Ndo Nyanga Dɛ Mɔ 35 - WE NU GALE 1995

Yakɔbɔ la si Betɛlɛ

¹ Mbe ngba soe kpo, nɛ Gale tɔ̃ hã Yakɔbɔ na: “Mɔ kúlú ngɔ, hã mɔ la si Betɛlɛ, nɛ mɔ ɔ dɛ di ni, nɛ mɔ kala ta, nɛ mɔ dɛ gbagala hã mi. Mɔ dɛ ma tɛ fala kɛ mi bia zi do tɛ mi hã mɔ, do ngba soe kɛ mɔ yu zi nya mɔ Ezau ni.”

² Yakɔbɔ zila ní, nɛ a tɔ̃ hã nu fɛlɛ kula 'da a, mba do owinɔ vɛ̃ kɛ wa ɔ do a ni na: “Nɛ fo ogele galenɔ kɛ nɛ do wa ni do'do. Nɛ nɛ fɔ́lɔ́ tɛ nɛ, nɛ nɛ hɔ osa wi li Gale, nɛ nɛ kpolo tulu tɛ nɛ.

³ Nɛ nɛ 'dafa tɛ nɛ, takɔ lɛ la dɛ Betɛlɛ. Lɛ hɔ i mɔ, nɛ mi dɛ sɛ gbagala do ta hã Gale, we kɛ a gbaka zi mi 'da fala ngamɔ, nɛ a zi do mi tɛ falanɔ vɛ̃ kɛ mi la nɛ ni.”

⁴ Wa zila ni, nɛ wa kala kpikimanɔ kɛ wa zi do ma ni, mba do mɛnɔ kɛ wa a zi ma zala wa ni vɛ̃, nɛ wa hã ma hã Yakɔbɔ. Nɛ Yakɔbɔ mi ma tɛ ti gba gbɛlɛ te kɛ ma dɔ̃ɔ do Sikɛmɛ ni.

⁵ 'Da fala kɛ Yakɔbɔ do obenɔ 'da a wa nɛa we kulu fala kɛ wa ɔ zi nɛ ni, nɛ Gale a kili tɛ winɔ kɔ olenɔ kɛ zã wa ni, nɛ wele kpo wè zi tɛ ndaka 'do wa gɔ.

⁶ Nɛ Yakɔbɔ fala nɛ kpo do owinɔ 'da a ni vɛ̃, wa la dɛ kɔ le Luzɛ, kɛ wa sa mbe 'bɔ li nɛ na Betɛlɛ ni. Le ni a ngɔ nù Kanana.

⁷ Wa hɔa i mɔ, nɛ a kala ta, nɛ a dɛ gbagala dɛ di ni. Nɛ a e li fala ni na: “Gale tɛ Betɛlɛ”, we duzu kɛ Gale bia zi tɛ̃ ɛ hã a di ni 'da fala kɛ a yu zi nya a ni.

⁸ Nɛ Debora, wuke kɛ a dala zi Rebɛka ni fia, nɛ wa mi a dɔ̃ɔ do Betɛlɛ, dɛ ti te sɛnɛ kɛ wa sa zɛ́ li nɛ belee na: “Te sɛnɛ kɛ wa he kɔ̃a dɛ ti nɛ” ni.

⁹ Nɛ 'da fala kɛ Yakɔbɔ yula zi Mezopotami kɔ a si ni, nɛ Gale bia 'bɔ tɛ̃ ɛ mbé nɛ hã a, nɛ a wele nu a tɛ̃ a.

¹⁰ Nɛ a tɔ̃ hã a na: “Li mɔ zi a Yakɔbɔ, nɛ nde yolo do sɔɛ gɛ, wa sá sɛ 'bɔ li mɔ ni gɔ. Li mɔ sɛ a Israɛlɛ.” Na mɛ ni, nɛ Gale sa li a na Israɛlɛ.

¹¹ Nɛ a tɔ̃ 'bɔ hã a na: “Mi a Gale kɛ mi do nganda vɛ̃. Mi hã sɛ gba gili obe hã mɔ. Mɔ ko sɛ odɔa be, nɛ mɔ hɔ yaa nu kɔnggɔ gba gili Owele, nɛ onwa wa yolo sɛ dɛ kɔ obe zã mɔ ni.

¹² Nɛ mi hã sɛ nùi kɛ mi hã zi ma hã Abrahama do Izaka ni hã mɔ. Nɛ 'do nɛ, nɛ mi hã sɛ 'bɔ nùi ni hã obe zã mɔ.”

