Ndo Nyanga Dɛ Mɔ 31 - WE NU GALE 1995

Yakɔbɔ yu ti Labanɛ do'do

¹ Do 'da fala ni, nɛ Yakɔbɔ zele wenɔ kɛ obenɔ 'da Labanɛ wa tɔ̃ zi na: “Yakɔbɔ kala kpamɛnɔ 'da baa lɛ vɛ, ma kɛ a hɔa wi kpamɛ gɛ.”

² Nɛ Yakɔbɔ zɔa 'bɔ na, dɛa mɔ tɛ Labanɛ dɛ 'da ɛ, ma ɔ̀ 'bɔ nɛ kuti kɛ zi dati ni gɔ.

³ Ma kɛ NWA tɔ̃a hã a na: “Mɔ sí dɛ ngɔ nùi 'da Owele mɔ, dɛ kɔ nu fɛlɛ mɔ, hã mɔ dungu dɛ di ni. Mi sɛ do mɔ fala nɛ kpo.”

⁴ Nɛ Yakɔbɔ sa mɔ hã Rasɛlɛ do Lea dɛ fala kɛ a fɔmɔ do onadalamɛnɔ 'da a ni,

⁵ nɛ a tɔ̃ hã wa na: “Mi zɔa na, dɛa mɔ tɛ baa nɛ dɛ 'da mi, ma à 'bɔ nɛ kuti kɛ zi dati ni gɔ. Nɛ nde Gale 'da baa mi do mi boe.

⁶ Nɛ ĩ de wena na, mi dɛa toe hã baa nɛ do ngawi 'da mi vɛ.

⁷ Gɛnɛ kɔ ni, nɛ nde a ɔkɔlɔ mi, nɛ a kpolo mɔ olo toe 'da mi fala 'bu. Nɛ nde Gale hã̀ wala hã a na, a zũ mi gɔ.

⁸ Fala kɛ baa nɛ tɔ̃ na, osa'denɔ vɛ kɛ tɛ wa gɔnɔ do dã mba'da mba'da ni a mɔ olo toe 'da mi nde, nɛ osa'denɔ vɛ wa ko tati a obenɔ kɛ tɛ wa gɔnɔ do dã mba'da mba'da ni. Kɔ fala kɛ a tɔ̃ na, osa'denɔ kɛ tɛ wa gɔnɔ do yɔla nɛ ni a mɔ olo toe 'da mi nde, nɛ osa'denɔ vɛ wa ko tati a obenɔ kɛ tɛ wa gɔnɔ do yɔla nɛ ni.

⁹ Wi a Gale a kala onadalamɛnɔ kɔ baa nɛ, hã a hã wa hã mi.

¹⁰ “Do 'da fala kɛ osa'denɔ wa ɔ do ngba wa ni, nɛ mi yala zi zu mi. Mi yala na, tɛ owili sa'denɔ kɛ wa ɔ do onaa batanɔ tabi duanɔ ni, ma gɔnɔ do yɔla nɛ, nɛ tɛ ombe ma gɔnɔ mba'da mba'da ni.

¹¹ Nɛ do li yalɛ ni, nɛ anzɛ 'da Gale sa mɔ hã mi na: ‘Yakɔbɔ!’ Nɛ mi kɔ̃a na: ‘Mi kɛ!’

¹² Nɛ a tɔ̃ hã mi na: ‘Mɔ zɔ̀, tɛ owili sa'denɔ vɛ kɛ wa ɔ do naa batanɔ tabi duanɔ ni, ma gɔnɔ do dã. Tɛ ombe ma gɔna do yɔla nɛ, nɛ tɛ ombe ma gɔna mba'da mba'da ni. Ma na mɛ ni we duzu kɛ mi zɔa mɛ Labanɛ dɛ do mɔ ni.

¹³ Mi a Gale kɛ mi bia zi tɛ mi hã mɔ tɛ Betɛlɛ, fala kɛ mɔ zĩ zi do ta dɛ ngɔ, nɛ mɔ ia ma we dɔnggɔ do mi, nɛ mɔ kpo 'bɔ mbulu dɛ di ni hã mi ni. Di dɔ ni, mɔ kúlú ngɔ, hã mɔ yu tɛ mɔ kɔ le gɛ do'do, hã mɔ si dɛ ngɔ nùi 'da mɔ.’ ”

¹⁴ Rasɛlɛ do Lea wa zila ni, nɛ wa gese hã Yakɔbɔ na: “Lɛ do mɔ kɔ kpamɛ 'da baa lɛ 'bɔ bina.

