Ndo Nyanga Dɛ Mɔ 4 - WE NU GALE 1995

Kaina do Abɛlɛ

¹ Adamu mba ngɔ te do wuke 'da a Eva, nɛ a ba zã. Nɛ a ko bulu be, nɛ a e li a na Kaina, nɛ a na: “NWA gala mi, nɛ mi kua bulu be.”

² 'Do nɛ, nɛ Eva ko 'bɔ bulu be nya Kaina, nɛ a e li a na Abɛlɛ. Obenɔ ni wa gã, nɛ Abɛlɛ hɔ wi dala bata, nɛ Kaina a wi wa fɔ.

³ Mbe ngba soe kpo, nɛ Kaina kala okpalɛ li fɔɛ 'da a, nɛ a hã ma do dɔnggamɔ hã NWA.

⁴ Nɛ Abɛlɛ kala tɛ mɛ 'bɔ Okuti be batanɔ kɔ ba'de 'da a, nɛ a gbɛ wa, nɛ a saka dia mulu nɛ, nɛ a dɔ ma do dɔnggamɔ hã NWA. Nɛ NWA kɔ̃a gɛnɛ Abɛlɛ, nɛ dɔnggamɛ 'da a dia tɛ a wena.

⁵ Nɛ a bɛ̃ gɛnɛ Kaina, nɛ a da li a ngɔ dɔnggamɛ 'da a do'do. Kaina zɔa ní, nɛ dã ba a wena, nɛ sanga li a 'danga.

⁶ Nɛ NWA tɔ̃ hã a na: “Gulu kɛ mɔ dɛ nɔ̃lɔ̃ zã, nɛ mɔ 'danga sanga li mɔ we ge nde?

⁷ Mɔ dɛ sɔ ɔ dia, nɛ bula li mɔ sɔ tɛ mɛ 'bɔ do yangga. Nɛ nde mɔ dɛa 'dã mɔ, nɛ 'dã mɛ ni, ma ɔ nɛ gba sɔ̃ sa'de kɛ a ɔa nù dɛ 'do nu tɔa 'da mɔ, nɛ a fa we ba mɔ do ngbá ni. Kɔ ma wia na, mɔ dɛ a nga, hã mɔ nɛ ngɔ a.”

⁸ 'Do nɛ, nɛ Kaina tɔ̃ hã nya a Abɛlɛ na: “Lɛ yɛnggɛ mbe sɛ.” Nɛ wa yɛngga, nɛ wa hɔ zamɔ i, nɛ Kaina te tɛ nya ɛ Abɛlɛ, nɛ a gbɛ a.

⁹ Nɛ NWA aka Kaina na: “Nya mɔ Abɛlɛ a do nde?” Nɛ Kaina gese na: “Mi ĩ̀ gɔ. Wa ia wá mi do wi zɔ mɔ tɛ a nde?”

¹⁰ Nɛ NWA gese hã a na: “Gulu kɛ mɔ dɛa 'danga ni we ge nde? Mi zila giti tɔkɔ tɛ nya mɔ tɛ he mɔ zã nùi dɛ 'da mi nga na, mi bili nu gbã mɛ mɔ dɛa gɛ hã mɔ.

¹¹ Kɔ yolo do sɔɛ gɛ, nùi ma nɔmɔ tɔkɔ tɛ nya mɔ kɛ mɔ gbɛa a ni, ma kana nu ɛ tɛ mɔ.

¹² We duzu ki ni, mɔ wa sɛ fɔ gbaa, nɛ nde mɔ kpá sɛ mɔ li nɛ gɔ. Mɔ yɛnggɛ sɛ do zu nzanɔ iko, nɛ nde mɔ sɛ do nu di mɔ mɔ ngboo bina.”

¹³ Nɛ Kaina tɔ̃ hã NWA na: “Ngamɛ kɛ mɔ hã hã mi gɛ, ma nɛa ngɔ mi do'do.

