Ndo Nyanga Dɛ Mɔ 50 - WE NU GALE 1995

Wa dungu gɛla Yakɔbɔ

¹ Yozɛfu tia do kɔ̃a dɛ ngɔ wɔlɔ baa a, nɛ a 'be a dɛ tɛ̃ a, nɛ mili kɔ̃a li a ma 'bɔ sanga li baa a vɛ̃.

² 'Do nɛ, nɛ a tɔ̃ hã monganganɔ kɛ wa dɛ toe hã a ni na, wa a ina tɛ wɔlɔ baa a na, da dɛ kɔ a mbúlú gɔ. Nɛ monganganɔ wa dɛa na mɛ ni.

³ Wa a ina tɛ̃ a gbaa 'do 'bu tũ nalɛ, ɔ nɛ kɛ wa dɛ fai ni. Nɛ Oezipeto wa hia kɔ̃a Yakɔbɔ, nɛ wa dungu gɛla a 'do 'bu tũ sambo.

⁴ Wa dungu gɛla ni do'do, nɛ Yozɛfu tɔ̃ hã owinɔ kɔ tɔa 'da nwa ni na: “Nɛ kɔ̃́ nde, nɛ nɛ tɔ̃ mbe we 'da mi hã nwa na:

⁵ ‘Dati kɛ na baa mi fe, nɛ a tɔ̃a zi hã mi na, mi zonggo tɛ mi hã ɛ na, fala kɛ ɛ fe, nɛ mi tɛ m wɔlɔ ɛ ngɔ nù Ezipeto gɛ gɔ, nɛ nde mi mí sɛ ɛ ngɔ nù Kanana, tɛ kɔ zuni kɛ ɛ 'dafa zi mbɔkɔ nɛ we ɛ ia ni. Kɔ a kɔ̃́, nɛ a hã wala hã mi, takɔ mi nɛ we mi baa mi, sɛ nɛ mi kpolo tɛ mi de.’ ”

⁶ Nwa ngɔ nù Ezipeto zila ní, nɛ a hã wala hã Yozɛfu na, a nɛ, hã a mi baa a do'do, sɛ nɛ a kpolo tɛ̃ a, ɔ nɛ kɛ a tɔ̃a ni de.

⁷ Yozɛfu kulu ngɔ, nɛ a nɛ we mi baa a. Tɛ nɛ mɔ a, nɛ ogã wi dɛa tonɔ kɔ ngbo 'da nwa, do okpasa winɔ Ezipeto ni vɛ̃, do nu fɛlɛ kula 'da a, mba do onya a,

⁸ do tala owinɔ kɔ nu fɛlɛ kula 'da baa a ni vɛ̃, wa nɛa fala nɛ kpo do a. Nɛ wa la zi olo wa Gosɛnɛ nga tati a obe do nadalamɔ iko.

⁹ Nɛ kɔ owinɔ wa kã Yozɛfu ni, ombe wa kũ ongilingili, nɛ lɔnggɔ wa dulu zi wena.

¹⁰ 'Da fala kɛ wa hɔa kɔ le Gorɛnɛ-Atadɛ, tɛ kulu lì Yɔrdanɛ i, nɛ wa sambala fie 'do nɛ nyɛlɛ wena. Nɛ Yozɛfu dɛa mɔ ngɔ fio baa a 'do tũ sambo.

¹¹ Nɛ Okanana kɛ wa ɔ zi ngɔ nùi ni, wa zɔa dɛa mɔ ngɔ fie kɛ wa dɛa ma tɛ Gorɛnɛ-Atadɛ ni, nɛ wa tɔ̃ na: “Mɔ ngɔ fie kɛ Oezipeto wa dɛa gɛ, ma 'danga nɛ́ mba mɔ ni.” Ma hã wa sa li fala ni na Abɛlɛ-Misraimɛ. Gulu nɛ na: “Mɔ ngɔ fio 'da Oezipeto.”

¹² Nɛ obenɔ 'da Yakɔbɔ wa dɛa zi mɛnɔ vɛ̃, nɛ́ kɛ baa wa ba zi do nu ɛ hã wa ni.

¹³ Wa ba zi wɔlɔ a, nɛ wa si do ma dɛ ngɔ nù Kanana, nɛ wa mi ma kɔ zuni tɛ kɔ ta ngɔ nùi tɛ Makpela, dɔ̃ɔ do Mamre ni. Abrahama usa zi fɔɛ ni kɔ̃ Efroni, be Hiti, takɔ ma ɔ do fala mi do fio mɔ a.

