Ndo Nyanga Dɛ Mɔ 28 - WE NU GALE 1995

¹ Izaka sa mɔ hã Yakɔbɔ, nɛ a wele nu a tɛ a, nɛ a tɔ̃ hã a na: “Mi kɔ na, mɔ ba wuko ngɔ nù Kanana gɔ.

² Mɔ kúlú ngɔ, hã mɔ la dɛ 'da yaa mɔ Bɛtuɛlɛ, baa naa mɔ tɛ Mezopotami i. Nɛ mɔ sáká wuko sanga obe zɔnga benɔ 'da yamba mɔ Labanɛ, nɛ mɔ ba a do wuke 'da mɔ.

³ E kɔ Gale kɛ a do nganda vɛ, a wele nu a tɛ mɔ, nɛ a hã gba gili obe hã mɔ, takɔ mɔ hɔ yaa gili nu kɔnggɔ Owele.

⁴ E kɔ Gale wele nu a tɛ mɔ, do obe zã mɔ, ɔ nɛ kɛ a wila zi do nu a tɛ Abrahama ni. E kɔ Gale hã nùi kɛ mɔ dungu ngɔ nɛ gɛ hã mɔ do mɔ mɔ. Mɛ a nùi kɛ a hã zi ma hã yaa mɔ Abrahama.”

⁵ Na mɛ ni, nɛ Izaka tumba Yakɔbɔ tɛ Mezopotami 'da Labanɛ, kɛ a be 'da Bɛtuɛlɛ, wi Aramɛ ni. Labanɛ zi a bulu nya Rebɛka, naa Yakɔbɔ do Ezau.

⁶ Ezau zila na, Izaka wila nu ɛ tɛ Yakɔbɔ, hã a tumba a tɛ Mezopotami, takɔ a ba wuko i mɔ. Nɛ a zele 'bɔ na, 'da fala kɛ Izaka wila do nu ɛ tɛ Yakɔbɔ ni, nɛ a bɛ̃a na, Yakɔbɔ tɛ bà boko Kanana gɔ.

⁷ Nɛ Ezau zɔa na, Yakɔbɔ zila we nu baa a do naa a, nɛ a la dɛ Mezopotami i.

⁸ Na mɛ ni, nɛ Ezau ĩ wá na, baa ɛ Izaka kɔ̃̀ gɛnɛ obe zɔnganɔ tɛ ngɔ nù Kanana ni gɔ.

⁹ Nɛ a la dɛ 'da Ismaɛlɛ, be 'da Abrahama, nɛ a ba be zɔnga be 'da a kɛ li a a Mahalata ni do wuko. Mahalata zi a boko nya Nɛbayɔtɛ.

Yakɔbɔ yala zu a

¹⁰ Yakɔbɔ kulu ngɔ tɛ Bɛrseba, nɛ a la dɛ Haranɛ.

¹¹ A nɛa gbaa, nɛ wese gɛ a li wala, nɛ a ɔ dɛ fala ni. A nɛa we ɔ nù, nɛ a ba mbe kili ta kpo, nɛ a e zu a ngɔ nɛ.

¹² Nɛ do tũi ni, nɛ a yala zu a, nɛ nde wa ia ngalangala nù nga, nɛ ma nɛa gbaa nɛ ma to li nza. Nɛ oanzɛnɔ 'da Gale wa zĩlĩ, nɛ wa kũ do nɛ.

¹³ Nɛ a zɔ NWA dɛ dati a ni, nɛ NWA tɔ̃ hã a na: “Mi a NWA Gale 'da yaa mɔ Abrahama, do baa mɔ Izaka. Mi hã sɛ nùi kɛ mɔ ɔa ngɔ nɛ gɛ hã mɔ do obe zã mɔ.

¹⁴ Obe zã mɔ wa dɛlɛ sɛ ɔ nɛ gbãlã kɛnzɛ ngɔ nùi gɛ. Nɛ nùi 'da wa ma gã sɛ dɛ 'do si ba gɔtɔ, si 'biti gba wese, si gbãlã ngɔ, do si 'biti gɛ̃a wese. Mi wele sɛ nu mi tɛ nu kɔnggɔ owinɔ ngɔ nù gɛ vɛ do wala 'da mɔ, do obe zã mɔ.

¹⁵ Mi sɛ fala nɛ kpo do mɔ, nɛ mi zɔ sɛ mɔ tɛ mɔ falanɔ vɛ kɛ mɔ nɛ sɛ nɛ ni, nɛ mi gese sɛ mɔ dɛ ngɔ nùi gɛ. Mi lá sɛ mɔ gɔ, nɛ mi dɛ sɛ mɛ kɛ mi kpua mbulu nɛ hã mɔ ni.”

¹⁶ Yakɔbɔ tunu li yala, nɛ a tɔ̃ na: “Gbãlã we, NWA tɛ fala gɛ boe, nɛ nde mi ĩ̀ sɔ we nɛ gɔ.”

¹⁷ Nɛ kili ba a, nɛ a he mɔ na: “Fala gɛ a fala hã kili hã Owele. Mɛ a tɔa 'da Gale, nɛ mɛ 'bɔ a nu wala li nza do gbãlã we!”

¹⁸ Yakɔbɔ kulu ngɔ do sanga titole, nɛ a ba ta kɛ a ia zu a ngɔ nɛ ni, nɛ a zĩ ma dɛ ngɔ. Nɛ a tɛnɛ nɔ dɛ zu nɛ na, ma hɔ ta kɛ ma santo, takɔ ma gba ta zu a we lengge do Gale.

¹⁹ A ia li fala ni na Betɛlɛ, gulu nɛ na: “Tɔa 'da Gale.” Nɛ nde wa sa zi li fala ni dati na Luzɛ.

²⁰ Nɛ Yakɔbɔ kpua mbulu hã NWA na: “Aa Gale, fala kɛ mɔ 'bana do mi, hã mɔ zɔ mɔ tɛ mi li wala mi nɛ nɛ gɛ, kɔ mɔ hã nyɔngɔmɔ na mi nyɔngɔ, do tulu na mi he'de,

²¹ kɔ fala kɛ mi nɛ, hã mi si do ba tɛ mi dɛ 'da baa mi nde, nɛ mɔ sɛ a Gale 'da mi.

²² Nɛ ta kɛ mi zĩ, nɛ ma samo ni, ma gba sɛ ta zu mi ngɔ mɔ Gale. Nɛ mi kala sɛ kpo mbee 'bu kɔ mɛnɔ mɔ hã ma hã mi ni, nɛ mi dɔnggɔ do mɔ dɛ fala gɛ.”