɔ 'da fala kɛ Hi Wi Santo, kɛ a tɔ̃ gbãlã we ni a hɔ, nɛ a be sɛ gbãlã we ngɔ mɛnɔ vɛ̃ hã nɛ. A tɔ̃́ sɛ wenɔ do linggamɛ 'da a zu a kpo gɔ, nɛ nde a tɔ̃ sɛ vɛ̃ a kɛ a zila ma nu Gale ni. Nɛ a tɔ̃ sɛ 'bɔ we mɛnɔ kɛ ma hɔ sɛ ni.

¹⁴ A hã sɛ dɔ̃lɔ̃ li hã mi, we kɛ wenɔ a tɔ̃ sɛ hã nɛ ni, a kpa sɛ ma 'da mi.

¹⁵ Mɛnɔ 'da Baa mi vɛ̃ a mɔ́ mi. Gulu nɛ a mi tɔ̃ na, wenɔ Hi Wi Santo a tɔ̃ sɛ hã nɛ ni, a kpa sɛ ma 'da mi ni.

'Bako ma kifi sɛ yangga

¹⁶ “Ma 'bana bi sĩ, nɛ nɛ zɔ́ sɛ 'bɔ mi gɔ. Kɔ 'do nɛ la 'bɔ bi sĩ, nɛ nɛ zɔ sɛ 'bɔ mi.”

¹⁷ Nɛ ombe sanga owi yambala mɛnɔ wa aka ngba wa na: “Kɛ a tɔ̃ na, ma 'bana bi sĩ, nɛ lɛ zɔ́ sɛ ɛ gɔ, nɛ 'do nɛ 'bɔ bi sĩ, nɛ lɛ zɔ sɛ ɛ, do kɛ a tɔ̃ na, ɛ si 'da Baa ɛ ni, gulu nɛ na ge nde?

¹⁸ Gulu we a tɔ̃ na, ma 'bana bi sĩ ni na ge nde? Lɛ ĩ̀ ti kɛ a tɔ̃ ni gɔ.”

¹⁹ Nɛ Yezu ĩ na wa kɔ̃a we aka a ni, nɛ a tɔ̃ hã wa na: “Mi tɔ̃a sɔ hã nɛ na, ma 'bana bi sĩ, nɛ nɛ zɔ́ sɛ mi gɔ, nɛ 'do nɛ 'bɔ bi sĩ, nɛ nɛ zɔ sɛ 'bɔ mi. Kɔ nɛ aka ngba nɛ we wenɔ ni nde?

²⁰ Mi tɔ̃ hã nɛ do gbãlã we na, nɛ dungu sɛ do mili kɔ̃a, do 'bako, nɛ nde winɔ nù gɛ wa sɛ do yangga wena. Nɛ sɛ do 'bako, nɛ nde 'bakoe 'da nɛ ma kifi sɛ yangga.

²¹ Ma ɔ nɛ fala kɛ wuko kɔlɔ fala ko nɛ, nɛ nde a do 'bako, we duzu kɛ ngba soe zɛlɛ kula 'da a kɔla ni. Kɔ fala kɛ be hɔ do'do, nɛ ta zu a ele ngɔ zɛlɛ kula, we kɛ a do yangga mbé be a kua a ni.

²² Ma tɛ mɛ 'bɔ na mɛ ni we nɛ. Mba gɔ, ngangga ni, nɛ do 'bako, kɔ mi zɔ sɛ 'bɔ nɛ, nɛ sila nɛ ma dɛ sɛ yangga, nɛ wele wé sɛ we fo yangga ni gɔ.

²³ “Kɔ ngba soe kɛ nɛ zɔ sɛ 'bɔ mi ni we, nɛ nɛ áká sɛ 'bɔ mi aka gɔ. Mi tɔ̃ hã nɛ do gbãlã we na, Baa mi a hã sɛ mɛnɔ vɛ̃ kɛ nɛ gɔ ma kɔ̃ a do zu li mi ni hã nɛ.

²⁴ Gbaa tia do sɔɛ gɛ, nɛ tɛ gɔ̀ mɔ kɔ̃ Baa mi do zu li mi gɔ. Kɔ fala kɛ nɛ gɔ, nɛ nɛ kpa sɛ. Kɔ fala kɛ nɛ kpa ma, nɛ sila nɛ ma dunu sɛ do yangga.

Yezu do ngawi nɛa ngɔ mɛnɔ nù gɛ vɛ̃

²⁵ “Mi tɔ̃a zi wenɔ ni vɛ̃ hã nɛ do gba we. Kɔ 'do gɛ, nɛ nde mi tɔ̃́ sɛ 'bɔ hã nɛ do gba we gɔ. Mi tɔ̃ sɛ wenɔ 'da Baa mi hã nɛ dɛ wila fala iko.

²⁶ Kɔ ngba soe ni we, nɛ nɛ gɔ sɛ mɔ kɔ̃ Baa mi do zu li mi. Nɛ mi áká sɛ Baa mi we nɛ aka gɔ,

²⁷ we kɛ Baa mi ngboo kɔ̃a gɛnɛ nɛ. A kɔ̃a gɛnɛ nɛ, we kɛ nɛ kɔ̃a gɛnɛ mi, nɛ nɛ kɔ̃a na, mi yula 'da Gale.

²⁸ Mi yula zi 'da Baa mi, nɛ mi tɛa nù gɛ. Kɔ ngangga ni, mi nɛ la nùi gɛ, nɛ mi si dɛ 'da Baa mi i.”

²⁹ Nɛ Owi yambala mɛnɔ 'da a wa tɔ̃ na: “Mɔ zɔ́, ngangga ni mɔ tɔ̃a dɛ wila fala, mɔ tɔ̃̀ do gba we gɔ.

³⁰ Nɛ lɛ ĩ na, mɔ ĩ ti mɛnɔ vɛ̃, nɛ ma wè na, wele aka mɔ do we aka sɛ nɛ de gɔ. Ma kɛ lɛ kɔ̃a na, mɔ yula 'da Gale ni.”

³¹ Nɛ Yezu gese hã wa na: “Ngangga ni, nɛ kɔ̃a ní ngboo nde?

³² Do ngba soe ma tɛ 'do gɛ, nɛ ma hɔa 'bɔ ia ni, nɛ nɛ vɛ̃ nɛ pɛsɛ sɛ ndã ndã, nɛ wele do wele a si sɛ dɛ nu tɔa 'da a, nɛ nɛ la sɛ mi zu mi kpo. Nɛ nde mi sɛ zu mi kpo iko gɔ, we kɛ Baa mi do mi boe.

³³ Mi tɔ̃a zi wenɔ ni hã nɛ, takɔ nɛ mba do mi kpo, hã sila nɛ gɛ̃. Nɛ kpa sɛ zɛlɛ tɛ ngɔ nù gɛ, nɛ nde nɛ ɔ́ do kpã sila! Mba gɔ, ngawi 'da mi nɛa ngɔ mɛnɔ nù gɛ vɛ̃ ia.”