YOANƐ 11 - WE NU GALE 1995

Fie 'da Lazarɛ

¹ Mbe wi wili zi kpo, li a a Lazarɛ, a tia do zɛlɛ. A ɔ zi kɔ le Betani, le kɛ oboko nya a Maria do Marta wa ɔ zi nɛ ni.

² (Maria ni a wele kɛ a tɛnɛ zi nɔ yɔmbɛ dɛ tɛ nyanga Nwa Yezu, nɛ a dili do mili zu a ni. Nɛ Lazarɛ kɛ a do zɛlɛ ni a nya a.)

³ Nɛ oboko nya Lazarɛ bɔa ni, wa tumba wele we tɔ̃ hã Yezu na, yali ngba a do zɛlɛ.

⁴ Kɔ Yezu nɛa we zele toe ni, nɛ a tɔ̃ na: “Zɛlɛ ni ma gbɛ́ sɛ a gɔ. Nɛ nde ma ba a, takɔ Gale kpa dɔ̃lɔ̃ li, sɛ a mi Be 'da Gale, mi kpa 'bɔ dɔ̃lɔ̃ li de.”

⁵ Yezu kɔ̃ zi gɛnɛ Marta, do Maria, do nya wa Lazarɛ wena.

⁶ Nɛ gɛnɛ kɔ a zila na, Lazarɛ do zɛlɛ ni, nɛ a nɛ̀ do ti gɔ, a 'bana 'bɔ dɛ fala a zi nɛ ni 'do tũ bɔa.

⁷ Nɛ 'do nɛ, nɛ a tɔ̃ hã Owi yambala mɛnɔ 'da a na: “Lɛ gílí tɛ lɛ dɛ ngɔ nù Yude i.”

⁸ Nɛ owi yambala mɛnɔ wa gese hã a na: “Wi be mɔ, ma tɛ là di nyɛlɛ gɔ, Oyudanɔ wa fa zi mɔ, takɔ wa lo mɔ do ta. Kɔ mɔ kɔ̃a 'bɔ we kpolo tɛ mɔ i mɔ nde?”

⁹ Nɛ Yezu gese na: “Li wese kpo do sa 'bu ngɔ nɛ bɔa gɔ nde? Kɔ fala kɛ wele yɛnggɛ do gbo gba wese, nɛ nde a wè tɛ kɔ zu nyanga a gɔ, we kɛ a zɔ tua wese kɛ ma to dɛ ngɔ nù gɛ ni zɔa.

¹⁰ Kɔ fala kɛ wele yɛnggɛ do tũ, nɛ a kɔ zu nyanga a, we kɛ mɛ a tũ, nɛ wese to gɔ.”

¹¹ Yezu tɔ̃a wenɔ ni hã wa do'do, nɛ a tɔ̃ 'bɔ na: “Yali ngba lɛ Lazarɛ ɔa yala, kɔ mi nɛ we tunu a.”

¹² Nɛ owi yambala mɛnɔ wa gese hã a na: “Nwa, fala kɛ a ɔ yala iko, nɛ a kpasa sɛ.”

¹³ Yezu kɔ̃a zi we tɔ̃ hã wa na, Lazarɛ fi fia, nɛ nde Owi yambala mɛnɔ wa lengge na, a tɔ̃ we ngbongbo yala.

¹⁴ Nɛ a tɔ̃ hã wa mboe na: “Lazarɛ fi fia.

¹⁵ Kɔ mi dɛa yangga wena na, 'da fala ni nɛ nde mi i mɔ bina. Ma dɛa tɛ̃ ɛ na mɛ ni, takɔ nɛ kɔ̃ sɛ zu li mi. Kɔ lɛ nɛ́ 'da a i.”

¹⁶ Nɛ Toma, kɛ wa sa mbe 'bɔ li a na Be Dã ni tɔ̃ hã ongba a wi yambala mɛnɔ na: “Lɛ nɛ́ do a! Kɔ fala kɛ ma ɔ do fio nde, nɛ lɛ fe do a fala nɛ kpo.”

Yezu a wi tunu wele kɔ fio

¹⁷ Yezu hɔa i mɔ, nɛ nde wa mi Lazarɛ la tu nalɛ ia.

¹⁸ Betani nyɛ̀lɛ̀ do Yeruzalɛmɛ gɔ, ma hɔ̀ kilomɛtrɛ talɛ gɔ.

¹⁹ Nɛ mbe gba gili Oyudanɔ wa tɛa 'da Marta do Maria nga, we dungu do wa olo fio nya wa.

²⁰ Kɔ wa nɛa we tɔ̃ hã Marta na, Yezu hɔa ni, nɛ a yɛlɛ ti a, nɛ Maria 'bana dɛ kɔ tɔa i.

