Ndo Nyanga Dɛ Mɔ 47 - WE NU GALE 1995

¹ Nɛ Yozɛfu nɛa 'da nwa ngɔ nù Ezipeto, nɛ a tɔ̃ hã a na: “Mɔ zɔ, baa mi do onya mi, wa yula ngɔ nù Kanana i, hã wa hɔa. Nɛ wa tɛa do obata, odua, ongɔmbɔ do okpamɛnɔ 'da wa vɛ̃. Kɔ di dɔ̃ ni, wa a ngɔ nù Gosɛnɛ.”

² 'Do nɛ, nɛ Yozɛfu kala mbe onya a mɔlɔ, nɛ a nɛ do wa, nɛ a be wa hã nwa.

³ Nɛ nwa aka wa na: “Toe kɛ nɛ dɛ ni a to ge nde?” Nɛ wa gese hã a na: “Aa nwa, lɛ a owi dala onadalamɔ ɔ nɛ kɛ oyaa lɛ wa dɛ zi ma ni.

⁴ Gba wɛ tia, nɛ ma fila ngɔ nù Kanana i kerr, nɛ fo wɔkɔsɔ na onadalamɛnɔ 'da lɛ wa nyɔngɔ ma bina. Ma kɛ lɛ kulu dɛ i nga ni. Kɔ mɔ kɔ̃́, nɛ mɔ hã wala hã lɛ na, lɛ ɔ ngɔ nù Gosɛnɛ.”

⁵ Nɛ nwa tɔ̃ hã Yozɛfu na: “Ɔ nɛ kɛ baa mɔ, do onya mɔ wa tɛa dɛ 'da mɔ nga ni,

⁶ nù Ezipeto vɛ̃ ma dɛ tambala kɔ̃ mɔ. Mɔ fá fala kɛ ma a dia ni, hã wa ɔ nɛ. Wa wia we ɔ ngɔ nù Gosɛnɛ. Nɛ mɔ sáká mbe Owele sanga wa, kɛ wa ĩ ti dala sa'de wena ni, nɛ mɔ a wa we dala onadalamɛnɔ 'da mi.”

⁷ 'Do ki ni, nɛ Yozɛfu nɛa do baa a Yakɔbɔ, nɛ a be a hã nwa. Nɛ Yakɔbɔ wila nu ɛ tɛ nwa.

⁸ Nɛ nwa aka a na: “Mɔ do sabɛlɛ nɛ nde?”

⁹ Nɛ Yakɔbɔ gese hã a na: “Ma la di ni sabɛlɛ kama do 'bu nɛ talɛ kɛ mi yɛnggɛ do zu nza, nɛ mi ɔ kpo fala gɔ ni. Mi ɔ̃ ngɔ nù gɛ ngboo gɔ, nɛ nde mi zɔa ngamɔ 'do sabɛlɛ dɛlɛ wena. Nɛ sabɛlɛ 'da mi ma hɔ tɛ sabɛlɛ 'da oyaa mi kɛ wa yɛnggɛ zi do zu nza ni gɔ.”

¹⁰ Nɛ Yakɔbɔ wele 'bɔ mbé nu a tɛ nwa, nɛ a hɔ nza kɔ tɔa 'da a, nɛ a la.

¹¹ Nɛ Yozɛfu saka mbe 'bili tɛ nù kɛ ma dia nɛa ngɔ ngbɛ ɛ tɛ ngɔ nù Ezipeto vɛ̃ ni, nɛ a hã ma hã baa a do onya a na, ma ɔ do mɔ́ wa, ɔ nɛ kɛ nwa ba do nù a ni. Nɛ fala a hã ma hã wa ni, ma kɔlɔ dɔ̃ɔ do le Ramsɛsi.

¹² Nɛ a hã nyɔngɔmɔ hã baa a, do onya a, do obe zã wa, nɛ ma kpa zu wa vɛ̃.

