Ndo Nyanga Dɛ Mɔ 9 - WE NU GALE 1995

Gale gba tɔkɔ do Nowe

¹ Nɛ Gale wila nu ɛ tɛ Nowe, do obenɔ 'da a, nɛ a tɔ̃ na: “Nɛ kó hã nɛ dɛlɛ, nɛ nɛ yɛ'bɛ ngɔ nù gɛ.

² Nɛ kili nɛ ma ba sɛ ogã sa'denɔ, do obe wanɔ, do onɔɛnɔ, do okɔyɔnɔ vɛ. Mi ia wa vɛ ti mbula 'da nɛ.

³ Nɛ wia we nyɔngɔ wa vɛ, mba do onwá sanggonɔ kɛ mi hã zi hã nɛ dati ni. Mi hã mɛnɔ ni vɛ hã nɛ na, nɛ nyɔngɔ ma.

⁴ 'Bali mɔ kpo, nɛ tɛ nyɔngɔ sa'de kɛ tɔkɔ tɛ a sì nù gɔ ni gɔ. We duzu kɛ tɔkɔ ma do kpasi kɔ nɛ boe.

⁵ Ma ɔ kpasaa nɛ tɔkɔ tɛ nɛ ngboo, kɛ ma 'bɔ do kpasi kɔ nɛ boe ni. Na mɛ ni, wi kɛ a gbɛ ngba a, nɛ a kpa sɛ etumbu fio. Ma ɔ tabi do sa'de hã a gbɛ wele nde, nɛ mi hã sɛ etumbu fio hã sa'de ni.

⁶ Fala kɛ wele a tɔkɔ tɛ ngba a nù, nɛ ngba a wele a a sɛ tɛ mɛ 'bɔ tɔkɔ tɛ a nù. We kɛ mi dɛa wele ɔ nɛ mi, nɛ a ba tɛlɛ tɛ mi ngboo.

⁷ Nɛ nde we duzu nɛ, nɛ ko hã nɛ dɔ, nɛ nɛ yɛ'bɛ ngɔ nùi vɛ.”

⁸ Nɛ Gale tɔ̃ 'bɔ hã Nowe do obenɔ 'da a na:

⁹ “Mi nɛ gba tɔkɔ do nɛ, do obe zã nɛ.

¹⁰ Mi gba sɛ 'bɔ tɔkɔ do omɛnɔ vɛ kɛ ma do tunu li ɛ ni, onɔɛnɔ do osa'denɔ vɛ kɛ wa zi fala nɛ kpo do nɛ kɔ masua, do owanɔ wa sɛ ngɔ nù gɛ do 'do nza ni.

¹¹ Gba tɔkɛ ni, ma ɔ sɛ nɛ kɛ gɛ: Mi kúmú sɛ 'bɔ omɛnɔ kɛ ma do tunu li ɛ ngɔ nù gɛ do gba hɛ̃a lì gɔ. Nɛ gba hɛ̃a lì 'dángá sɛ 'bɔ nùi gɛ fala kpo gɔ.”

¹² Nɛ Gale tɔ̃ 'bɔ na: “Gba tɔkɛ kɛ mi gba do nɛ, do omɛnɔ vɛ kɛ ma do tunu li ɛ ni, ma 'bana sɛ 'bana fai. Nɛ mɛ kɛ ma be sɛ na, mi gba tɔkɔ do nɛ ni, ma kɛ:

¹³ Mi dɛ sɛ na, ndumbe hɔ lì nza, nɛ ma be sɛ gba tɔkɛ kɛ mi gba ma do owinɔ ni.

¹⁴ Nɛ 'da fala fai, kɛ mi dɛ na, li nza ma kpe do lĩ kolo, hã ndumbe ma hɔ nde,

¹⁵ nɛ ta zu mi ma gba sɛ ngɔ gba tɔkɛ kɛ mi gba do nɛ, do osa'denɔ vɛ̃ ni. Nɛ gba hɛ̃a lì kúmú sɛ 'bɔ omɛnɔ kɛ ma do tunu li ɛ ngɔ nù gɛ fala kpo gɔ.

¹⁶ Fala kɛ ndumbe hɔ, nɛ ta zu mi ma gba sɛ ngɔ gba tɔkɛ, kɛ ma 'bana sɛ fai ngbala lɛ do Otunu li omɛnɔ ngɔ nù gɛ ni.”

¹⁷ Nɛ Gale dala 'bɔ nu ɛ hã Nowe na: “Ndumbe ma be gba tɔkɛ kɛ mi gba ma do omɛnɔ kɛ ma do tunu li ɛ ngɔ nù gɛ ni vɛ.”

Nowe do obenɔ 'da a talɛ ni

¹⁸ Obenɔ 'da Nowe kɛ wa hɔa nza kɔ masua do a ni, wi zi a Sɛmɛ, Kamɛ do Yafɛtɛ. Kamɛ zi a baa Kanana.

¹⁹ Yolo dɛ ngɔ obenɔ talɛ ni, nɛ Owele wa yɛ'bɛ zi ngɔ nù gɛ.

²⁰ Nowe zi a wi wa fɔ, a zi a wi dati we mi te vinɔ.

²¹ Nɛ mbe tũ kpo, nɛ Nowe nɔa dɔ̃, nɛ ma ba a, nɛ a hɔlɔ tulu tɛ a, nɛ a ɔ yala dɛ kɔ tɔa tande 'da a do wila tɛ a iko.

²² Nɛ be 'da a, Kamɛ, kɛ a baa Kanana ni, a zɔ kũlĩ tɛ baa a Nowe, nɛ a hɔ nza, nɛ a tɔ̃ we nɛ hã onya a

²³ Sɛmɛ do Yafɛtɛ. Wa nɛa we zele ní, nɛ wa kala gbau tulu, nɛ wa zɛ ma ngɔ 'baka wa, nɛ wa le kɔ tɔa tande, nɛ wa siki 'do wa dɛ 'da baa wa na, dɔ lo zɔ kũlĩ tɛ baa lo gɔ. Wa tili ni gbaa, nɛ wa gu tuli ni ngɔ a.

²⁴ 'Da fala kɛ Nowe tunu, nɛ li a sa tɛ bá dɔ̃ɛ 'da a ni, nɛ a zele we mɛ kɛ zagbãlã be 'da a dɛa do a ni,

²⁵ nɛ a tɔ̃ na: “E kɔ fɔmba zĩlĩ ngɔ mɔ Kanana! Mɔ sɛ a tala ngɔ go'do ngbá 'da onya mɔ.”

²⁶ Nɛ Nowe tɔ̃ 'bɔ na: “Lɛ dɔnggɔ NWA Gale 'da Sɛmɛ, nɛ Kanana dúngú ngbá 'da Sɛmɛ.

²⁷ Aa Gale, mɔ dɛ na, Yafɛtɛ kpa de mɔ a gã, nɛ onu fɛlɛ a wa ɔ́ fala nɛ kpo do nu fɛlɛ Sɛmɛ. Nɛ Kanana dúngú ngbá 'da Yafɛtɛ.”

²⁸ 'Do gba hɛ̃a lì ni, nɛ Nowe ɔa 'bɔ sabɛlɛ kama talɛ do 'bu nɛ mɔlɔ.

²⁹ A ɔa zi ngɔ nù gɛ vɛ sabɛlɛ kama kusi do 'bu nɛ mɔlɔ, nɛ a fe.