YOANƐ 1 - WE NU GALE 1995

Yezu a We nu Gale kɛ ma hã kpasi

¹ Kuti kɛ kurr na, Gale dɛ mɛnɔ ngɔ nù gɛ vɛ̃ ni, nɛ nde We nu a zɛ́ boe fai. Nɛ We ni zɛ́ fala nɛ kpo do Gale, a zɛ́ a Gale.

² We ni zɛ́ fala nɛ kpo do Gale, 'da fala kɛ a ndua nyanga dɛ mɛnɔ ni.

³ We ni dɛa mɛnɔ ngɔ nù gɛ vɛ̃ do ngawi 'da Gale. Fo mɔ kpo kɛ a dɛ̀ ma ngɔ nù gɛ gɔ ni bina.

⁴ A zɛ́ a wi hã kpasi, nɛ kpasi ni zi a sa fala 'da owinɔ.

⁵ Sa fala ni sa kɔ tũ fala, nɛ tũ fala wè tɛ kele li nɛ gɔ.

⁶ Nɛ Gale tumba wele kpo, li a a Yoanɛ.

⁷ Nɛ a tɛa we tɔ̃ gulu sa fala, takɔ winɔ vɛ̃ wa zele, nɛ wa kɔ̃ sa fala ni.

⁸ Yoanɛ zi a ngbongbo sa fala ni gɔ, nɛ nde a tɛa we tɔ̃ we 'da sa fala ni hã winɔ iko.

⁹ Sa fala ni zi a ngbongbo sa fala kɛ ma tɛa zi dɛ ngɔ nù gɛ, nɛ ma sa ngɔ winɔ vɛ̃.

¹⁰ We nu Gale zɛ́ a dɛ ngɔ nù gɛ, nɛ mɛnɔ vɛ̃ ngɔ nùi gɛ ni, wi a a hã a dɛa ma do ngawi 'da Gale. Nɛ nde winɔ ngɔ nùi gɛ, wa ĩ̀ zi ti a gɔ.

¹¹ A tɛa ngɔ nù gɛ, nɛ a ɔa dɛ sanga winɔ 'da a ngboo, nɛ nde winɔ 'da a wa kɔ̃̀ zi gɛnɛ a gɔ.

¹² Gɛnɛ kɔ na mɛ ni, nɛ nde ombe wa kɔ̃a gɛnɛ a. Ma kɛ a hã wala hã wa na, wa hɔ benɔ 'da Gale, we kɛ wa kɔ̃a zu li a ni.

¹³ Nɛ nde wa hɔ̀ zi benɔ 'da Gale do tɛlɛ tɛ linggamɔ zu wele, tabi do tɛlɛ tɛ tunu tɛ wi mɔ́ wele, tabi do tɛlɛ tɛ kɛ wa ko do wele ngɔ nù gɛ ni gɔ. Gale a kua wa.

¹⁴ We nu Gale hɔa wele, nɛ a ɔa sanga lɛ, nɛ lɛ zɔa dɔ̃lɔ̃ li 'da a. Mɛ a dɔ̃lɔ̃ li kɛ Baa a Gale hã hã a, kɛ a a kpo Be 'da a ni. Be ni do dia zã wena, nɛ a tɔ̃ zi gbãlã we ngɔ Baa a.

¹⁵ Yoanɛ tɔ̃a we 'da a do nga gɛlɛ hã winɔ na: “Wi mi tɔ̃a zi we 'da a na, a tɛ tɛ 'do mi gɛ ni, wi a a. A nɛa ngɔ mi, we duzu kɛ a zɛ́ belee dati hã mi.”

¹⁶ We nu Gale kɔ̃a gɛnɛ lɛ la li ngele, nɛ a wila nu a tɛ lɛ do wala kpi do kpi.

¹⁷ Gale hã zɛ́ mbula 'da a hã lɛ do wala 'da Mɔizɛ, nɛ Gale bia dia zã dɛ 'da lɛ do wala 'da Yezu Kristo, nɛ lɛ ĩ ti gbãlã we ngɔ Gale we duzu a.

¹⁸ Wele kpo tɛ zɔ̀ Gale gɔ, nɛ nde wi a Yezu, kpo Be 'da a, kɛ a ɔ fala nɛ kpo do a ni, hã a tɔ̃ gulu Baa a Gale hã lɛ.

Bia we 'da Yoanɛ wi batisa winɔ

¹⁹ Nɛ zélé we kɛ Yoanɛ tɔ̃a zi hã onwa Yudanɔ tɛ Yeruzalɛmɛ, do 'da fala wa tumba ombe nganganɔ do levitɛnɔ na wa nɛ́, kɔ wa aka a do we ni. Wa nɛa, nɛ wa aka a na: “Mɔ a wio nde?”

