Ndo Nyanga Dɛ Mɔ 30 - WE NU GALE 1995

¹ Rasɛlɛ nɛa we zɔ na, ɛ kó sɛ be gɔ ni, nɛ a dɛa bɔnɛ hã nya a. Nɛ a tɔ̃ hã Yakɔbɔ na: “Mɔ hã́ obe hã mi, we kɛ mi kò be gɔ, nɛ nde gulu dungu nza 'da mi 'bɔ bina.”

² Yakɔbɔ nɛa we zele ní, nɛ zã a nɔ̃lɔ̃ dɛ tɛ a, nɛ a gese hã a na: “Mɔ zɔ mi nɛ Gale ni nde? We kɛ wi a a, hã a dɛa na mɔ tɛ kò gɔ.”

³ Nɛ Rasɛlɛ gese na: “Mɔ mbá ngɔ te do Bila, wuko wi dɛa toe 'da mi, hã a ko be olo li mi. Na mɛ ni, nɛ mi kpa sɛ obe mɔ mi do wala 'da a.”

⁴ Nɛ a hã wuko wi dɛa toe 'da a hã Yakɔbɔ na, a mba ngɔ te do a.

⁵ Yakɔbɔ ɔa ngu'du Bila, nɛ a ba zã, nɛ a ko bulu be hã Yakɔbɔ.

⁶ Nɛ Rasɛlɛ tɔ̃ na: “Gale gɔnɔ ngbangga hã mi do bɔlɔ nɛ. A zila ala nu 'da mi, nɛ a hã bulu be hã mi.” Nɛ a e li a na Danɛ.

⁷ Bila ba 'bɔ mbé zã, nɛ a ko bɔa bulu be hã Yakɔbɔ.

⁸ Nɛ Rasɛlɛ tɔ̃ na: “Mi bi nga bolo do boko nya mi, nɛ mi nɛa ngɔ a.” Nɛ a e li be 'da a na Nɛftali.

⁹ 'Da fala kɛ Lea zɔa na, ɛ ko 'bɔ gɔ ni, nɛ a ba Zilpa, wuko wi dɛa toe 'da a, nɛ a hã a hã Yakɔbɔ na, a ɔ ngu'du a.

¹⁰ Nɛ Zilpa ba zã, nɛ a ko bulu be hã Yakɔbɔ.

¹¹ Lea nɛa we zɔ ní, nɛ a he mɔ na: “Kɛ gɛ a dia 'dɔkɔlɔ ge nde!” Nɛ a e li be na Gadɛ.

¹² Zilpa kua 'bɔ bɔa bulu be hã Yakɔbɔ.

¹³ Nɛ Lea na: “Kɛ gɛ a dia 'dɔkɔlɔ! Di dɔ ni owukonɔ wa tɔ̃ sɛ na, mi a wi yangga.” Nɛ a e li a na Asɛrɛ.

¹⁴ Mbe tũ kpo do 'da fala kala kpalɛ ble, nɛ Rubɛnɛ kulu ngɔ, nɛ a la si kɔ fɔnɔ i, nɛ a kpa wala te ina kula i mɔ. Nɛ a kala ma, nɛ a si nɛ hã naa a Lea. Rasɛlɛ nɛa we zɔ ni, nɛ a tɔ̃ hã Lea na: “Mɔ kɔ, nɛ mɔ hã mbe ina kula kɛ be 'da mɔ kpa ma gɛ hã mi.”

¹⁵ Nɛ Lea gese na: “Kɛ mɔ ba wili mi kɔ mi do'do, nɛ mɔ kɔ̃a 'bɔ na mi hã ina kula hã mɔ nde?” Nɛ Rasɛlɛ gese na: “Mɔ hã ina ni hã mi, nɛ Yakɔbɔ a mba sɛ ngɔ te do mɔ tũi gɛ.”

¹⁶ Wese gɛ̃a, nɛ Yakɔbɔ yolo fɔ i tɛ si ma, nɛ Lea ka mɔ, nɛ a zɔ a li wala i, nɛ a gɔnɔ dati a. Nɛ a to hã a na: “Mɔ mba sɛ ngɔ te do mi tũi gɛ, we kɛ mi hã ina kula kɛ be 'da mi tɛa nɛ hã mi ni hã gula mi we nɛ ia.” Nɛ Yakɔbɔ mba ngɔ te do a do tũi ni.

