Ndo Nyanga Dɛ Mɔ 38 - WE NU GALE 1995

Lɛnggɛ ngɔ Yuda do Tamarɛ

¹ 'Da fala ni, nɛ Yuda kulu ngɔ, nɛ a e onya a dɛ di ni, nɛ a la si kɔ le kpo li nɛ a Adulamɛ. Nɛ a ɔ 'da mbe wi wili kpo li a a Hira.

² A hɔa i mɔ, nɛ a zɔ be zɔnga be 'da mbe wi Kanana kpo, li a a Sua, nɛ a fa a, nɛ a ba a do wuko. Wa mba ngɔ te do a,

³ nɛ a ba zã, nɛ a ko bulu be, nɛ Yuda e li a na Ɛrɛ.

⁴ Nɛ wuke ni ko mbé bulu be, nɛ a e li a nɛ Onanɛ.

⁵ Nɛ 'do ki ni, nɛ a ko 'bɔ mbé be, nɛ a e li a na Sela. Do ngba soe ko Sela, nɛ nde Yuda zi a tɛ le li nɛ a Kɛzibɛ ni.

⁶ Yuda ba wuko hã kuti be 'da a Ɛrɛ. Li wuke ni a Tamarɛ.

⁷ Nɛ nde Ɛrɛ dɛa zi mɔ kɛ ma dè tɛ NWA gɔ ni, nɛ NWA gbɛa a.

⁸ 'Da fala kɛ a fia, nɛ Yuda tɔ̃ hã Onanɛ na: “Mɔ ĩ ti mɛ kɛ nya fio wia tɛ dɛ ma ni. Mɔ mbá ngɔ te do wuke olo nya mɔ gɛ, hã mɔ ko be do a, takɔ mɔ anga li nya mɔ dɛ nza.”

⁹ Nɛ nde Onanɛ ĩ zi na, obe zã a kɛ a nɛ ko do wuke ni sɛ a obenɔ 'da a ngboo gɔ. Ma hã 'da fala kɛ wa mba ngɔ te do wuko olo nya a ni, nɛ a a lì tɛ̃ a dɛ nù iko na, da dɛ kɔ a kó be do wuke ni hã nya a gɔ.

¹⁰ Nɛ mɛ a dɛa ni dè zi tɛ NWA gɔ, nɛ a gbɛa 'bɔ a.

¹¹ Nɛ Yuda tɔ̃ hã konduka 'da a Tamarɛ na: “Mɔ sí dɛ nu tɔa 'da baa mɔ i, hã mɔ ɔ i mɔ we 'bɔ do 'da kɛ na be 'da mi Sela gã, hã a hɔ wi wili, sɛ nɛ a ba mɔ do wuko de.” Yuda tɔ́a ni we kɛ a dɛa kili na, Sela a fe sɛ ɔ nɛ kɛ onya a wa fia ni. Nɛ Tamarɛ kulu ngɔ, nɛ a si dɛ nu tɔa 'da baa a i.

¹² Ma là 'do ki ni nyɛlɛ gɔ, nɛ wuke 'da Yuda fe. Nɛ Yuda dɛa gɛla wuke 'da a. Kɔ a dɛa ma vɛ̃ ia do'do, nɛ wa kulu ngɔ fala nɛ kpo do yali ngba a Hira, nɛ wa nɛ tɛ fala kɛ owinɔ wa kɛlɛ do sala obatanɔ 'da a ni.

¹³ Nɛ mbe wele kpo tɔ̃ hã Tamarɛ na, kɛfɛ mɔ la dɛ tɛ Timna i, we kɛlɛ sala obatanɔ 'da a.

¹⁴ Tamarɛ nɛa we zele ni, nɛ a hɔlɔ tulu gɛla tɛ̃ a ni, nɛ a gu tulu zu a, nɛ a nɛ, nɛ a dungu nù dɛ nu ngbo le Enaimɛ, kɛ ma li wala Timna ni. Mba gɔ, a ĩ zi na Sela gã, nɛ a hɔa wi wili ia, nɛ nde wa è zi a ngu'du Sela na a ba a gɔ.

¹⁵ Yuda zɔa zi Tamarɛ nɛ́ ndumba ni, we kɛ a gu zi tuli zu a, nɛ a kele bula li a.

¹⁶ Yuda nɛa we zɔ a, nɛ a ɛlɛ dɛ 'da a kɛ zã wala ni, nɛ a tɔ̃ hã a na: “Mi kɔ̃a we si do mɔ.” Nɛ Tamarɛ aka a na: “Mɛ mɔ nɛ dɛ sɛ hã mi olo nɛ ni a ge nde?”

