Ndo Nyanga Dɛ Mɔ 46 - WE NU GALE 1995

Yakɔbɔ kulu dɛ ngɔ nù Ezipeto

¹ Yakɔbɔ kulu ngɔ, nɛ a kala tolenɔ 'da a vɛ̃, nɛ a ma ngɔ la nɛ. A hɔa kɔ le Bɛrseba, nɛ a gbɛ sa'de, nɛ a hã ma do dɔnggamɔ hã Gale 'da baa a Izaka.

² Nɛ do tũi ni, nɛ Gale bia tɛ̃ ɛ hã a, nɛ a sa mɔ hã a na: “Yakɔbɔ, Yakɔbɔ.” Nɛ Yakɔbɔ gese na: “Mi kɛ!”

³ Nɛ Gale tɔ̃ na: “Mi a Gale, mi a Gale 'da baa mɔ. Mɔ tɛ dɛ̀ kili nɛ Ezipeto i gɔ, we kɛ mi dɛ sɛ na, obe zã mɔ wa hɔ i mɔ, nɛ nu kɔnggɔ wa dɛlɛ.

⁴ Nɛ mi ngboo, mi nɛ sɛ fala nɛ kpo do mɔ, nɛ mi gese sɛ 'bɔ obe zã mɔ dɛ i nga. Nɛ fala kɛ mɔ fe, nɛ wi 'dafa sɛ fala wɔlɔ mɔ, wi a Yozɛfu.”

⁵ Nɛ obenɔ 'da Yakɔbɔ wa kala ongilingilinɔ, kɛ nwa ngɔ nù Ezipeto hã zi ma hã wa we gɔnɔ do wala ni, nɛ wa ba do baa wa, do owukonɔ, do obenɔ 'da wa. Nɛ wa kulu ngɔ Bɛrseba,

⁶ do onadalamɛnɔ 'da wa, do okpamɛnɔ 'da wa vɛ̃ kɛ wa kpa zi ma ngɔ nù Kanana ni. Nɛ wa nɛa gbaa, nɛ wa hɔ ngɔ nù Ezipeto.

⁷ Yakɔbɔ hɔa Ezipeto i fala nɛ kpo do nu fɛlɛ kula 'da a vɛ̃, obulu benɔ, do boko benɔ, do obe yaa a wi wili wanɔ do wuko wanɔ.

^8-9 Nɛ zélé li obenɔ 'da Yakɔbɔ do li obe yaa a kɛ wa nɛa do a ngɔ nù Ezipeto i ni. Kuti be 'da a Rubɛnɛ do obenɔ 'da a, li wa a: Hanɔkɛ, Palu, Hɛsroni do Karmi.

¹⁰ Simeoni do obenɔ 'da a, li wa a: Yɛmuɛlɛ, Yaminɛ, Ohadɛ, Yakinɛ, Soharɛ do Saulɛ, kɛ a be 'da boko Kanana ni.

¹¹ Levi do obenɔ 'da a, li wa a: Gɛrsoni, Kehatɛ do Mɛrari.

¹² Yuda do obenɔ 'da a, li wa a: Sela, Perɛsi do Zera. Nɛ ombe gele benɔ 'da a, Ɛrɛ do Onanɛ, wa fia zi dɛ ngɔ nù Kanana i. Nɛ Perɛsi ko zi obulu be bɔa, Hɛsroni do Hamulɛ.

¹³ Isakarɛ do obenɔ 'da a, li wa a: Tola, Puva, Yakubɛ do Simroni.

¹⁴ Zabuloni do obenɔ 'da a, li wa a: Serɛdɛ, Eloni do Yaleɛlɛ.

¹⁵ Obenɔ ni a obulu benɔ 'da Lea kɛ a kua wa do Yakɔbɔ ɛ ngɔ nù Mezopotami i gɛ a ni. Nɛ fala kɛ mɔ mba boko nya wa Dina do wa, mba 'bɔ do obenɔ 'da wa vɛ̃, nɛ nde wa hɔa zi vɛ̃ Owele 'bu wa talɛ ngɔ wa talɛ.

¹⁶ Gadɛ do obenɔ 'da a, li wa a: Sifioni, Hagi, Suni, Ɛsboni, Eri, Arodi, do Areli.

¹⁷ Asɛrɛ do obenɔ 'da a, li wa a: Imna, Isɛva, Isɛvi do Bɛria, nɛ boko nya wa Sera. Bɛria kua zi obulu be bɔa, Hebɛrɛ do Malkiɛlɛ.

