Ndo Nyanga Dɛ Mɔ 29 - WE NU GALE 1995

Yakɔbɔ kpa ngba a do Labanɛ

¹ Yakɔbɔ kúlú ngɔ, nɛ a la dɛ ngɔ nùi 'da owinɔ si 'biti gba wese i.

² A nɛa ni gbaa, hã a nɛ ka mɔ, nɛ a zɔ mbe kɔ lì kpo dɛ li zɔ ni, nɛ a zɔ 'bɔ ngɔ gili obata talɛ wa ɔa nù dɛ kɛ zã nu lì ni, we kɛ mɛ a fala kɛ wa hã zi do lì hã wa. Wa kpe zi nu kɔ lì ni do gã ta.

³ Nɛ fala kɛ Owi fɔmɔ nadalamɛnɔ wa ngɛmɛ zi li wa vɛ, nɛ wa kimili ta nu kɔ lì, takɔ wa so ma hã onadalamɛnɔ 'da wa. Kɔ wa so do'do, nɛ wa gese ta dɛ olo nɛ.

⁴ Yakɔbɔ aka owi fɔmɔ nadalamɛnɔ na: “Aa onyae, nɛ yula i do nde?” Nɛ wa gese na: “Lɛ yula tɛ Haranɛ.”

⁵ Nɛ Yakɔbɔ aka 'bɔ wa na: “Nɛ ĩ ti Labanɛ, be 'da Nahɔrɛ nde?” Nɛ wa gese na: “Ĩi, lɛ ĩ ti a.”

⁶ Nɛ a aka na: “A vɛ a dia nde?” Nɛ wa gese na: “A vɛ a dia! Kɔ mɔ zɔ́, be zɔnga be 'da a Rasɛlɛ, a a tɛ do obatanɔ 'da a ni.”

⁷ Nɛ Yakɔbɔ tɔ̃ na: “Wese 'bana wena, hã ma wè na nɛ ngɛmɛ li onadalamɛnɔ we si do wa do ti gɔ. Nɛ hã́ lì hã wa, nɛ nɛ fo wa dɛ zã obulukunɔ, hã wa nyɔngɔ mbe mɔ sɛ.”

⁸ Nɛ wa gese na: “Lɛ wè tɛ dɛ ni gɔ, lɛ 'bɔ sɛ hã li onadalamɛnɔ we vɛ do'do, sɛ nɛ lɛ fo ta nu kɔ lì, nɛ lɛ so hã wa de.”

⁹ Yakɔbɔ 'bana fala wele we do wa, nɛ Rasɛlɛ hɔ do obatanɔ 'da baa a, we kɛ a zi a wi fɔmɔ onadalamɔ.

¹⁰ Yakɔbɔ nɛa we zɔ Rasɛlɛ do onadalamɛnɔ 'da yamba a Labanɛ, nɛ a ngbɔ tɛ̃ a dɛ nu 'de i, nɛ a kimili ta nu kɔ lì ni do'do, nɛ a so lì hã onadalamɛnɔ 'da yamba a Labanɛ.

¹¹ 'Do nɛ, nɛ a 'be Rasɛlɛ dɛ tɛ a, nɛ a ufu zala a, nɛ a te do kɔ̃a.

¹² Nɛ a tɔ̃ hã Rasɛlɛ na: “Mi a wi na tɛ baa mɔ Labanɛ. Mi a be 'da boko nya a Rebɛka.” Rasɛlɛ zila ni, nɛ a yu dɔ we tɔ̃ we nɛ hã baa a.

¹³ Kɔ Labanɛ nɛa we zele we 'da Yakɔbɔ, be 'da boko nya a ni, nɛ a gɔnɔ ti a do yu. A kpa a, nɛ a 'be a dɛ tɛ a, nɛ a ufu zala a, nɛ a si do a dɛ nu tɔa 'da a i. Nɛ Yakɔbɔ tɔa we mɛnɔ vɛ kɛ ma dɛa a ni hã Labanɛ.

¹⁴ Nɛ Labanɛ tɔ̃ na: “Gbãlã we, mɔ a kili tɛ mi ngboo.” Nɛ Yakɔbɔ ɔa dɛ 'da a ni 'do zɛkɛ kpo.

Yakɔbɔ kala owuko bɔa

¹⁵ Ngba soe kpo, nɛ Labanɛ tɔ̃ hã Yakɔbɔ na: “Gɛnɛ kɔ mɔ a kili tɛ mi, nɛ nde ma wè na mɔ dɛ to hã mi yala iko gɔ. Kɔ mɔ kɔ̃a na, mi futa mɔ olo dɛa toe 'da mɔ do ge nde?”

¹⁶ Ĩ na, Labanɛ zi do obe zɔnga benɔ 'da a bɔa. Li kuti wele kɛ a Lea, nɛ li hɔ dɛ 'do a a Rasɛlɛ.

¹⁷ Gbali Lea ma dè zi ngboo gɔ, nɛ nde Rasɛlɛ de zi zɔnga wena do kili tɛ a vɛ.