²⁰ Nɛ a bɛ we gese nu we ni gɔ. A gisa hã wa dɛ wila fala na, ɛ a Mɛsiya gɔ.

²¹ Nɛ wa aka 'bɔ a na: “Kɔ ní, nɛ nde mɔ a Elia nde?” Nɛ Yoanɛ gese na: “Ɔ̃ ɔ̃, mi a Elia gɔ.” Nɛ wa aka 'bɔ a mbé nɛ na: “Kɔ mɔ wá a wi gba olo nu Gale kɛ a tɛ sɛ ni nde?” Nɛ Yoanɛ gese hã wa na: “Ɔ̃ ɔ̃, wi a mi gɔ.”

²² Nɛ wa aka a na: “Kɔ mɔ a wio nde? Mɔ ngboo mɔ tɔ̃ na, mɔ a wio nde? Mɔ tɔ̃́ hã lɛ, takɔ lɛ nɛ we be gulu nɛ hã winɔ wa tumba lɛ ni.”

²³ Nɛ Yoanɛ gese hã wa na: “Mi a wi kɛ Ezai, wi gba olo nu Gale kɔma zi we 'da mi kɔ 'buki 'da a na: ‘Wele tɛ he mɔ li gba zɔ̃ i na, nɛ 'dáfá li wala 'da Nwa, kɔ ma bɔlɔ’ ni.”

²⁴ Sanga winɔ kɛ onwa Yudanɔ wa tumba zi wa ni, Ofariziɛ̃ wa zi boe.

²⁵ Nɛ wa aka Yoanɛ na: “Kɔ mɔ a Mɛsiya gɔ, nɛ mɔ a Elia gɔ, nɛ mɔ 'bɔ a wi gba olo nu Gale kɛ a tɛ sɛ ni gɔ, kɔ gulu kɛ mɔ batisa winɔ we ge nde?”

²⁶ Nɛ Yoanɛ gese hã wa na: “Mi gɛ, mi batisa winɔ do lì, nɛ nde mbe wele kpo sanga nɛ gɛ, nɛ ĩ̀ ti a gɔ.

²⁷ A hɔ sɛ 'do mi gɛ, nɛ nde a nɛa ngɔ mi. Mi hɔ̀ wi bulu fɛlɛ ngɔ mɔ nyanga wi 'da a gɔ.”

²⁸ Wa wele zi wenɔ ni do kulu lì Yɔrdanɛ i, tɛ le Betani, dɛ tɛ fala Yoanɛ batisa do winɔ ni.

Yezu a Be Bata 'da Gale

²⁹ Fala nɛa we sa 'do nɛ, nɛ Yoanɛ zɔ Yezu tɛ tɛ 'da a nga, nɛ a tɔ̃ hã owinɔ na: “Nɛ zɔ́, Be Bata 'da Gale kɛ a fo sɛ ku'da 'dã mɛnɔ zu winɔ ni, a kɛ!

³⁰ Wi mi tɔ̃a we 'da a na, a tɛ tɛ 'do mi gɛ ni, wi a a. A nɛa ngɔ mi, we duzu kɛ a zɛ́ belee dati hã mi.

³¹ Mi ĩ̀ zi ti a gɔ, nɛ nde mi batisa winɔ do lì, takɔ mi be a hã wa obe Israɛlɛ.”

³² Nɛ Yoanɛ tɔ̃ 'bɔ na: “Mi zɔa Hi Wi Santo, nɛ nde a yula li nza i, nɛ a zĩlĩ dɛ ngɔ a ɔ nɛ gbakulĩ ni, nɛ a 'bana dɛ ngɔ a ni.

³³ Mi ĩ̀ zi ti a gɔ, nɛ nde Gale, kɛ a tumba mi takɔ mi batisa winɔ do lì ni, a tɔ̃a hã mi na: ‘Mɔ zɔ sɛ wele kpo, nɛ nde Hi Wi Santo yula ngɔ i, kɔ a zĩlĩ dɛ ngɔ a, nɛ a 'bana dɛ ngɔ a ni. Wi ni a wele kɛ a nɛ batisa sɛ winɔ do Hi Wi Santo ni.’

³⁴ Mi zɔa na mɛ ni, nɛ mi tɔ̃ na, a a Be 'da Gale.”

Yezu sa mɔ hã kuti wi yambala mɛnɔ 'da a

³⁵ Fala sa 'do ki ni, nɛ Yoanɛ zi 'bɔ dɛ kpo olo wa ni, fala nɛ kpo do mbe wi yambala mɛnɔ 'da a bɔa.

³⁶ Kɔ a nɛa we zɔ Yezu tɛ la nɛ, nɛ a tɔ̃ na: “Nɛ zɔ́, Be Bata 'da Gale, a kɛ!”