¹⁵ Baa lɛ dɛ do lɛ di ni ɔ nɛ lɛ a ogele wi ni, we kɛ a bia gole lɛ, nɛ a nyɔngɔ mbili 'do lɛ ia.

¹⁶ Na mɛ ni, okpamɛnɔ 'da a vɛ kɛ Gale kala ma kɔ a, nɛ a hã ma hã mɔ ni, mɛ a kɛnɔ 'da lɛ do obenɔ 'da lɛ. Kɔ mɔ dɛ mɛnɔ vɛ kɛ Gale tɔ̃a na, mɔ dɛ ma ni.”

^17-19 Nɛ Yakɔbɔ 'dafa tɛ ɛ we si dɛ 'da baa a Izaka tɛ ngɔ nù Kanana i. Nɛ mbe ngba soe kpo, nɛ Labanɛ nɛa we kɛlɛ sala obatanɔ 'da a tɛ zamɔ i. A nɛa we la do'do, nɛ Yakɔbɔ ngɛmɛ li onadalamɛnɔ do omɛnɔ kɛ a kpa zi ma tɛ Mezopotami ni vɛ, nɛ a kala we si do ma dɛ 'da baa a Izaka i. Rasɛlɛ zɔa na, baa a bina ni, nɛ a kala okpikimanɔ kɛ wa dɛa zi ma we duzu nu fɛlɛ kula 'da baa a ni, nɛ a fi ma kɔ tole. Yakɔbɔ 'dafa obenɔ do owukonɔ 'da a dɛ li 'do osamonɔ 'da a, nɛ wa la do osa'denɔ do otolenɔ vɛ.

²⁰ Na mɛ ni, Yakɔbɔ ɔkɔlɔ Labanɛ we kɛ fala la mɔ a, nɛ a mbèsè a gɔ.

²¹ Yakɔbɔ yu zi do mɛnɔ 'da a vɛ, nɛ a wɛlɛ tɛ a we kũ lì Efratɛ, sɛ nɛ wa la dɛ ngɔ okalanɔ tɛ Galadɛ de.

Labanɛ ndaka 'do Yakɔbɔ

²² 'Do nɛ la tũ talɛ, nɛ mbe wele kpo tɔ̃ hã Labanɛ na, Yakɔbɔ yu, hã a si.

²³ Labanɛ nɛa we zele ni, nɛ a ngɛmɛ lì owinɔ 'da a, nɛ wa ndaka 'do Yakɔbɔ gbaa 'do tũ sambo, nɛ wa kpa a tɛ ngɔ kalanɔ tɛ Galadɛ ni,

^24-25 nɛ nde a zĩ otɔa tandenɔ 'da a dɛ di ni. Nɛ Labanɛ do owinɔ 'da a wa zĩ tɛ mɛ 'bɔ kɛnɔ 'da wa dɛ di ni. Nɛ do tũi, nɛ Gale tɔ̃ yalɛ zu Labanɛ na: “Mɔ tɛ è kɔ mɔ tɛ Yakɔbɔ gɔ.”

²⁶ Fala sa, nɛ Labanɛ nɛ, nɛ a aka Yakɔbɔ na: “Mɛ mɔ dɛa ni a ge nde? Mɔ ɔkɔlɔ mi, nɛ mɔ kala oboko benɔ 'da mi, nɛ mɔ yu do wa, ɔ nɛ kɛ mɔ kala wa li bolo ni.

²⁷ Gulu kɛ mɔ yu do usu nɛ ni we ge nde? Mɔ mbese sɔ mi dati mbisa, nɛ mi kã sɔ mɔ do yangga, do ozuma tɛ zɛ be bia do kundu.

²⁸ Nɛ mɔ è 'bɔ mbe mi na, mi ufu zala oboko benɔ 'da mi, mba do obe yaa mi, sɛ nɛ de gɔ. Mɔ dɛa ki ni ɔ nɛ kɛ mɔ a yɔnda wi ni.

²⁹ Mi wia sɔ tɛ dɛ mɔ 'danga, nɛ nde Gale 'da baa mɔ tɔ̃a hã mi zɛ tũi gɛ na, mi tɛ è kɔ mi tɛ mɔ gɔ.

³⁰ Kɔ we bina, mi ĩ na mɔ la we kɛ sila mɔ dɛ ngɔ ngbũu we si dɛ 'da baa mɔ i. Kɔ gulu kɛ mɔ zũ okpikimanɔ 'da mi we ge nde?”

