Ndo Nyanga Dɛ Mɔ 37 - WE NU GALE 1995

Yozɛfu yala oyalɛ

¹ Yakɔbɔ 'dafa zi fala ɔi 'da a tɛ ngɔ nù Kanana, dɛ fala kɛ baa a ɔ zi nɛ dati ni.

² Nɛ zélé lɛnggɛ ngɔ obenɔ 'da Yakɔbɔ. Yozɛfu zi a be zagbãlã, do sabɛlɛ 'bu ngɔ nɛ sambo, nɛ a fɔmɔ zi obatanɔ do oduanɔ fala nɛ kpo do onya a, benɔ 'da Bila do Zilpa kɛ wa zi a mbe ogula naa a ni. Fala kɛ Yozɛfu zele zi 'dã we, tabi a zɔ 'dã mɛnɔ kɛ onya a wa dɛ ni nde, nɛ a gba 'da nu nɛ hã baa a.

³ Yakɔbɔ kɔ̃a zi gɛnɛ Yozɛfu nɛa ngɔ tala onya a vɛ̃, we kɛ a zi a be kɛ a kua a do kula gbɛlɛ. Nɛ a hã zi tulu olo gã gole hã a.

⁴ Onya a wa zɔa na, baa lo kɔ̃a gɛnɛ Yozɛfu nɛa ngɔ lo vɛ̃ ni, nɛ wa sɛnɛ zi a wena, nɛ wa wélé zi de we hã a gɔ.

⁵ Mbe tũ kpo, nɛ Yozɛfu yala zu ɛ, nɛ a tɔ̃ nu yalɛ ni hã onya a, kɔ wa nɛa we zele nu yalɛ ni, nɛ ma dãlã sila wa dɛ tɛ̃ a, nɛ wa sɛnɛ 'bɔ a dɛ dati.

⁶ A tɔ́a hã wa na: “Nɛ zélé nu yalɛ mi yala gɛ.

⁷ Mi yala zu mi na, lɛ sɛlɛ ble, nɛ lɛ ɛnzɛ lã nɛ. Nɛ 'da kala sĩ, hã mi nɛ ka mɔ, nɛ nde lã kɛ 'da mi kulu ngɔ, nɛ ma yolo do nyanga ɛ, nɛ kɛnɔ 'da nɛ ma linggi kɛ 'da mi takpa, nɛ ma gu nù ti nɛ.”

⁸ Nɛ onya a wa aka a na: “Mɔ lengge wá na, mɔ hɔ sɛ nwa, nɛ mɔ e mbula ngɔ lɛ nde?” Nɛ wa sɛnɛ 'bɔ a dɛ dati we duzu yalɛnɔ 'da a, do wenɔ kɛ a tɔ̃ hã wa ni.

⁹ Nɛ 'do ki ni, nɛ Yozɛfu yala 'bɔ zu a mbé nɛ, nɛ a tɔ̃ we nɛ hã onya a na: “Mi yala 'bɔ, nɛ nde wese, do zɛkɛ, do sɔla 'bu ngɔ nɛ kpo, ma tɛa, hã ma gu nù ti mi.”

¹⁰ Nɛ a tɔ̃ 'bɔ nu yalɛ ni hã baa a. Nɛ baa a dãlã dɛ tɛ̃ a, nɛ a aka a na: “Kɛ mɔ tɔ̃ nu mɔ gɛ a ngbongbo yalɛ nde? Ma wia na, mi do naa mɔ, do onya mɔ lɛ gu nù ti mɔ nde?”

¹¹ Nɛ onya a wa zi do kɔ sila bɔnɛ we a. Nɛ nde baa a lengge zi we ngɔ yalɛnɔ ni lingga fai.

Onya Yozɛfu wa bia gole a

¹² Mbe ngba soe kpo, nɛ onya Yozɛfu wa la dɛ ngɔ nù Sikɛmɛ we fɔmɔ onadalamɛnɔ 'da baa wa.

