Ndo Nyanga Dɛ Mɔ 34 - WE NU GALE 1995

We 'da Dina

¹ Zi mbe ngba soe kpo, nɛ be zɔnga be 'da Yakɔbɔ do Lea kɛ li a a Dina ni, a nɛa we zɔ owukonɔ kɔ le wa nɛ ni.

² Nɛ Sikɛmɛ, zagbãlã be 'da Hamɔrɛ kɛ a zi a nwa 'da Ohivi dɛ di ni ni, a zɔ a, nɛ a ba a, nɛ a wɛlɛ a, nɛ a ɔ do a.

³ Be zagbãlã ni kɔ̃ zi gɛnɛ Dina wena. Nɛ a fa vɛ̃ na, Dina kɔ̃ tɛ mɛ 'bɔ gɛnɛ ɛ.

⁴ Nɛ a tɔ̃ hã baa a Hamɔrɛ na: “Mɔ fá be zɔnga gɛ hã mi. Mi kɔ̃a we ba a do wuke 'da mi.”

⁵ Yakɔbɔ zila na, Sikɛmɛ wɛlɛ be zɔnga be 'da a Dina, hã a ɔa do a ni, nɛ a dɛ mɔ kpo gɔ, we duzu kɛ zagbãlã benɔ 'da a, wa zi a 'do onadalamɛnɔ 'da wa zamɔ i. Nɛ a 'bɔa 'da wa gbaa na, wa si do'do sɛ nɛ de.

⁶ Nɛ Hamɔrɛ, baa Sikɛmɛ nɛa we wele we do Yakɔbɔ.

⁷ Nɛ nde do 'da fala ni, zagbãlã benɔ 'da Yakɔbɔ wa yula zamɔ i hã wa hɔa ia, nɛ wa zele we mɛ kɛ ma la olo wa le nga ni, nɛ ma zɛlɛ sila wa. Nɛ zã wa nɔ̃lɔ̃ wena, we kɛ Sikɛmɛ hã zi sape hã obe Israɛlɛ wena. Mba gɔ, a wɛlɛ be zɔnga be 'da Yakɔbɔ, nɛ a ɔ do a.

⁸ Nɛ Hamɔrɛ tɔ̃ hã wa na: “Be 'da mi Sikɛmɛ kɔ̃a gɛnɛ be zɔnga nya nɛ wena. Kɔ nɛ kɔ̃, nɛ a ba a do wuko 'da a.

⁹ Nɛ dɛ́ na do lɛ, nɛ nɛ hã obe zɔnga benɔ 'da nɛ, hã lɛ kala wa do wukonɔ 'da lɛ, nɛ nɛ kala tɛ mɛ 'bɔ wanɔ 'da lɛ do owukonɔ 'da nɛ.

¹⁰ Nɛ dɛ ní, nɛ nɛ ɔ sɛ fala nɛ kpo do lɛ, nɛ wele nùi gɛ sɛ a mɔ́ nɛ. Nɛ nɛ ɔ sɛ dɛ dɛ, nɛ nɛ dɛ mɛnɔ 'da nɛ vɛ̃ nɛ kɛ zã nɛ kɔ̃a ni, nɛ wele mɛnɔ sɛ a mɔ́ nɛ.”

¹¹ Nɛ Sikɛmɛ nɛa, nɛ a tɔ̃ hã baa Dina do ozagbãlã nya a na: “Nɛ bé dia zã hã mi. Mi hã sɛ mɛnɔ vɛ̃ kɛ nɛ kɔ̃a gɛnɛ nɛ ni hã nɛ.

¹² Nɛ we mɔ 'dɔkɔlɔ wuke a gã, do mbili olo kili tɛ̃ a, nɛ mi hã sɛ ma vɛ̃ hã nɛ, takɔ nɛ hã be zɔnga be 'da nɛ kɔ mi ba a do kɛnɛ mi.”

¹³ Nɛ nde zã ozagbãlã benɔ 'da Yakɔbɔ nɔ̃lɔ̃ we duzu kɛ Sikɛmɛ wɛlɛ zi Dina, nɛ a ɔa do a ni, nɛ wa dɛa 'dã hã.

¹⁴ Nɛ wa gese we hã Sikɛmɛ do baa a na: “Lɛ hã́ sɛ boko nya lɛ hã wi wili kɛ a nɛ̀ gaza gɔ ni gɔ. Lɛ dɛ mɔ na mɛ ni, nɛ mɛ sɛ a sape we duzu lɛ.

¹⁵ Fala kɛ wi wilinɔ 'da nɛ gɛ vɛ̃, wa nɛ gaza ɔ nɛ kɛ 'da lɛ gɛ, nɛ lɛ kɔ̃ sɛ na lɛ hã wuke hã nɛ.

¹⁶ Nɛ lɛ hã sɛ obe zɔnga benɔ 'da lɛ hã nɛ na, nɛ kala wa do kɛnɛ nɛ. Nɛ lɛ tɛ mɛ 'bɔ, lɛ kala sɛ wanɔ 'da nɛ do kɛnɛ lɛ. Nɛ lɛ ɔ sɛ fala nɛ kpo do nɛ, nɛ lɛ hɔ sɛ nu fɛlɛ kula kpo.