³¹ Nɛ Yakɔbɔ gese hã Labanɛ na: “Mi dɛa kili, nɛ mi tɔ̃ do kɔ sila mi na, mɔ kala sɛ oboko benɔ 'da mɔ kɔ mi.

³² Nɛ nde fala kɛ mɔ fa okpikimanɔ 'da mɔ, hã mɔ kpa wa tɛ kɔ mbe winɔ 'da mi kpo nde, nɛ wi ni a fe sɛ. Ní a mɔ fa mɛ 'da mɔ dɛ gbali owinɔ 'da mi gɛ, hã mɔ kpa ma nde, nɛ mɔ kala.” Yakɔbɔ tɔa ni, we kɛ a ĩ̀ na, Rasɛlɛ kala okpikima kɔ nu fɛlɛ kula 'da wa ni gɔ.

³³ Labanɛ fa kɔ tɔa tandenɔ 'da Yakɔbɔ, do Lea do owuko wi dɛa tonɔ 'da a bɔa ni, nɛ a kpà mɔ kpo gɔ. A yula kɔ tɔa tande 'da Lea, nɛ a le kɔ kɛ 'da Rasɛlɛ.

³⁴ Ĩ a Rasɛlɛ zi a kala okpikimanɔ ni, nɛ a a wa tɛ kɔ mɔ dungi kɛ wa e ma li 'do osamonɔ ni, nɛ a dungu dɛ ngɔ nɛ. Labanɛ fa kɔ tɔa tande vɛ, nɛ a kpà mɔ kpo gɔ.

³⁵ Nɛ Labanɛ hɔa dɛ fala Rasɛlɛ dungu nɛ ni, nɛ Rasɛlɛ tɔ̃ hã baa a na: “Aa baa mi, zã mɔ tɛ nɔ̃̀lɔ̃̀ gɔ, mi kùlù ngɔ gɔ, we kɛ mi zɔa zɛkɛ, kɔ fala na mi kulu ngɔ bina.” Gɛnɛ kɔ Labanɛ fa mɛnɔ ni gbaa, nɛ nde a kpà zi ma gɔ.

³⁶ Nɛ zã Yakɔbɔ nɔ̃lɔ̃, nɛ a dala dɛ tɛ Labanɛ, nɛ a tɔ̃ hã a na: “Li 'dã mɛ kɛ mi dɛa na zã mɔ nɔ̃lɔ̃, kɔ mɔ ndaka 'do mi gɛ a ge nde?

³⁷ Mɔ fa kɔ omɛnɔ 'da mi vɛ, nɛ mɔ kpa mbe mɔ kɛ ma yula 'da mɔ i ni nde? Mɔ kpa ni kpa nde, nɛ mɔ bé hã owinɔ 'da mi do owanɔ 'da mɔ hã wa zɔ, nɛ wa gɔnɔ sanga nɛ hã lɛ do mɔ.

³⁸ Mi ɔa do mɔ sabɛlɛ 'bu nɛ bɔa, nɛ nde zã osa'denɔ 'da mɔ álá mbe gɔ, nɛ mi nyɔngɔ mbe batanɔ kɔ ba'de 'da mɔ fala kpo gɔ.

³⁹ Nɛ mi tɛ mbe 'da mɔ do nadalamɔ kɛ sa'de zamɔ gbɛa a ni gɔ. Mba gɔ, fala kɛ mbe nadalamɛ 'da mɔ kpo fe zi nde, nɛ mi kpolo fia a do tunu li wele kɛ 'da mi. Nɛ 'da fala kpo, wa zũ zi mbe osa'denɔ 'da mɔ do gba wese tabi do tũ nde, nɛ mɔ aka zi mi fai na, mi gese olo nɛ hã mɔ.

⁴⁰ Do gba wese, nɛ mi kpa zi ngamɔ li gba tua wese gbaa, nɛ do tũi, nɛ mi kpa 'bɔ ngamɔ tɛ gɛ̃ɛ gbaa, nɛ fala do kɛ mi ɔ yala bina.

⁴¹ Nɛ mi ɔa zi fala nɛ kpo do mɔ gbaa we sabɛlɛ 'bu nɛ bɔa. Nɛ mi dɛa to hã mɔ 'do sabɛlɛ 'bu ngɔ nɛ nalɛ, we kala oboko benɔ 'da mɔ bɔa ni do owukonɔ 'da mi. Nɛ mi ɔa 'bɔ 'do ki ni sabɛlɛ gazɛlɛ we kpa onadalamɔ kɔ mɔ. Nɛ nde mɔ kpolo zi mɔ olo dɛa toe 'da mi fala 'bu.