¹³ Nɛ Yakɔbɔ sa mɔ hã Yozɛfu, nɛ a tɔ̃ hã a na: “Onya mɔ wa a tɛ li zɔ̃ Sikɛmɛ i tɛ fɔmɔ onadalamɛnɔ. Kɔ mi kɔ̃a na, mɔ nɛ́ 'do wa.” Nɛ Yozɛfu kɔ̃a.

¹⁴ Nɛ Yakɔbɔ tɔ̃ 'bɔ hã a na: “Mɔ nɛ́ hã mɔ zɔ onya mɔ do onadalamɛnɔ tabi wa vɛ̃ do dia nɛ nde, nɛ mɔ si we tɔ̃ we nɛ hã mi.” Nɛ a ba wala hã a na, a la. Nɛ Yozɛfu yolo tɛ kɔ gbangɔlɔ̃ Hebroni, nɛ a nɛ, nɛ a kɔlɔ dɔ̃ɔ do Sikɛmɛ.

¹⁵ Nɛ mbe wi wili kpo kpa a tɛ yɛnggɛ do zamɛnɔ di ni ni, nɛ a aka a na: “Mɔ fá ge nde?” Nɛ Yozɛfu gese hã a na:

¹⁶ “Mi fa onya mi, kɔ mɔ wia we be fala wa la do onadalamɛnɔ 'da wa ni hã mi nde?”

¹⁷ Nɛ wi wili ni gese hã a na: “Wa kulu dɛ do'do. Mi zila zi nu wa na, lo nɛ la si kɔ le Dotanɛ.” Nɛ Yozɛfu la 'dɔkɔlɔ wa, nɛ a kpa wa tɛ Dotanɛ i.

¹⁸ Nɛ onya a wa zɔ a ndũu tɛ tɛ ma. Nɛ dati kɛ na a hɔ dɛ 'da wa i ni, nɛ wa ma ngɔ tɔ̃ 'dã we tɛ̃ a, nɛ wa ba zã zu we gbɛ a.

¹⁹ Nɛ wa tɔ̃ dɛ sanga tɛ ngba wa na: “Ee! Nɛ zɔ́ wi ya yalɛnɔ, a a mɔ ni!

²⁰ Kɔ lɛ gbɛ́ a do ti, nɛ lɛ da wɔlɔ a kɔ kɔ̃. Nɛ lɛ to sɛ na sa'de zamɔ hã a nyɔngɔ a. Lɛ dɛ sɛ na mɛ ni hã lɛ zɔ, fala yalɛnɔ 'da a nɛ dɛ do tɛ̃ ɛ ni.”

²¹ Nɛ kpasa wi ti wa Rubɛnɛ zele we wa tɔ̃ ni, nɛ a fa we kpasa Yozɛfu. Nɛ a tɔ̃ hã wa na: “Nɛ tɛ gbɛ a gɔ.

²² Ma wè na nɛ a tɔkɔ tɛ wele nù gɔ. Nɛ dá a kɔ 'du kɔ̃ɛ li gba zɔ́ gɛ iko. Nɛ nde nɛ tɛ gbɛ a gbɛa gɔ.” A tɔ́a hã wa ni, takɔ a kpasa a, hã a gese a hã baa a.

²³ Yozɛfu nɛa we hɔ dɛ 'da onya a i, nɛ wa ba a, nɛ wa hɔlɔ tulu 'da a kɛ ma dia nɛ ge nde ni tɛ̃ a,

²⁴ nɛ wa da a kɔ kɔ, kɛ lì zi kɔ nɛ bina ni.

²⁵ Wa zumu a dɛ kɔ kɔ i do'do, nɛ wa dungu nù we nyɔngɔ mɔ. 'Da fala wa tɛ nyɔngɔ mɛ ni, nɛ wa ka mɔ, nɛ wa zɔ owi nu kpala Ismaɛlɛ kɛ wa a owi be golenɔ ni, nɛ nde wa yula ngɔ nù Galadɛ, kɔ wa la si Ezipeto. Nɛ osamonɔ 'da wa, wa kala zi otole kpi do kpi ɔ nɛ mɔpaka, do ndibili, do nɔ yɔmbɔ dɛ li 'do wa.