¹³ A tɔ̃a ni do'do, nɛ a la.

¹⁴ Nɛ Yakɔbɔ ba gã ta kpo, nɛ a zĩ ma ngɔ dɛ di ni, nɛ a tɛnɛ nɔ, mba do dɔ̃ dɛ zu nɛ, nɛ a e ma we dɔnggɔ do Gale.

¹⁵ Nɛ a sa li fala kɛ Gale wila do we do a ni na Betɛlɛ. Gulu nɛ na: “Tɔa 'da Gale.”

Rasɛlɛ fia olo kula Bɛnzamɛ

¹⁶ Nɛ 'do nɛ, nɛ Yakɔbɔ do nu fɛlɛ kula 'da a, wa yula Betɛlɛ, nɛ wa nɛ ni gbaa, nɛ wa kɔlɔ do le wa sa li nɛ na Efrata ni. Nɛ ngba soe kula 'da Rasɛlɛ ma we, nɛ a ko bulu be. Nɛ nde kula ni ba zi tɛ̃ a wena.

¹⁷ 'Da fala kɛ a zi tɛ bi zɛlɛ kula ni, nɛ wi ba ngbɛ ni tɔ̃ hã a na: “Rasɛlɛ, mɔ tɛ dɛ kili gɔ, mɔ kua 'bɔ mbé bulu be.”

¹⁸ 'Da fala be hɔa ni, nɛ nde Rasɛlɛ zi a fio. Nɛ dati fe mɔ́ a, nɛ a e li be na Bɛnɛ-Oni. Gulu nɛ na: “Dungu 'bako.” Nɛ baa a e zi li a na Bɛnzamɛ. Gulu nɛ na: “Dia dungu.”

¹⁹ 'Da fala kɛ Rasɛlɛ fia, nɛ wa mi a dɛ kɛ zã wala Efrata, kɛ wa sa mbe 'bɔ li nɛ na, Bɛtleɛmɛ ni.

²⁰ Nɛ Yakɔbɔ zĩ ta dɛ ngɔ zunu a ni. Nɛ gbaa tia do sɔɛ gɛ, wa sa li ta ni na: “Ta ngɔ zunu Rasɛlɛ.”

²¹ Yakɔbɔ kulu ngɔ di ni, nɛ a la, nɛ a dɛ fala ɔi mɔ́ a do 'do fala wa sa li nɛ na Migdalɛ-Edɛrɛ ni.

²² 'Da fala kɛ Yakɔbɔ ɔ zi ngɔ nùi ni, nɛ zagbãlã be 'da a Rubɛnɛ a ɔ do Bila, makango 'da baa a. Nɛ Yakɔbɔ zila we nɛ, nɛ ma zɛlɛ a wena.

Obulu benɔ 'da Yakɔbɔ

²³ Obulu benɔ 'da Yakɔbɔ zi 'bu ngɔ wa bɔa. Obe zã Lea wa kɛ: Rubɛnɛ kuti be kɛ Yakɔbɔ kua a ni, 'do a ni a Simeoni, Levi, Yuda, Isakarɛ do Zabuloni.

²⁴ Owanɔ 'da Rasɛlɛ wi a Yozɛfu do Bɛnzamɛ.

²⁵ Nɛ obenɔ 'da Bila, wi toe 'da Rasɛlɛ, wi a Danɛ do Nɛftali.

²⁶ Nɛ obenɔ 'da Zilpa, wi toe 'da Lea, wi a Gadɛ do Asɛrɛ. Obenɔ kɛ Yakɔbɔ kua wa ngɔ nù Mezopotami gɛ wa a ni.

Izaka fia

²⁷ Yakɔbɔ kulu ngɔ, nɛ a nɛ 'da baa a Izaka tɛ Mamre, kɛ ma a ngɔ nù Kiriatɛ-Arba, kɛ wa sa mbe 'bɔ li nɛ na, Hebroni ni. Mɛ a le kɛ Abrahama do Izaka wa ɔ zi nɛ ni.

²⁸ Izaka ɔa zi sabɛlɛ kama do 'bu nɛ ngbɛ'dɛ'dɛ.

²⁹ Izaka ɔa gbaa, nɛ tũi 'da a ma wia, nɛ a fe, nɛ obenɔ 'da a Ezau do Yakɔbɔ wa mi a.