²¹ Marta kpa ngba a do Yezu, nɛ a tɔ̃ hã a na: “Nwa, ɔ do kɛ mɔ zi dɛ boe, nɛ nde nya mi fé sɔ gɔ.

²² Nɛ nde mi ĩ na, Gale a hã sɛ mɛnɔ vɛ̃ kɛ mɔ nɛ gɔ kɔ̃ a ni hã mɔ.”

²³ Nɛ Yezu tɔ̃ hã a na: “Nya mɔ a za'da sɛ nza kɔ fio.”

²⁴ Nɛ Marta gese na: “Mi ĩ na, a za'da sɛ nza do ngba soe ofionɔ wa za'da sɛ nɛ do ndɔti nùi ni.”

²⁵ Nɛ Yezu gese hã a na: “Mi a wi kɛ mi tunu winɔ kɔ fio, nɛ mi hã kpasi hã wa. Kɔ fala kɛ wele kɔ̃ zu li mi, hã gɛnɛ kɔ a fe fia, nɛ a kpasa sɛ.

²⁶ Wi kɛ a kɔ̃ zu li mi ni, a do kpasi kɛ ma é sɛ gɔ, nɛ a fé sɛ fio gɔ. Mɔ kɔ̃a na mɛ ni nde?”

²⁷ Nɛ Marta gese na: “Ĩi, mi kɔ̃a na mɛ ni, Nwa. Mi ĩ na, mɔ a Mɛsiya, Be 'da Gale, kɛ wa tɔ̃a zɛ́ na, a tɛ sɛ ngɔ nù gɛ ni.”

Yezu nɛa ngɔ zunu Lazarɛ

²⁸ Marta tɔ̃a ni do'do, nɛ a nɛ, nɛ a sa mɔ hã nya a Maria, nɛ a tɔ̃ hã a do usu nɛ na: “Mɔ zɔ́, wi be mɔ hɔa ia, kɔ a aka we mɔ.”

²⁹ Maria nɛa we zele ní, nɛ a kulu ngɔ, nɛ a la do gbɛnga tɛ dɛ 'da Yezu i.

³⁰ (Mɛ ni nɛ nde Yezu tɛ lè dɛ kɔ le i gɔ, a 'bana dɛ tɛ olo a kɛ Marta kpa sɔ do a ni.)

³¹ Kɔ Oyudanɔ wa zi kɔ tɔa mɔ tɛ dungu do Maria ni, wa nɛa we zɔ na, a kulu ngɔ, kɔ a la do gbɛnga tɛ ni, nɛ wa kulu ngɔ 'dɔkɔlɔ a, we kɛ wa lengge zi na, a nɛ ngɔ zunu Lazarɛ i we he kɔ̃a.

³² Kɔ Maria nɛa we hɔ fala Yezu nɛ ni, nɛ a gu nù ti a, nɛ a tɔ̃ hã a na: “Nwa, ɔ do kɛ mɔ ɔ zi dɛ boe, nɛ nde nya mi fé sɔ gɔ.”

³³ Nɛ Yezu zɔa Maria do winɔ a tɛa do wa ni tɛ he ma, nɛ ma zɛlɛ a wena, nɛ ma vĩ zu a,

³⁴ nɛ a aka wa na: “Nɛ mi Lazarɛ do nde?” Nɛ wa gese hã a na: “Nwa, mɔ tɛ́, kɔ mɔ zɔ́!”

³⁵ Nɛ Yezu ma ngɔ he nɛ.

³⁶ Nɛ Oyudanɔ wa tɔ̃ na: “Nɛ zɔ́, a kɔ̃ gɛnɛ a wena!”

³⁷ Nɛ ombe sanga wa ni wa tɔ̃ na: “A hũi zi dɛ li wi tandui, nɛ a wè zi tɛ dɛ na, Lazarɛ tɛ fè gɔ ni gɔ nde?”

³⁸ Nɛ ma zɛlɛ 'bɔ Yezu wena, nɛ a la dɛ ngɔ zunu i. Zuni ni, wa 'dungga zi ma dɛ kɔ ta, nɛ wa kpe nu nɛ do ta.

Yezu tunu Lazarɛ kɔ fio

³⁹ Nɛ Yezu tɔ̃ hã wa na: “Nɛ kímílí ta do'do.” Nɛ Marta, boko nya fie tɔ̃ hã a na: “Aa Nwa, wa mi a ma la tũ nalɛ, kɔ a ndua unu nɛ ia.”

⁴⁰ Nɛ Yezu gese hã a na: “Mi tɔ̃a sɔ hã mɔ na, fala kɛ mɔ kɔ̃ zu li mi, nɛ mɔ zɔ sɛ dɔ̃lɔ̃ li 'da Gale gɔ nde?”

