Ndo Nyanga Dɛ Mɔ 40 - WE NU GALE 1995

¹ 'Do mɛnɔ ni nyɛla, nɛ mbe Owi dɛa tonɔ 'da nwa ngɔ nù Ezipeto bɔa, wa dɛ 'dã mɔ dɛ 'da nwa 'da wa. Wi dɛa tonɔ ni wi a gã wi ngɔ owi kɛ̃ dɔ̃, do gã wi ngɔ owi dɔ mapanɔ 'da nwa.

² Nwa zɔa ní, nɛ zã a nɔ̃lɔ̃ dɛ tɛ wa,

³ nɛ a fi wa bɔlɔkɔ 'da gã wi zɔ mɔ tɛ ngboe 'da a ni. Nɛ nde mɛ zi a kpo kpo tɔa bɔlɔkɛ wa fi 'bɔ Yozɛfu kɔ nɛ ni.

⁴ Nɛ gã wi zɔ mɔ tɛ ngboe ni e owi dɛa tonɔ ni dɛ kɔ̃ Yozɛfu, nɛ wa ɔa, nɛ 'dɔkɔlɔ wa nyɛlɛ kɔ bɔlɔkɛ ni wena.

Yozɛfu tɔ̃a gulu yalɛnɔ 'da Owi bɔlɔkɔnɔ bɔa ni

⁵ Mbe tũ kpo, nɛ wi kɛ̃ dɔ̃ɛ, do wi dɔ mapa 'da nwa wa yala zu wa kɔ tɔa bɔlɔkɔ i. Nɛ nde gulu yalɛnɔ ni wè kɔ̃ gɔ.

⁶ Fala sa titole, nɛ Yozɛfu nɛ we zɔ wa, nɛ a kpa wa, nɛ nde sanga li wa dè gɔ.

⁷ Nɛ a aka wa na: “Gulu kɛ nɛ dungu do 'bako ní ni we ge nde?”

⁸ Nɛ wa gese hã a na: “Lɛ yala zu lɛ yala. Nɛ fo wele kpo kɔ tɔa gɛ na, a tɔ̃ gulu nɛ hã lɛ ni bina.” Nɛ Yozɛfu tɔ̃ hã wa na: “Gale wia we tɔ̃ gulu nɛ hã nɛ. Hã nɛ tɔ̃́ yalɛ ni hã mi.”

⁹ Nɛ wi kɛ̃ dɔ̃ɛ tɔ̃ yalɛ 'da a, nɛ a na: “Mi zɔa te vinɔ,

¹⁰ nɛ nde gbakɔ̃ nɛ talɛ. Nɛ nwá nɛ 'bɔa, nɛ ma do, nɛ ma wala, nɛ ma fele.

¹¹ Nɛ mi do bila dɔ̃ɛ 'da nwa dɛ kɔ̃ mi, nɛ mi 'bi wala te, nɛ mi kpĩlĩ lì nɛ dɛ kɔ bila, nɛ mi hã ma hã a na a nɔ.”

¹² Wi kɛ̃ dɔ̃ɛ tɔ̃a yalɛ 'da a do'do, nɛ Yozɛfu tɔ̃ hã a na: “Mɔ zɔ́, gulu yalɛ ni ma kɛ: gbakɔ̃ tenɔ talɛ ni, ma be kɔ̃ tũ talɛ.

¹³ 'Do tũ talɛ, nɛ nwa a fo sɛ mɔ kɔ bɔlɔkɛ dɛ nza, nɛ a ba sɛ mɔ dɛ ngɔ. Mɔ kpolo sɛ tɛ mɔ tɛ toe 'da mɔ, nɛ mɔ hã sɛ 'bɔ bila dɔ̃ɛ hã nwa, ɔ nɛ kɛ mɔ dɛ zi ma dati ni.

¹⁴ Kɔ fala kɛ mɛnɔ ma la do mɔ do dia nɛ nde, nɛ ta zu mɔ tɛ èlè ngɔ mi gɔ, nɛ mɔ tɔ̃ we 'da mi hã nwa na, a fo mi kɔ bɔlɔkɛ gɛ dɛ nza.

¹⁵ Wa ba zi mi ngɔ nùi 'da Ohebrenɔ i do nga nɛ, nɛ wa tɛ do mi i nga. Nɛ mi dɛ̀ 'bɔ mɔ kpo kɛ ma wia na, wa fi mi bɔlɔkɔ ni gɔ.”

¹⁶ Wi dɔ mapa ni zɔa na gulu yalɛ kɛ Yozɛfu tɔ̃a ni ma a dia ni, nɛ a tɔ̃ hã Yozɛfu na: “Mi tɛ mɛ 'bɔ ni, mi yala zu mi, nɛ nde mi tula be gɛzɛ dɛ ngɔ ngbɛ ɛ talɛ do mukate kɔ nɛ.

¹⁷ Nɛ be gɛzɛ kɛ ngɔ nɛ ni, ma dunu do dia mukate kɛ nwa kɔ̃a gɛnɛ nɛ ni, nɛ onɔɛ wa tɛa, nɛ wa ma ngɔ gɔmɔ ma dɛ zu mi ni.”

¹⁸ Nɛ Yozɛfu tɔ̃ hã a na: “Mɔ zɔ̃, gulu yalɛ ni ma kɛ: obe gɛzɛnɔ talɛ ni, ma be kɔ̃ tũ talɛ.

¹⁹ 'Do tũ talɛ, nɛ nwa a fo sɛ mɔ kɔ bɔlɔkɛ dɛ nza. Nɛ a ba sɛ mɔ dɛ ngɔ wena do tɛlɛ tɛ kɛ na, mɔ kɔ̃́ sɛ 'bɔ gɔ ni. A gãlã sɛ mɔ nu te, nɛ onɔɛ wa tɛ sɛ we gɔmɔ wɔlɔ mɔ.”

²⁰ Ma la 'do nɛ tũ talɛ, nɛ ma hɔ ngba soe ɛngga kula 'da nwa, nɛ a dɛ mɔ dɔ hã owi olo li a vɛ̃. Nɛ do ngba soe ni, nɛ a fo wi kɛ̃ dɔ̃ɛ do wi dɔ mapa kɔ bɔlɔkɛ dɛ nza.

²¹ Nɛ a gese wele kɛ dati ni dɛ tɛ tonɔ 'da a, takɔ a a dɔ̃ɛ hã a.

²² Nɛ a ba bɔa wele kɛ, nɛ a gãlã a nu te. Nɛ gulu yalɛ dɛ tɛ̃ ɛ nɛ́ kɛ Yozɛfu tɔ̃a ni.

²³ Gɛnɛ kɔ ní, nɛ nde ta zu wi kɛ̃ dɔ̃ɛ ila zi ngɔ Yozɛfu do'do.