YOANƐ 10 - WE NU GALE 1995

Gba we ngɔ wi fɔmɔ bata

¹ Nɛ Yezu na: “Mi tɔ̃ hã nɛ do gbãlã we na, wi kɛ a lè kɔ ngboe 'da batanɔ do nu nɛ gɔ, kɔ a kũ do zu ngboe ni, a a wi zũ.

² Nɛ wele kɛ a le do nu ngboe ni, a a wi fɔmɔ obatanɔ.

³ Wi zɔ mɔ tɛ nu ngboe hũi nu nɛ hã a, nɛ a sa mɔ hã obatanɔ 'da a kpo kpo do li wa. Nɛ obatanɔ wa zele gɛlɛ a, nɛ wa hɔ 'do a.

⁴ Kɔ a fo wa dɛ nza do'do, nɛ a kpe dati wa, nɛ wa nɛ 'do a, we kɛ wa ĩ ti gɛlɛ a.

⁵ Nɛ nde wa lá sɛ 'do gele wele, kɛ wa ĩ̀ ti a gɔ ni gɔ. Wa yu sɛ a do'do, we kɛ wa ĩ̀ ti gɛlɛ a gɔ.”

⁶ Yezu tɔ̃a zi gba we gɛ hã owinɔ, nɛ nde wa ĩ̀ ti gulu nɛ gɔ.

Yezu a dia wi fɔmɔ bata

⁷ Nɛ Yezu tɔ̃ 'bɔ na: “Mi tɔ̃ hã nɛ do gbãlã we na, mi a nu ngboe 'da batanɔ.

⁸ Owinɔ vɛ̃ kɛ wa hɔa zi dati mi ni, wa a owi zũ, nɛ obatanɔ wa zèlè gɛlɛ wa gɔ.

⁹ Mi a nu ngboe. Kɔ wele kɛ a le do nu ngboe ni, nɛ a kpasa sɛ. A wia sɛ we le nɛ, nɛ a hɔ nza, nɛ a kpa nyɔngɔmɔ.

¹⁰ Nɛ nde wi zũ tɛ kɛ 'dɛ ɛ we zũ mɔ, do 'danga mɔ, do gbɛ sa'de iko. Kɛ 'da mi, mi tɛa, takɔ mi hã kpasi kɛ ma dia la li ngele ni hã Owele.

¹¹ “Mi a dia wi fɔmɔ bata. Dia wi fɔmɔ bata hã tɛ̃ a we batanɔ 'da a.

¹² Kɔ wele kɛ a dɛ to fɔmɔ batanɔ we kpa mbili iko ni, a a ngbongbo wi fɔmɔ wa gɔ, nɛ batanɔ ni wa 'bɔ a mɔ́ a gɔ. A zɔ gɔ̃̀ tɛ tɛ ma, nɛ a la batanɔ dɛ di ni, nɛ a yu. Nɛ gɔ̃̀ɛ kala wa, nɛ tala wa wa pɛsɛ.

¹³ A yu, we kɛ a dɛ to fɔmɔ batanɔ we kpa mbili iko, nɛ nde a lénggé do wa ngboo gɔ.

¹⁴ Mi a dia wi fɔmɔ bata, nɛ mi ĩ ti batanɔ 'da mi, nɛ batanɔ 'da mi wa ĩ ti mi, kpasaa nɛ́ kɛ Baa mi ĩ do ti mi, nɛ mi ĩ tɛ mɛ 'bɔ do ti a ni.

¹⁵ Nɛ mi hã sɛ tɛ mi we obatanɔ 'da mi.

¹⁶ Nɛ mi 'bɔ do gele obata kɛ wa kɔ ngbo bina ni. Kɔ ma wia na, mi kpe tɛ mɛ 'bɔ ti wa, nɛ mi a wa kɔ ngboe. Wa zele sɛ gɛlɛ mi, nɛ ngɔ gili batanɔ sɛ kpo, nɛ wi fɔmɔ wa kpo.

¹⁷ “Baa mi kɔ̃a gɛnɛ mi, we kɛ mi 'dɔlɔ sɛ kili tɛ mi, takɔ mi kpa 'bɔ ma.

¹⁸ Wele wé sɛ we gbɛ mi gɔ, nɛ nde mi wele nɛ mi 'dɔlɔ sɛ kili tɛ mi. Mi do ngawi we 'dɔlɔ ma, nɛ mi 'bɔ do ngawi we kpa ma mbé nɛ. We duzu kɛ Baa mi ba nu a hã mi na, mi dɛ ɔ na mɛ ni.”

¹⁹ Kɔ Oyudanɔ wa nɛa we zele ní, nɛ sanga wa gɔnɔ bɔa.

²⁰ Nɛ ombe wa na: “A do 'dã hi wi kɔ a, tabi bɔ tia zu a! Kɔ gulu kɛ nɛ zele a we ge nde?”

²¹ Nɛ ombe wa na: “Wi kɛ a do 'dã hi wi kɔ a ni, a wélé we na mɛ gɛ gɔ. 'Dã hi wi wia do kpasa wi tandu, nɛ a zɔ mɔ nde?”

