Ndo Nyanga Dɛ Mɔ 49 - WE NU GALE 1995

Tala wila nu 'da Yakɔbɔ tɛ obenɔ 'da a

^1-2 Yakɔbɔ sa mɔ hã obenɔ 'da a, nɛ a tɔ̃ hã wa na: “Aa benɔ 'da a, nɛ mbá li ngba nɛ, hã nɛ zele tala we nu mi baa nɛ. Nɛ zélé we ngɔ mɛnɔ ma kpa sɛ nɛ 'do gɛ ni.

³ Mɔ, Rubɛnɛ, mɔ a kuti be 'da mi. Mi kua zi mɔ dati hã onya mɔ 'da fala kɛ mi 'bana zi ngɔ nga tɛ mi ni. Mɔ nɛa ngɔ onya mɔ vɛ̃ do dĩ, do ngawi.

⁴ Nɛ mɔ ɔ nɛ fua lì kɛ ma dɛ ngele wena ni. Gɛnɛ kɔ ní, nɛ nde mɔ sɛ a wi dati gɔ, we kɛ mɔ hã zi sape hã mi. Mɔ lia kɔ 'bili tɔa olo mi, nɛ mɔ ɔ do mbe kpo sanga owukonɔ 'da mi, nɛ mɔ faka te ɔi 'da mi.

⁵ “Dɛa mɔ tɛ Simeoni do Levi, ma wia kɔ̃, nɛ wa mba li ngba wa we dɛ ngatɛ.

⁶ Nɛ nde mi mbá sɛ do wa gɔ, nɛ mi bá sɛ zã zu we do wa gɔ. We kɛ zã wa nɔ̃lɔ̃ zi, nɛ wa gbɛ owele, nɛ wa 'bili fɛlɛ nzabele nyanga owili ngɔmbɔ, nɛ ma dɛ yangga tɛ wa.

⁷ Mi fɔmbɔ wa we duzu 'dã nɔ̃lɔ̃ zã 'da wa, we kɛ wa ĩ̀ 'bako hã wele gɔ. Ma kɛ mi pɛsɛ sɛ obe zã wa do ngɔ nù Israɛlɛ vɛ̃.

⁸ “Mɔ, Yuda, onya mɔ wa dɔnggɔ sɛ mɔ. Mɔ isi sɛ gɛlɛ Owi sɛnɛ mɔ dɛ nù, nɛ onya mɔ ngboo wa gu sɛ nù ti mɔ.

⁹ Mɔ, Yuda, be 'daa, mɔ ɔ nɛ be wili gbɔgbɔ, kɛ a yula tɛ gbɛ sa'de, nɛ a kasa nyanga a, nɛ a ɔ nù ni. Wi kɛ a wia we fo a na, a kulu ngɔ, wi a wio nde?

¹⁰ Nu kpala mɔ ma dɛ sɛ to nwa fai. Dɔndɔlɔ nwa yú sɛ tɛ̃ ɛ kɔ̃ be zã mɔ gɔ, gbaa na owinɔ wa tɛ do mɔ we dɔnggɔ do a, nɛ wa dɛ mbulanɔ 'da a.

¹¹ Te vinɔ 'da mɔ ma ko sɛ wala nɛ dɛlɛ wena do tɛlɛ tɛ kɛ na, wele kpo punda dɛ gulu nɛ, kɔ gɛnɛ kɔ a nyɔngɔ mbe nwá te vinɔnɔ, nɛ nde ma dɛ́ sɛ mɔ gɔ. Lì dɔ̃ vinɔ 'da mɔ ma dɔ sɛ wena, ɔ nɛ lì fɔlɔ tulu ni.

¹² Li a ndele ɔ nɛ lì dɔ̃ vinɔ, nɛ gogo a ma fɛngɛ sɛ nɛ ngɔ lì bele.

¹³ “Zabuloni a dɛ sɛ fala ɔi 'da a dɛ nu gã lì, dɛ fala kɛ masua ma kpɔ sɛ do ma ni. Nɛ nùi 'da a, ma nɛ sɛ gbaa, nɛ ma Sɔkpɔ tɛ le Sidoni.

¹⁴ “Isakarɛ ɔ nɛ gã wili punda, kɛ a ɔa nù dɛ kɔ ngbo ni.

¹⁵ A zɔa na, fala kɛ wa ia do ɛ ni ma de wena, nɛ nùi 'da ɛ 'bɔ a dia ni, nɛ a 'dafa zu 'baka a we kala tolenɔ, nɛ a ma ngɔ dɛ to kolofe do dia nɛ.

¹⁶ “Danɛ a dungu sɛ ngɔ owinɔ 'da a, wa tɛ mɛ 'bɔ a mbe kpo sanga nu kpala obe Israɛlɛ.