¹⁴ 'Do kɛ wa mi wɔlɔ baa wa do'do ni, nɛ Yozɛfu kpula tɛ̃ ɛ dɛ Ezipeto i fala nɛ kpo do onya a, do owinɔ wa kã zi a ni vɛ̃.

Yozɛfu kpãlã sila onya a

¹⁵ Onya Yozɛfu wa nɛa we zɔ na, baa lo fia ia ni, nɛ kili ba wa, nɛ wa na: “Mbe gɔ, nɛ Yozɛfu a kifi sɛ li a dɛ tɛ lɛ, nɛ a dɛ sɛ lɛ 'danga, we bili nu gbã 'dã mɛ kɛ lɛ dɛa zi do a ni.”

¹⁶ Nɛ wa tombo to hã Yozɛfu na: “Dati kɛ na baa lɛ fe ni, nɛ a tɔ̃a zi tala we hã lɛ na,

¹⁷ lɛ tɔ̃ hã mɔ na, mɔ kɔ̃, nɛ mɔ mbɔkɔ 'dã mɛnɔ kɛ lɛ onya mɔ, lɛ dɛa zi do mɔ 'danga nɛ́ mba mɛ ni, mɔ élé ma vɛ̃. Nyae, mɔ mbɔ́kɔ́ lɛ, we kɛ lɛ vɛ̃ lɛ dɔnggɔ Gale kpo, kɛ a a Gale 'da baa lɛ ni.” Yozɛfu nɛa we zele toe ni, nɛ a he wena.

¹⁸ 'Do nɛ, nɛ onya a wa tɛa, nɛ wa gu nù ti a, nɛ wa tɔ̃ hã a na: “Lɛ a ongbánɔ 'da mɔ.”

¹⁹ Nɛ Yozɛfu gese hã wa na: “Nɛ tɛ dɛ̀ kili gɔ, we kɛ mi wè tɛ e tɛ mi fala olo Gale gɔ.

²⁰ Nɛ kɔ̃a zi we dɛ mi 'danga, nɛ nde Gale kifi 'dã mɛ ni do dia mɔ. A kɔ̃a zi we kpasa mi, takɔ mi kpasa gba gili Owele, ɔ nɛ kɛ nɛ ĩ ma sɔɛ gɛ ni.

²¹ Kɔ nɛ tɛ dɛ̀ kili gɔ. Mi zɔ sɛ mɔ tɛ nɛ do nu fɛlɛ kulanɔ 'da nɛ vɛ̃.” Nɛ wila we gɛ̃ sila wi kɛ Yozɛfu wila hã onya a ni, ma hã zi kpã sila hã wa.

Fie 'da Yozɛfu

²² Na mɛ ni, nɛ Yozɛfu, do onya a, do obe zã wa, wa ɔa dɛ ngɔ nù Ezipeto ni. Yozɛfu ɔa zi ngɔ nù gɛ vɛ̃ sabɛlɛ kama do ngɔ nɛ 'bu.

²³ Nɛ a zɔa obenɔ kɛ Efraimɛ do Manase wa kua wa ni, nɛ a kala zi obe yaa a do okanggadɔkɔ a. Nɛ a zɔa obe zã Makirɛ, be 'da Manase.

²⁴ Ngba soe kpo, nɛ Yozɛfu tɔ̃ hã onya a na: “Ma 'bànà tũ dɛlɛ gɔ na mi fe. Nɛ nde Gale a gbaka sɛ nɛ. A dɛ sɛ na, nɛ la ngɔ nù Ezipeto, nɛ a kã sɛ nɛ dɛ ngɔ nùi kɛ a kpua zi mbulu hã ma hã Abrahama, Izaka do Yakɔbɔ ni.

²⁵ Kɔ mi kɔ̃a na, nɛ zonggo tɛ nɛ hã mi na, fala kɛ Gale kɔ̃ na nɛ si nde, nɛ nɛ ba sɛ wɔlɔ mi, nɛ nɛ la do ma.”

²⁶ Yozɛfu fia Ezipeto i, nɛ nde a zi do sabɛlɛ kama do ngɔ nɛ 'bu. Nɛ wa a ina tɛ wɔlɔ a na, da dɛ kɔ a mbúlú gɔ, nɛ wa fi a kɔ sanduku fio.