Ndo Nyanga Dɛ Mɔ 42 - WE NU GALE 1995

Yakɔbɔ tumba obenɔ 'da a ngɔ nù Ezipeto

¹ Yakɔbɔ zila na, nyɔngɔmɔ Ezipeto i boe, nɛ a tɔ̃ hã obenɔ 'da a na: “Gulu kɛ nɛ dungu, nɛ nɛ ka mɔ dɛ li ngba nɛ iko ni we ge nde?

² Mi zila na, nyɔngɔmɔ Ezipeto i boe. Kɔ nɛ nɛ́ we oso ma, takɔ lɛ nyɔngɔ, dɔ lɛ fé gɔ.”

³ Nɛ okpasa wi dati Yozɛfu 'bu ni wa kulu ngɔ, nɛ wa la Ezipeto i we oso nyɔngɔmɛ.

⁴ Nɛ nde Yakɔbɔ kɔ̃̀ zi na, be nya Yozɛfu, kɛ li a a Bɛnzamɛ ni nɛ do wa gɔ. A dɛa zi kili na, da dɛ kɔ 'dã mɔ dɛ́ a gɔ.

⁵ Obenɔ 'da Yakɔbɔ wa hɔa Ezipeto i fala nɛ kpo do ombe gele winɔ, kɛ wa yula tɛ mɛ 'bɔ ngɔ nù Kanana ni. Wa nɛa zi we oso nyɔngɔmɔ, we kɛ gba wɛ ma kpa zi do ngɔ nùi 'da wa vɛ̃.

⁶ Yozɛfu zi a gã wi ngɔ tonɔ 'da nwa ngɔ nù Ezipeto vɛ̃. Nɛ a zi a wi be gole nyɔngɔmɛnɔ hã ogɛnɛnɔ kɛ wa tɛ ni. Onya a wa hɔa 'da a, nɛ wa gu nù ti a, nɛ wa bili zu wa nù.

⁷ Yozɛfu nɛa we zɔ wa, nɛ a ĩ ti wa, nɛ nde a kɔ̃̀ we be tɛ̃ a hã wa gɔ. Nɛ a wila we hã wa do dã vɛ̃. Nɛ a aka wa na: “Nɛ yula do nde?” Nɛ wa gese hã a na: “Lɛ yula ngɔ nù Kanana, kɔ lɛ tɛa we oso nyɔngɔmɔ.”

⁸ Ĩ na, Yozɛfu ĩ zi ti wa, nɛ nde wa ĩ̀ ti a gɔ.

⁹ Nɛ ta zu Yozɛfu gba ngɔ yalɛnɔ kɛ a yala zi ma dɛ ngɔ wa ni. Nɛ a tɔ̃ hã wa na: “Nɛ a owi miã. Nɛ tɛa dɛ we zɔ le, takɔ nɛ ĩ ti fala kɛ ma a mbɔkɔ, nɛ wa zĩ̀ ngbo se'de gɔ ni.”

¹⁰ Nɛ wa gese hã a na: “Ɔ̃ ɔ̃ nwa, lɛ tɛa we oso nyɔngɔmɔ iko.

¹¹ Nɛ lɛ vɛ̃ gɛ, baa lɛ kpo. Lɛ a owi miã gɔ, nɛ nde lɛ a owi bɔlɔ zu.”

¹² Nɛ Yozɛfu gese hã wa na: “Nɛ 'bili bɛlɛ iko, nɛ tɛa we zɔ le, takɔ nɛ ĩ ti fala kɛ ma a mbɔkɔ ni.”

¹³ Nɛ wa gese na: “Ma a ni gɔ. Lɛ vɛ̃ gɛ baa lɛ kpo, nɛ lɛ yula ngɔ nù Kanana. Nɛ lɛ zi vɛ̃ a obulu be 'bu ngɔ lɛ bɔa. Nɛ be tala nya lɛ 'do gɛ, a 'bana dɛ kɛ zã baa lɛ i, nɛ mbe nya lɛ kpo a yɔa zi.”

¹⁴ Nɛ Yozɛfu tɔ̃ hã wa na: “Ma ɔ nɛ kɛ mi tɔ̃a sɔ dɛ ni, nɛ a owi miã.