¹⁷ Gale zila ala nu 'da Lea, nɛ a ba zã, nɛ a ko mɔlɔ bulu be hã Yakɔbɔ.

¹⁸ Nɛ a tɔ̃ na: “Gale gisa olo kɛ mi hã wi toe 'da mi do wuko hã wili mi ni hã mi.” Nɛ a e li be na Isakarɛ.

¹⁹ Nɛ Lea ba 'bɔ mbé zã, nɛ a ko gazɛlɛ bulu be hã Yakɔbɔ.

²⁰ Nɛ a tɔ̃ na: “Gale hã dia mɔ hã mi. Kɔ ngangga ni, wili mi a dɔnggɔ sɛ mi, we kɛ mi kua obulu be hã a gazɛlɛ.” Nɛ a e li bulu be 'da a na Zabuloni.

²¹ 'Do nɛ, nɛ a ko 'bɔ boko be, nɛ a e li a na Dina.

²² Nɛ ta zu Gale gba ngɔ Rasɛlɛ, nɛ a zele ala nu 'da a, nɛ a 'dafa fala kula 'da a.

²³ Nɛ Rasɛlɛ ba zã, nɛ a ko bulu be. Nɛ a tɔ̃ na: “Gale kala sape li mi, nɛ a hã be hã mi.”

²⁴ Nɛ a e li be 'da a na Yozɛfu nɛ a gɔ 'bɔ NWA na, a kɔ, nɛ a hã 'bɔ mbé bulu be hã ɛ.

Yakɔbɔ do Labanɛ

²⁵ 'Do kɛ wa kua Yozɛfu ni, nɛ Yakɔbɔ tɔ̃ hã Labanɛ na: “Mɔ hã́ wala hã mi, hã mi si dɛ ngɔ nùi 'da mi.

²⁶ Mɔ é mi, kɔ mi kala owukonɔ do obenɔ 'da mi, kɛ mi dɛa toe we duzu wa ni, hã mi si. Mɔ ĩ ti tɛlɛ tɛ toe kɛ mi dɛa ma 'da mɔ gɛ vɛ.”

²⁷ Nɛ Labanɛ gese hã a na: “Mɔ kɔ, nɛ mɔ zele mi sɛ. Ogalenɔ 'da mi wa tɔ̃a hã mi na, NWA wila nu ɛ tɛ mi we duzu mɔ.

²⁸ Kɔ mɔ wé mbili kɛ mɔ kɔ̃a na, mi hã ma hã mɔ we si olo toe mɔ dɛa ni hã mi.”

²⁹ Nɛ Yakɔbɔ gese hã a na: “Mɔ ĩ ti tɛlɛ tɛ kɛ mi dɛa do toe hã mɔ ni, nɛ sɔɛ gɛ onadalamɛnɔ 'da mɔ wa yɛ'bɛ we duzu mi.

³⁰ Be wanɔ sĩ, kɛ mɔ zi do wa dati a hɔa 'da mi ni, wa yɛ'bɛ, nɛ wa dɛlɛ we duzu mi. Yolo do kɛ mi hɔa nu tɔa 'da mɔ gɛ, nɛ NWA wila nu ɛ tɛ mɔ. Kɔ ngangga ni, ma wè na, mi dɛ tɛ mɛ 'bɔ to we dala do nu fɛlɛ kula 'da mi gɔ nde?”

³¹ Nɛ Labanɛ tɔ̃ hã a na: “Mi nɛ si olo toe 'da mɔ do ge nde?” Nɛ Yakɔbɔ gese na: “Mɔ sí sɛ olo mɔ kpo hã mi gɔ. Nɛ nde fala kɛ mɔ kɔ gɛnɛ mɛ mi nɛ tɔ̃ hã mɔ ni, nɛ mi 'bana sɛ tɛ fɔmɔ onadalamɛnɔ 'da mɔ ɔ nɛ kɛ mi dɛ zi ma dati ni.