¹⁴ Mɔ ndaka mi ngɔ nùi kɛ ma hã nyɔngɔmɔ hã mi ni, nɛ mi wè 'bɔ tɛ hɔ dati mɔ gɔ. Mi sɛ 'bɔ do nu di mɔ mi ngɔ nù gɛ bina, nɛ mi yɛnggɛ sɛ do zu nza iko. Kɔ wele kpa mi, nɛ a gbɛ sɛ mi.”

¹⁵ Nɛ NWA tɔ̃ hã a na: “Ɔ̃ ɔ̃, wele gbɛ sɛ mɔ gɔ. Fala kɛ wele gbɛ mɔ, nɛ wa gbɛ sɛ Owele sambo we bili nu gbã fio mɔ.” Nɛ NWA gɔnɔ dã tɛ Kaina na, da dɛ kɔ wele kpa a, kɔ a gbɛ a gɔ.

¹⁶ Nɛ Kaina la, nɛ a nyɛlɛ do NWA, nɛ a nɛ we ɔ ngɔ nù Nɔdɛ, kɛ mɔ yolo Edɛnɛ, nɛ nde ma si 'biti gba wese ni.

Obe zã Kaina

¹⁷ Kaina mba ngɔ te do wuke 'da a, nɛ a ba zã, nɛ a ko bulu be, nɛ wa e li a na Henɔkɛ. Kaina dɛa le, nɛ a e li bulu be 'da a Henɔkɛ dɛ zu le ni.

¹⁸ Henɔkɛ kua Iradɛ, nɛ Iradɛ ko Mɛhuyaɛlɛ, nɛ Mɛhuyaɛlɛ ko Mɛtusaɛlɛ, nɛ Mɛtusaɛlɛ ko Lemɛkɛ.

¹⁹ Nɛ Lemɛkɛ kala owuko bɔa, li ko nu tɔa 'da a zi a Ada, nɛ li wuko 'doe a Sila.

²⁰ Ada kua Yabalɛ, kɛ a a yaa owanɔ vɛ kɛ wa ɔ ti tɔa tande, nɛ wa dala onadalamɛnɔ ni.

²¹ 'Do Yabalɛ ni, nɛ naa a ko 'bɔ nya a wi wili nɛ, nɛ wa e li a na Yubalɛ. Wele ki ni a yaa owanɔ vɛ kɛ wa zɛ kundu, nɛ wa dama gaga ni.

²² Nɛ wuko 'doe li a Sila ni, a ko tɛ mɛ 'bɔ bulu be, nɛ a e li a na Tubalɛ-Kaina. Tubalɛ-Kaina zi a wi dɛ dula, nɛ a dolo zi otɔa nu mɔ kpi do kpi do tũ mɔ bolo tabi fɛ̃a mɔ bolo. Li nya a wuko nɛ zi a Nama.

²³ Lemɛkɛ tɔa hã owukonɔ 'da a Ada do Sila na: “Aa nɛ, owukonɔ 'da mi, nɛ gɛ zala nɛ, nɛ zélé we mi nɛ tɔ̃ hã nɛ gɛ. Wele e dani tɛ mi, nɛ mi gbɛ sɛ wi wili, wele zɛ mi, nɛ mi gbɛ sɛ be zagbãlã.

²⁴ We bili nu gbã fio Kaina, ma wia na, wa gbɛ Owele sambo. We bili nu gbã fio mi Lemɛkɛ, nɛ wa gbɛ sɛ Owele 'bu wa sambo ngɔ wa sambo.”

²⁵ Adamu do wuke 'da a wa kua zi 'bɔ mbé bulu be. Nɛ Eva e li a na Sɛtɛ, nɛ a tɔ̃ na: “Gale hã 'bɔ mbé bulu be hã mi olo li Abɛlɛ kɛ Kaina gbɛa a ni.”

²⁶ Sɛtɛ kua bulu be, nɛ a e li a na Enosi. Nɛ yolo do di ni, winɔ wa ma zi ngɔ dɔnggɔ Gale, nɛ wa sa li a na NWA.