¹⁵ Kɔ mi kɔ̃a we yamba sila nɛ. Mi zonggo tɛ mi do zu li nwa ngɔ nù Ezipeto na, 'da fala kɛ be tala nya nɛ ni hɔ dɛ gɔ, nɛ nde nɛ lá sɛ gɔ.

¹⁶ Nɛ tómbó mbe kɔ nɛ kpo, hã a nɛ we kpa a tɛ do a. Nɛ tala nɛ gɛ vɛ̃, nɛ ɔ sɛ do kɔ tɔa bɔlɔkɔ. Na mɛ ni, nɛ mi zɔ sɛ we nɛ tɔ̃a gɛ, tabi mɛ a gbãlã we nde. Kɔ fala kɛ ma ɔ̃ na mɛ ni gɔ, nɛ mi ĩ sɛ na, nɛ ngboo a owi miã.”

¹⁷ Nɛ Yozɛfu a wa vɛ̃ bɔlɔkɔ 'do tũ talɛ.

¹⁸ Nɛ do talɛ tũi ni, nɛ a tɔ̃ hã wa na: “Nɛ zɔ̃, mɛ mi kɔ̃a na nɛ dɛ ma gɛ ma kɛ. Kɔ nɛ dɛ ma, nɛ nde nɛ fé sɛ gɔ. We kɛ mi dɛ kili Gale dɛa.

¹⁹ Fala kɛ nɛ a owi bɔlɔ zu nde, nɛ nɛ kɔ̃ na mbe nya nɛ kpo 'bana dɛ kɔ bɔlɔkɛ gɛ. Nɛ otala nɛ wa si do nyɔngɔmɛnɔ hã nu fɛlɛ kulanɔ 'da nɛ kɛ wa fe wɛ ni.

²⁰ 'Do nɛ, nɛ nɛ tɛ do be tala nya nɛ, nɛ mi ĩ sɛ na, nɛ tɔ̃a gbãlã we, nɛ nɛ fé sɛ gɔ.” Nɛ onya a wa kɔ̃a gɛnɛ we a tɔ̃a ni.

²¹ Nɛ wa tɔ̃ dɛ sanga wa na: “Aa! Lɛ zɔ ngamɛ gɛ we duzu mɛ lɛ dɛa zi do nya lɛ ni. Lɛ zɔa zi a kɔ 'bako, nɛ a ala nu a hã lɛ na, lɛ ĩ 'bako hã ɛ, nɛ nde lɛ zèlè zi ala nui 'da a gɔ. Kɔ sɔɛ gɛ, lɛ tɛ zɔ kpo kpo 'bakoe ni.”

²² Nɛ Rubɛnɛ tɔ̃ na: “Mi tɔ̃a zi hã nɛ na, nɛ tɛ dɛ̀ 'dã mɔ ɔ na mɛ ni do Yozɛfu gɔ. Nɛ nɛ kɔ̃̀ zi we zele mi gɔ. Di dɔ̃ ni, lɛ tɛ kpa ngamɔ olo fie 'da a.”

²³ Onya Yozɛfu wa ĩ̀ zi na, a zele wila we nu lo ni zila gɔ. Mba gɔ, a ia zi wele we kifi olo nu wa hã a ia.

²⁴ Yozɛfu la dɛ gele fala, nɛ a ma ngɔ he ma. A hia gbaa ma ia, nɛ a hɔ, nɛ a ba Simeoni dɛ sanga onya a ni, nɛ a fi a bɔlɔkɔ.

²⁵ Nɛ Yozɛfu ba nu a na, wa a nyɔngɔmɔ kɔ sakinɔ 'da wa, nɛ ma dunu. Nɛ a gese mbili 'da wele do wele dɛ kɔ saki 'da a. Nɛ a tɔ̃ hã owi dɛa tonɔ 'da a na, wa hã nyɔngɔmɔ hã wa we gala wa li wala. Nɛ wa dɛa na mɛ ni.

²⁶ Nɛ onya a wa 'dafa tole nyɔngɔmɛnɔ 'da wa dɛ li 'do pundanɔ 'da wa vɛ̃, nɛ wa ma ngɔ la nɛ.