Dɛa toe 'da Yozɛfu 'da fala gba wɛ

¹³ Gba wɛ tia, nɛ ma fila kerr, nɛ ma kpa do kɔ lenɔ vɛ̃, nɛ fo zi nyɔngɔmɔ 'bɔ bina. Nɛ owi ngɔ nù Ezipeto, do owi ngɔ Kanana wa zi tɛ fe wɛ.

¹⁴ Nɛ Yozɛfu kala mbili kɛ Oezipeto do Okanana wa oso zi do nyɔngɔmɛ ni vɛ̃, nɛ a a ma kɔ tɔa 'da nwa.

¹⁵ 'Da fala kɛ mbili ia kɔ̃ owinɔ vɛ̃ ni, nɛ owi Ezipeto wa nɛ, nɛ wa tɔ̃ hã Yozɛfu na: “Mɔ hã́ nyɔngɔmɔ hã lɛ! Mɔ kɔ̃a na, lɛ fe wɛ dɛ li mɔ gɛ, we duzu kɛ fo 'bɔ mbili kɔ̃ lɛ bina ni nde?”

¹⁶ Nɛ Yozɛfu gese hã wa na: “Fala kɛ nɛ do mbili bina nde, nɛ mi hã sɛ nyɔngɔmɛ hã nɛ, nɛ nɛ kpolo do onadalamɛnɔ 'da nɛ.”

¹⁷ Nɛ wa kala onadalamɛnɔ 'da wa, nɛ wa tɛ do wa hã Yozɛfu. Nɛ Yozɛfu hã nyɔngɔmɛ hã wa olo mbalatanɔ, batanɔ, duanɔ, ngɔmbɔnɔ do opundanɔ 'da wa. Nɛ kɔ sabɛlɛ ni, Yozɛfu hã nyɔngɔmɔ hã wa olo nadalamɛnɔ 'da wa gbaa nɛ wa e vɛ̃.

¹⁸ Sabɛlɛ ni ia, nɛ winɔ wa nɛ, nɛ wa tɔ̃ hã Yozɛfu na: “Aa nwa, lɛ wè tɛ usu we gɛ do mɔ gɔ. Lɛ do mbili bina, nɛ nadalamɛnɔ 'da lɛ wa ia 'bɔ vɛ̃ dɛ kɔ̃ mɔ nga ia. Kɔ lɛ 'bɔ do mɔ kpo we hã ma hã mɔ bina, tati a kili tɛ lɛ wele nɛ do nùnɔ 'da lɛ iko.

¹⁹ Kɔ mɔ kɔ̃a na lɛ fe wɛ dɛ li mɔ gɛ, nɛ lɛ la nùnɔ 'da lɛ dɛ i mɔ nde? Mɔ kɔ̃, nɛ mɔ oso kili tɛ lɛ, mba do nùnɔ 'da lɛ, kɔ mɔ hã nyɔngɔmɔ olo nɛ hã lɛ. Nɛ lɛ hɔ sɛ owi dɛa tonɔ 'da nwa ngɔ nùi, nɛ nùnɔ 'da lɛ sɛ a mɔ a. Lɛ kɔ̃́ na lɛ fe gɔ. Mɔ hã kpala ble, hã lɛ mi li fɔnɔ 'da lɛ, we kpasa do ma, da dɛ kɔ fɔnɔ 'da lɛ ɔ́ nɛ li gba zɔ̃ iko gɔ.”

²⁰ Nɛ wele do wele ma zi ngɔ be gole fɔnɔ 'dɛ ɛ, we duzu kɛ gba wɛ fele zi wena, nɛ Yozɛfu usa nùnɔ vɛ̃ hã nwa. Na mɛ ni, nɛ le vɛ̃ ma hɔa zi kɛ 'da nwa.

²¹ Nɛ Yozɛfu ia zi owinɔ kɔ le do ngbá.