³² Mi yɛnggɛ sɛ sɔɛ gɛ we zɔ onadalamɛnɔ. Nɛ mi ngɛmɛ sɛ li obatanɔ vɛ kɛ tɛ wa ma tũ, tabi ma gɛzɛ do tũ nɛ mba'da mba'da ni. Mi kala sɛ oduanɔ kɛ tɛ wa ma gɛzɛ do fɛ̃a nɛ mba'da mba'da ni. Nɛ mi a sɛ wa kpi, nɛ owanɔ ni vɛ̃ sɛ we si do olo dɛa toe 'da mi.

³³ Kɔ mi dɛ do'do, nɛ ma wia na, mɔ tɛ we zɔ mɛ mi dɛa ni, tabi mi dɛa ma do bɔlɔ nɛ nde. Oduanɔ vɛ, obe nɛ do ogã nɛ, kɛ fɛ̃a dã tɛ wa bina, do obatanɔ kɛ tɛ wa ma tũ gɔ ni, sɛ vɛ̃ a osa'de zũ.”

³⁴ Nɛ Labanɛ kɔ̃a, nɛ a na: “Lɛ dɛ sɛ ɔ nɛ kɛ mɔ tɔa ni.”

³⁵ Nɛ do ngba soe ni, nɛ Labanɛ saka owili duanɔ do onaa wanɔ kɛ tɛ wa gɛzɛ do fɛ̃a nɛ ni, obe nɛ do ogã nɛ, do obatanɔ kɛ tɛ wa gɛzɛ do tũ nɛ ni, nɛ a a wa kpi. Nɛ a kala wa, nɛ a hã wa hã obenɔ 'da a.

³⁶ Nɛ a tombo wa na, wa la do osa'denɔ ni gbaa 'do tũ talɛ na, wa nyɛlɛ do fala Yakɔbɔ se'de ni. Nɛ Yakɔbɔ zɔ mɔ tɛ tala wanɔ ni.

³⁷ Yakɔbɔ zɔa tɔlɔ te talɛ, kɛ ma kpi kpi, nɛ a gbini ogba kɔ tenɔ ni kpo kpo, nɛ a ɛlɛ mbe okɔa 'do nɛ, nɛ a la mbe nɛ ni, takɔ ma gɛzɛ do fɛ̃a nɛ.

³⁸ Nɛ a a obe tenɔ a gɛza tɛ nɛ ni dɛ gbali onadalamɛnɔ, tɛ fala kɛ wa nɔ do lì ni. We kɛ 'da fala wa tɛ we nɔ lì fai ia, nɛ wa ɔ do ngba wa dɛ di ni.

³⁹ Kɔ fala kɛ wa ɔ do ngba wa dɛ dati obe tenɔ ni, nɛ wa ba zã, nɛ wa ko obe dua, nɛ nde tɛ wa ma gɛzɛ do gã nɛ, do bi nɛ mba'da mba'da ni.

⁴⁰ Nɛ we duzu obatanɔ kɛ a a zi wa kpi ni, 'da fala kɛ a zɔ na, wa tɛ ɔ do ngba wa ni, nɛ a dɛ na, wa ka mɔ dɛ tɛ osa'denɔ 'da Labanɛ kɛ tɛ wa ma tũ, tabi ma gɔnɔ do tũ nɛ ni. A dɛa ni fai, nɛ a kpa gili obata mɔ a. Nɛ nde a mbà li wa do owanɔ 'da Labanɛ gɔ.

⁴¹ Nɛ 'da fala kɛ Yakɔbɔ zɔ ogã sa'denɔ tɛ ɔ do ngba wa ni, nɛ a kala otenɔ ni, nɛ a a ma dɛ gbali wa tɛ fala wa nɔ do lì ni, na wa ɔ do ngba wa dɛ dati nɛ ni.

⁴² Kɔ fala kɛ osa'denɔ wa gã̀ gɔ, nɛ nde a á otenɔ ni dati wa gɔ. Na mɛ ni, nɛ ɔkɔ be sa'denɔ vɛ zi a wanɔ 'da Labanɛ, nɛ ogã wanɔ gɛ vɛ a wanɔ 'da Yakɔbɔ.

⁴³ Do wala ni, Yakɔbɔ kpa zi mɔ wena. A zi do gba gili obata, do odua, osamo do opunda. Nɛ a zi 'bɔ do owi dɛa to, owuko do owi wili.