¹⁷ Nɛ Yuda gese na: “Mi hã sɛ be bata 'da mi kpo hã mɔ.” Nɛ Tamarɛ gese hã a na: “Mi kɔ̃a, nɛ nde mɔ e mɔ hã mi do tikɔɛ nɛ, gbaa hã mɔ tombo be bata ni sɛ nɛ de.”

¹⁸ Nɛ Yuda aka a na: “Mɛ mɔ kɔ̃a na mi e hã mɔ do tikɔɛ ni a ge nde?” Nɛ a gese na: “Mɔ e pɛtɛ 'da mɔ kɛ mɔ to do kasɛ ti mbɛtinɔ, do fɛlɛ nɛ, mba do dɔndɔlɔ 'da mɔ hã mi.” Nɛ Yuda hã mɛnɔ ni hã a, nɛ a mba ngɔ te do a, nɛ zã a yolo.

¹⁹ Tamarɛ si dɛ nu tɔa 'da a i, nɛ a hɔlɔ tuli kɛ a gu ma zu a ni do'do, nɛ a he'de tulu gɛla 'da a dɛ olo nɛ.

²⁰ Yuda tumba yali ngba a Hira do be bata kɛ a tɔ́a zi we nɛ ni na, a hã ma hã wuke ni, nɛ a kala sɛ mɛnɔ kɛ ɛ ia zi ma do tikɔɛ hã a ni si do ma. Yali ngba a ni nɛa, nɛ a kpà wuke gɔ.

²¹ Nɛ a aka mbe owinɔ tɛ Enaimɛ ni na: “Wuko ndumba kɛ a dungu zi kɛ zã wala gɛ ni a do nde?” Nɛ owinɔ ni wa gese hã a na: “Wuko ndumba fala gɛ bina.”

²² Yali ngba Yuda zila ni, nɛ a si, nɛ a tɔ̃ we nɛ hã a na: “Mi kpà a gɔ, nɛ owinɔ fala ni wa tɔ̃a hã mi na, wa zɔ̀ mbe wuko ndumba di ni fala kpo gɔ.”

²³ Nɛ Yuda gese hã a na: “E hã a dungu do omɛnɔ ni! Lɛ tɛ fà a, hã Owele wa mɔmɔ lɛ gɔ. Mi tumba mɔ do be bata hã a tumba, nɛ nde mɔ kpà a gɔ.”

²⁴ Ma la 'do nɛ zɛkɛ talɛ, nɛ mbe wele kpo hɔ, nɛ a tɔ̃ hã Yuda na: “Mɔ zɔ́ konduka 'da mɔ Tamarɛ yɛnggɛ ndumba, hã a ba zã.” Yuda zila ni, nɛ a ba nu a na: “Wa ba a hã wa dɔ a do tunu li a.”

²⁵ Kɔ wa nɛa we la do a we gbɛ a ni, nɛ a tombo to hã kɛfɛ a wi wili nɛ na: “Wi ia zã tɛ mi gɛ wi a wele mɛnɔ mi tombo hã mɔ gɛ: pɛtɛ kɛ wa to do kasɛ ti mbɛtinɔ, do fɛlɛ nɛ, do dɔndɔlɛ. Hã mɔ zɔ ma, wele nɛ tabi a wio nde?”

²⁶ Yuda zɔa mɛnɔ ni, nɛ a ĩ ti nɛ, nɛ a tɔ̃ na: “Wuke gɛ, zu a bɔlɔ nɛa ngɔ mi. Ma wia sɔ na, mi hã a hã be 'da mi Sela na, a ba a do wuke 'da a, nɛ nde mi dɛ̀ na mɛ ni gɔ.” Nɛ 'do ki ni, nɛ Yuda mbà ngɔ te 'bɔ mbé nɛ do a gɔ.

²⁷ Ma hɔa ngba soe kula, nɛ Tamarɛ gbala obulu be dã.

²⁸ Mbe kpo be dã ni ɛfɛ kɔ ɛ kɔ zã naa a i dɛ nza. Nɛ wuko wi ba ngbɛ te tɛ kɔ̃ a, nɛ a kpo fila fɛlɛ nu gɛlɛ kɔ̃ a. Nɛ a tɔ̃ na: “Wele kɛ gɛ a kuti be.”

²⁹ Nɛ be gbɔtɔ kɔ ɛ dɛ kɔ zã naa ɛ i, nɛ nya a hɔ nza dati. Nɛ wuko wi ba ngbɛ ni nɛ zɔ ní, nɛ a zɛ nu a na: “Mɔ kpa wala kɛ mɔ hɔa nɛ gɛ i do nde!” Nɛ Yuda e li a na Perɛsi, gulu nɛ na: “Wala.”

³⁰ Nɛ 'do nɛ, nɛ tala wele ki ni hɔ nza do fila fɛlɛ dɛ nu gɛlɛ kɔ̃ a ni, nɛ Yuda e li a na Zera.