Ndo Nyanga Dɛ Mɔ 44 - WE NU GALE 1995

Yozɛfu yamba sila onya a

¹ 'Do nɛ, nɛ Yozɛfu ba nu a hã wi dɛa toe 'da a na: “Mɔ á nyɔngɔmɔ dunu saki 'da owinɔ gɛ, ɔ nɛ kɛ wa wia do ba tole nɛ ni. Nɛ mɔ gésé 'bɔ mbili 'da wele do wele dɛ kɔ saki 'da a.

² Nɛ kɔ saki 'da be wele kɛ 'do gɛ, mɔ tɛ fì tati a mbili kɛ a tɛa do ma we oso do nyɔngɔmɛ ni iko gɔ, nɛ nde mɔ fi 'bɔ bila fɛ̃a mɔ bole 'da mi ni kɔ nɛ.” Nɛ wi dɛa toe ni dɛa olo nu Yozɛfu.

³ Fala sa 'do ki ni, nɛ wa hã wala hã benɔ 'da Yakɔbɔ na, wa kala pundanɔ 'da wa, hã wa si.

⁴ Wa kulu ngɔ tɛ la nɛ, nɛ 'do wa tɛ nyɛ̀lɛ̀ wena gɔ, nɛ Yozɛfu tɔ̃ hã wi dɛa toe 'da a ni na: “Mɔ yú 'do wa, kɔ mɔ kpa wa nde, nɛ mɔ aka wa na: ‘Gulu kɛ nɛ gisa 'dã mɔ olo li de mɛ kɛ wa dɛa do nɛ ni we ge nde?

⁵ Nɛ gulu kɛ nɛ zũ bila kɛ nwa 'da mi nɔ do dɔ̃ɛ 'da a, nɛ a zɔ do gulu mɛnɔ ni we ge nde? Mɛ kɛ nɛ dɛa ni, ma dè gɔ.’ ”

⁶ Nɛ wi dɛa toe nɛa, nɛ a kpa wa, nɛ a tɔ̃ wenɔ ni hã wa.

⁷ Nɛ onya Yozɛfu wa gese hã a na: “Dɛ do kɛ mɔ tɔ̃ we dɛ ngɔ lɛ ní we ge nde? Lɛ wè tɛ dɛ mɔ ɔ na mɛ ni fala kpo gɔ.

⁸ Mɔ zɔ kɛ lɛ kpa zi mbili kɔ sakinɔ 'da lɛ tɛ Kanana i, nɛ lɛ tɛa do nɛ we gese ma, nɛ gulu kɛ lɛ wia we zũ 'bɔ mbili, tabi mɔ mbali kɔ tɔa 'da nwa 'da mɔ ni we ge nde?

⁹ Fala kɛ wa kpa bila ni kɔ tole mɔ wele kpo sanga lɛ gɛ nde, nɛ wa gbɛ sɛ wi ni. Nɛ tala lɛ vɛ̃ lɛ hɔ sɛ ngbá 'da nɛ.”

¹⁰ Nɛ wi dɛa toe ni gese hã wa na: “Tati a wele kɛ wa kpa sɛ bila kɔ tole 'da a ni, a hɔ sɛ ngbá. Nɛ tala onya a wa sɛ do we bina.”

¹¹ Nɛ onya Yozɛfu wa kala tolenɔ li 'do opundanɔ 'da wa ni dɔ̃ dɔ̃ dɛ nù, nɛ wele do wele ma ngɔ yala kɛ 'da a.

¹² Nɛ wi ni sala kɔ sakinɔ vɛ̃, a ndua sala nɛ do ngɔ kuti be gbaa we hɔ ngɔ tala be. Nɛ a kpa bila kɔ saki 'da Bɛnzamɛ.

¹³ Nɛ kili ba onya a wena, nɛ wa ɛ̃ tulu tɛ wa do 'bako, nɛ wele do wele ɛnzɛ tole 'dɛ ɛ dɛ li 'do punda 'dɛ ɛ, nɛ wa ma ngɔ kpolo tɛ wa dɛ kɔ gã le i.

Yuda dɛa dia mɔ we Bɛnzamɛ

¹⁴ Yuda do onya a wa hɔa 'da Yozɛfu i, nɛ wa kpa a, nɛ nde a 'bana dɛ olo a ni. Nɛ wa gu nù ti a.

¹⁵ Nɛ Yozɛfu tɔ̃ hã wa na: “Gulu kɛ nɛ dɛa ni we ge nde? Nɛ ĩ̀ kɛ na, wele ɔ nɛ mi gɛ a wia tɛ ĩ fala mɛnɔ vɛ̃ ma la ni gɔ nde?”

¹⁶ Nɛ Yuda gese hã a na: “Nwa, lɛ nɛ tɔ̃ 'bɔ na ge nde? We lɛ nɛ tɔ̃ takɔ ma be na, lɛ tɔ̃ gbãlã we ni a ge nde? Gale bia 'dã mɛ 'da lɛ dɛ nza, nɛ lɛ tia do we ia. Kɔ lɛ sɛ a ngbánɔ 'da nɛ fala nɛ kpo do wele kɛ wa kpa bila kɔ saki 'da a ni.”

