Ndo Nyanga Dɛ Mɔ 8 - WE NU GALE 1995

Nowe hɔa nza kɔ masua

¹ Nɛ ta zu Gale gba ngɔ Nowe, do osa'denɔ do onɔɛnɔ vɛ kɛ wa zi kɔ masua fala nɛ kpo do a ni. Nɛ a dɛa na bũ ma fi, nɛ bũ fi ngɔ nù gɛ, nɛ hɛ̃a lì ma ngɔ ɔ̃sɔ̃ nɛ.

² Nɛ zu lìnɔ ti nù gɛ ɔ̃sɔ̃, nɛ go'do li nza kpia, nɛ kole gɔnɔ.

³ Nɛ lìnɔ ma ngɔ ɔ̃sɔ̃ nɛ ngɔ nù nga gɛɔ gɛɔ gbaa, nɛ 'do tũ kama do 'bu nɛ mɔlɔ, nɛ lìnɔ ma ɔ̃sã vɛ.

⁴ Nɛ do zɛkɛ 'da sambo, kɔ̃ nɛ 'bu ngɔ nɛ sambo, nɛ masua haka, nɛ ma yolo nù dɛ zu mbe kala kpo sanga okala Araratɛ.

⁵ Nɛ lìnɔ ma ɔ̃sã zi ɔ̃sã gbaa we hɔ tɛ zɛkɛ 'da 'bu, kɔ̃ nɛ kpo, nɛ zu kalanɔ hɔa nza.

⁶ 'Do nɛ la 'bu tũ nalɛ, nɛ Nowe hũi li hole kɛ a ia zi ma tɛ 'bolo zã masua ni,

⁷ nɛ a da kɔ a tɛ ganakele kpo. Nɛ ganakele bũlũ, nɛ a yɛnggɛ do nza gɛ tɛ zĩ zĩ fai we 'bɔ do 'da ɔ̃sã lì.

⁸ 'Do a ni, Nowe da kɔ ɛ tɛ gbakulĩ na, a nɛ we zɔ lìnɔ, tabi ma ɔ̃sã nde?

⁹ Nɛ gbakulĩ la, nɛ a kpà fala we zĩ nù tɛ nɛ gɔ, we kɛ lì 'bana kpa do ngɔ nùi vɛ. Nɛ a kpolo tɛ a dɛ 'da Nowe tɛ kɔ masua i, nɛ Nowe ɛfɛ kɔ ɛ do li hole, nɛ a ba a, nɛ a gese a dɛ kɔ masua.

¹⁰ Nowe 'bɔa 'do ki ni tũ sambo, nɛ a da 'bɔ kɔ a tɛ gbakulĩ, nɛ gbakulĩ la.

¹¹ Nɛ wese gɛ̃a, nɛ a kpolo tɛ a do mbé nwá te olivɛ dɛ nu a. Nowe zɔa na mɛ ni, nɛ a ĩ na, lì ma ngɔ ɔ̃sɔ̃ nɛ ia.

¹² Nɛ Nowe 'bɔa 'bɔ 'do ki ni tũ sambo, nɛ a da kɔ a mbé nɛ tɛ gbakulĩ, nɛ a la, nɛ a 'bana do zu a fai, a kpolo 'bɔ mbé tɛ a gɔ.

¹³ Nowe ɔa zi sabɛlɛ kama gazɛlɛ do ngɔ nɛ kpo, nɛ do kuti zɛkɛ, kɔ nɛ kpo, nɛ nde lì ɔ̃sã ngɔ nù nga vɛ. Nɛ Nowe yala mɔ zu masua, nɛ a ka mɔ nza, nɛ a zɔ na, nùi ma ngɔ kolo nɛ ia.

¹⁴ Nɛ ma hɔa tɛ zɛkɛ 'da bɔa, kɔ nɛ 'bu nɛ bɔa ngɔ nɛ sambo, nɛ nde nùi kula vɛ ia.

¹⁵ Nɛ Gale tɔ̃ hã Nowe na:

¹⁶ “Mɔ hɔ nza kɔ masua do wuke 'da mɔ, do obenɔ, do okondukanɔ 'da mɔ.

¹⁷ Nɛ mɔ fo osa'denɔ kɛ wa ɔ fala nɛ kpo do mɔ ni dɛ nza, onɔɛnɔ, do osa'denɔ tɛ̃ ɛ do tɛ ɛ vɛ, ogã wanɔ do obe sa'de hala nùnɔ. Mɔ fo wa dɛ nza, takɔ wa pɛsɛ do ngɔ nùi, nɛ wa ko, hã wa yɛ'bɛ.”

¹⁸ Nɛ Nowe hɔa nza kɔ masua do wuke 'da a, do obenɔ, do okondukanɔ 'da a.

¹⁹ Nɛ sa'denɔ wa hɔa tɛ mɛ 'bɔ nza: onɔɛnɔ, do ogã sa'denɔ do obe wanɔ. Wa hɔa nza do 'da nu fɛlɛ wa kpo do kpo.

Nowe dɔa sa'de we dɔnggɔ do Gale

²⁰ 'Do kɛ sa'denɔ wa hɔa nza vɛ ni, nɛ Nowe dɛa gbagala do ta we dɔ do sa'de hã NWA. A saka sanga sa'denɔ kɛ wa a sa li NWA ni tɛ ɛ do tɛ ɛ, nɛ a saka 'bɔ kɔ nɔɛnɔ, nɛ a gbɛ wa, nɛ a ngɛmɛ wa vɛ dɛ ngɔ gbagala, nɛ a dɔ wa we dɔnggɔ do NWA.

²¹ Nɛ zɛ dɔnggamɛ ni unu NWA, nɛ ma de tɛ a wena, nɛ a tɔ̃ do kɔ sila a na: “Mi fɔmbɔ sɛ 'bɔ nùi we duzu 'dã dɛa mɛnɔ kɛ owinɔ wa dɛ ma ni gɔ. Gɛnɛ kɔ mi ĩ na, 'dã linggamɔ lia zi kɔ sila wele belee do be tɛ a, nɛ nde mi gbɛ sɛ 'bɔ Otunu li mɛnɔ ɔ nɛ kɛ mi dɛa gɛ gɔ.

²² “Yolo do sɔɛ gɛ gbaa we hɔ ndɔti nza, zɔlɔ mi kpalɛ, do zɔlɔ kala kpalɛ sɛ boe fai. Zɔlɔ gɛ, do zɔlɔ tua wese, zɔlɔ sabɛlɛ, do zɔlɔ lì kolo, tũ do gba wese, ma sɛ boe fai kɔ sabɛlɛ do sabɛlɛ.”