Ndo Nyanga Dɛ Mɔ 32 - WE NU GALE 1995

¹ Ma la 'do nɛ tũ bɔa, nɛ Labanɛ kulu ngɔ do titole belee, nɛ a 'be oboko benɔ 'da a do obe yaa a dɛ tɛ a, nɛ a ufu zala wa, nɛ a wele nu a tɛ wa, nɛ a kpolo tɛ a dɛ olo a i.

Yakɔbɔ 'dafa tɛ̃ a we kpa ngba a do Ezau

² Yakɔbɔ kulu ngɔ, nɛ a ma ngɔ si nɛ, nɛ oanzɛnɔ 'da Gale wa gɔnɔ dati a.

³ A nɛa we zɔ wa, nɛ a zɛ nu a na: “Kɛ gɛ a fala 'da Gale!” Nɛ a sa li fala ni na: “Mahanaimɛ.”

⁴ Yakɔbɔ tumba owi tonɔ 'da a dati we kpa nya a Ezau, kɛ a ɔ zamɛ 'da Oedɔmɛ tɛ ngɔ nù Seirɛ i ni.

⁵ Wa nɛa we la nɛ, nɛ a ba nu a hã wa na, wa tɔ̃ sɛ hã nya ɛ Ezau na: “Mi Yakɔbɔ wi dɛa to 'da mɔ, mi tumba wi tonɔ 'da mi we tɔ̃ hã mɔ na, mi kulu zi dɛ 'da Labanɛ i, nɛ mi ɔa i mɔ gbaa tia do sɔɛ gɛ.

⁶ Nɛ mi do ongɔmbɔ, opunda, obata do odua, nɛ mi 'bɔ do owi dɛa to, owi wili do owuko. Kɔ mi tumba owi tonɔ gɛ we mbese mɔ, NWA 'da mi na, mɔ be dia kɔ sila hã mi.”

⁷ Owi tonɔ ni wa nɛa, nɛ wa kpolo tɛ wa, nɛ wa tɔ̃ hã Yakɔbɔ na: “Lɛ nɛa, nɛ lɛ kpa nya mɔ Ezau. Kɔ a kala owinɔ 'da a kama nalɛ, hã a tɛ gɔnɔ dati mɔ, fala nɛ kpo do wa.”

⁸ Yakɔbɔ nɛa we zele ní, nɛ kili ba a wena. Nɛ a gɔnɔ sanga owinɔ 'da a do ngɔ gili wa bɔa. Nɛ a gɔnɔ 'bɔ sanga batanɔ, duanɔ, ngɔmbɔnɔ do samonɔ 'da a na mɛ ni.

⁹ Nɛ a tɔ̃ na: “'Da fala kɛ Ezau bi tabi mbe ngɔ gili owinɔ gɛ kpo nde, nɛ ombee nɛ wa yu, nɛ wa kpasa.”

¹⁰ 'Do nɛ, nɛ a sambala na: “Aa Gale 'da yaa mi Abrahama do baa mi Izaka, mɔ tɔa zi hã mi na, mi si dɛ ngɔ nùi 'da mi, dɛ kɔ nu fɛlɛ kula 'da mi. Nɛ mɔ dɛ sɛ na, mɛnɔ 'da mi ma la vɛ do dia nɛ.

¹¹ NWA, mi a wi dɛa toe 'da mɔ, nɛ mi hɔ̀ wi kɛ mɔ be dia zã hã mi, nɛ mɔ dɛ dia mɔ dɛ 'da mi gɔ. 'Da fala kɛ mi kũ zi lì Yɔrdanɛ dɛ kulu nɛ i ni, nɛ nde mɛ zi kɔ mi a dɔndɔlɛ 'da mi iko. Kɔ di dɔ ni, mi si do gba gili Owele do osa'de.

¹² Mɔ kpásá mi ti kɔ nya mi Ezau, we kɛ mi do kili na, a gbɛ sɛ mi do owukonɔ, do obenɔ 'da mi.

¹³ Kɔ mɔ lengge do olo nu mɔ kɛ mɔ tɔ̃a zi hã mi na, mɔ zɔ sɛ mɔ tɛ mi, nɛ mɛnɔ 'da mi ma la sɛ vɛ do dia nɛ, nɛ mɔ dɛ sɛ na, obe zã mi wa dɛlɛ ɔ nɛ gbãlã kɛnzɛnɔ nu gba lì ni.”

¹⁴ Yakɔbɔ sambala do'do, nɛ a 'dafa fala we ɔ dɛ di ni. Wa ɔa hã fala sa, nɛ Yakɔbɔ saka kɔ mɛnɔ 'da a we tombo ma do dɔnggamɔ hã nya a Ezau.

¹⁵ A saka onaa dua kama bɔa, nɛ owili nɛ 'bu nɛ bɔa. Nɛ a saka onaa bata kama bɔa, nɛ owili nɛ 'bu nɛ bɔa,

¹⁶ onaa samo do obenɔ 'da wa 'bu nɛ talɛ, onaa ngɔmbɔ 'bu nɛ nalɛ, nɛ owili nɛ 'bu, onaa punda 'bu nɛ bɔa, nɛ owili nɛ 'bu.

¹⁷ Yakɔbɔ kɛ̃a zi sanga onadalamɛnɔ ni kpi kpi, nɛ a hã wa hã owi dɛa tonɔ 'da a, nɛ a tɔ̃ hã wa na: “Nɛ lá dati, nɛ nɛ dɛ na, sanga onadalamɛnɔ ma nyɛlɛ do ngbɛ ɛ.”