²² Nɛ nùi a òsò zi ma gɔ tati a kɛ 'da onganganɔ 'da Oezipeto. We duzu kɛ nwa ia zi mbula ngɔ mɛnɔ 'da wa, nɛ wa kpasa zi do mɛnɔ kɛ nwa kɛ̃ ma hã wa ni. Ma kɛ wa bè zi gole nùnɔ 'da wa nɔ ni.

²³ Yozɛfu tɔ̃a hã winɔ na: “Ɔ nɛ kɛ mi usa nɛ mba do nùnɔ 'da nɛ vɛ̃ hã nwa ia ni, mi hã sɛ kpala ble hã nɛ na, nɛ mi ma li fɔnɔ 'da nɛ.

²⁴ Kɔ ma hɔ ngba soe kala kpalɛnɔ nde, nɛ nɛ hã sɛ kpo mbee mɔlɔ kɔ kpalɛnɔ ni hã nwa. Nɛ tala ki ni, nɛ mi sɛ ma li fɔnɔ 'da nɛ dɛ dati, sɛ a nɛ kpa nyɔngɔmɔ we duzu nɛ, do obenɔ 'da nɛ, do owinɔ vɛ̃ kɛ wa ɔ kɔ tɔa 'da nɛ ni de.”

²⁵ Nɛ wa gese hã a na: “Aa nwa, mɔ kpasa lɛ kpasa. Mɔ bia dia kɔ sila hã lɛ, kɔ lɛ kɔ̃a we hɔ ngbá 'da nwa.”

²⁶ Yolo dɛ di ni, nɛ Yozɛfu ia zi mbula ngɔ nù Ezipeto na, kpo mbee mɔlɔ kɔ kpalɛnɔ vɛ̃ a mɔ́ nwa, nɛ mbula ni 'bana fai tia do sɔɛ gɛ. Nɛ nùnɔ ma 'bana zi, nɛ ma hɔ kɛ 'da nwa gɔ, tati a nùnɔ 'da onganganɔ 'da Oezipeto.

Tala lingga wenɔ 'da Yakɔbɔ

²⁷ Obe Israɛlɛ wa ɔa zi Gosɛnɛ, tɛ ngɔ nù Ezipeto, nɛ wa kpa zi mɔ wena, nɛ wa kua 'bɔ obe dɛlɛ wena.

²⁸ Yakɔbɔ ɔa zi ngɔ nù Ezipeto i sabɛlɛ 'bu ngɔ nɛ sambo. Nɛ ma mba vɛ̃, nɛ nde a ɔa sabɛlɛ kama do 'bu nɛ nalɛ ngɔ nɛ sambo.

²⁹ 'Da fala kɛ Yakɔbɔ ĩ na ɛ kɔlɔ do fio ni, nɛ a sa mɔ hã be 'da a Yozɛfu, nɛ a tɔ̃ hã a na: “Fala kɛ mɔ kɔ̃ gɛnɛ mi kɔ̃a ngboo, nɛ mɔ bé dia zã do gbisa zu 'da mɔ hã mi dati kɛ na mi fe ni. Mɔ yulu kɔ̃ mɔ ti ku mi, nɛ mɔ zonggo tɛ mɔ hã mi na, mɔ mí sɛ wɔlɔ mi ngɔ nù Ezipeto gɛ gɔ.

³⁰ Nɛ nde fala kɛ mi fe, nɛ mɔ gese sɛ wɔlɔ mi dɛ ngɔ nù Kanana i, takɔ wa mi mi ngɔ mabi'donggo 'da oyaa mi ni.” Nɛ Yozɛfu gese hã a na: “Mi dɛ sɛ nɛ́ kɛ mɔ tɔ̃a ni.”

³¹ Nɛ Yakɔbɔ tɔ̃ 'bɔ mbé nɛ na: “Mɔ zónggó tɛ mɔ hã mi.” Nɛ Yozɛfu zungga tɛ̃ ɛ hã a. Nɛ Yakɔbɔ hã iɔ̃nae hã a, nɛ a gu li a nù si ti zu mɔ ɔi 'da a ni.