³⁷ Owi yambala mɛnɔ wa nɛa we zele ni, nɛ wa la 'dɔkɔlɔ Yezu.

³⁸ Kɔ Yezu nɛ ka mɔ 'do ɛ, nɛ a zɔ wa, nɛ nde wa tɛ tɛ 'do a, nɛ a aka wa na: “Nɛ fa ge nde?” Nɛ wa aka tɛ mɛ 'bɔ a na: “Rabi, mɔ ɔ do nde?” (Gulu Rabi na: “Wi be mɔ.”)

³⁹ Nɛ a gese hã wa na: “Nɛ tɛ́, hã nɛ zɔ́!” Wa nɛa gbaa, nɛ wa hɔ fala Yezu ɔ nɛ ni, nɛ wa ɔa do a dɛ di ni, we kɛ wese gɛ̃a zi gɛ̃a.

⁴⁰ Mbe sanga winɔ kɛ wa zila we nu Yoanɛ, kɔ wa la 'dɔkɔlɔ Yezu ni, wi a Andre, nya Simɔ Petro.

⁴¹ Nɛ Andre la, nɛ a kpa nya a Simɔ, nɛ a tɔ̃ hã a na: “Lɛ kpa Mɛsiya.” (Gulu Mɛsiya a Kristo, nɛ gulu Kristo a: “Wele kɛ Gale saka a ni.”)

⁴² Nɛ Andre nɛa do Simɔ 'da Yezu i. Wa nɛa we hɔ nɛ, nɛ Yezu soko Simɔ, nɛ a tɔ̃ hã a na: “Mɔ a Simɔ, be 'da Yoanɛ. Nɛ nde wa sa sɛ li mɔ na Sefasi.” (Gulu Sefasi a: Petro, tabi: “Ta.”)

Yezu sa mɔ hã Filipɛ do Natanaɛlɛ

⁴³ Fala sa, nɛ Yezu kɔ̃a we la dɛ ngɔ nù Galile. Nɛ a kpa Filipɛ, nɛ a tɔ̃ hã a na: “Mɔ tɛ́, kɔ lɛ yɛ́nggɛ́ do mɔ!”

⁴⁴ Filipɛ zi a wi Bɛtsaida, le 'da Andre do Petro.

⁴⁵ 'Do nɛ, nɛ Filipɛ kpa Natanaɛlɛ, nɛ a tɔ̃ hã a na: “Lɛ kpa wi kɛ Mɔizɛ kɔma zɛ́ we 'da a kɔ 'buku mbula ni. A a wele kɛ owi gba olo nu Gale wa tɔ̃a zɛ́ 'bɔ we 'da a ni. Wi a Yezu, be 'da Yozɛfu, wi Nazarɛtɛ.”

⁴⁶ Nɛ Natanaɛlɛ tɔ̃ hã a na: “Dia mɔ wia we hɔ kɔ le Nazarɛtɛ nde?” Nɛ Filipɛ na: “Mɔ tɛ́, kɔ mɔ zɔ́!”

⁴⁷ Kɔ Yezu nɛa we zɔ Natanaɛlɛ tɛ tɛ dɛ 'da a nga, nɛ a tɔ̃ na: “Nɛ zɔ́, wele kɛ gɛ a ngbongbo be Israɛlɛ ngboo, a tɔ̃́ bɛlɛ fala kpo gɔ.”

⁴⁸ Nɛ Natanaɛlɛ aka a na: “Mɔ dɛa fala ĩ ti mi nɛ nde?” Nɛ Yezu gese hã a na: “Mi zɔa sɔ mɔ 'da fala mɔ sɔ ti te figɛ i, dati a kɛ na Filipɛ sa mɔ hã mɔ ni.”

⁴⁹ Nɛ Natanaɛlɛ tɔ̃ hã a na: “Wi be mɔ, mɔ a Be 'da Gale! Mɔ a Nwa 'da obe Israɛlɛ!”

⁵⁰ Nɛ Yezu tɔ̃ hã a na: “Mɔ kɔ̃a zu li mi, we kɛ mi tɔ̃a na, mi zɔa sɔ mɔ ti te figɛ i ni nde? Mɔ zɔ sɛ ombé mɔ kɛ ma nɛa ngɔ kɛ gɛ ni wena!”

⁵¹ Nɛ Yezu tɔ̃ 'bɔ na: “Mi tɔ̃ hã nɛ do gbãlã we na, nɛ zɔ sɛ li nza, nɛ nde ma hũi, kɔ oanzɛnɔ 'da Gale wa kũ, nɛ wa zĩlĩ 'da mi Be 'da Wele!”