¹⁸ Nɛ a ba nu a hã wi kɛ a kpia dati do kuti ngɔ gili osa'denɔ ni na: “Fala kɛ nɛ kpa ngba nɛ do nya mi Ezau, nɛ a aka sɛ mɔ na: ‘Nwa 'da mɔ a wio nde? Nɛ mɔ nɛ do nde? Nɛ onadalamɛnɔ mɔ kpia dɛ 'do wa gɛ a mɔ wio nde?’

¹⁹ Nɛ mɔ gese sɛ hã a na: ‘Wele wa a mɔ wi dɛa toe 'da mɔ Yakɔbɔ. A tumba wa we hã wa do dɔnggamɔ hã mɔ nwa 'da a. Nɛ nde a do tɛ a, a 'bana tɛ tɛ 'do lɛ gɛ.’ ”

²⁰ Nɛ Yakɔbɔ tɔ̃ 'bɔ na mɛ ni hã bɔa wi dɛa toe, do talɛ wele kɛ, nɛ a tɔ̃ 'bɔ hã owi dɛa tonɔ vɛ kɛ wa kpia zi dɛ 'do onadalamɛnɔ ni na: “Ki ni a wenɔ kɛ nɛ kpa ngba nɛ do Ezau hã a aka nɛ, nɛ nɛ tɔ̃ sɛ hã a gɛ a ni.

²¹ Nɛ nɛ tɔ̃ sɛ 'bɔ na, wi dɛa toe 'da mɔ, a tɛ tɛ 'do gɛ.” Nɛ Yakɔbɔ tɔ̃ do kɔ sila a na: “Mi tombo sɛ dia mɛnɔ gɛ hã a dati, hã sila a gɛ do'do, sɛ nɛ mi hɔ dɛ dati a i de. Mbe gɔ, nɛ a be sɛ dia zã hã mi.”

²² Ma kɛ onadalamɛnɔ wa la dati, nɛ Yakɔbɔ 'bana do tũi ni dɛ tɛ fala kɛ wa ɔa nɛ ni.

Yakɔbɔ bi do Gale

²³ Do kpo kpo tũi ni, nɛ Yakɔbɔ kulu ngɔ, fala nɛ kpo do owukonɔ 'da 'a bɔa nɛ, do owuko wi tonɔ 'da a bɔa nɛ, do obenɔ 'da a 'bu ngɔ wa kpo ni.

²⁴ Nɛ a ba nu a hã wa na, wa kũ takala lì Yabɔkɛ. 'Do nɛ, nɛ a ba 'bɔ nu a hã owi dɛa tonɔ 'da a na, wa kũ lì do mɛnɔ 'dɛ ɛ vɛ̃,

²⁵ nɛ Yakɔbɔ 'bana dɛ di ni zu a kpo. Nɛ mbe wele kpo hɔ, nɛ a ba Yakɔbɔ do bolo, nɛ wa bi do tũi ni gbaa, nɛ fala sa wa.

²⁶ Fala kɛ wi ni zɔa na ɛ wé sɛ we nɛ ngɔ Yakɔbɔ gɔ ni, nɛ a zɛ a si gulu ku a, nɛ nĩ gulu ku a gɔnɔ, nɛ ku a yala li ngbɛ ɛ.

²⁷ Nɛ wi ni tɔ̃ na: “Mɔ dá kɔ̃ mɔ tɛ mi hã mi la, we kɛ fala sa ia.” Nɛ Yakɔbɔ gese hã a na: “Mi dá sɛ kɔ mi tɛ mɔ gɔ gbaa, hã mɔ wele nu mɔ tɛ mi, sɛ nɛ mi da sɛ kɔ mi tɛ mɔ de.”

²⁸ Nɛ wi ni aka a na: “Li mɔ a ge nde?” Nɛ a gese na: “Li mi a Yakɔbɔ.”

²⁹ Nɛ wi ni tɔ̃ na: “Li mɔ sɛ 'bɔ mbé nɛ a Yakɔbɔ gɔ, nɛ nde wa sa sɛ li mɔ na Israɛlɛ. We duzu kɛ mɔ bi bolo do Gale, nɛ mɔ bi 'bɔ do Owele, nɛ mɔ nganda nɛa ngɔ wa.”

³⁰ Nɛ Yakɔbɔ aka a na: “Mɔ tɔ̃ hã mi sɛ, li mɔ a ge nde?” Nɛ wi ni gese hã a na: “Gulu kɛ mɔ aka we li mi we ge nde?” 'Do we ni, nɛ a wele nu a tɛ Yakɔbɔ dɛ di ni.

³¹ Nɛ Yakɔbɔ tɔ̃ na: “Mi zɔa bula li Gale ngboo, nɛ mi fè gɔ.” Nɛ a e li fala ni na Pɛnuɛlɛ. Gulu nɛ na: “Bula li Gale.”

³² 'Da fala kɛ wese nɛa we gba nɛ ni, nɛ nde Yakɔbɔ kũ sɔ takala lì Pɛnuɛlɛ ia. Nɛ a nɛ zi ku, we kɛ nĩ gulu ku a ma gɔnɔ zi gɔna.

³³ Nɛ tia do sɔɛ gɛ, obe Israɛlɛ wa nyɔ́ngɔ́ nĩ gulu ku sa'de gɔ, we kɛ Gale zɛa zi Yakɔbɔ dɛ ngɔ nĩ́ gulu ku a ni.