HABAKUKƐ 2 - WE NU GALE 1995

¹ Kɛ 'da mi, mi nɛ kũ dɛ ngɔ gba'da i, ɔ nɛ wi zɔ mɔ nu ngba le ni. Nɛ mi 'bɔ dɛ di ni we zele we NWA nɛ tɔ̃ hã mi, do we a nɛ gese hã mi ni.

NWA gisa nu aka we 'da Habakukɛ

² NWA gisa hã mi na: “Mɔ kɔ́mɔ́ wenɔ mi nɛ tɔ̃ hã mɔ gɛ dɛ ngɔ ta, nɛ mɔ gɛzɛ ma gã wena, sɛ a owinɔ wa tɔlɔ do dia nɛ de.

³ Wenɔ ni ma dɛ́ sɛ tɛ̃ ɛ da dɔ̃ gɛ gɔ, nɛ nde kɔ̃ tũ nɛ ma tɛ kɔlɔ nɛ. Gɛnɛ kɔ ma dɛ̃ tɛ̃ ɛ ngangga gɛ gɔ, nɛ mɔ kunu sila mɔ kpa. Wenɔ mi nɛ tɔ̃ ma ni, ma dɛ sɛ tɛ̃ ɛ do ngbongbo nɛ, wele dísí sɛ ma gɔ.

⁴ We mi kɔ̃a na mɔ kɔmɔ ni ma kɛ: ‘O'dã winɔ wa kpásá sɛ gɔ, nɛ nde Owi bɔlɔ zunɔ wa kpasa sɛ, we kɛ wa gbini zã wa do mi Gale!’ ”

⁵ Ma ni kpaa, ma wè na lɛ gbini zã lɛ do kpamɔ gɔ. Owi gã zunɔ wa do dungu fio bina. Wa dɛ nga'ba ɔ nɛ nù ni, we kɛ gɛnɛ kɔ wa mi fionɔ gbaa, nɛ nde zã nù hɛ̃́ fala kpo gɔ. Gulu nɛ a Owi gã zunɔ wa kala lenɔ 'da gele winɔ dɛ ngɔ ngbɛ ɛ, nɛ wa a winɔ ni ti mbulanɔ 'da wa.

Gale a hã sɛ etumbu hã Owi dɛ 'dã mɔ

⁶ Owinɔ kɛ Owi Babilonia wa kala zi lenɔ 'da wa ni, wa ma sɛ ngɔ mɔmɔ wa, nɛ wa be sɛ tɛlɛ tɛ kɛ wa sɛnɛ do Owi Babilonia ni hã wa. Wa tɔ̃ sɛ hã wa na: “'Bako do nɛ! Nɛ zũ mɛnɔ 'da ongba nɛ, nɛ nɛ kala mɛnɔ wa ia do tikɔɛ kɔ nɛ ni, sɛ a nɛ dungu ngɔ gili kpamɔ de. Nɛ nde nɛ lengge na, nɛ dɛ sɛ ni fai nde?

⁷ “Owinɔ kɛ nɛ kala zi mbilinɔ 'da wa ni, wa gbanga sɛ nɛ, nɛ wa ba sɛ nzɔlɔ gɛlɛ nɛ, nɛ nɛ tana sɛ kili. Wa kala sɛ tɛ mɛ 'bɔ mɛnɔ 'da nɛ, ɔ nɛ kɛ nɛ kala zi do kɛnɔ 'da wa ni.

⁸ Nɛ kala zi omɔ kɔ̃ ogba gili wele, nɛ nde ngangga gɛ, tala wanɔ wa 'bana ni, wa kala sɛ tɛ mɛ 'bɔ kɛnɔ 'da nɛ, we duzu tɔkɔ tɛ winɔ kɛ ma a zi nù, do ngamɛnɔ kɛ nɛ hã zi hã owinɔ ngɔ nùi gɛ, do lenɔ 'da wa ni.

⁹ “'Bako do nɛ! Nɛ kala zi mɛnɔ 'da ogele winɔ kɔ̃ wa do zũ we gala do Owi nanɔ 'da nɛ. Nɛ nɛ lingga na, nɛ dɛ na mɛ ni, nɛ nde nɛ zĩ gba'da dɛ tɛ nɛ we hɔ kɔ ngamɔ.