¹⁸ Obenɔ 'bu ngɔ wa gazɛlɛ ni wa a obe zã Yakɔbɔ do Zilpa, wuke kɛ Labanɛ hã zi a ɔ nɛ wuko wi dɛa to hã be 'da a Lea ni.

¹⁹ Rasɛlɛ, wuke 'da Yakɔbɔ kua zi obulu be bɔa: Yozɛfu do Bɛnzamɛ.

²⁰ Yozɛfu kua zi obulu be bɔa ngɔ nù Ezipeto i do wuke 'da a Asnatɛ, be 'da Potifera, wi kɔ le Ɔnɛ, kɛ a zi a nganga gale Ezipeto ni. Li benɔ ni a: Manase do Efraimɛ.

²¹ Bɛnzamɛ kua zi obulu be 'bu: Bela, Bekɛrɛ, Asɛbɛlɛ, Gera, Namanɛ, Ehi, Rɔsi, Hupimɛ, Mupimɛ do Arɛdɛ.

²² Obenɔ 'bu ngɔ wa nalɛ ni wa a obe zã Yakɔbɔ do Rasɛlɛ.

²³ Danɛ kua zi bulu be kpo, li a Husimɛ.

²⁴ Nɛ Nɛftali zi do obenɔ 'da a, li wa a: Yasiɛlɛ, Guni, Yɛsɛrɛ do Silɛmɛ.

²⁵ Obenɔ sambo ni, wa a obe zã Yakɔbɔ do Bila, wuke kɛ Labanɛ hã zi a do wi dɛa to hã be 'da a Rasɛlɛ ni.

²⁶ Obe zã Yakɔbɔ, kɛ wa nɛa zi ngɔ nù Ezipeto i ni, wa zi vɛ̃ a Owele 'bu wa gazɛlɛ ngɔ wa gazɛlɛ, nɛ wa tɔ̀lɔ̀ zi okondukanɔ 'da a kɔ obe zã a gɔ.

²⁷ Mba wa do obenɔ 'da Yozɛfu kɛ a kua zi wa ngɔ nù Ezipeto i ni, nɛ nde wa vɛ̃ a Owele 'bu wa sambo.

Yakɔbɔ hɔa ngɔ nù Ezipeto

²⁸ Yakɔbɔ hɔa ngɔ nù Ezipeto, nɛ a tombo Yuda dati we tɔ̃ hã Yozɛfu na, a gɔnɔ dati ɛ dɛ Gosɛnɛ. Yozɛfu zila ní,

²⁹ nɛ a kũ ngilingili 'da a, nɛ a nɛ we kpa ngba a do baa a. A nɛa we zɔ baa a, nɛ a bũlũ, nɛ a te tɛ gɛlɛ a, nɛ a ba a dɛ tɛ̃ a, nɛ a he wena.

³⁰ Nɛ Yakɔbɔ tɔ̃ hã a na: “Di dɔ̃ ni, mi wia we fe ma, we duzu kɛ mɔ 'bana nza, nɛ mi zɔa 'bɔ tɛ mɔ mbé nɛ ia.”

³¹ Nɛ Yozɛfu tɔ̃ hã baa a, do onya a, do obe zã wa na: “Mi nɛ nɛ we tɔ̃ we 'da nɛ hã nwa ngɔ nù Ezipeto na, baa mi, do onya mi do obe zã wa, kɛ wa zi vɛ̃ tɛ Kanana i ni, wa tɛa 'da mi nga.

³² Nɛ mi tɔ̃ sɛ 'bɔ hã a na, onya mi wa a wi dala nadalamɔ, nɛ wa tɛa do obata, odua, ongɔmbɔ, do omɛnɔ vɛ̃ kɛ wa do ma ni.

³³ Kɔ fala kɛ nwa sa mɔ hã nɛ, hã a aka nɛ na toe 'da nɛ a ge nde?

³⁴ Nɛ nɛ gese sɛ hã a na, nɛ a owi dala nadalamɔ zɛ́ belee, yolo ngɔ be tɛ nɛ gbaa tia do sɔɛ gɛ, ɔ nɛ kɛ oyaa nɛ wa dɛ zi ma ni. Kɔ nɛ tɔ̃ na mɛ ni, nɛ a kɔ̃ sɛ na, nɛ ɔ ngɔ nù Gosɛnɛ, dɔ nɛ kɔ́lɔ́ do gã le gɔ. We duzu kɛ Oezipeto wa kɔ̃́ gɛnɛ owi dala onadalamɔ gɔ.”