YOANƐ 13 - WE NU GALE 1995

Yezu fɔla nyanga owi yambala mɛnɔ 'da a

¹ Do dati ɛngga Hɔ Nza kɔ Ngbá, nɛ Yezu ĩ zi na, ngba soe ɛ nɛ la nùi gɛ, kɔ ɛ nɛ dɛ 'da Baa ɛ i ni, ma wia ia. A kɔ̃a zi gɛnɛ owinɔ 'da a kɛ wa ngɔ nù gɛ ni wena, nɛ a kɔ̃a gɛnɛ wa la li ngele gbaa nɛ a fe nɛ.

² Yezu zi do Owi yambala mɛnɔ 'da a tɛ nyɔngɔ mɔ. Mɛ ni nɛ nde Satana fi zi linggamɔ kɔ zã Yudasi, be 'da Simɔ Iskariɔtɛ na, a 'dɔlɔ Yezu ia.

³ Nɛ Yezu ĩ zi na, ɛ yula 'da Gale, nɛ ɛ kpolo sɛ 'bɔ tɛ̃ ɛ dɛ 'da Gale. Nɛ a ĩ 'bɔ na, Gale a zi mɛnɔ vɛ̃ dɛ kɔ̃ ɛ ni.

⁴ Ma kɛ a kulu ngɔ nu nyɔngɔmɛ, nɛ a hɔlɔ tulu ngɔɛ 'da a, nɛ a ba mbe tulu dili tɛ wi, nɛ a kpo ma 'dɛ tili a.

⁵ Nɛ a a lì kɔ sani, nɛ a ma ngɔ fɔlɔ nyanga owi yambala mɛnɔ 'da a, tɛ dili ma do tuli kɛ a kpua 'dɛ tili a ni.

⁶ Kɔ a nɛa we hɔ ngɔ Simɔ Petro, nɛ Petro aka a na: “Mɔ Nwa, mɔ nɛ fɔlɔ nyanga mi kpaa nde?”

⁷ Nɛ Yezu gese hã a na: “Mɔ ĩ̀ gulu mɛ mi dɛ ma ngangga ni gɔ, nɛ nde mɔ ĩ sɛ gulu nɛ do 'do.”

⁸ Nɛ Petro tɔ̃ hã a na: “Mɔ fɔ́lɔ́ sɛ nyanga mi fala kpo gɔ!” Nɛ Yezu gese na: “Fala kɛ mi fɔ̀lɔ̀ nyanga mɔ gɔ, nɛ nde lɛ sɛ 'bɔ do mɔ kpo gɔ.”

⁹ Nɛ Simɔ Petro tɔ̃ hã a na: “Nwa, ma ɔ ní, nɛ mɔ tɛ fɔ̀lɔ̀ tati a nyanga mi iko gɔ, mɔ fɔ́lɔ́ 'bɔ kɔ̃ mi do zu mi.”

¹⁰ Nɛ Yezu na: “Wi kɛ a fɔlɔ tɛ̃ a ia ni, fo 'bɔ gulu kɛ na a fɔlɔ mbé tɛ̃ a ni bina. A fɔlɔ tati a nyanga a iko, nɛ kili tɛ̃ a vɛ̃ sa. Nɛ vɛ̃, nɛ a sa, kɔ tati a wele kpo sanga nɛ gɛ, a a sa gɔ.”

¹¹ (Yezu ĩ zi ti wi kɛ a nɛ 'dɔlɔ sɛ a ni, ma kɛ a tɔ́a na, wa vɛ̃ wa a sa gɔ ni.)

¹² Yezu fɔlɔ nyanga wa do'do, nɛ a he'de tulu ngɔɛ 'da a dɛ olo nɛ, nɛ a dungu nù, nɛ a aka wa na: “Nɛ ĩ gulu mɛ mi dɛa do nɛ ni nde?

¹³ Nɛ sa li mi na ‘Wi be mɔ’ tabi ‘Nwa’, nɛ mɛ a gbãlã we, we kɛ mi a Wi be mɔ hã nɛ do Nwa 'da nɛ.

¹⁴ Kɔ nɛ́ kɛ mi a Nwa 'da nɛ, do Wi be mɔ hã nɛ, kɔ mi fɔlɔ nyanga nɛ ni, ma wia na, nɛ do tɛ nɛ, nɛ fɔlɔ tɛ mɛ 'bɔ nyanga ongba nɛ.

¹⁵ Mɛ kɛ mi dɛa ni, nɛ dɛ́ ma sanga tɛ ngba nɛ, ɔ nɛ kɛ mi bia hã nɛ ni.

¹⁶ Mi tɔ̃ hã nɛ do gbãlã we na, wi dɛa to nɛ ngɔ gɛlɛ nwa 'da a gɔ, nɛ wi nɛ to nɛ̀ ngɔ wi tombo a gɔ.

¹⁷ Nɛ́ kɛ nɛ ĩ gulu nɛ ia ni, fala kɛ nɛ e ma fala dɛa to, nɛ nɛ sɛ do yangga wena.

¹⁸ “Mi tɔ̃̀ we gɛ we duzu nɛ vɛ̃ gɔ, we kɛ mi ĩ ti winɔ mi saka zi wa ni ia. Kɔ ma wia na, lɛnggɛ wa kɔma zɛ́ kɔ 'Buki 'da Gale ni, ma dɛ tɛ̃ ɛ. Wa kɔma zɛ́ na: ‘Wi kɛ a nyɔngɔ mɛ fala nɛ kpo do mi ni, a siki li a dɛ tɛ mi’.

