HABAKUKƐ 3 - WE NU GALE 1995

Habakukɛ sambala NWA

¹ Kɛ gɛ a sambala ala nui 'da Habakukɛ, wi gba olo nu Gale.

² A na: “Aa NWA, mi zila we mɛnɔ vɛ̃ kɛ mɔ dɛa ni, nɛ mi dɛ kili ma wena. Mɔ dɛ́ 'bɔ kpo kpo gã dɛa mɛnɔ ni do kɔ̃ tũnɔ gɛ, nɛ mɔ bé ma dɛ li winɔ, takɔ wa ĩ ti ma. Gɛnɛ kɔ zã mɔ nɔ̃lã gbãlã we, nɛ nde mɔ bé dia zã 'da mɔ hã lɛ.

³ “Gale kɛ a santo, a yula tɛ le Temanɛ, kɔ a tɛ tɛ nɛ. Nɛ a zĩlĩ do ngɔ kalanɔ tɛ Paranɛ. Yele ngbala 'da a ma kpa li nza vɛ̃, nɛ winɔ ngɔ nù gɛ vɛ̃ wa tɛ dɔnggɔ a.

⁴ A ma ngɔ tɛ nɛ, nɛ a nyɛ ɔ nɛ we ni, nɛ sala nu we ma za'da do zã kɔ̃ a, kɛ mɛ a fala a usu do ngawi 'da a ni.

⁵ A tombo 'dã zɛlɛ dati, tɛ falanɔ vɛ̃ kɛ a la do nɛ ni, nɛ winɔ di ni, wa te do nga zɛlɛ.

⁶ Fala kɛ a yolo nù, nɛ nùi ma tana. A soko owinɔ ngɔ nùi gɛ, nɛ tɛ wa tana gbulu gbulu. Nɛ sanga oã gã kalanɔ zi fai ni ma fũ, nɛ oã be kalanɔ ma gbɛsɛ. Ĩ na wala ni, a la zɛ́ do ma dati la.

⁷ Mi zɔa owinɔ tɛ Kusanɛ, nɛ nde wa do 'bako, nɛ mi zɔ Owi ngɔ nù Madianɛ, nɛ nde wa tana kili.

⁸ “Aa nwa, mɛ nɔ̃lɔ̃ zã mɔ, mɛ a ofua lìnɔ nde? Tabi mɛ hã dã hã mɔ, mɛ a gba lìnɔ nde? Ogba kutunɔ ma ɔ nɛ ngilingili bole 'da mɔ. Mɔ kũ dɛ kɔ nɛ, nɛ mɔ nɛ we bi owi sɛnɛ winɔ 'da mɔ, nɛ mɔ nɛ ngɔ wa.

⁹ Mɔ kpo fɛlɛ nzabele 'da mɔ, nɛ kpili da do ma, mɛ a fɔmbanɔ kɛ mɔ tɔ̃ ni. Nùi gba sanga tɛ ngbɛ ɛ, nɛ fua lìnɔ za'da.

¹⁰ Fala kɛ okalanɔ wa zɔ mɔ, nɛ kili ba wa, nɛ tɛ wa tana. Mɔ fi gba kolo, nɛ ma tɛ, nɛ ma bindi nùi. Ngele gba lìnɔ ma sulu, nɛ ma kpã dɛ li nza i, nɛ giti nɛ dɔ̃lɔ̃ wuu.

¹¹ Wese do zɛkɛ wa zɔ nyɛa we kpilinɔ 'da mɔ, do nyɛa we gbali sɛlɛ 'da mɔ, nɛ wa yu Kili ma, nɛ wa gbɔtɔ tɛ wa dɛ 'do.

¹² Mɔ la ngɔ nù gɛ do dã, nɛ mɔ mbɔtɔ ogele winɔ dɛ ti nyanga mɔ do nɔ̃lɔ̃ zã.

¹³ Mɔ hɔa nza we kpasa owinɔ 'da mɔ, do nwa wele kɛ mɔ saka a ni. Mɔ 'bili gɛlɛ nwa ngɔ nu fɛlɛ 'dã winɔ, nɛ mɔ kumu owinɔ 'da a.

¹⁴ Wa yu zi nganda ɔ nɛ gba bũ kamba ni we pɛsɛ lɛ, nɛ wa he zi hiamɔ yangga, we kɛ wa nɛ gbɛ Owi 'bakonɔ do usu nɛ. Nɛ nde mɔ NWA, mɔ ndɔla ogã wi ngɔ sodanɔ 'da wa do kpo kpo kpilinɔ 'da wa.

¹⁵ Mɔ le 'dɔ ngele gba lìnɔ do ombalatanɔ 'da mɔ, nɛ giti nɛ ma ngɔ wele nɛ.

¹⁶ “Mi zila giti mɔ NWA, nɛ gbãlã zã mi bi do'do. Ndala nu mi tana gbɛrr do kili, gbãlã tɛ mi gbini, nɛ nyanga mi kala ti mi do'do. Nɛ nde mi dungu do gɛ̃a sila we 'bɔ 'da ngba soe kɛ ngamɛ ma nɛ tɛ we kpa owi zɛlɛ tɛ lɛ ni.

¹⁷ “Do gbãlã we, te figɛ ma dó 'bɔ gɔ, te vinɔ ma wálá 'bɔ gɔ, te olivɛ ma kó 'bɔ gɔ, nɛ fo 'bɔ kpalɛ kɔ fɔnɔ bina. Batanɔ wa ia kɔ ba'de, nɛ ngɔmbɔ 'bɔ kɔ ngbonɔ bina.

¹⁸ Gɛnɛ kɔ na mɛ ni, nɛ nde mi kpa yangga 'da mi kɔ̃ NWA Gale, nɛ mi ga zuma do zu li a, Wi kpasa mi.

¹⁹ Ngawi 'da mi, wi a NWA Gale. A a dɛ na, nyanga mi hãsã ɔ nɛ kɛ 'da zambɛlɛ ni, nɛ a kã mi we yɛnggɛ ngɔ kalanɔ do dia nɛ.”