¹⁰ Nɛ nde nɛ ĩ na, mɛnɔ vɛ̃ kɛ nɛ lingga we dɛ ma ni, ma hã sɛ sape hã Owi nanɔ 'da nɛ do ndɔti nɛ. Nɛ do 'do, nɛ onu fɛlɛ kulanɔ 'da winɔ nɛ gbɛa wa wena ni, wa bili sɛ nu gbã nɛ hã nɛ.

¹¹ Do gbãlã we, gɛnɛ kɔ ota nyanga tɔanɔ, do olangba zu tɔanɔ 'da nɛ, ma sɛ a temɔɛ 'dã mɛnɔ kɛ nɛ dɛa ni.

¹² “'Bako do nɛ! Nɛ bi ogele winɔ we kpa nù we dɛ ogã lenɔ 'da nɛ tɛ nɛ. Nɛ gbɛ Owele, nɛ nɛ kala mbili kɔ̃ wa we 'dafa do lenɔ 'da nɛ.

¹³ Gulu nɛ a ogele winɔ wa tɛ zɔ ngamɔ li tonɔ 'da wa do yala iko, nɛ mɔ olo tonɔ ni ma ngutu vɛ̃. Ní a wi dɛ mɛnɔ ni vɛ̃, wi a NWA ngɔ mɔ nyanga nza gɔ nde?

¹⁴ Do gbãlã we, owinɔ ngɔ nù gɛ wa ĩ sɛ ti dɔ̃lɔ̃ li 'da NWA, nɛ ma dunu sɛ kɔ sila wa, ɔ nɛ kɛ gba lì dunu kɔ kungba nɛ ni.

¹⁵ “'Bako do nɛ! Nɛ ba dɔ̃ kɛ ma fanga ɔ nɛ sambe ni, nɛ nɛ a ma hã ogele winɔ na wa nɔ, nɛ ma ba wa, nɛ wa e kũlĩ tɛ wa dɛ nza. Dɛ 'do nɛ, nɛ nɛ ma ngɔ soko wa we ya fala tɛ wa.

¹⁶ Nɛ nde nɛ do tɛ nɛ, nɛ kpa sɛ sape olo li kpa dɔ̃lɔ̃ li. Nɛ nɔ sɛ fã dɔ̃ɛ ni, nɛ nɛ e sɛ kũlĩ tɛ nɛ dɛ nza. NWA a hã sɛ etumbu hã nɛ, nɛ ma vĩ sɛ zu nɛ, ɔ nɛ kɛ a ia fã dɔ̃ nu nɛ ni. Nɛ dɔ̃lɔ̃ li 'da nɛ ma kifi sɛ sape.

¹⁷ Nɛ gɔma zi tenɔ tɛ Libanɛ vɛ̃ dɛ nù, nɛ nde di ngangga gɛ, wa 'bili sɛ tɛ mɛ 'bɔ gɛlɛ nɛ. Nɛ gbɛa zi osa'denɔ wena, nɛ nde osa'de wa a sɛ kili tɛ nɛ. Mɛnɔ ni vɛ̃ ma dɛ sɛ tɛ̃ ɛ, we duzu tɔkɔ tɛ winɔ kɛ ma a nù, do ngamɛnɔ kɛ nɛ hã zi hã winɔ ngɔ nùi gɛ, do lenɔ 'da wa ni.

¹⁸ “Gulu dɛ kpikima gɛ a ge nde? Mɛ a nga mɔ bolo kɛ wele dula iko. Gulu kɛ wele gbini zã a do okpikima kɛ a do tɛ̃ a a dɛa, nɛ ma wè tɛ wele we gɔ ni we ge nde?

¹⁹ 'Bako do nɛ! Nɛ tɔ̃ hã sɛa te na: ‘Mɔ túnú li yala!’ Nɛ nɛ tɔ̃ hã sɛa ta na: ‘Mɔ kúlú ngɔ!’ Ĩ na, ma wè tɛ be gulu we hã nɛ gɔ. Gɛnɛ kɔ wa nãlã mɔ mbali, tabi fɛ̃a mɔ bolo tɛ nɛ, nɛ nde tunu tɛ wi kɔ ma sĩ bina.”

²⁰ Nɛ nde NWA Gale, a dungu kɔ Tɛmpɛloe 'da a kɛ ma santo. E kɔ winɔ ngɔ nu gɛ vɛ̃ wa dungu fioo dati a!