²⁶ Nɛ Yuda tɔ̃ hã onya ɛ na: “Dia mɛ kɛ lɛ kpa sɛ olo gbɛ nya lɛ, nɛ lɛ usu we fio a ni a ge nde?

²⁷ Lɛ bá a, hã lɛ be gole a hã Oismaɛlɛ. Nɛ nde lɛ tɛ gbɛ̀ a gɔ, we kɛ a a nya lɛ, nɛ a a kili tɛ lɛ ngboo.” Nɛ onya a wa kɔ̃a.

²⁸ 'Da fala nɛ ni, nɛ mbe Oismaɛlɛ kɛ wa sa mbe 'bɔ li wa na, Omadianɛ ni, wa la do wala ni. Nɛ onya Yozɛfu wa nɛ, nɛ wa ba a kɔ kɔ̃ɛ i dɛ nza, nɛ wa be gole a hã owinɔ ni. Nɛ wa oso Yozɛfu we mbili 'bu nɛ bɔa. Nɛ owinɔ ni wa la do a dɛ tɛ Ezipeto i.

²⁹ Do 'da fala ni, nɛ nde Rubɛnɛ zi bina. A nɛa we hɔ nɛ, nɛ a nɛ nu kɔ̃ i, kɔ a nɛ ka mɔ, nɛ nde Yozɛfu kɔ kɔ gɛ bina. Nɛ 'bako ba a wena, nɛ a ɛ̃ tulu tɛ̃ a.

³⁰ Nɛ a kpolo tɛ̃ a dɛ 'da onya a i, nɛ a tɔ̃ hã wa na: “Fo Yozɛfu kɔ kɔ̃ i bina, hã mi nɛ dɛ nɛ nɛ nde?”

³¹ Nɛ onya a wa ba wili dua, nɛ wa 'bili gɛlɛ a, nɛ wa ba tulu 'da Yozɛfu, nɛ wa nzakata tɛ nɛ do tɔkɔ dua ni vɛ̃.

³² Nɛ wa tombo do tulu ni hã baa wa, nɛ wa na: “Mɔ zɔ́ tuli kɛ lɛ kpa ma gɛ, tabi mɛ a tulu tɛ be 'da mɔ nde?”

³³ Yakɔbɔ nɛa we zɔ ma, nɛ a ĩ ti nɛ, nɛ a he mɔ na: “Kɛ gɛ a tulu tɛ be 'da mi! 'Dã sa'de ba Yozɛfu, nɛ a ɛ̃a sanga a, nɛ a nyɔngɔ a.”

³⁴ A nɛa we tɔ̃ ni do'do, nɛ a ɛ̃ tulu tɛ̃ a, nɛ a hi'da tulu gɛla, nɛ a hia kɔ̃a be 'da a 'do nɛ nyɛlɛ wena.

³⁵ Nɛ obenɔ 'da a vɛ̃, wa tɛa we kpãlã sila a. Nɛ a bɛ̃ na wa tɛ mbɔ̀kɔ̀ sila ɛ gɔ, nɛ a 'bɔ na: “Mi dungu sɛ gɛla be 'da mi gbaa, ndɔti nɛ a kɛ na mi fe, hã mi kpa tɛ̃ a kɔ le 'da ofionɔ i.” A tɔ́a ni, nɛ a ma ngɔ he ma.

³⁶ Omadianɛ kɛ wa si zi do Yozɛfu dɛ Ezipeto i ni, wa bia gole a hã mbe wele kpo li a a Potifarɛ. Potifarɛ ni a zi a wi kɛ a ngɔ sila nwa. Nɛ a a gã wi ngɔ osodanɔ kɛ wa zɔ zi mɔ tɛ nwa ngɔ nù Ezipeto ni.