¹⁷ Danɛ ɔ nɛ danuasɛ kɛ a usu kɛ zã wala ni, a gɔmɔ fɛlɛ nzabele nyanga mbalata, nɛ wi kũ ngɔ a te nù do talaka.

¹⁸ “Aa NWA, mi gbini zã mi do mɔ, hã mɔ kpasa mi.

¹⁹ “Kɛ 'da Gadɛ ni, owi 'danga mɔ wa bi sɛ a, nɛ a siki sɛ li a dɛ tɛ wa, nɛ a ndaka 'do wa.

²⁰ “Nùi 'da Asɛrɛ ma de sɛ kpalɛ wena, wa wia sɛ we kpa dia nyɔngɔmɔ gi hã nwa di ni.

²¹ “Nɛftali ɔ nɛ dɛngbɛ ni. A yɛnggɛ do falanɔ vɛ̃ kɛ zã a kɔ̃a ni, nɛ a ko dia be.

²² “Yozɛfu ɔ nɛ be wili ngɔmbɔ, kɛ a yolo dɛ kɛ zã nu lì, nɛ a bũlũ ngɔ ngboe, nɛ a yɛnggɛ do nza ni.

²³ Owi da nzabelenɔ wa nɔ̃lɔ̃ zã a wena, wa da kpilinɔ 'da wa hã a, nɛ wa bi a.

²⁴ Nɛ nde Yozɛfu 'bia nzabele 'da a, nɛ kɔ̃ a nɔ se'de, nɛ a nɛa ngɔ owi sɛnɛ a do ngawi 'da Gale 'da mi Yakɔbɔ. Gale a wi zɔ mɔ tɛ lɛ, nɛ a yolo gba sala 'do lɛ, obe Israɛlɛ.

²⁵ “A a Gale 'da mi baa mɔ, nɛ a gbaka sɛ 'bɔ mɔ. A do ngawi nɛa ngɔ mɔ vɛ̃, nɛ a wele sɛ nu a tɛ mɔ. E kɔ kole ma tɛ li nza gɛ, do lìnɔ ma kũ ndũu ti nù i ni, ma dɛ dia mɔ hã mɔ. E kɔ Gale wele nu a tɛ wukonɔ do nadalamɛnɔ 'da mɔ, hã wa ko gba dɔa be hã mɔ.

²⁶ Wila nu 'da mi baa mɔ ma dia nɛa ngɔ mɔ vɛ̃. Nɛ ma nɛa ngɔ de mɛnɔ kɛ gã kalanɔ ma ɔ fai ma hã ma ni. E kɔ wila nu 'da mi te ngɔ mɔ Yozɛfu, kɛ mɔ a gã wi ngɔ onya mɔ ni.

²⁷ “Bɛnzamɛ ɔ nɛ ngbia kɛ a do wɔ ni. Do titole, nɛ a gbɛ sa'de we nyɔngɔ ma, nɛ do gɛ̃a wese, nɛ a kɛ̃ sa'de kɛ a gbɛa a ni.”

²⁸ Ki ni mɛ a wenɔ kɛ Yakɔbɔ tɔ̃a hã obenɔ 'da a 'bu ngɔ wa bɔa, do 'da fala kɛ a wila tala wila we hã wa kpo kpo gɛ a ni. Nɛ obenɔ ni wa hɔa yaa nu kpala obe Israɛlɛ 'bu ngɔ wa bɔa ni.

Fie 'da Yakɔbɔ

²⁹ Nɛ Yakɔbɔ ba nu a hã obenɔ 'da a na: “Mi kɔlɔ do fio ia, kɔ nɛ mi sɛ mi ngɔ mabi'donggo 'da oyaa mi, tɛ kɔ ta ngɔ nù 'da Efroni, be Hiti.

³⁰ Nùi ni, ma a tɛ Makpela, dɔ̃ɔ do Mamre tɛ ngɔ nù Kanana. Abrahama usa zi ma kɔ̃ Efroni na, ma ɔ do fala mi do fio mɔ a.

³¹ Wa mi zi Abrahama do kɛnɛ a Sara, nɛ wa mi 'bɔ Izaka do kɛnɛ a Rebɛka dɛ di ni, nɛ mi mi zi 'bɔ kɛnɛ mi Lea dɛ kpo kpo fala ni.

³² Wa usa zi fɔɛ do kɔ ta kɔ nɛ ni kɔ̃ Ohiti. Kɔ nɛ mi sɛ mi dɛ di ni.”

³³ 'Da fala kɛ Yakɔbɔ wila tala wenɔ ni hã obenɔ 'da a do'do, nɛ a ɔ nù dɛ ngɔ te ɔi 'da a ni, nɛ a fe, nɛ a nɛ we kpa ngba a do oyaa a.