²⁷ Wa nɛa ni gbaa, nɛ tũ tũ, nɛ wa yolo nù we ɔ nù, nɛ mbe wele kpo kɔ wa ni, yala nu saki 'da ɛ we hã nyɔngɔmɔ hã punda 'da a, nɛ a kpa mbili 'da a dɛ nu saki ni.

²⁸ Nɛ a he mɔ hã onya a na: “Ee! Wa gisa mbili 'da mi, ma a kɔ saki gɛ.” Nɛ sila wa gɔnɔ, nɛ kili ba wa wena. Nɛ wele do wele tɛ aka ngba ɛ na: “Kɛ Gale dɛa hã lɛ gɛ a mɔ ge nde?”

²⁹ 'Da fala kɛ wa hɔa 'da baa wa Yakɔbɔ tɛ Kanana i, nɛ wa tɔ̃ we mɛnɔ vɛ̃ ma la ni hã a.

³⁰ Wa na: “Gã wi ngɔ owi tonɔ 'da nwa vɛ̃ ni, a ua dã zu lɛ, nɛ a tɔ̃ hã lɛ na, lɛ a owi miã.

³¹ Nɛ lɛ gisa hã a na, lɛ a owi miã gɔ, nɛ nde lɛ a owi bɔlɔ zu.

³² Nɛ lɛ tɔ̃ 'bɔ hã a na, lɛ zi vɛ̃ a obulu be 'bu ngɔ lɛ bɔa, nɛ lɛ vɛ̃ ni baa lɛ kpo. Nɛ mbe nya lɛ kpo yɔa zi, nɛ tala bulu be nya lɛ kpo a 'bana ngɔ nù Kanana i do baa lɛ.

³³ Nɛ gã wi ni gese na, takɔ ɛ ĩ na lɛ tabi a owi bɔlɔ zu kpaa nde, ɛ kɔ̃a na, lɛ la mbe kɔ lɛ kpo dɛ 'dɛ ɛ i. Nɛ tala lɛ ni, lɛ si do nyɔngɔmɛ hã nu fɛlɛ kula 'da lɛ kɛ wa fe wɛ ni.

³⁴ Nɛ 'do nɛ, nɛ lɛ kpóló tɛ lɛ do tala bulu be nya lɛ ni, sɛ nɛ ɛ ĩ sɛ na lɛ a owi miã gɔ, nɛ nde lɛ a owi bɔlɔ zu de. Nɛ ɛ gese sɛ nya lɛ Simeoni hã lɛ, nɛ ɛ e sɛ lɛ na, lɛ yɛnggɛ kɔ le 'dɛ ɛ we dɛ mɛnɔ 'da lɛ.”

³⁵ 'Do nɛ, nɛ wa sukpu mɛnɔ kɔ sakinɔ 'da wa ni, nɛ wele do wele kpa koe mbili 'da ɛ dɛ kɔ saki. Wa zɔa mbili ni, nɛ wa do baa wa Yakɔbɔ wa dɛ kili wena.

³⁶ Nɛ baa wa tɔ̃ hã wa na: “Nɛ 'dɔlɔ obenɔ 'da mi bɔa ia. Yozɛfu fia, nɛ Simeoni la, nɛ nɛ kɔ̃a 'bɔ we ba Bɛnzamɛ kɔ̃ mi nde? Zɛlɛ tɛnɔ ni vɛ̃ ma tɛ dɛ ngɔ mi zu mi kpo.”

³⁷ Nɛ Rubɛnɛ tɔ̃ hã a na: “Fala kɛ mi gèsè Bɛnzamɛ hã mɔ gɔ, nɛ mɔ gbɛ́ sɛ obulu benɔ 'da mi bɔa ni. Kɔ mɔ hã a hã mi, mi gese sɛ a hã mɔ.”

³⁸ Nɛ Yakɔbɔ gese na: “Be 'da mi nɛ́ sɛ do nɛ i mɔ gɔ. Nya a fia, nɛ a 'bana dɛ kɔ̃ mi zu a a kpo gɛ iko. Kɔ fala kɛ ngamɔ dɛ a li wala gɛnɛ, hã kpasa wi nɛ́ mi gɛ fe fio 'bako, nɛ yaka fie 'da a ma a sɛ nɛ.”