Ndo Nyanga Dɛ Mɔ 48 - WE NU GALE 1995

Yakɔbɔ wila nu a tɛ obenɔ 'da Yozɛfu

¹ 'Do mɛnɔ ni, nɛ wa tɔ̃ hã Yozɛfu na, baa a do zɛlɛ. Nɛ Yozɛfu zila ní, nɛ a kulu ngɔ, nɛ a kala obulu benɔ 'da a bɔa ni, Manase do Efraimɛ, nɛ a la do wa 'da baa a i.

² Kɔ Yakɔbɔ nɛa we zele na, be 'da a Yozɛfu tɛ tɛ li wala gɛ we zɔ a ni, nɛ a ngo tɛ̃ a, nɛ a kulu ngɔ, nɛ a dungu do go'do a dɛ ngɔ mɔ ɔi 'da a ni.

³ Yozɛfu hɔa, nɛ Yakɔbɔ tɔ̃ hã a na: “Gale kɛ a do nganda vɛ̃, a bia zi tɛ̃ a hã mi tɛ kɔ le Luzɛ, tɛ ngɔ nù Kanana, nɛ a wila nu a tɛ mi,

⁴ nɛ a tɔ̃ hã mi na, ɛ hã sɛ obe hã mi dɛlɛ wena, takɔ mi hɔ yaa gba gili nu kɔnggɔ Owele. Nɛ ɛ hã sɛ nùi ni hã obe zã mi do mɔ wa fai!”

⁵ Nɛ Yakɔbɔ tɔ̃ 'bɔ hã Yozɛfu na: “Obulu benɔ 'da mɔ bɔa gɛ, Manase do Efraimɛ, kɛ mɔ kua wa ngɔ nù Ezipeto nga dati kɛ na, mi tɛ we kpa ngba mi do mɔ ni, wa ɔ sɛ nɛ obenɔ 'da mi ni. Wa ɔ sɛ nɛ Rubɛnɛ do Simeoni.

⁶ Kɔ fala kɛ mɔ ko obe 'do gɛ nde, nɛ wanɔ ni sɛ a benɔ 'da mɔ, nɛ wa kpa sɛ 'bili tɛ nù mɔ wa dɛ ngɔ nùi 'da nu fɛlɛ kula 'da onya wa Manase do Efraimɛ.

⁷ Mi kala Manase do Efraimɛ ɔ nɛ obenɔ 'da mi, we lengge do naa mɔ Rasɛlɛ. Mba gɔ, 'da fala kɛ mi yula zi ngɔ nù Mezopotami i, kɔ mi tɛ si ma, nɛ dati kɛ na mi hɔ kɔ le Efrata, tɛ ngɔ nù Kanana ni, nɛ naa mɔ Rasɛlɛ a fe dɛ kɔ̃ mi dɛ li wala ni. Nɛ mi mi zi a dɛ kɛ zã wala ni.” Nɛ sɔɛ gɛ, wa sa li Efrata na Bɛtleɛmɛ.

⁸ Yakɔbɔ 'bana tɛ wele we ni, nɛ a zɔ obenɔ 'da Yozɛfu, nɛ a aka a na: “Wanɔ gɛ a wio nde?”

⁹ Nɛ Yozɛfu gese hã a na: “Obenɔ kɛ Gale hã wa hã mi ngɔ nù Ezipeto nga gɛ a ni.” Nɛ baa a Yakɔbɔ tɔ̃ 'bɔ hã a na: “Mɔ ngbɔ do obenɔ 'da mɔ dɔ̃ɔ dɛ kɛ zã mi nga, hã mi wele nu mi tɛ wa.”

¹⁰ Do 'da fala ni, Yakɔbɔ dɛ zi gbɛlɛ wena, nɛ gbali a mbɔkɔ, nɛ a zɔ zi mɔ ngboo gɔ. Yozɛfu ngbɔa obenɔ 'da a ni dɔ̃ɔ do Yakɔbɔ, nɛ Yakɔbɔ 'be wa dɛ tɛ̃ ɛ, nɛ a ba wa dɛ ngɔ ku a, nɛ a ufu zala wa.

¹¹ 'Do nɛ, nɛ a tɔ̃ hã Yozɛfu na: “Mi ĩ zi kɛ na, mi zɔ sɛ bula li mɔ ni gɔ. Nɛ nde Gale dɛa na, mi zɔ tɛ mɔ, nɛ mi zɔ 'bɔ tɛ obenɔ 'da mɔ.”

