YOANƐ 14 - WE NU GALE 1995

Yezu a li wala kɛ ma nɛ dɛ 'da Baa a i ni

¹ Nɛ Yezu tɔ̃ hã wa na: “Dɔ sila nɛ ɔ́ ngɔ gɔ. Nɛ ɔ́ do kɔ̃a we dɛ 'da Gale, nɛ nɛ ɔ́ 'bɔ do kɔ̃a we dɛ 'da mi.

² Kɔ tɔa 'da Baa mi i, fala ɔi dɛlɛ wena. Ma ɔ̃ sɔ ni gɔ, nɛ nde mi tɔ̃́ sɔ 'bɔ hã nɛ gɔ. Mi nɛ nɛ we 'dafa fala hã nɛ.

³ Kɔ mi nɛ, hã mi 'dafa fala hã nɛ do'do, nɛ mi kpolo sɛ 'bɔ tɛ mi, we kala nɛ si do nɛ dɛ fala mi do ma ni, takɔ nɛ ɔ tɛ mɛ 'bɔ dɛ di ni.

⁴ Nɛ ĩ ti wala kɛ ma nɛ dɛ fala mi nɛ la nɛ ni.”

⁵ Nɛ Toma aka a na: “Nwa, lɛ ĩ̀ ti fala mɔ nɛ la dɛ tɛ nɛ ni gɔ, kɔ lɛ nɛ dɛ fala ĩ ti li wala nɛ nɛ nde?”

⁶ Nɛ Yezu gese hã a na: “Mi a li wala kɛ ma la dɛ 'da Baa mi, nɛ mi a wele gbãlã we do wele kpasi. Wele wè tɛ hɔ 'da Baa mi iko gɔ, tati a do wala 'da mi sɛ nɛ de.

⁷ Fala kɛ nɛ ĩ sɔ ti mi, nɛ nɛ ĩ sɔ tɛ mɛ 'bɔ ti Baa mi. Kɔ yolo do sɔɛ gɛ, nɛ ĩ ti a ia, nɛ nɛ zɔa 'bɔ a ia.”

⁸ Nɛ Filipɛ tɔ̃ hã a na: “Nwa, mɔ kɔ̃, nɛ mɔ bé Baa mɔ hã lɛ, kɔ lɛ zɔ a, nɛ ma we sɛ do lɛ iko.”

⁹ Nɛ Yezu gese hã a na: “Filipɛ, kɛ mi ɔa do nɛ gbaa gɛ, mɔ tɛ ĩ̀ ti mi gɔ nde? Wi kɛ a zɔ mi, nɛ nde a zɔa Baa mi ia. Kɔ gulu kɛ mɔ aka 'bɔ mi na, mi be Baa mi hã nɛ ni we ge nde?

¹⁰ Mɔ ĩ̀ na, lɛ do Baa mi, lɛ a wele kpo iko ni gɔ nde? Wenɔ mi tɔ̃ hã nɛ gɛ, ma yóló kɔ mi iko gɔ. Wi a Baa mi, kɛ a fala nɛ kpo do mi ni, a hã a dɛ mɛnɔ gɛ.

¹¹ Ma wia na, nɛ kɔ̃ gɛnɛ we nu mi gɛ na, lɛ do Baa mi, lɛ a wele kpo iko. Kɔ fala kɛ nɛ kɔ̃̀ ni gɔ, nɛ nɛ zɔ mɛnɔ mi dɛ ma ni, nɛ nɛ kɔ̃́ gɛnɛ mi we duzu ma.

¹² “Mi tɔ̃ hã nɛ do gbãlã we na, wele kɛ a kɔ̃ zu li mi, nɛ a dɛ sɛ tɛ mɛ 'bɔ mɛnɔ mi dɛ ma gɛ. Nɛ a dɛ sɛ 'bɔ kɛnɔ ma nɛa ngɔ gɛlɛ kɛ mi dɛa ma ni, we kɛ mi nɛ la dɛ 'da Baa mi i.

¹³ Mɛnɔ vɛ̃ nɛ aka Baa mi we nɛ do zu li mi ni, mi dɛ sɛ ma, takɔ Baa mi kpa dɔ̃lɔ̃ li do wala 'da mi.

¹⁴ Nɛ gɛnɛ kɔ mɔ ge nde, kɔ nɛ gɔ kɔ̃ mi do zu li mi, nɛ mi hã sɛ ma hã nɛ.

Gale a tombo sɛ Hi Wi Santo

¹⁵ “Fala kɛ nɛ kɔ̃ gɛnɛ mi, nɛ nɛ dɛ sɛ mbulanɔ 'da mi.

¹⁶ Nɛ mi aka sɛ Baa mi, nɛ a tombo mbé Wi gbaka wi hã nɛ olo mi, nɛ a 'bana sɛ do nɛ fai.