¹⁷ Nɛ Yozɛfu gese na: “Ɔ̃ ɔ̃, mi dɛ́ sɛ ni gɔ. Wi mi nɛ ba sɛ a do ngbá wi a wele kɛ wa kpa bila kɔ saki 'da a ni. Nɛ nde we duzu tala nɛ ni, ma wia na nɛ gili tɛ nɛ do dia nɛ dɛ 'da baa nɛ i.”

¹⁸ Nɛ Yuda ngbɔ dɛ kɛ zã Yozɛfu i, nɛ a tɔ̃ hã a na: “Nwa, gã wi 'da mɔ ma wia kɔ̃ do nwa ngɔ nù Ezipeto. Kɔ mɔ kɔ̃́, nɛ mɔ mbɔkɔ mi we tɔ̃ we gɛ hã mɔ, nɛ zã mɔ tɛ nɔ̃́lɔ̃́ gɔ.

¹⁹ Nwa, mɔ aka zi lɛ dati na, baa lɛ boe nde? Nɛ mbe tala bulu nya lɛ 'bana 'bɔ nde?

²⁰ Nɛ lɛ gisa hã mɔ na, gbɛlɛ baa lɛ boe, nɛ mbe tala bulu nya lɛ, wele kɛ baa lɛ kua a do kula gbɛlɛ ni boe. Nɛ baa lɛ kɔ̃ gɛnɛ a wena. We kɛ a a tala be 'da wuke 'da baa lɛ kɛ a kɔ̃a gɛnɛ a nɛ ge nde ni. Nɛ mbe be 'da wuke ni kpo fia zi 'bɔ do'do.

²¹ Nɛ mɔ tɔ̃a zi hã lɛ na, lɛ tɛ do a hã ɛ, we kɛ ɛ kɔ̃a we zɔ a.

²² Nɛ lɛ tɔ̃a zi hã mɔ de wena na, be ni wè tɛ la baa lɛ fala kpo gɔ. Mba gɔ, a la a nde, nɛ a fe sɛ.

²³ Nɛ mɔ tɔ̃ hã lɛ na, fala kɛ lɛ tɛ̃ do tala bulu be nya lɛ ni gɔ, nɛ nde ɛ kɔ̃́ sɛ gɛnɛ lɛ gɔ.

²⁴ “Ma kɛ lɛ si zi nu tɔa 'da baa lɛ, wi dɛa toe 'da mɔ i, nɛ lɛ tɔ̃ wenɔ kɛ mɔ tɔ̃a zi ni vɛ̃ hã a.

²⁵ Nɛ 'da fala kɛ a tɔ̃a zi hã lɛ na, lɛ kpóló tɛ lɛ we oso mbé nyɔngɔmɛ ni,

²⁶ nɛ lɛ tɔ̃ hã a na: ‘Fala kɛ mɔ hã̀ wala hã tala bulu be nya lɛ na, a kpe do lɛ gɔ, nɛ gã wi ngɔ le ni a kɔ̃́ sɛ gɛnɛ lɛ gɔ. Nɛ lɛ kɔ̃́ sɛ tɛ mɛ 'bɔ we nɛ i mɔ gɔ.’

²⁷ Nɛ baa lɛ gese hã lɛ na: ‘Nɛ ĩ de wena na, wuke 'da mi Rasɛlɛ kua bulu be hã mi bɔa iko,

²⁸ nɛ mbe kpo yɔa. Mi lengge na sa'de zamɔ nyɔngɔ a, we kɛ mi zɔ̃ 'bɔ mbé tɛ̃ a gɔ.

²⁹ Nɛ nɛ kɔ̃a 'bɔ we ba tala wele kɛ gɛ nde? Kɔ fala kɛ ngamɔ dɛ a, nɛ kpasa wi nɛ́ mi gɛ fe fio 'bako, nɛ yaka fie 'da a ma a sɛ nɛ.’ ”

³⁰ Nɛ Yuda tɔ̃ 'bɔ na: “Aa nyae, mi nɛ dɛ fala si dɛ 'da baa mi i, nɛ nde tala bulu be nya lɛ bina ni nɛ nde? We kɛ tɛ baa lɛ nganda we duzu be gɛ iko.

³¹ Kɔ fala kɛ a zɔ̃ a tɛ si nɛ gɔ, nɛ a fe sɛ. Nɛ zugolo fio 'da a ma dĩ sɛ lɛ, we kɛ wi a lɛ a lɛ gbɛa a do 'bako kɔ gbɛlɛ 'da a.

³² Nɛ mi tɔ̃a zi hã baa mi na, mi zɔ sɛ mɔ tɛ be. Nɛ mi tɔ̃ 'bɔ hã a na, fala kɛ mi sì do a gɔ, nɛ mɔ aka sɛ mi. Nɛ mi sɛ a wi dɛ 'dã mɔ gbali mɔ fai.

³³ Mɔ kɔ̃, nɛ mɔ e mi hã mi hɔ ngbá olo be gɛ, nɛ mɔ hã wala hã a na, a si do tala onya a.

³⁴ Mi wè tɛ si dɛ 'da baa mi i, nɛ nde be gɛ fala nɛ kpo do mi bina ni gɔ. We kɛ mi wé sɛ we kunu sila mi tɛ gã 'bakoe kɛ ma nɛ hɔ hã baa mi ni gɔ.”