Oyudanɔ wa Ma gɛnɛ Yezu

²² Ngba soe ni zi a 'da fala ɛngga lengge do tũi kɛ wa ia do tɔa Tɛmpɛloe tɛ Yeruzalɛmɛ i hã Gale ni. Nɛ mɛ zi a zɔlɔ gɛ̃ɛ.

²³ Nɛ Yezu zi kɔ Tɛmpɛlo i tɛ yɛnggɛ do ti mɔnggɔlɔ tɔa Tɛmpɛloe, kɛ li nɛ a “Mɔnggɔlɔ Tɔa 'da Salɔmɔ” ni.

²⁴ Nɛ Oyudanɔ wa tɛa, nɛ wa ngɛmɛ dɛ kɛ zã a, nɛ wa aka a na: “Gulu kɛ mɔ e sila lɛ ngɔ ni we ge nde? Mɔ tɔ̃́ hã lɛ ngboo sɛ! Mɔ a Mɛsiya nde?”

²⁵ Nɛ Yezu gese hã wa na: “Mi tɔ̃a zi hã nɛ ia, nɛ nɛ kɔ̃̀ gɔ. Nɛ nde mɛnɔ kɛ mi dɛ do ngawi 'da Baa mi ni, ma be gbãlã we 'da mi.

²⁶ Nɛ nɛ kɔ̃́ gɔ, we duzu kɛ fo nɛ sanga obatanɔ 'da mi bina.

²⁷ Obatanɔ 'da mi wa ĩ ti gɛlɛ mi, nɛ mi ĩ ti wa, nɛ wa tɛ yɛnggɛ 'dɔkɔlɔ mi.

²⁸ Mi hã kpasi kɛ ma é sɛ gɔ ni hã wa, nɛ wa fé sɛ fio gɔ, nɛ wele kpo wé sɛ tɛ dolo zu wa kɔ̃ mi gɔ.

²⁹ Baa mi kɛ a hã wa hã mi ni, a nɛa ngɔ mɛnɔ vɛ̃, nɛ wele wè tɛ dolo zu wa kɔ̃ a gɔ.

³⁰ Lɛ do Baa mi, lɛ a wele kpo iko.”

³¹ Nɛ Oyudanɔ wa kala 'bɔ ta we lo do Yezu.

³² Nɛ a tɔ̃ hã wa na: “Mi dɛa dia mɔ wena do ngawi 'da Baa mi dɛ li nɛ gɛ. Kɔ mɛ nɛ kɔ̃a we lo mi we nɛ ni a ge nde?”

³³ Nɛ wa gese hã a na: “Lɛ nɛ lo mɔ we odia mɛnɔ mɔ dɛa ni gɔ, nɛ nde mɛ a we kɛ mɔ dã zu li Gale. Mɔ a wele iko, nɛ mɔ ba tɛ mɔ na, ɛ a Gale.”

³⁴ Nɛ Yezu gese hã wa na: “Wa kɔma kɔ 'buku mbula 'da nɛ na, Gale tɔ̃a na: ‘Nɛ a ogalenɔ.’

³⁵ Nɛ lɛ ĩ na, lɛnggɛ kɔ 'Buki ni ma do ngawi fai. Gale sa zi li winɔ kɛ a bia we nu a hã wa ni na ogale.

³⁶ Kɔ we mi, Gale saka zɛ́ mi, nɛ a tombo mi dɛ ngɔ nù gɛ. Na mɛ ni, kɔdɛ kɛ nɛ tɔ̃ na, mi dã zu li Gale, we kɛ mi tɔ̃a na, mi a Be 'da a ni nɛ nde?

³⁷ Fala kɛ nɛ zɔ na, mi dɛ̀ toe 'da Baa mi gɔ, nɛ nɛ tɛ kɔ̃̀ zu li mi gɔ.

³⁸ Kɔ fala kɛ mi dɛ toe 'da a, kɔ gɛnɛ kɔ nɛ kɔ̃ zu li mi gɔ, nɛ nɛ wia sɔ we kɔ̃ gɛnɛ mɛnɔ mi dɛ ni, takɔ nɛ ĩ fai na, lɛ do Baa mi, lɛ a wele kpo iko.”

³⁹ Wa nɛa we zele ni, nɛ wa fa 'bɔ we ba Yezu, nɛ a vĩ wa do'do.

⁴⁰ Nɛ a la dɛ kulu lì Yɔrdanɛ i, tɛ fala Yoanɛ batisa zi do winɔ ni, nɛ a 'bana dɛ di ni.

⁴¹ Nɛ gba gili Owele wa nɛa 'da a, nɛ wa tɔ̃ na: “Yoanɛ dɛ̀ zi mbe gba sɔ̃ mɔ gɔ, nɛ nde wenɔ vɛ̃ kɛ a tɔ̃a ngɔ wi gɛ ni, mɛ a gbãlã we.”

⁴² Nɛ gba gili winɔ zi di ni ni, wa kɔ̃a zu li Yezu.