¹⁹ Kɔ mi tɔ̃ ma hã nɛ dati kɛ na ma dɛ tɛ̃ ɛ ni. Hã ma dɛ tɛ̃ ɛ, nɛ nɛ kɔ̃ sɛ zu li mi na, mi a ‘Wi kɛ mi boe fai.’

²⁰ Mi tɔ̃ hã nɛ do gbãlã we na, fala kɛ wele kɔ̃ gɛnɛ wi kɛ mi tumba a ni, nɛ nde a kɔ̃a tɛ mɛ 'bɔ gɛnɛ mi. Kɔ wi kɛ a kɔ̃ gɛnɛ mi ni, nɛ nde a kɔ̃a gɛnɛ Wi tombo mi.”

Yezu tɔ̃a na Yudasi a 'dɔlɔ sɛ ɛ

²¹ Yezu tɔ̃a wenɔ ni do'do, nɛ sila a gbini do 'bako, nɛ a tɔ̃ na: “Mi tɔ̃ hã nɛ do gbãlã we na, mbe kpo sanga nɛ gɛ a 'dɔlɔ sɛ mi.”

²² Nɛ Owi yambala mɛnɔ wa ma ngɔ ka mɔ li ngba wa, nɛ wa aka tɛ wa na, Yezu sa li wio nde?

²³ Mɛ ni nɛ nde mbe kpo sanga wa, wele kɛ Yezu kɔ̃a gɛnɛ a wena ni, a dungu dɛ kɛ zã Yezu ni.

²⁴ Nɛ Simɔ Petro we kɔ̃ ɛ hã a, takɔ a aka Yezu na, wi a tɔ̃ we 'da a ni a wio nde?

²⁵ Nɛ wi Yezu kɔ̃a gɛnɛ a nɛ ge nde ni bili zu ɛ dɛ 'da Yezu, nɛ a aka a na: “Nwa, wi a wio nde?”

²⁶ Nɛ Yezu gese na: “Wi a wi kɛ mi nɛ gbini mapa, nɛ mi fi 'dɔ lì sanggoe, nɛ mi hã ma hã a ni.” Nɛ Yezu ba gbini mapa, nɛ a fi ma 'dɔ lì sanggoe, nɛ a hã ma hã Yudasi, be 'da Simɔ Iskariɔtɛ.

²⁷ Kɔ Yudasi nɛa we ba gbini mapa ni, nɛ Satana le kɔ a do ti. Nɛ Yezu tɔ̃ hã a na: “Mɛ mɔ nɛ dɛ nɛ ni, mɔ dɛ́ ma dɔ̃!”

²⁸ (Nɛ wele kpo sanga wa ni ĩ̀ gulu we Yezu tɔ̃a hã Yudasi ni gɔ.

²⁹ Nɛ́ kɛ Yudasi zi a wi fɔmɔ mbilinɔ 'da wa ni, nɛ ombe wa lingga na, Yezu tɔ̃ hã a na, a nɛ́ we hɛ mɔ we ɛngga, tabi a hã mɔ hã owi sãnɔ.)

³⁰ Yudasi ba gbini mapa ni do'do, nɛ a hɔ nza do ti. Mɛ ni nɛ nde tũi tũ ia.

Mbe mbula

³¹ 'Do kɛ Yudasi hɔa nza ni, nɛ Yezu tɔ̃ hã wa na: “Ngangga ni, mi Be 'da Wele, mi kpa dɔ̃lɔ̃ li, nɛ Gale kpa dɔ̃lɔ̃ li do wala 'da mi.

³² Kɔ fala kɛ Gale kpa dɔ̃lɔ̃ li do wala 'da mi Be 'da Wele, nɛ a dɛ sɛ na, mi Be 'da Wele, mi kpa dɔ̃lɔ̃ li da dɔ̃ gɛ, do wala 'da a.

³³ Benɔ 'da mi, mi 'bana do nɛ bi sĩ iko. 'Do nɛ, nɛ nɛ fa sɛ mi fa. Nɛ nde mi tɔ̃ hã nɛ, ɔ nɛ kɛ mi tɔ̃a zi hã onwa Yudanɔ ni na, nɛ wé sɛ tɛ hɔ fala mi nɛ la dɛ tɛ nɛ ni gɔ.

³⁴ Mi hã mbé mbula hã nɛ na, nɛ kɔ̃́ gɛnɛ ngba nɛ. Nɛ ma wia na, nɛ kɔ̃ gɛnɛ ngba nɛ, ɔ nɛ kɛ mi kɔ̃a do gɛnɛ nɛ ni.

³⁵ Fala kɛ nɛ kɔ̃ gɛnɛ ngba nɛ, nɛ winɔ vɛ̃ wa ĩ sɛ na, nɛ a owinɔ 'da mi.”

Yezu tɔ̃a hã Simɔ Petro na a kafa sɛ ɛ

³⁶ Nɛ Simɔ Petro aka a na: “Nwa, mɔ nɛ nɛ do nde?” Nɛ Yezu gese na: “Fala mi nɛ nɛ tɛ nɛ ni, mɔ wé sɛ we nɛ 'do mi ngangga gɛ gɔ, nɛ nde mɔ nɛ sɛ 'do mi do 'do.”

³⁷ Nɛ Petro aka a na: “Nwa, gulu kɛ mi wè tɛ nɛ do mɔ ngangga gɛ gɔ we ge nde? Mi 'dɔlɔ sɛ kili tɛ mi we mɔ.”

³⁸ Nɛ Yezu gese hã a na: “Mɔ 'dɔlɔ sɛ kili tɛ mɔ we mi nde? Mi tɔ̃ hã mɔ do gbãlã we na, dati kɛ na kɔla he mɔ ni, nɛ mɔ kafa sɛ mi fala talɛ na, mɔ ĩ̀ ti mi gɔ.”