HABAKUKƐ 1 - WE NU GALE 1995

¹ Lɛnggɛnɔ kɔ 'buki gɛ, mɛ a lɛnggɛ ngɔ mɛnɔ Gale bia ma li wi gba olo nu a Habakukɛ na, a tɔ̃ ma ni.

Habakukɛ bi tɛ̃ ɛ ngɔ 'dã mɛ 'da winɔ

² Aa NWA, gbaa mɔ zi belee, mi tɛ sa mɔ hã mɔ na mɔ tɛ́, hã mɔ gbaka lɛ zãa! Mɔ nɛ zele mi soe ki nge nde? Mɔ nɛ tɛ we gbaka lɛ, takɔ lɛ hɔ ti kɔ̃ Owi zɛlɛ tɛ lɛ soe ki nge nde?

³ Gulu kɛ mɔ kɔ̃a na, mi zɔ gili 'dã mɛnɔ 'da winɔ dɛ li mi fai we ge nde? Kɔdɛ kɛ mɔ wia tɛ kunu sila mɔ, we zɔ 'dã mɛnɔ 'da winɔ do li mɔ iko ni nɛ nde? Mi ka mɔ, nɛ mi zɔ tati a zɛlɛ tɛ ngba wi, do kpawe, do bolo, do mɔ̃lã tɛ falanɔ vɛ̃.

⁴ Fo wi zele mbula bina, nɛ fo 'bɔ wi gɔnɔ we do bɔlɔ nɛ bina. Wa gbɛ gbãlã we hã o'dã winɔ, nɛ wa 'bili wenɔ vɛ̃ do bɛlɛ.

NWA gisa nu aka we 'da Habakukɛ

⁵ Nɛ nwa tɔ̃a hã owinɔ 'da a na: “Nɛ á li nɛ nu, hã nɛ zɔ́ ogele winɔ kɛ zã nɛ gɛ, nɛ nɛ ɔngbɔ sɛ mɛnɔ nɛ do 'da fala ngamɔ, takɔ wa kpa wala wa zɔa ni. Mi nɛ dɛ mɔ kpo do 'da fala 'da nɛ gɛ, hã nɛ zɔ. We kɛ nɛ zele sɔ do zala nɛ iko, nɛ nde nɛ kɔ̃́ sɔ gɔ.

⁶ Mi nɛ hã ngawi hã owi Babilonia, takɔ wa hã zɛlɛ tɛ hã ogele winɔ. Wa do 'bako li wa bina, nɛ sila wa dɛ wɛ'dɛ wɛ'dɛ we bi bolo iko. Osodanɔ 'da wa wa yɛnggɛ ngɔ nu gɛ vɛ̃ we kala nùnɔ 'da ongba wa.

⁷ Wa a kili tɛ ogele winɔ, nɛ tɛ wa ma ngɔ tana nɛ iko. Gã zui 'da wa la li, nɛ wa ba nu wa hã owinɔ nɛ́ kɛ zã wa kɔ̃a ni.

⁸ “Ombalatanɔ 'da wa wa ĩ ti yu yu nɛa ngɔ ogɔ̃̀, nɛ tɛ wa gbɛngɛ nɛa ngɔ ogbokologboe kɛ wa nɛ we fa nyɔngɔmɔ nu wa do gɛ̃a wese ni. Osoda kũ mbalatanɔ 'da wa, wa yula du wala, nɛ ombalatanɔ 'da wa, wa tɛ bũlũ wula wula. Nɛ osodanɔ wa tisi owinɔ kɛ wa bi wa ni, ɔ nɛ kɛ oziki wa tisi do sa'de ni.

⁹ Osodanɔ 'da wa wa tɛ vɛ̃, nɛ wa kala dia mɛnɔ kɔ le, nɛ wa la do nɛ. Kɔ wa kɔlɔ do le kpo ia, nɛ bula li wa a kili tɛ winɔ di ni vɛ̃. Nɛ wa ngɛmɛ gba gili owinɔ ɔ nɛ gbãlã kɛnzɛ ni si do wa.

¹⁰ Wa zɔ Onwanɔ li wa yala iko, nɛ wa mɔmɔ Owi fɔmɔ lenɔ. Gɛnɛ kɔ gba ngbonɔ kɛ ma nganda nɛ ge nde ni, nɛ wa zɔ ma li wa yala iko. Wa so nùi dɛ nyanga ngbonɔ gbaa, hã zu nɛ nɛ we kɔ̃ do zu ngboe ni, nɛ wa bũlũ, nɛ wa zĩ nù kɔ le, nɛ wa ba ma iko.

¹¹ Dɛ 'do nɛ, nɛ wa la ɔ nɛ gba bũ kamba ni, nɛ wa bi tũ. Winɔ ni wa a o'dã wele, wa zɔ ngawi 'da wa li wa ɔ nɛ gale 'da wa ni.”

Habakukɛ bi 'bɔ tɛ̃ a ngɔ 'dã mɛnɔ 'da winɔ

¹² Aa NWA, gbaa mɔ zi belee, mɔ fai a NWA. Mɔ a Gale 'da mi, mɔ a santo, nɛ mɔ fé fio gɔ. NWA Gale 'da mi, mɔ a wi amba zu mi. Mɔ saka Obabilɔnɛ, nɛ mɔ hã ngawi hã wa na, wa hã etumbu hã lɛ, ɔ nɛ kɛ mɔ 'bili ni.

¹³ Nɛ nde NWA, kɔdɛ kɛ mɔ wia tɛ ka mɔ tɛ o'dã winɔ gɛ do li mɔ iko ni nɛ nde? Wa bɛ̃a mbula 'da mɔ, nɛ mɔ ha etumbu hã wa gɔ we ge nde? 'Dã mɔ bi sĩ kɔ mɔ bina, nɛ mɔ wè tɛ kunu sila mɔ we zɔ 'dã mɔ gɔ. Gulu kɛ 'dã mɛ 'da winɔ ni ma gã nɛa ngɔ 'dã mɛ 'da wanɔ wa zɛlɛ tɛ wa ni, nɛ mɔ wélé we gɔ we ge nde?

¹⁴ Gulu kɛ mɔ zɔ owinɔ li mɔ ɔ nɛ okɔyɔ, tabi olaka, kɛ fo wi zɔ mɔ tɛ wa bina ni we ge nde?

¹⁵ Owi Babilɔnɛ wa kala winɔ, ɔ nɛ kɛ wa kala okɔyɔ do galĩ ni. Wa kala wa ɔ nɛ okɔyɔ kɔ gbanda ni, nɛ wa si do wa, nɛ ma hã yangga hã wa wena.

¹⁶ Wa zɔ gbandanɔ 'da wa li wa, ɔ nɛ gale 'da wa ni, nɛ wa gbɛ osa'de, nɛ wa dɔ fũ yɔmbɔ we dɔnggɔ do ma. We duzu kɛ gbandanɔ ni hã dia nyɔngɔmɔ hã wa dɛlɛ wena.

¹⁷ Wa nɛ la fala kula li 'da wa, do gbɔtɔ du kɔyanɔ 'da wa, we kumu ogele winɔ soe ki nge nde?