¹² Nɛ Yozɛfu kala obenɔ 'da a, kɛ wa zi ngɔ ku baa a ni, nɛ a gu nù ti baa a.

¹³ Nɛ a 'be nu kɔ̃ benɔ 'da a bɔa nɛ. A 'bia Efraimɛ do gale kɔ̃ a, nɛ nde a si do ngɔ ngawili kɔ̃ yaa wa Yakɔbɔ. Nɛ a 'be 'bɔ Manase do ngawili kɔ̃ a, nɛ nde a si do ngɔ gale kɔ̃ Yakɔbɔ.

¹⁴ Nɛ Yakɔbɔ yapa kɔ̃ a, nɛ a e ngawili kɔ̃ a zu Efraimɛ kɛ a zi a be 'do ni, nɛ a e gale kɔ̃ a zu Manase kɛ a zi a kuti be ni.

¹⁵ Nɛ a wele nu a tɛ Yozɛfu, nɛ a tɔ̃ na: “E kɔ Gale, kɛ a zi do obaa mi Abrahama do Izaka fala nɛ kpo, nɛ a fɔmɔ zi mi gbaa tia do sɔɛ gɛ ni, a wele nu a tɛ obulu benɔ 'da mɔ.

¹⁶ Nɛ anzɛ kɛ a fua zi mi kɔ ngamɛ ni, a wele nu a tɛ obulu benɔ 'da mɔ. Nɛ e kɔ li mi ma 'bana ngɔ nù gɛ fai do wala 'da wa, ɔ nɛ kɛ li obaa mi Abrahama do Izaka 'bana ngɔ nù gɛ ni. E kɔ wa ko obe, nɛ obe zã wa dɛlɛ wena, nɛ wa yɛ'bɛ do ngɔ nùi gɛ vɛ̃.”

¹⁷ Nɛ zã Yozɛfu nɔ̃lɔ̃ zi wena we zɔ na, baa a ia ngawili kɔ̃ a zu Efraimɛ ni. Nɛ a fo ngawili kɔ̃ baa a kɛ a ia ma zu Efraimɛ ni, nɛ a e ma zu Manase, nɛ a tɔ̃ na:

¹⁸ “Ɔ̃ ɔ̃ baa mi, mɔ yɔa kɔ̃ mɔ. Wele kɛ gɛ a kuti be. Mɔ é ngawili kɔ̃ mɔ zu a.”

¹⁹ Nɛ baa a bɛ̃, nɛ a tɔ̃ hã a na: “Mi ĩ na, a a kuti be ni de wena, be 'daa. Obe zã Manase wa sɛ tɛ mɛ 'bɔ a gã nu kɔnggɔ Owele. Gɛnɛ kɔ ní, nɛ nde be hɔ dɛ 'do a sɛ do ngɔ a, nɛ obe zã a wa hɔ sɛ gba gili nu kɔnggɔ Owele.”

²⁰ Do ngba soe ni, nɛ a wila nu a tɛ wa, nɛ a tɔ̃ na: “Obe Israɛlɛ wa sa sɛ li nɛ, 'da fala kɛ wa nɛ wele nu wa tɛ wele ni. Nɛ wa tɔ̃ sɛ na: ‘E kɔ Gale be dia kɔ sila hã mɔ, ɔ nɛ kɛ a bia zi ma hã Efraimɛ do Manase ni.’ ” Na mɛ ni, nɛ Yakɔbɔ ia Efraimɛ na, a hɔ be dati olo li Manase.

²¹ Nɛ 'do nɛ, nɛ Yakɔbɔ tɔ̃ hã Yozɛfu na: “Mi kɔlɔ do fio ia, nɛ nde Gale sɛ fala nɛ kpo do mɔ, nɛ a gese sɛ mɔ dɛ ngɔ nùi 'da oyaa mɔ.

²² Nɛ nde we mi, mi hã nùi kɛ ma dia nɛa ngɔ kɛnɔ 'da onya mɔ vɛ̃ ni hã mɔ. Mi hã nù Sikɛmɛ hã mɔ. Mɛ a nùi kɛ mi ba zi ma kɔ̃ Oamori do du kɔya 'da mi, do nzabele 'da mi ni.”