¹⁸ Nɛ Yakɔbɔ kɔ zi gɛnɛ Rasɛlɛ wena, nɛ a gese hã Labanɛ na: “Mi dɛ sɛ to hã mɔ 'do sabɛlɛ sambo, takɔ mɔ ba bɔa boko be 'da mɔ Rasɛlɛ hã mi do wuko.”

¹⁹ Nɛ Labanɛ kɔ̃a, nɛ a na: “Dia nɛ na, mi ba be 'da mi hã mɔ, olo li kɛ na mi ba sɔ a hã gele wele ni. Kɔ mɔ 'báná dɛ 'da mi gɛ.”

²⁰ Na mɛ ni, nɛ Yakɔbɔ dɛa to hã Labanɛ 'do sabɛlɛ sambo we ba Rasɛlɛ. Sabɛlɛnɔ ni, ma dùlù zi li Yakɔbɔ gɔ, we kɛ a kɔ zi gɛnɛ Rasɛlɛ wena.

²¹ Yakɔbɔ dɛa toe 'do sabɛlɛ sambo ni ia do'do, nɛ Yakɔbɔ tɔ̃ hã Labanɛ na: “Mɔ hã wuke 'da mi hã lɛ ba ngba lɛ do a, we kɛ tũi 'da mi ma la ia.”

²² Labanɛ nɛa we zele ni, nɛ a ngɛmɛ li owinɔ di ni ni vɛ, nɛ a dɛ mɔ dɔ ba ngba wi.

²³ Nɛ do tũi ni, nɛ a ba Lea, nɛ a kã a hã Yakɔbɔ, nɛ Yakɔbɔ mba ngɔ te do a.

²⁴ (Labanɛ ba zi wuko wi dɛa to, li a a Zilpa hã be 'da a Lea na, a gala a we dɛ to hã a.)

²⁵ Kɔ fala nɛa we sa nɛ, nɛ Yakɔbɔ zɔ na, wuke wa kã a hã ɛ ni, wi a Lea. Nɛ a tɔ̃ hã Labanɛ na: “Mɔ dɛa do mi ní we ge nde? Wuke kɛ mi dɛa toe hã mɔ we ba a, wi a Rasɛlɛ gɔ nde? Gulu kɛ mɔ ɔkɔlɔ mi we ge nde?”

²⁶ Nɛ Labanɛ gese hã a na: “Mɛ a mbula kɔ le 'da lɛ na, be 'do wè tɛ ba wili dati hã kpasa wi ti a gɔ.

²⁷ Kɔ mɔ 'bɔ, hã kɔ tũi sambo 'do mɔ dɔ ba ngba wi 'da mɔ do kpasa wele kɛ gɛ la do'do, sɛ nɛ mi hã sɛ Rasɛlɛ hã mɔ de. Nɛ nde ma wia na, mɔ dɛ 'bɔ mbé to hã mi 'do sabɛlɛ sambo.”

²⁸ Nɛ Yakɔbɔ kɔ, nɛ a 'bɔa gbaa, hã kɔ tũi sambo 'do mɔ dɔ ba ngba wi 'da a do Lea ma la do'do, nɛ Labanɛ hã Rasɛlɛ hã a.

²⁹ Nɛ Labanɛ hã wuko wi dɛa to, li a a Bila hã Rasɛlɛ na, a gala a we dɛ to hã a.

³⁰ Nɛ Yakɔbɔ mba ngɔ te do Rasɛlɛ, nɛ a kɔ̃a gɛnɛ a nɛa ngɔ Lea. Nɛ a ma ngɔ dɛ toe hã Labanɛ 'bɔ mbé nɛ we sabɛlɛ sambo ni.

Obenɔ 'da Yakɔbɔ

³¹ 'Da fala kɛ NWA zɔa na Yakɔbɔ kɔ̃a gɛnɛ Rasɛlɛ nɛa ngɔ Lea ni, nɛ a 'dafa fala kula 'da Lea, nɛ a dɛ Rasɛlɛ do ndɔlɔ.

³² Lea ba zã, nɛ a ko bulu be, nɛ a tɔ̃ na: “Gale zɔa sape 'da mi, kɔ ngangga ni, wili mi a kɔ sɛ gɛnɛ mi.” Nɛ a e li be ni na Rubɛnɛ.

³³ Nɛ 'do ki ni, nɛ a ba mbé zã, nɛ a ko bɔa bulu be. Nɛ a tɔ̃ na: “Gale ĩ na, wili mi kɔ zi gɛnɛ mi gɔ, ma kɛ a hã 'bɔ mbé bulu be hã mi ni.” Nɛ a e li a na Simeoni.

³⁴ 'Do ki ni, nɛ a ba 'bɔ mbé zã, nɛ a ko talɛ bulu be. Nɛ a tɔ̃ na: “Di dɔ ni, wili mi a kɔ̃ sɛ gɛnɛ mi, nɛ a kala li a dɛ tɛ mi, we kɛ mi kua obulu be hã a talɛ.” Nɛ Yakɔbɔ e li be ni na Levi.

³⁵ Nɛ a ba 'bɔ mbé zã, nɛ a ko nalɛ bulu be, nɛ a tɔ̃ na: “Mi dɔnggɔ sɛ NWA we kula gɛ.” Nɛ a e li be ni na Yuda. Nɛ 'do ki ni, nɛ kula 'da a yolo nù.