⁴² Ɔ do kɛ Gale 'da yaa mi Abrahama, Gale kɛ a hã zi kili hã baa mi Izaka ni, a gbàkà sɔ mi gɔ, nɛ mi kala sɔ wila kɔ mi we si do ma iko. Nɛ nde Gale zɔa ngamɛ 'da mi, do nganda dɛa tonɔ kɛ mi dɛa ma ni, ma kɛ zɛ tũi gɛ, a 'bili dia gulu we hã mi.”

Labanɛ gba takɔ do Yakɔbɔ

⁴³ Nɛ Labanɛ gese hã Yakɔbɔ na: “Mɔ ĩ na, oboko benɔ gɛ wa a obenɔ 'da mi, nɛ wele obenɔ 'da wa wi a mi, nɛ wele onadalamɛnɔ mba do mɛnɔ vɛ gɛ a mɔ mi. Nɛ nde yolo do sɔɛ gɛ, mi dɛ sɛ mɔ kpo si fala 'da oboko benɔ 'da mi, do obe zã wa gɔ.

⁴⁴ Kɔ lɛ gba tɔkɔ sanga tɛ ngba lɛ do mɔ. Nɛ ma wia na, lɛ nɛ gba tɔkɛ ni, nɛ lɛ fa mbe mɔ kpo, hã ma ɔ temɔɛ sanga tɛ ngba lɛ.”

⁴⁵ Na mɛ ni, nɛ Yakɔbɔ ba kili ta, nɛ a zĩ ma, nɛ a e ma we dɔnggɔ do Gale.

⁴⁶ Nɛ a to hã owinɔ 'da a na, wa kala okili ta. Nɛ wa kala otanɔ ni, nɛ wa ngɛmɛ ngɔ gili nɛ. 'Do nɛ, nɛ wa vɛ wa nyɔngɔ mɔ dɛ kɛ zã gili tanɔ ni.

⁴⁷ Nɛ Labanɛ sa li fala ni do lɛnggɛ nu a na Yɛgarɛ Sahaduta. Nɛ Yakɔbɔ sa tɛ mɛ 'bɔ li fala ni na Galɛdɛ

⁴⁸ 'Do nɛ, nɛ Labanɛ to na: “Ngɔ gili otanɔ gɛ mɛ a temɔɛ sanga tɛ ngba lɛ do mɔ.” Ma hã wa sa li fala ni na Galɛdɛ. Gulu nɛ na: “Ngɔ gili otemɔɛ.”

⁴⁹ Labanɛ tɔa 'bɔ na: “Ma wia na NWA zɔ sɛ mɔ tɛ lɛ, 'da fala kɛ lɛ gɔnɔ sɛ sanga tɛ ngba lɛ, nɛ lɛ zɔ sɛ 'bɔ ngba lɛ gɔ ni.” Ma hã wa ia li fala ni na Mispa. Gulu nɛ na: “Fala zɔ mɔ tɛ ngba wi.”

⁵⁰ Nɛ Labanɛ tɔ̃ na: “Fala kɛ mɔ hã ngamɔ hã oboko benɔ 'da mi, tabi mɔ kala ogele wuko dɛ ngɔ wa nde, nɛ mɔ dɛ zĩ, nɛ mɔ lengge ngboo sɛ. Nɛ mɔ ĩ́ na, gele wele a dúngú sɛ temɔɛ sanga lɛ do mɔ gɔ, nɛ nde wi a Gale do tɛ a ngboo.

⁵¹ Mɔ zɔ ngɔ gili otanɔ mi a ma gɛ, mba do kɛ mi zĩ 'bɔ ma sanga lɛ do mɔ ni.

⁵² Ngɔ gili otanɔ ni, ma ɔ sɛ nɛ li ngbala sanga lɛ do mɔ. Nɛ wele kṹ sɛ ma we nɛ 'da ngba a do 'dã linggamɔ gɔ.

⁵³ Kɔ ma wia na, Gale 'da Abrahama do Nahɔrɛ a dungu temɔɛ sanga lɛ do mɔ.” Nɛ Yakɔbɔ zonggo tɛ a do zu li Gale kɛ a hã zi kili hã baa a Izaka ni.

⁵⁴ Nɛ a gbɛ sa'de dɛ ngɔ kala ni, nɛ a hã ma do dɔnggamɔ hã Gale. Nɛ a sa mɔ hã owinɔ kɛ zã a ni, nɛ wa tɛ we nyɔngɔ mɔ. Wa nyɔngɔ mɛ ia do'do, nɛ wa ɔ dɛ ngɔ kala ni.