Ndo Nyanga Dɛ Mɔ 39 - WE NU GALE 1995

Yozɛfu dɛa to kɔ tɔa 'da Potifarɛ wi Ezipeto

¹ Oismaɛlɛ wa la zi do Yozɛfu dɛ Ezipeto i, nɛ wa be 'bɔ gole a hã mbe wi Ezipeto kpo, li a a Potifarɛ. Potifarɛ ni zi a wi kɛ a ngɔ sila NWA, nɛ a a gã wi ngɔ osodanɔ wa zɔ zi mɔ tɛ NWA ni.

² Nɛ nde NWA Gale zi fala nɛ kpo do Yozɛfu boe, nɛ mɛnɔ vɛ̃ kɛ a dɛ ni, ma Sɔkpɔ zi do dia nɛ. Nɛ a ɔ zi kɔ tɔa 'da NWA 'da a Potifarɛ, wi Ezipetoe ni.

³ Nɛ Potifarɛ zɔa na, mɛnɔ kɛ Yozɛfu dɛ ni, ma nɛ vɛ̃ do dia nɛ, we kɛ NWA Gale fala nɛ kpo do a.

⁴ Nɛ Potifarɛ kɔ̃ gɛnɛ a wena, nɛ a ba a do wi toe 'da a ngboo. Nɛ a la tonɔ kɔ tɔa 'da a do mɛnɔ 'da a vɛ̃ dɛ kɔ̃ Yozɛfu na, a 'dafa ma.

⁵ Nɛ yolo do ngba soe ni, nɛ NWA Gale wila nu ɛ tɛ mɛnɔ 'da Potifarɛ vɛ̃. A wila nu a tɛ mɛnɔ kɔ tɔa i, mba do kɛnɔ li fɔ i ni.

⁶ Ma kɛ Potifarɛ la mɛnɔ 'da ɛ vɛ̃ dɛ kɔ̃ Yozɛfu, nɛ a lénggé zi 'bɔ do mɔ kpo gɔ. Mɔ kpo kɛ na, a là dɛ kɔ a gɔ ni, mɛ a nyɔngɔmɛ 'da a iko. Yozɛfu de zi zagbãlã wena.

Yozɛfu do wuko 'da Potifarɛ

⁷ Ma hã 'da nɛ kala gɔ, nɛ wuke 'da NWA 'da Yozɛfu ma ngɔ dɛ wɔ tɛ̃ a, nɛ a tɔ̃ hã a na: “Mɔ tɛ́, hã mɔ ɔ do mi.”

⁸ Nɛ. Yozɛfu bɛ̃, nɛ a gese hã a na: “Ma wé sɛ fala kpo gɔ. Ɔ nɛ kɛ mi kɔ tɔa gɛ, NWA 'da mi a la tonɔ 'da a, do mɛnɔ kɔ tɔa 'da a vɛ̃ dɛ kɔ̃ mi na, mi 'dafa ma. A gbini zã a do mi, nɛ a lénggé 'bɔ do mɔ kpo kɔ tɔa gɛ gɔ.

⁹ Nɛ a ia mi do NWA ngɔ mɛnɔ kɔ tɔa gɛ vɛ̃. Nɛ a bɛ̃̀ zu mɔ kpo hã mi gɔ, fo tati a mɔ, we kɛ mɔ a kɛnɛ a. Kɔ mi nɛ dɛ fala dɛ 'dã mɔ ní ni nɛ nde? Mi dɛ ma, nɛ nde mi dɛa 'dã mɔ dɛ 'da Gale ngboo.”

¹⁰ Gɛnɛ kɔ ní, nɛ nde wuke tɛ tɔ̃ we nɛ tɛ mɛ tɔ̃a tũ kpo kpo iko na, a ɔ do ɛ, nɛ Yozɛfu kɔ̃̀ we ɔ do a gɔ.

¹¹ Nɛ ngba soe kpo, nɛ Yozɛfu le kɔ tɔa i we dɛ toe 'da a, nɛ nde tala ogele wi dɛa tonɔ di ni ni, wa zi bina.

¹² Nɛ wuke 'da Potifarɛ te tɛ Yozɛfu, nɛ a so gã tuli 'da a nɔ vĩi, nɛ a tɔ̃ hã a na: “Mɔ tɛ́, hã mɔ ɔ do mi!” Nɛ Yozɛfu hɔ kɔ gã tuli 'da ɛ ni, nɛ a la ma dɛ kɔ̃ a ni, nɛ a yu dɛ nza i.

¹³ Kɔ wuke nɛa we zɔ na Yozɛfu hɔa kɔ gã tuli 'da ɛ, hã a la ma dɛ kɔ̃ ɛ nga ni,

¹⁴ nɛ a zɛ nu a, tɛ sa mɔ hã owi dɛa tonɔ na: “Nɛ tɛ́, kɔ nɛ zɔ́ mɔ kɛ! Be hebre kɛ wili mi tɛa do a dɛ kɔ tɔa gɛ, a kɔ̃a we yɔndɔ lɛ. A tɛa, nɛ a ma ngɔ wɛlɛ mi we ɔ do mi. Nɛ mi zɛa nu mi nganda wena.

¹⁵ Kɔ mɛ a nɛa we zele gɛlɛ mi tɛ zɛ nu mi ni, nɛ a yu dɛ nza i, nɛ a la gã tuli 'da a dɛ kɛ zã mi gɛ.”

¹⁶ Nɛ a fɔmɔ fala tuli 'da Yozɛfu dɛ kɛ zã a ni gbaa we 'bɔ do 'da wili a.

¹⁷ Wili a nɛa we hɔ nɛ, nɛ a tɔ̃ gulu we ni hã a na: “Ngbá 'da mɔ be hebre kɛ mɔ si do a hã lɛ gɛ, a tɛa sɔ, nɛ a fa we ɔ do mi we 'danga dɔ̃lɔ̃ li 'da mi.

¹⁸ Kɔ mi zɛa nu mi, hã mi nɛa we sa mɔ, nɛ a yu, nɛ a la tuli 'da a dɛ kɛ zã mi gɛ.”

¹⁹ Nwa 'da Yozɛfu nɛa we zele we mɛ kɛ Yozɛfu dɛa do wuke 'da a ni, nɛ zã a nɔ̃lɔ̃ wena.

²⁰ Nɛ a ba nu a na, wa ba Yozɛfu, hã wa fi a kɔ tɔa kɛ wa a do owi bɔlɔkɔnɔ 'da NWA ni, nɛ a ɔa dɛ di ni.

²¹ Nɛ nde kɔ bɔlɔkɔ mɔ ni, NWA zi 'bɔ fala nɛ kpo do a, nɛ a bia dia zã 'da a hã a. Ma kɛ gã wi ngɔ wi zɔ mɔ tɛ tɔa bɔlɔkɛ ni kɔ̃a gɛnɛ Yozɛfu wena.

²² Nɛ a e a ngɔ otala owi bɔlɔkɔnɔ vɛ̃, nɛ a ba to zɔ mɔ tɛ tonɔ vɛ̃ wa dɛ ma kɔ tɔa bɔlɔkɛ ni hã a.

²³ Nɛ gã wi ngɔ tɔa bɔlɔkɛ ni la tonɔ 'da a vɛ̃ dɛ kɔ̃ Yozɛfu, nɛ a lénggé 'bɔ do mɔ gɔ, we duzu kɛ NWA Gale zi fala nɛ kpo do a, nɛ a dɛ zi na, mɛnɔ vɛ̃ kɛ Yozɛfu dɛ ni, ma Sɔkpɔ do dia nɛ.