Ndo Nyanga Dɛ Mɔ 33 - WE NU GALE 1995

Yakɔbɔ kpa ngba a do Ezau

¹ Yakɔbɔ zɔa Ezau do Owi wili kama nalɛ tɛ tɛ nɛ. Nɛ a kɛ̃ obenɔ 'da a dɛ sanga owukonɔ 'da a, Lea do Rasɛlɛ, do owuko wi dɛa tonɔ bɔa ni.

² Nɛ a kpe wuko wi dɛa tonɔ ni dati do obenɔ 'da wa. Nɛ dɛ 'do wa ni, nɛ a kpe Lea do obenɔ 'da a. Nɛ do Sɔkpɔ nɛ vɛ̃, nɛ a kpe Rasɛlɛ do Yozɛfu.

³ Nɛ a do tɛ̃ a ngboo a kpe do dati wa vɛ̃. A zɔa nya a Ezau, nɛ a gu nù fala sambo dati kɛ na wa kpa ngba wa do a ni.

⁴ Ezau zɔa ni, nɛ a gɔnɔ dati nya a do yu, nɛ wa sanga ngba wa dɛ tɛ wa. Nɛ wa bɔa nɛ wa ma ngɔ he ma.

⁵ 'Da fala kɛ Ezau zɔa wukonɔ do obenɔ, nɛ a aka na: “Winɔ wa kã mɔ gɛ a wio nde?” Nɛ Yakɔbɔ gese na: “Mɛ a obenɔ kɛ Gale hã wa hã mi gɛ a ni.”

⁶ Nɛ wuko wi dɛa tonɔ do benɔ 'da wa, wa tɛa kɔlɔ do a, nɛ wa gu nù ti a.

⁷ 'Do nɛ, nɛ Lea do obenɔ 'da a, wa tɛ kɔlɔ do a, nɛ wa gu nù ti a. 'Do nɛ, nɛ Yozɛfu do Rasɛlɛ wa dɛ 'bɔ kpasaa na mɛ ni.

⁸ 'Do nɛ, nɛ Ezau aka na: “Mɛ mɔ kɔ̃a sɔ we dɛ do onadalamɛnɔ vɛ̃ kɛ mi kpa wa li wala gɛ a ge nde?” Nɛ Yakɔbɔ gese na: “Aa NWA 'da mi, mi fa zi gɛ na, mɔ kɔ̃ 'bɔ gɛnɛ mi mbé nɛ.”

⁹ Nɛ Ezau gese hã a na: “Aa nyae, mi zɔlɔ mɔ gɔ, kɔ mɔ 'báná do omɛnɔ 'da mɔ.”

¹⁰ Nɛ Yakɔbɔ tɔ̃ na: “Ɔ̃ ɔ̃, mi ala nu mi hã mɔ, mɔ tɛ bɛ̃̀ gɔ. Mɔ kɔ̃ we be dia kɔ sila hã mi nde, nɛ mɔ kálá mɛnɔ mi hã ma hã mɔ gɛ. Kpa ngba wi 'da lɛ do mɔ, ma ɔ nɛ kɛ mi kpa ngba mi do Gale, nɛ a bia dia kɔ sila hã mi ni.

¹¹ We duzu lá ni, mi ala nu mi hã mɔ na, mɔ kala mɛnɔ kɛ mi tumba ma hã mɔ ni, we kɛ Gale dɛa mi de wena, nɛ mi kpa mɛnɔ vɛ̃ kɛ ma wia ni.” Yakɔbɔ tɔ̃a we ni, nɛ a dala nu a se'de fai, nɛ Ezau kɔ̃.

¹² Nɛ Ezau tɔ̃ hã a na: “Mɔ kúlú ngɔ hã lɛ si. Mi kã sɛ mɔ.”

¹³ Nɛ Yakɔbɔ gese hã a na: “Aa NWA 'da mi, mɔ ĩ na, tɛ obenɔ tɛ ngàndà gɔ, nɛ mi 'bɔ do obata do onaa ngɔmbɔ kɛ wa do obe nɛ 'do wa. Kɔ fala kɛ lɛ wɛlɛ wa we la do wa do nga nɛ 'do tũ kpo iko, nɛ wa fe sɛ.

¹⁴ Kɔ mɔ lá dati, nɛ mi kpe sɛ do 'do mɔ ni gɛɔ gɛɔ, fala nɛ kpo do nadalamɛnɔ, mba do obenɔ gbaa we hɔ 'da mɔ tɛ ngɔ nù Seirɛ i.”

¹⁵ Nɛ Ezau tɔ̃ na: “Ma ɔ ni, nɛ mi la sɛ mbe winɔ 'da mi hã wa kpe do mɔ.” Nɛ Yakɔbɔ aka a na: “Gulu kɛ mɔ nɛ la wa we ge nde? Mɛ mi fa zi gɛ tati nɛ na, mɔ be dia kɔ sila hã mi iko.”

¹⁶ Nɛ Ezau si dɛ Seirɛ i do kpo ngba soe ni.

¹⁷ Nɛ Yakɔbɔ la dɛ kɔ le Sukɔtɛ. Nɛ a dɛ tɔa mɔ a, nɛ a zĩ 'bɔ da hã onadalamɛnɔ 'da a. Ma kɛ wa sa li fala ni na Sukɔtɛ. Gulu nɛ na: “Oda.”

Yakɔbɔ dɛa fala ɔi 'da a dɔ̃ɔ do le Sikɛmɛ

¹⁸ Yakɔbɔ yula tɛ Mezopotami, nɛ a si do ba tɛ̃ a gbaa, nɛ a hɔ kɔ le Sikɛmɛ kɛ ma ngɔ nù Kanana ni. Nɛ a zĩ tɔa tande 'da a dɔ̃ɔ do le ni.

¹⁹ Nɛ 'do nɛ, nɛ a aka obe zã Hamɔrɛ, wi kɛ a dɛa zi le Sikɛmɛ ni na, ɛ nɛ oso nùi kɛ a zĩ zi tɔa tande 'da a ngɔ nɛ ni. Nɛ a usa ma do mbili fɛ̃a mɔ bolo kama kpo.

²⁰ Yakɔbɔ dɛa gbagala do ta dɛ di ni, nɛ a sa li fala ni na Ɛlɛ. Gulu nɛ na: “Gale 'da obe Israɛlɛ.”