⁴¹ Nɛ wa kimili ta. Nɛ Yezu kala li ɛ dɛ ngɔ, nɛ a tɔ̃ na: “Baa mi, mi hã iɔ̃nae hã mɔ, we kɛ mɔ zila mi.

⁴² Mi ĩ na, mɔ zele mi zila 'da fala fai, nɛ nde mi tɔ̃ ní we winɔ kɛ zã mi gɛ, takɔ wa kɔ̃ na, mɔ a mɔ tumba mi.”

⁴³ A tɔ̃a ni do'do, nɛ a sa mɔ dɛ ngɔ na: “Lazarɛ, hɔ́ nza!”

⁴⁴ Nɛ fie hɔa nza, nɛ nde wa ɛnza zi nyanga a, do kɔ̃ a do fɛlɛ tulu, nɛ wa ɛnzɛ 'bɔ li a do tulu. Nɛ Yezu tɔ̃ hã wa na: “Nɛ yálá a, kɔ a lá!”

Onwa Yudanɔ wa fa we ba Yezu

⁴⁵ Nɛ gba gili Oyudanɔ sanga winɔ wa tɛa zi 'da Maria nga ni, wa nɛa we zɔ mɛ Yezu dɛa ni, nɛ wa kɔ̃a zu li a.

⁴⁶ Nɛ nde ombe wa nɛa, nɛ wa kpa Ofariziɛnɔ, nɛ wa tɔ̃ we mɛ Yezu dɛa ni hã wa.

⁴⁷ Kɔ Ofariziɛnɔ wa nɛa we zele ní, nɛ wa do onwa nganganɔ, wa mba li ngba wa do owi 'bili wenɔ, nɛ wa tɔ̃ na: “Wi gɛ dɛ gba sɔ̃ mɔ wena, kɔ lɛ nɛ dɛ nɛ nɛ nde?

⁴⁸ Lɛ la a tɛ dɛ na mɛ ni, nɛ winɔ vɛ̃ wa kɔ̃ sɛ zu li a. Kɔ ogã wi Roma wa zɔ ní, nɛ wa gbini sɛ tɔa Tɛmpɛloe 'da lɛ, nɛ wa kumu sɛ nu kpala lɛ.”

⁴⁹ Nɛ mbe wele sanga wa ni kpo, li a a Kaifɛ, a zi a gã nwa nganga do sabɛlɛ ni, a tɔ̃ hã wa na: “Nɛ ĩ̀ ti gulu mɛ gɛ gɔ.

⁵⁰ Nɛ ĩ́ na, we duzu nɛ, ma dia fɛ̃ na, wele kpo fe we winɔ, dɔ nu kpala lɛ kúmú gɔ.”

⁵¹ A tɔ̃̀ zi wenɔ ni do linggamɔ mɔ́ a gɔ. A zi a gã nwa nganga do sabɛlɛ ni, ma kɛ a gba zi olo nu Gale na, Yezu a fe sɛ we nu kpala Oyudanɔ.

⁵² Nɛ nde Yezu fé sɛ we nu kpala Oyudanɔ iko gɔ, a fe sɛ we mba li winɔ 'da Gale kɛ wa kpa ngɔ nù gɛ vɛ̃ ni, takɔ wa hɔ wele kpo.

⁵³ Nɛ ndo do ngba soe ni, onwa Yudanɔ wa 'dafa do kɔ sila wa we gbɛ Yezu.

⁵⁴ Ma kɛ Yezu wè zi 'bɔ tɛ be tɛ̃ ɛ dɛ wila fala sanga Oyudanɔ gɔ. Nɛ a kulu ngɔ, nɛ a la dɛ ngɔ nù kɛ ma dɔ̃ɔ do li gba zɔ̃ɛ ni, nɛ a hɔ kɔ le kpo, li nɛ a Efraimɛ, nɛ a do owi yambala mɛnɔ 'da a, wa 'bana dɛ di ni.

⁵⁵ Nɛ ngba soe ɛngga Hɔ Nza kɔ Ngbá 'da Yudanɔ kɔla, nɛ gba gili winɔ wa kulu ngɔ kɔ lenɔ 'da wa dati ɛngga ni, nɛ wa nɛ Yeruzalɛmɛ, takɔ wa fɔlɔ tɛ wa we hɔ sa wi li Gale, ɔ nɛ kɛ mbula tɔ̃a ni.

⁵⁶ Nɛ wa ma ngɔ fa Yezu. Nɛ wa aka ngba wa kɔ Tɛmpɛlo i na: “Nɛ lengge na, a tɛ sɛ tɛ ɛngga gɛ nde?”

⁵⁷ Nɛ onwa nganganɔ do Ofariziɛnɔ, wa tɔ̃ hã winɔ vɛ̃ na, fala kɛ wele ĩ fala Yezu, nɛ a tɔ̃ 'da nɛ hã lo, takɔ lo ba a.