¹⁷ Wi a Hi Wi Santo kɛ a be gulu gbãlã we hã winɔ. Winɔ nù gɛ wa wé sɛ we kpa Hi Wi Santoe ni gɔ, we kɛ wa zɔ́ a gɔ, nɛ wa ĩ́ 'bɔ ti a gɔ. Nɛ nde nɛ, nɛ ĩ ti a, we kɛ a do nɛ fala nɛ kpo, nɛ a ɔ sɛ 'bɔ dɛ kɔ nɛ.

¹⁸ “Mi lá sɛ nɛ ɔ nɛ obe gula iko gɔ, mi kpolo sɛ 'bɔ tɛ mi 'da nɛ.

¹⁹ Ma 'bànà nyɛlɛ gɔ, nɛ winɔ nù gɛ, wa zɔ́ sɛ 'bɔ mi gɔ. Nɛ nde nɛ, nɛ zɔ sɛ mi. Nɛ́ kɛ mi do kpasi ni, nɛ sɛ tɛ mɛ 'bɔ do kpasi.

²⁰ Kɔ 'da fala ni ma we, nɛ nɛ ĩ sɛ na, lɛ do Baa mi, lɛ a wele kpo, nɛ lɛ tɛ mɛ 'bɔ do nɛ a wele kpo.

²¹ “Wele kɛ a zele mbulanɔ 'da mi, kɔ a dɛ ma, nɛ nde wi kɔ̃ gɛnɛ mi a ni. Nɛ Baa mi a kɔ̃ sɛ gɛnɛ wi kɛ a kɔ̃a mi ni, nɛ mi kɔ̃ sɛ tɛ mɛ 'bɔ gɛnɛ wi ni, nɛ mi be sɛ tɛ mi hã a.”

²² Nɛ Yudasi ('bangga tɛ Yudasi Iskariɔtɛ mba) aka Yezu na: “Nwa, mɔ nɛ dɛ sɛ fala be tɛ mɔ hã lɛ, nɛ nde mɔ bé sɛ tɛ mɔ hã ogele winɔ gɔ ni nɛ nde?”

²³ Nɛ Yezu gese hã a na: “Wi kɛ a kɔ̃ gɛnɛ mi, nɛ a dɛ sɛ olo nu mi, nɛ Baa mi a kɔ̃ sɛ gɛnɛ a. Nɛ lɛ do Baa mi, lɛ tɛ sɛ, nɛ lɛ ɔ do a fai.

²⁴ Kɔ wi kɛ a kɔ̃̀ gɛnɛ mi gɔ, nɛ nde a dɛ́ sɛ olo nu mi gɔ. Kɔ wenɔ mi tɔ̃ hã nɛ ni, ma yóló dɛ nu mi zu mi kpo iko gɔ, nɛ nde ma yula nu Baa mi, Wi tombo mi.

²⁵ “Mi tɔ̃ wenɔ ni hã nɛ, do 'da fala mi 'bana do nɛ gɛ.

²⁶ Nɛ 'do nɛ, nɛ Hi Wi Santo, Wi gbaka wi kɛ Baa mi a tombo sɛ a do zu li mi ni, a be sɛ mɛnɔ vɛ̃ hã nɛ, nɛ a gba sɛ 'bɔ ta zu nɛ ngɔ wenɔ kɛ mi tɔ̃a zi hã nɛ ni vɛ̃.

²⁷ “Mi hã gɛ̃a sila hã nɛ, mi la gɛ̃a sila kɛ mi do ma ni hã nɛ. Mi hã̀ ma ɔ nɛ kɛ winɔ nù gɛ wa hã ma ni gɔ. Kɔ dɔ sila nɛ ɔ́ ngɔ gɔ, nɛ kili tɛ bà nɛ gɔ.

²⁸ Nɛ zila we mi tɔ̃a na: ‘Mi la nɛ, nɛ 'do nɛ, nɛ mi kpolo sɛ 'bɔ tɛ mi 'da nɛ’ ni. Kɔ fala kɛ nɛ kɔ̃ sɔ gɛnɛ mi kɔ̃a, nɛ nɛ dɛ sɔ yangga kɛ na, mi si 'da Baa mi i ni. We kɛ Baa mi nɛa ngɔ mi.

²⁹ Mi tɔ̃a wenɔ gɛ hã nɛ dati kɛ na ma dɛ tɛ̃ ɛ ni, takɔ fala kɛ ma dɛ tɛ̃ ɛ, nɛ nɛ kɔ̃ gɛnɛ we 'da mi.

³⁰ Mi wélé sɛ 'bɔ mbé we hã nɛ wena gɔ, we kɛ Satana, nwa ngɔ nùi gɛ tɛ tɛ nɛ. Nɛ nde a do ngawi kpo ngɔ gɛlɛ mi bina.

³¹ Nɛ ma wia na, winɔ nù gɛ wa ĩ na, mi kɔ̃a gɛnɛ Baa mi, nɛ mi dɛ olo nu a. Kɔ nɛ kúlú ngɔ, hã lɛ lá dɛ gele fala!