¹⁷ Nɛ nde fala kɛ nɛ kɔ̃̀ we nɛ gaza gɔ, nɛ lɛ ba sɛ boko nya lɛ kɔ̃ nɛ, nɛ lɛ kulu sɛ dɛ do'do.”

¹⁸ Nɛ Hamɔrɛ do be 'da a, wa kɔ̃a gɛnɛ we ni.

¹⁹ Nɛ zagbãlã be 'da Hamɔrɛ ni a dà'bà tɛ̃ a we fa wala dɛ mɛ kɛ wa tɔ̃a we nɛ ni gɔ, we kɛ a kɔ̃a zi gɛnɛ be zɔnga be 'da Yakɔbɔ ni wena. Ĩ na wa zele zi we nu be 'da Hamɔrɛ kɔ nu fɛlɛ kula 'da wa wena.

²⁰ Hamɔrɛ do Sikɛmɛ wa nɛa tɛ fala kɛ owinɔ wa mba do li ngba wa we yɔlɔ gulu wenɔ tɛ nu le i ni, nɛ wa tɔ̃ hã onya wa na:

²¹ “Owinɔ gɛ wa do dia linggamɔ dɛ 'da lɛ boe. Lɛ hã wala hã wa kɔ wa dɛ le do lɛ, nɛ wa ɔ nɛ Owele le ni, nɛ wa dɛ mɛnɔ 'da wa dɛ le gɛ, takɔ le 'da lɛ ma gã dɛ 'do. Lɛ wia sɛ we ba wuko ti wa, nɛ lɛ hã tɛ mɛ 'bɔ wanɔ 'da lɛ hã wa.

²² Nɛ nde takɔ wa ɔ fala nɛ kpo do lɛ, nɛ lɛ hɔ nu fɛlɛ kula kpo ni, wa kɔ̃a na lɛ dɛ mbula gaza 'da wa. Wa kɔ̃a na, wi wilinɔ 'da lɛ vɛ̃ wa nɛ gaza ɔ nɛ kɛ 'da wa ni.

²³ Kɔ fala kɛ lɛ dɛ ni, nɛ wa ɔ sɛ fala nɛ kpo do lɛ. Nɛ onadalamɛnɔ do gele mɛnɔ 'da wa vɛ̃, ma hɔ sɛ mɔ mɔ lɛ.”

²⁴ Owinɔ kɔ le ni vɛ̃ wa zila we kɛ Hamɔrɛ do be 'da a Sikɛmɛ wa tɔ̃a ni, nɛ wa kɔ̃a, nɛ wa vɛ̃ wa nɛ gaza.

²⁵ Tũ bɔa 'do kɛ wa nɛa gaza, hã zɛlɛ dani gaza 'bana dɛ tɛ wa iko ni, nɛ obenɔ 'da Yakɔbɔ bɔa, Simeoni do Levi, ozagbãlã nya Dina wa kulu ngɔ, nɛ wa kala gba du kɔya dɛ kɔ̃ wa, nɛ wa le kɔ le, nɛ nde wele ĩ̀ fala wa gɔ. Nɛ wa gbɛ owi wilinɔ di ni vɛ̃.

²⁶ Wa gbɛa wa ni mba do Hamɔrɛ do be 'da a Sikɛmɛ. Nɛ wa ba Dina kɔ tɔa 'da Sikɛmɛ i, nɛ wa si do a.

²⁷ 'Do nɛ, nɛ tala obulu benɔ 'da Yakɔbɔ wa nɛ, nɛ wa bi le, nɛ wa 'bili sanga wɔlɔ winɔ vɛ̃. We duzu kɛ Sikɛmɛ wɛla zi boko nya wa, nɛ a ɔ do a ni.

²⁸ Nɛ wa kala mɛnɔ 'da le ni, obata, odua, ongɔmbɔ, opunda, do omɔ kɔ fɔnɔ 'da winɔ vɛ̃.

²⁹ Wa kala kpamɛnɔ 'da owinɔ vɛ̃, do obenɔ do owukonɔ, nɛ wa si do wa, nɛ wa là mɔ kpo kɔ tɔa 'da winɔ ni gɔ.

³⁰ Nɛ Yakɔbɔ tɔ̃ hã Simeoni do Levi na: “Nɛ dɛ mi de gɔ, nɛ dɛa na mi hɔ 'dã wi gbali Okanana do Opɛrizi. Owinɔ ni wa mba sɛ li ngba wa we bi mi. Nɛ wa gbɛ sɛ lɛ do nɛ vɛ̃, we kɛ owinɔ 'da mi wa dɛlɛ gɔ.”

³¹ Nɛ Simeoni do Levi wa tɔ̃ na: “Ma wè sɔ na, wa dɛ do boko nya lɛ ɔ nɛ a a wuko yɛnggɛ vĩ zu yali ni gɔ.”